Policia Kombëtare spanjolle e ka arrestuar një tifoz të Real Oviedos për shkak të thirrjeve raciste në hapësirën e tifozëve vendës në stadiumin “Carlos Tartiere” gjatë ndeshjes me Real Madridin, e zhvilluar më 24 gusht.

Këtë e bën të ditur Policia e Asturie ku tifozi u ndalua për një krim kundër integritetit moral dhe një krim të urrejtjes pasi u identifikua falë analizës së fotove dhe të videove.

Ai bëri gjeste dhe tinguj majmuni në minutën e 37-të, që përkoi me festimin e golit të parë të skuadrës mysafire, të shënuar nga Kylian Mbappe.

Ky incident i panevojshëm u raportua pas ndeshjes së organizuar nga LFP (Liga de Fútbol Profesional).

Burri, i identifikuar, e dha një deklaratë në selinë e policisë dhe iu dorëzua gjyqtarit të parë hetues në Oviedo.

“Më shumë sesa thjesht një arrestim. Është propozuar gjithashtu një shkelje kundër Ligës kundër Dhunës, Racizmit, Ksenofobisë dhe Intolerancës në sport, e cila e parasheh një gjobë prej 60 mijë deri në 650 mijë euro për vepra shumë të rënda penale, si dhe një ndalim në impiantet sportive”.

Sipas asaj që e parasheh Kodi Penal dhe Selia e Lartë e Policisë së Asturie, krimet si ai i urrejtjes mund ta mbartin një dënim maksimal prej tre vjetësh burgim./S.K/EO/

Legjenda e boksit, Mike Tyson, ka bërë së fundmi një pranim të habitshëm duke zbuluar se përdorte fentanyl (substancë narkotike), për të përballuar dhimbjet gjatë karrierës së tij ikonike.

“Ishte një analgjezik, dhe e përdorja për të trajtuar gishtin e këmbës. Ishte si heroinë sapo të kalonte efekti dhe hiqeje Band-Aid-in, fillon të kesh simptoma të tërheqjes, të vjella, ashtu si në heroinë”, rrëfeu Tyson në episodin e fundit të “Katie Miller Podcast”.

Fentanyl është një opioid sintetik shumë i fuqishëm, i aprovuar nga Administrata për Ushqimin dhe Barnat në SHBA për përdorim si qetësues dhimbjesh, por mund të jetë fatal edhe në doza të vogla nëse përdoret pa recetë.

Miku i ngushtë i Tyson, Arturo Gatti, i cili ndërroi jetë në 2009, kishte një betejë të gjatë me opioidet, siç kishte rrëfyer më parë në intervista.

Sipas Qendrës për Kontrollin dhe Parandalimin e Sëmundjeve (CDC), vitin e kaluar 48,422 persona humbën jetën për shkak të përdorimit të paligjshëm të fentanylit.

Ky opioid është 100 herë më i fuqishëm se morfina dhe 50 herë më i fuqishëm se heroinë.

Varësia nga drogët është një sfidë me të cilën Tyson ka përballuar për një kohë të gjatë, dhe kjo nuk është hera e parë që publikohet dhimbja ekstreme në këmbët e tij.

Ai madje kishte goditur me shuplakë Jake Paul gjatë përgatitjeve për ndeshjen e tyre në nëntor 2024, pasi Paul i kishte shkelur gishtin gjatë peshimit. Tani në të 50-tat, Tyson është angazhuar fuqishëm në biznesin e tij të kanabisit, duke e përdorur si alternativë ndaj ilaçeve tradicionale për dhimbje./S.K/EO/

Federata e Futbollit të Serbisë dhe kombëtarja po presin një dënim të ashpër nga FIFA, për shkak të ngjarjeve në ndeshjen mes serbëve dhe kombëtares së Anglisë, në kuadër të kualifikimeve për Kupën e Botës 2026.

Serbia u mund në shtëpi nga Anglia me rezultatin 0:5, dhe golashënues ishin Harry Kane, Noni Madueke, Ezri Konsa, Marc Guehi dhe Marcus Rashford nga pika e penalltisë.

Përveç disfatës në rezultat, kombëtarja serbe dhe Federata Serbe mund të përballen me një problem edhe më të madh, shkruan portali anglez “Sportbybl”.

Arsyeja, sipas mediave britanike, është sjellja e tifozëve, veçanërisht duke qenë se FSS ishte nën një dënim me kusht nga FIFA dhe një pjesë e stadiumit, tribuna jugore, ishte bosh për këtë arsye.

Ndeshja u luajt në një stadium pjesërisht të mbyllur si ndëshkim për thirrjet raciste në ndeshjen e mëparshme kundër Andorrës, ku 15% e kapacitetit ishte bosh.

Federata e Futbollit të Serbisë publikoi një deklaratë para ndeshjes, duke i bërë thirrje tifozëve të silleshin me qytetari, duke shtuar se gjatë pesë viteve të fundit janë gjobitur me mbi 700,000 euro nga FIFA dhe UEFA për shkelje të përsëritura.

Sipas portalit “Sportbybl”, problemi më i madh për FSS do të jenë thirrjet e tifozëve për Kosovën dhe Metohinë. Britanikët shkruajnë:

“Kosova shpalli në mënyrë të njëanshme pavarësinë nga Serbia në vitin 2008 dhe tani është një shtet i pavarur pjesërisht i njohur. Megjithatë, Serbia nuk e njeh Kosovën si të pavarur dhe të dyja kombëtaret nuk lejohen të përballen në garat ndërkombëtare”.

Tifozët serbë kritikohen jo vetëm për thirrjet për Kosovën dhe Metohinë, por sipas mediave angleze edhe për “një banderolë provokuese me një hartë të Kosovës të mbuluar me ngjyrat e flamurit serb”.

Për këtë arsye kanë reaguar përfaqësues të SHBA-së, të cilët kanë kërkuar nga FIFA dhe UEFA të marrin masa.

Një tifoz i Kosovës i shkroi llogarisë zyrtare të UEFA-s në rrjetin X, duke shtuar se banderola ishte një akt i papranueshëm që shkel çdo standard sportiv./S.K/EO/Sportbybl/

Shqipëria ka arritur një fitore tepër të rëndësishme në Kualifikueset e Botërorit 2026, duke mundur 1-0 Letoninë, në një finale për kuqezinjtë.

Sfida u dominua nga Kombëtarja jonë, me golin që erdhi vetëm në minutën e 25’, pas një realizimi perfekt të Asllanit nga pika e bardhë e penalltisë.

Kuqezinjtë iu afruan disa herë golit të dytë me Bajramin, Manajn e Gjimshitin, por pa gjetur siç duhet kuadratin.

Në minutat e fundit u pa një përgjumje nga ana e kuqezinjve, me letonezët që iu afruan disa herë barazimit, por falë ndërhyrjeve të sakta të Strakoshës dhe Manajt, porta jonë ngeli e paprekur.

Kështu Shqipëria ngjitet në vendin e dytë të Grupit K, kjo edhe falë fitores 0-5 të Anglisë ndaj Servbisë, me kuqezinjtë që i mbyllin ndeshjet e shtatorit në zonën “Play Off”./S.K/EO/