Në kuadër të përgatitjeve për Kampionatin Evropian U21 që do të mbahet në Shqipëri dhe Serbi, një grup pune i UEFA-s ka zhvilluar një vizitë inspektuese nga 8 deri më 12 shtator.

Zyrtarët e UEFA-s, të shoqëruar nga përfaqësues të FSHF-së, inspektuan stadiumet ku do të zhvillohen ndeshjet, si dhe terrenet stërvitore, hotelet që do të presin ekipet pjesëmarrëse.

Në total, u vizituan 28 hotele dhe 21 qendra stërvitore, të cilat do të përzgjidhen për t’u përfshirë në katalogun e “Team Base Camp” që do t’u ofrohet skuadrave finaliste.

Përshtypja e përgjithshme e inspektorëve ishte pozitive, ndërsa vizita e radhës e UEFA-s është planifikuar për marsin e vitit 2026, me qëllim monitorimin e mëtejshëm të punimeve dhe përgatitjeve.

Kujtojmë se në shkurt të këtij viti, Komiteti Ekzekutiv i UEFA-s vendosi që Shqipëria të jetë një nga vendet organizatore të Euro U21 2027.

Turneu do të zhvillohet në qershor dhe do të mbledhë 16 kombëtare të moshës deri në 21 vjeç, me futbollistë të cilët tashmë spikasin edhe në ligat elitare të Europës./S.K/KP/

Në Dhomat e Specializuara në Hagë ka nisur dëshmia e Paul Williams, i cili ka qenë këshilltar i delegacionit të Kosovës në Rambuje. Ky është dëshmitari i dytë i mbrojtjes në rastin e ish-krerëve të UÇK-së, të cilët akuzohen për krime të pretenduara të luftës. Mbrojtja e Thaçit tha se dëshmia e Williams do të tregojë që “Thaçi nuk e kishte autoritetin për të nënshkruar marrëveshjen e Rambujesë”.

Dëshmia e tij pritet të zgjas një ditë e gjysmë, mbrojtja e Thaçit ka parashikuar dy orë, ekipet tjera të mbrojtjes së bashku kanë kërkuar dy orë e gjysmë dhe ZPS dy orë e gjysmë.

Avokati i Thaçit, Luka Misetiç tha se dëshmitari Paul Williams ka qenë këshilltar falas për delegacionin kosovar në Rambuje

“Amerikani Paul Williams ka qenë këshilltar falas për delegacionin kosovar në Rambuje në shkurt dhe mars të 1999, ai ka ndihmuar delegacionin për hartimin e propozimit të tyre dhe negociatat në marrëveshjen e Rambujesë. Ai po ashtu ka marrë pjesë në takime me delegacionin kosovar dhe me figura ndërkombëtare dhe diasporën e Kosovës. Williams do të jap dëshmi për procesin e vendimmarrjes të delegacionit si dhe diskutimet që janë bërë për nevojën për demilitarizim dhe transformim të UÇK-së. Doktor Williams po ashtu do të jap dëshmi për komunikimet që ka pasur me të gjithë anëtarët e delegacionit kosovar, mes të cilëve edhe Hashim Thaçi. Konstatimet dhe përshtypjet që ka formuar ky nga këto komunikime, të cilat e ndihmuan për të dalë në përfundimin që Thaçi nuk kishte autoritetin për të nënshkruar marrëveshjen e Rambujesë dhe se i duhej miratimi i komandantëve të zonave për ta bërë këtë”, deklaroi ai.

Gjatë marrjes në pyetje nga avokati i Thaçit, Luka Misetiç tha se ka qenë këshilltar juridik falas për delegacionin e Kosovës në Rambuje dhe se ishte përzgjedhur si këshilltar me propozimin e kryeministrit Bujar Bukoshi.

“Zyrtarisht jam zgjedhur rreth 10 ditë përpara se organizoheshin negociatat e Rambujesë, më ishte thënë më herët nga Bukoshi dhe më kishte thënë nëse do të ketë bisedime për paqe në Rambuje, atëherë do të kërkonte praninë time. Dhe kjo për shkak të punës që kisha bërë për negociatat e verës, të ashtuquajturat Hill edhe të Holbrooke në tetor.

