Rektori i UBT-së, Prof. Dr. Edmond Hajrizi, mori pjesë në EU Winter School, program ky i organizuar nga EYCA Kosova, që ka si qëllim bashkimin e ekspertëve dhe profesionistëve të rinj për të diskutuar mbi çështje kyçe si inovacioni, tërheqja e investimeve dhe rritja ekonomike.

Programi synon të krijojë mundësi për shkëmbimin e përvojave dhe ideve, duke u përqendruar në sfidat dhe mundësitë që ofron zhvillimi i qëndrueshëm dhe teknologjik i shoqërive moderne.

Në ditën e parë të ngjarjes, e cila u dedikua thellimit të njohurive mbi bazat teorike të tërheqjes së investimeve, Rektori Hajrizi mbajti një prezantim të veçantë mbi temën: “UBT Smart City – a Place based Small-scale Smart Sustain Entrepreneurial Innovation Ecosystem”.

Gjatë këtij prezantimi, Prof. Dr. Hajrizi ndau me audiencën përvojën e pasur të UBT-së në krijimin e një ekosistemi inovativ që nxit zhvillimin e sipërmarrjes së qëndrueshme dhe integrimin e teknologjisë në jetën urbane. Ai theksoi rëndësinë e krijimit të një mjedisi ku studentët dhe profesionistët mund të eksperimentojnë dhe zhvillojnë zgjidhje për qytetet e së ardhmes, duke përdorur teknologji të avancuara që përmirësojnë cilësinë e jetës urbane.

Një element kyç i këtij ekosistemi është krijimi i një mjedisi interaktiv dhe dinamik, ku individë të ndryshëm, nga studentë deri tek sipërmarrës dhe profesionistë, mund të bashkëpunojnë, të zhvillojnë dhe të testojnë inovacione teknologjike në kushte reale. Kjo mundësi u ofron atyre mjetet dhe hapësirën për të realizuar projekte që kanë potencialin të kontribuojnë në përmirësimin e jetës në qytetet moderne dhe të avancuara, duke u bërë një burim i vërtetë frymëzimi dhe veprimi për një të ardhme më të qëndrueshme dhe më të mençur.

Prezantimi i Rektorit Hajrizi u bë një shembull konkret i angazhimit të UBT-së për të promovuar dhe ndihmuar zhvillimin e një smart city të qëndrueshëm, duke theksuar rolin e arsimit dhe teknologjisë në përgatitjen e brezave të ardhshëm për sfidat dhe mundësitë që do të sjellë e ardhmja./UBTNews/

Një studim i detajuar mbi inspektimin, vlerësimin dhe strategjitë për përforcimin e Urës 94R, që ndodhet në aksin rrugor Prishtinë – Bllacë, në rrugën nacionale N2, është publikuar në SSRG International Journal of Civil Engineering (IJCE), një revistë prestigjioze e indeksuar në SCOPUS.

Autori i punimit, profesori Naser Morina nga Fakulteti i Inxhinierisë së Ndërtimit dhe Infrastrukturës në UBT, ka kryer një analizë të detajuar mbi gjendjen aktuale të urës, performancën e materialeve të përdorura dhe nevojat për ndërhyrje rehabilituese.

Studimi është një përpjekje ndërdisiplinore që kombinon analiza historike të dokumentacionit të projektimit dhe ndërtimit, inspektimet në terren me metoda jo-destruktive, dhe simulimet strukturore me modelim numerik për të vlerësuar shpërndarjen e sforcimeve dhe zonat e mundshme të degradimit.

Rezultatet kryesore të studimit përfshijnë, “gjendjen e materialeve”,  ku mostrat e analizuara tregojnë një rezistencë të lartë ndaj shtypjes, por gjithashtu janë vërejtur prani të karbonizimit dhe depërtimi i klorideve, që mund të ndikojnë në jetën e strukturës.

Pastaj “integriteti strukturor”, simulimet me metodën FEM (Metoda e Elementeve Fundorë) tregojnë se ura ka kapacitet të mjaftueshëm për të përballuar ngarkesat aktuale. Megjithatë, analizat e lodhjes sugjerojnë prani të çarjeve të vogla për shkak të stresit të përsëritur nga trafiku. Dhe “nevojat për mirëmbajtje”, ku për të siguruar jetëgjatësi dhe siguri të lartë, rekomandohet injektimi i çarjeve dhe riveshja e platformës.

Ura 94R mbetet e qëndrueshme nga pikëpamja strukturore, por kërkon ndërhyrje të synuara për mirëmbajtje dhe rehabilitim. Profesori Morina rekomandon që për të garantuar sigurinë dhe funksionalitetin e saj afatgjatë, të bëhet një monitorim i rregullt dhe një plan proaktiv i ndërhyrjeve teknike për të parandaluar dëmtimet më të mëdha dhe për të siguruar vazhdimësinë e funksionimit të urës./UBTNews/

UBT ndërlidh bashkëpunimin me Unionin e Bizneseve Shqiptaro-Gjermane, duke forcuar lidhjen mes arsimit dhe sektorit të biznesit, si dhe duke krijuar mundësi të reja për zhvillim profesional, akademik dhe ekonomik.

Marrëveshja u nënshkrua nga Rektori i UBT-së, Prof. Dr. Edmond Hajrizi dhe Kryetari i Degës së Unionit në Kosovë, Shkelzen Jusaj.

Rektori Hajrizi theksoi rëndësinë e bashkëpunimit mes arsimit dhe sektorit të biznesit, duke nënvizuar se UBT vazhdon të jetë një mbështetës i fuqishëm i bizneseve, ndërmarrësve dhe iniciativave të diasporës.

“UBT ka qenë dhe mbetet një nga mbështetësit kryesorë të bizneseve, ndërmarrësve dhe iniciativave të diasporës, duke u angazhuar vazhdimisht në fuqizimin e ekosistemit të inovacionit dhe zhvillimit ekonomik”, u shpreh Rektori Hajrizi

Palët angazhohen për mbështetje të ndërsjellë në promovimin e biznesit dhe arsimit, organizimin e trajnimeve dhe aktiviteteve profesionale, përkrahjen e inovacionit dhe sipërmarrjes, si dhe forcimin e lidhjeve mes studentëve dhe komunitetit të biznesit.