Banka Qendrore e Kosovës (BQK) njofton se shërbimi i njohur ndërkombëtar i pagesave Apple Pay është bërë zyrtarisht i disponueshëm edhe në Kosovë. Ata njoftuan se falë kësaj risie, bankat dhe institucionet financiare në vend mund të lidhin kartelat e tyre me platformën Apple Pay, duke ju mundësuar qytetarëve dhe bizneseve në Kosovë që të kryejnë pagesa të shpejta, të sigurta dhe pa kontakt, përmes pajisjeve të tyre Apple (iPhone, Apple Watch, ose tjetër).

“Funksionalizimi i plotë i këtij shërbimi për të gjitha bankat dhe institucionet financiare merr kohën e nevojshme mbi bazën e marrëveshjeve të tyre individuale dhe integrimet e nevojshme teknike”, thuhet në komunikatë.

Sipas BQK-së, ky është një tjetër hap i rëndësishëm drejt modernizimit të sistemit të pagesave, rritjes së përfshirjes financiare dhe përshpejtimit të digjitalizimit në Kosovë. Pas integrimit të Google Pay, Apple Pay përfaqëson një plotësim të domosdoshëm të qasjes sonë drejt ndërkombëtarizimit të shërbimeve financiare dhe përmbushjes së standardeve evropiane për pagesa digjitale.

“Në vazhdën e angazhimeve, si dhe takimit të fundit të mbajtur në muajin Maj 2025 me përfaqësues të lartë të kompanisë Apple, BQK theksoi përkushtimin e saj për të siguruar kushte të favorshme për adoptimin e shërbimeve më moderne financiare në Kosovë, në kuadër të aktiviteteve të Planit Strategjik të BQK-së 2024–2028”, thuhet në njoftimin e BQK-së.

Sipas këtij njoftimit, ky sukses është rezultat i një bashkëpunimi të ngushtë mes BQK-së, sektorit bankar dhe partnerëve ndërkombëtarë, me theks Ambasadën e Shteteve të Bashkuara të Amerikës.

“BQK falënderon të gjitha palët e përfshira për kontributin e tyre në këtë proces, dhe mbetet e përkushtuar për të avancuar më tej infrastrukturën digjitale financiare të vendit, në përputhje me praktikat më të mira ndërkombëtare dhe aspiratat tona për ndërkombëtarizim dhe integrim evropian”, thuhet në njoftim.

Fondi Monetar Ndërkombëtar (FMN) ka parashikuar një rritje më të fortë ekonomike globale krahasuar me muajin prill, pjesërisht për shkak të zbutjes së disa tarifave amerikane mbi mallrat. Një rritje e importeve amerikane, përderisa firmat u përpoqën të shmangnin taksat më të larta të importit dhe veprimet e disa qeverive për të nxitur rritjen, e rriti parashikimin e saj të fundit.

Megjithatë, tarifat më të larta dhe më shumë pasiguri mund të çojnë në një rritje më të dobët dhe një aktivitet më të ngadaltë ekonomik, paralajmëroi FMN, transmeton BBC.

Ndërkohë, rritja e Mbretërisë së Bashkuar parashikohet të jetë 1.2% këtë vit dhe 1.4% në vitin 2026, e pandryshuar nga parashikimet e rishikuara të përcaktuara në maj.

Mbretëria e Bashkuar pritet të jetë ekonomia e tretë me rritjen më të shpejtë nga të ashtuquajturat ekonomi më të përparuara në botë këtë vit dhe vitin tjetër, pas SHBA-së dhe Kanadasë.

FMN-ja, e cila është një grup prej 190 vendesh që punojnë së bashku për të provuar të stabilizojnë ekonominë globale, tha se përmirësimi i parashikimeve të saj globale përfshinte “ngarkesën paraprake” të tregtisë në muajt e fundit -duke iu referuar vrullit të importeve në SHBA.

Ajo parashikoi rritje globale prej 3% në vitin 2025 dhe 3.1% në vitin 2026, nga 2.8% dhe 3% në raportin e saj të prillit.

Megjithatë, kjo është ende nën normën prej 3.3% që kishte parashikuar për të dy vitet në janar, përpara se Presidenti i SHBA-së Donald Trump të merrte detyrën, dhe mesataren historike para pandemisë prej 3.7%.

Firmat amerikane nxituan produkte në vend në fillim të këtij viti për të provuar të ikin nga taksat e reja mbi importet e premtuara nga Trump.

FMN-ja tha se kjo krijoi rreziqe që mund të shtonin çdo tronditje ekonomike në të ardhmen, duke përfshirë kompanitë, që kanë shumë stok, duke i bërë importet e ardhshme më pak të nevojshme.

Gjithashtu, firmat mund të duhet të paguajnë më shumë për të ruajtur mallrat, dhe ekzistonte gjithashtu një rrezik që artikujt të bëheshin të vjetëruar, tha ajo.

Pas gjetjes së trupit të pajetë të 33-vjeçarit që të dielën u zhduk në ujërat e Liqenit të Ujmanit, ka reaguar kryeministri në detyrë Albin Kurti, duke u shprehur ngushëllime familjarëve, njëkohësisht duke falënderuar të gjithë që u angazhuan në aksionin e kërkim shpëtimit.