Misetiç: Kur jeni përfshirë për herë të parë në Kosovë, ju thatë në verë, tetor, negociatat e verës, dhe të tetorit por konkretisht kur?

Williams: Që ta sqarojmë, gjatë verës dhe të vjeshtës të vitit 1998, po punoja me Bujar Bukoshin dhe përmes tij me Rugovën. Dhe deri diku me Veton Surroin duke koordinuar ngushtë me diasporën shqiptare në Amerikë që kishin marrëdhënie me këtë persona. Dhe ata kërkuan ndihmën time pro-bono, udhëzime pro-bono lidhur me aspektet që do të negocioheshin. Fizikisht nuk kam shkuar në asnjë vend, kam qenë në Uashington dhe Nju Jork vetëm, për të marrë pjesë në negociata, ndryshe nga Rambujeja kur shkova fizikisht.

Misetiç: Kush ju zgjodhi si këshilltar të delegacionit?

Williams: Më ftoi Bujar Bukoshi, në emër të presidentit Rugova të shkoja në Rambuje, të udhëtoja drejt Rambujesë dhe të merrja pjesë në bisedimet më 7 shkurt është marrë një vendim me konsensus nga delegacioni kosovar në Rambuje përmes të cilit më ftuan që të shkoja tek kështjella ku mbaheshin bisedimet dhe të isha këshilltari i tyre juridik dhe Edita Tahiri e ka nënshkruar këtë dhe Bajram Kosumi këtë deklaratë zyrtare”, deklaroi ai.

Nga mbrojtja e Thaçit, dëshmitari i mbrojtjes është pyetur se kush ka qenë Edita Tahiri, për të cilën tha se ka qenë ministre e Jashtme e qeverisë së Bujar Bukoshit.

Ai tha se ka pasur marrëdhënie të ngushtë me Bujar Bukoshin, kryeministër i qeverisë në ekzil, teksa shtoi se ai shpesh shkonte në Shtetet e Bashkuara të Amerikës dhe se “Kur ishte në Uashington ai u takua edhe me mua dhe rrija gjatë gjithë kohës me të si avokati i tij”.

Ai tha se ka punuar intensivisht me anëtarët e delegacionit gjatë bisedimeve në Rambuje dhe se i ishte kërkuar që të përgatis gjuhë gjithëpërfshirëse “për të siguruar që TPJN të ishte në gjendje të kishte përgjegjësitë e veta për të zbatuar mandatin e saj”.

“Sa i takon Rambujesë, mua më është kërkuar që të përpiloj, që të përgatis gjuhën e cila ishte sa më gjithëpërfshirëse që të ishte e mundur për të siguruar që Tribunali Penal Ndërkombëtar për Ish-Jugosllavinë të ishte në gjendje të kishte përgjegjësitë e veta dhe kompetencat për të zbatuar mandatin e tij… Gjatë ditës së parë apo ditës së parë kur isha në kështjellën aty, më ftuan që të jepja një prezantim delegacionit të Kosovës për katër pika, tema e katërt ishte juridiksioni dhe aktivitetet, hetimet, aktakuzat e Tribunalit për Ish-Jugosllavi, të gjithë anëtarët e delegacionit ishin të pranishëm aty, kjo përfshinte edhe mësimet që kishim nxjerrë nga koha kur unë punoja si këshilltar ligjor për boshnjaket nga negociatat me Dejton”, u përgjigj ai.

Gjatë pyetjeve të mbrojtjes së Thaçit, Williams tha se ai bashkë me Mark Weller, i cili ka qenë këshilltar ligjor ndërkombëtar, e kanë përpiluar propozimin e delegacionit të Kosovës në Rambuje lidhur me hetimet dhe ndjekjen penale të krimeve të luftës.

