Ish-ministri i Mbrojtjes i Ukrainës, Mykhailo Fedorov, ka bërë thirrje për mbajtjen e zgjedhjeve në kohë lufe, në atë që shumë e shohin si sfidën më të madhe ndaj presidencës së Volodymyr Zelensky-t që nga shpërthimi i luftës me Rusinë në shkurt 2022.

“Demokracia nuk mund të mbahet peng nga Rusia,” tha Fedorov, 35 vjeç, në një video të postuar në YouTube të martën, duke shtuar se Ukraina po lufton “pikerisht sepse dëshirojmë të mbetemi një shtet i lirë evropian”.

Që nga pushtimi i plotë i Rusisë në vitin 2022, Ukraina ka qenë nën ligjin ushtarak, gjë që do të thotë se zgjedhjet janë pezulluar.

Fedorov, i cili nuk e përmendi Zelensky-n me emër në video, u shkarkua papritur nga detyra e tij si ministër i Mbrojtjes në fund të korrikut, vetëm gjashtë muaj pas emërimit të tij.

Zelensky ende nuk i është përgjigjur videos së Fedorov-it, reagimi i të cilit nxiti protesta në të gjithë vendin.

Gjatë mandatit të tij si ministër i Mbrojtjes, Fedorov u vlerësua për gjallërimin e ministrisë, udhëheqjen e një fushate kundër korrupsionit dhe përdorimin e të dhënave për të analizuar dhe përpjekur për të përmirësuar performancën në linjën e frontit.

Shkarkimi i tij pranohet gjerësisht se ka pasur lidhje me tensionet mes tij dhe komandantit të përgjithshëm të ushtrisë, Oleksandr Syrskyi. Syrskyi po ashtu u zëvendësua disa javë më vonë, pasi javë të tëra protestash ushtruan presion mbi presidentin ukrainas.

Fedorov nuk dha asnjë tregues për planin e tij politik në videon e YouTube, por në vend të kësaj u përqendrua në nevojën për një “mekanizëm ligjor, të sigurt dhe real që do t’i lejojë Ukrainës të rikthejë një proces të plotë demokratik madje edhe mes një lufe të zgjatur”. /BBC/

Partia Demokratike e Kosovës po vazhdon aksionin e saj për të pestën ditë me radhë, duke bllokuar hyrjen kryesore të ndërtesës së Qeverisë në shenjë pakënaqësie per mosthirrjen e seancës konstituive.

Mëngjesin e sotëm kësaj proteste i janë bashkuar për herë të parë edhe prodhuesit vendorë, të cilët së bashku me deputetët e PDK-së kanë qëndruar para hyrjes së ndërtesës qeveritare.

PDK-ja ka përsëritur thirrjen që të vazhdojë seanca konstituive e Kuvendit, me qëllim që të formohen institucionet dhe vendi të dalë nga ngërçi politik. Deputetët e këtij subjekti paralajmëruan se do të vazhdojnë me protestën deri në përmbushjen e kërkesave të tyre, duke e akuzuar pushtetin për bllokim të procesit./ E,A/

Foto: Ekonomia Online

Kryetari i Lëvizjes Vetëvendosje, Albin Kurti, ka nisur takimin konsultativ me kryetarin e Lidhjes Demokratike të Kosovës, Lumir Abdixhiku, në ambientet e Kuvendit të Kosovës.

Abdixhiku në takim është shoqëruar nga ish-presidentja Vjosa Osmani dhe nënkryetari i LDK-së, Lutfi Haziri.

Ndërkohë, Kurti ka marrë pjesë në takim së bashku me nënkryetaren e LVV-së, Arbërie Nagavci, dhe ministrin në detyrë të Financave, Hekuran Murati.

Para takimit, Kurti është shprehur optimist se bisedimet me LDK-në do të mund të kontribuojnë në ecjen përpara dhe në konstituimin e institucioneve të legjislaturës së 11-të.

“Do të shohim se si do të mund të ecim përpara bashkë që t’i konstituojmë institucionet e legjislaturës së 11-të, natyrisht me mirëbesim dhe me atmosferë pozitive”, ka deklaruar Kurti.

Takimi zhvillohet në kuadër të përpjekjeve të partive politike për tejkalimin e ngërçit institucional dhe gjetjen e një zgjidhjeje që do t’i hapte rrugë funksionalizimit të institucioneve të Kosovës./A.K/

Këshilli i Kryetarëve të Asociacionit të Komunave të Kosovës ka vendosur që më 1 shtator, në orën 11:00, të organizojë një protestë përballë ndërtesës së Qeverisë në Sheshin “Skënderbeu”.

Përmes një njoftimi zyrtar në Facebook, AKK bëri të ditur se protesta organizohet për mbrojtjen e buxheteve, pronës dhe kompetencave komunale, si dhe për kompensimin e dëmeve nga vërshimet dhe detyrimeve që rrjedhin nga kontratat kolektive. Po ashtu, kërkohet zbatimi i normës së përvojës së punës prej 0.5 për qind nga buxheti qendror, financim i drejtë për komunat dhe ndalimi i ndërhyrjeve të nivelit qendror në autonominë lokale.

Lidhur me këtë vendim, Asociacioni i Komunave të Kosovës deklaroi zyrtarisht: “Protesta do të jetë paqësore, institucionale dhe jopartiake, në mbrojtje të interesave të Komunave dhe të qytetarëve të Republikës së Kosovës”.

Vendimi ka nxitur edhe reagime të ndryshme mes krerëve të komunave.

Kryetari i Prishtinës, Përparim Rama, përmes një reagimi në Facebook ka akuzuar Qeverinë për qasje totalitare dhe për ndëshkimin e komunave që nuk udhëhiqen nga Lëvizja Vetëvendosje. Në anën tjetër, kryetari i Mitrovicës, Faton Peci, ka bërë të ditur se komuna e tij nuk do të marrë pjesë në këtë protestë, duke deklaruar se Rama nuk mund të flasë në emër të të gjithë kryetarëve të komunave. /E.A/