“Falënderoj Agjencinë e Menaxhimit të Emergjencave, Forcën e Sigurisë së Kosovës, Policinë e Kosovës, Shoqatën e Kosovës për Kërkim dhe Shpëtim, Klubin e Zhytjes “Trepça” dhe KFOR-in për punën profesionale, përkushtimin e jashtëzakonshëm dhe angazhimin e pareshtur deri në gjetjen e trupit të pajetë të Rrahim Latifit në liqenin e Ujmanit”, shkruan Kurti në Facebook.

Kurti më tej ka shkuruar se “Familjes Latifi i shprehim ngushëllimet më të përzemërta dhe ju qëndrojmë pranë në këto momente të vështira për të ofruar gjithë mbështetjen tonë e për të ndarë me ta dhimbjen e madhe”, shkruan Kurti.

Mërgimtari 33-vjeç, të dielën kishte kërcyer nga ura në Liqenin e Ujmanit, por që nuk arriti dalë nga uji. Gjatë trui ditëve të kërkimeve intensive nga Policia e Kosovës dhe Shoqata e Kërkim-Shpëtimit, nuk pati rezultat, derisa sot në mëngjes në këtë operacion zbarkoi Forca e Sigurisë së Kosovës (FSK).

Prokuroria e Posaçme Kundër Korrupsionit dhe Krimit të Organizuar (SPAK) në Shqipëri ka sekuestruar të martën 21 pasuri të luajtshme dhe të paluajtshme me një vlerë totale prej mbi 9.3 milionë eurosh. Këto pasuri dyshohet se janë përfituar nga aktiviteti i kontrabandës masive të cigareve, në kuadër të një grupi të strukturuar kriminal. 

Në qendër të këtij operacioni është kompania “Albania Tabak Fabrika e Re e Cigareve” sh.p.k., e kontrolluar nga kompania mëmë “EA TOBACCO”, në pronësi të biznesmenit Ergys Agasi. Kjo fabrikë, e cila prodhonte cigare të markës egjiptiane “Kleopatra”, është sekuestruar me vendim të Gjykatës së Posaçme, një javë pas paraqitjes së vetë Agasit në SPAK, transmeton RTSh.

Hetimet e SPAK-ut kanë zbuluar se në fabrikën “Albania Tabak” në Librazhd, prodhoheshin miliona paketa cigare “Kleopatra”. Ndërsa fabrika kishte marrë licencën nga një kompani ndërkombëtare për të prodhuar dhe shpërndarë këto cigare në Evropë, një pjesë e konsiderueshme e tyre dyshohet se kontrabandohej ilegalisht drejt Egjiptit, duke shkaktuar humbje të mëdha për kompaninë origjinale egjiptiane “Eastern Company”, pronare e markës.

Sinjalizimet për këtë aktivitet të paligjshëm fillimisht erdhën nga Doganat e Mbretërisë së Bashkuar në vitin 2015, duke nxitur nisjen e hetimeve edhe në Shqipëri. Si pasojë, në fund të vitit 2015, prodhimi në fabrikën “Albania Tabak” u pezullua përkohësisht. Çështja u rihap në vitin 2017, kur u zbuluan lidhje me kompani me bazë në Ishujt Virgjin Britanik dhe Qipro, të cilat dyshohet se menaxhonin trafikun ndërkombëtar të cigareve.

Sipas raportimeve, “Albania Tabak” prodhonte cigaret për kompaninë “Eques Holding Group”, e cila kishte licencën për përdorimin e markës “Kleopatra” për tregjet evropiane dhe ndërkombëtare. Dokumente gjyqësore, raporte të doganave britanike, kontrata dhe intervista me drejtues të fabrikës, kanë zbuluar se rreth 22 milionë paketa cigare prodhoheshin çdo vit nga fabrika në Librazhd, përpara se të dërgoheshin për eksport kryesisht drejt Libisë.

Pasuritë e sekuestruara, nga apartamentet luksoze dhe vila

Lista e pasurive të sekuestruara është e gjerë dhe përfshin prona të ndryshme, kryesisht të paluajtshme:

9 pasuri të patundshme në emër të “Albania Tabak Fabrika e Re e Cigareve” sh.p.k.

7 apartamente banimi të ndodhura në katin e 32-të të një ndërtese, me sipërfaqe të konsiderueshme.

3 ambiente parkimi, përfshirë depo.

2 vila luksoze dhe truall në zonën e Mulletit, përfshirë një vilë në kompleksin rezidencial “Rolling Hills”, me sipërfaqe ndërtimi 386 m2 dhe parcelë 818 m2.

Këto pasuri janë sekuestruar me dyshimin se janë përfitime nga veprat penale të “Kontrabandës me mallra për të cilat paguhet akcizë”, kryer në formën e grupit të strukturuar kriminal, si dhe “Shpërdorimi i detyrës” nga punonjës të lidhur me veprimtarinë doganore.