Dëshmitari i mbrojtjes, Paul Williams tha se ka punuar dy vjet edhe në Departamentin Amerikan të Shtetit dhe se ka qenë jurist për çështjet evropiane.

Gjatë ditës së sotme ka përfunduar dëshmia e James Rubin, i cili gjatë luftës ka qenë ndihmës-sekretar amerikan i Shtetit. Dëshmia e tij në mbrojtje të ish-presidentit, Hashim Thaçi ka zgjatur tri ditë. /D.B/KP

Gjykata Themelore në Ferizaj, ka caktuar masën e paraburgimit kundër të pandehurit B.R., për shkak siç thuhet të dyshimit të bazuar se ka kryer veprën penale vrasja e rëndë më 15 shtator.

B. R., dyshohet se ka vrarë me dashje e ka privuar nga jeta të dëmtuarin – djalin e axhës së tij I.R.

Sipas Njoftimit, pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake i Departamentit për Krime të Rënda – Habib Zeqiri, ka vlerësuar se ekziston dyshimi i bazuar se më datë 15 shtator rreth orës 19:42, në një fshatë të Ferizajt, i pandehuri me dashje e ka privuar nga jeta të dëmtuarin – djalin e axhës së tij I.R., në atë mënyrë që pas një mosmarrëveshje të mëhershme që kishin pasur si pasojë e problemeve në lidhje me një konflikt pronësor, me t`u takuar në rrugën e fshatit me njëri tjetrin, pas fjalosjes verbale në atë moment i pandehuri B.R., e nxjerr revolen e tipit ZIG 14 TISAS Turk, dhe shtënë katër herë në drejtim të viktimës I.R., duke e goditur në pjesët e sipërme të trupit, përkatësisht në regjionin e anës së djathtë, nofullës, regjionin e kraharorit të djathtë dy plagë dhe të dy parakrahët, me ç`rast viktima nga lëndimet e shkaktuara nga arma e zjarrit ka ndërruar jetë rrugës duke e dërguar në Qendrën Emergjente në Ferizaj.

“Gjyqtari i procedurës paraprake, kërkesën e prokurorit të shtetit për caktimin e masës së paraburgimit kundër të pandehurit e ka aprovuar si të bazuar konform dispozitave të KPPRK-së, dhe të njëjtëve iu është caktuar masa e paraburgimit në kohëzgjatje prej një (1) muaj”, thuhet në njoftim.

Me këtë rast palët njoftohen se ankesa kundër këtij aktvendimi nuk e shtynë ekzekutimin e tij./D.B/KP

Lionel Skaloni kujtoi me emocion fitoren 3-0 të Argjentinës ndaj Venezuelës, ndeshjen që shënoi ndeshjen e fundit garuese të Lionel Messit në shtëpi.

“E përjetuam ndeshjen si të gjithë të tjerët, duke e ditur sa emocionuese ishte, që të gjithë ishin aty për të dhe shokët e tij të ekipit. Emocionet që ndjemë atë ditë do të zgjasin përgjithmonë. Ishte një ditë e bukur, veçanërisht sepse gjithçka shkoi kaq mirë, Mesi ishte në gjendje të shijonte shënimin e golit dhe ishte me familjen e tij, gjë që në fund të fundit është ajo që ka vërtet rëndësi. Ishte një ditë spektakolare që do të mbetet në kujtimet tona.”, tha ai.

Skaloni la gjithashtu të hapur mundësinë që kampioni argjentinas të rikthehet në fushën e Argjentinës, edhe nëse nuk ka asnjë pikë në lojë:.

“Sigurisht që nuk do të jetë ndeshja e tij e fundit në Buenos Aires. Do ta shohim, sepse ai meriton të luajë përsëri këtu.”, shtoi Skaloni.

Një pasazh që nxjerr në pah jo vetëm dashurinë e Mesit për vendin e tij, por edhe admirimin e të gjithë mjedisit argjentinas për një lojtar që vazhdon të shkruajë historinë e futbollit botëror./S.K/EO/