Lajmet

Pse Rusia humb aq shumë pajisje ushtarake në Ukrainë?

Ukraina thotë se Rusia ka humbur rreth 1 mijë e 200 tanke.

Published

on

Rusia raportohet të ketë humbur më shumë se 650 tanke dhe rreth 3 mijë automjete të tjera të blinduara dhe pajisje të rënda, në luftën e saj në Ukrainë. Ekspertët ua atribuojnë humbjet armëve të avancuara anti-tank që i janë dhënë Ukrainës nga vendet perëndimore, strategjisë së dobët ruse dhe moralit të ulët të ushtarëve rusë.

Ukraina thotë se Rusia ka humbur rreth 1 mijë e 200 tanke, por kjo shifër nuk është konfirmuar në mënyrë të pavarur. Megjithatë, blogu ushtarak, Oryx, i cili mbledh humbjet e pajisjeve ushtarake ruse në Ukrainë, bazuar në fotografitë e dërguara nga vija e frontit, thotë se Rusia ka humbur 664 tanke deri më 13 maj dhe rreth 3 mijë automjete të tjera të blinduara dhe pajisje të rënda.

Pajisjet e braktisura

Nga 664 tanke që Rusia ka humbur në Ukrainë, 283 janë braktisur ose kapur. Sipas analistëve ushtarakë, kjo do të thotë shumë për operacionet: Inteligjenca e dobët ka bërë që oficerët komandues rusë të mos jenë në gjendje t’i planifikojnë siç duhet operacionet e tyre sulmuese. Edhe bërthama e personelit ushtarak përbëhet kryesisht nga rekrutët – rreth 80 për qind – të cilët nuk janë të trajnuar profesionalisht për t’i përdorur pajisjet.

Forcat pushtuese, po ashtu, kanë shpresuar se ukrainasit do t’i presin krahëhapur, gjë që nuk ka ndodhur. Numri i madh i viktimave në ditët dhe javët e para të pushtimit ka ndikuar në moralin e trupave ruse, që shpesh janë arratisur nga pozicionet e tyre, duke i lënë pas pajisjet.

Në fakt, aq shumë pajisje ushtarake ruse janë braktisur, saqë autoritetet ukrainase kanë deklaruar se kushdo që posedon pajisje të tilla, nuk ka nevojë t’i deklarojë ato për qëllime tatimore.

Videot amatore të tankeve ruse dhe automjeteve të tjera të blinduara, që tërhiqen nëpër fusha dhe fshatra nga traktorët ukrainas, janë bërë vazhdimisht virale në mediat sociale.

Automjetet ushtarake janë zakonisht të braktisura, të prishura ose pa karburant. Ato shpesh u dorëzohen forcave të armatosura ukrainase, që luftojnë kundër pushtimit rus.

Pajisjet e shkatërruara

Sa u përket pajisjeve ruse që kanë humbur në luftime, lufta në Ukrainë ka ekspozuar të meta të mëdha në to, si dhe materiale të vjetruara ose me cilësi të ulët.

Frëngjitë e tankeve që janë hedhur në erë, tregojnë një problem dizajni, të njohur si defekti “Jack-in-the-box”. Shumë tanke ruse, përfshirë T-72, i cili është përdorur shumë në pushtimin rus të Ukrainës, kanë një sistem të automatizuar municioni, që njihet si: “mbaj dhe ngarko”. Predhat vendosen në një unazë brenda frëngjisë dhe municionet ruhen nën operatorët e tankeve. Dhe, kur e shtëna e armikut godet një vend të cenueshëm – si p.sh. pjesa e sipërme e tankut, ku armatura është më e hollë – unaza e municionit mund të shpërthejë dhe të fillojë një reaksion zinxhiror, që avullon ekuipazhin dhe shpërthen frëngjinë e tankut.

Strategjia e dobët

Ushtria ruse operon përmes njësive të pavarura luftarake, të njohura si grupe taktike batalionesh, të përbëra nga tanke, këmbësori dhe artileri.

Këto njësi janë krijuar për të sulmuar shpejt dhe përbëhen prej shumë automjetesh të blinduara, por kanë pak këmbësori për të ofruar mbrojtje nëse kolona e blinduar sulmohet.

Njësitë ruse mund të shkaktojnë shumë dëme, por taktikat efektive të Ukrainës, së bashku me armët anti-tank të siguruara nga Perëndimi, i kanë dhënë Rusisë një goditje të madhe.

Armët anti-tank që i janë dhënë Ukrainës nga vendet perëndimore

Shumë tanke ruse janë të pajisura me forca të blinduara reaktive, të dizajnuara për t’i bërë ballë goditjes së raketave. Megjithatë, raketat Javelin, të prodhuara nga SHBA-ja, janë të pajisura me dy koka luftarake: e para e largon armaturën reaktive, ndërsa e dyta depërton në tank.

Armët tjera janë dëshmuar shumë efektive kundër pajisjeve ruse. Droni Bayraktar TB2, prodhim turk, ka aftësi unike për të zbuluar dhe identifikuar objektivat nga një distancë deri në 50 kilometra.

Deri më tani, më shumë se 30 vende kanë ofruar ndihmë financiare dhe ushtarake për Ukrainën. Furnizimet kanë qenë të kufizuara në armë, municione dhe pajisje mbrojtëse, si: sisteme anti-tank dhe anti-ajrore, pasi anëtarët e NATO-s kanë frikë se ofrimi i pajisjeve më të rënda sulmuese, të tilla si avionët luftarakë, mund të çojë në një konflikt të drejtpërdrejtë me Rusinë.

Para pushtimit të Ukrainës, ushtria ruse ka pasur reputacionin e një ushtrie të fortë, efektive dhe teknologjikisht të avancuar. Këtë reputacion e ka arritur kryesisht përmes përfshirjes së saj në luftën e Sirisë.

Por, në këtë teatër të ri të luftës, ushtria ukrainase, edhe pse është më e vogël, ka dëmtuar seriozisht reputacionin e saj./REL

Vendi

Rasti i Arlinda Zekajt: Komisioni Hetimor interviston sot kryetarin e Pejës dhe zyrtarët e QPS-së

Published

on

By

Komisioni Hetimor Parlamentar lidhur me veprimet dhe mosveprimet institucionale për vrasjen e Arlinda Zekajt, si dhe trajtimin e dhunës ndaj fëmijëve dhe grave në familje, pritet të intervistojë sot pesë dëshmitarë, në mesin e të cilëve edhe kryetarin e Komunës së Pejës, Gazmend Muhaxheri.

Sipas agjendës, mbledhja e Komisionit nis në orën 08:30, ndërsa intervistimi i dëshmitarëve pritet të fillojë nga ora 09:30. Përveç kryetarit Muhaxheri, para anëtarëve të Komisionit do të dëshmojnë edhe katër zyrtarë të Qendrës për Punë Sociale (QPS) në Pejë: drejtuesja Shpresa Lukaj, udhëheqësi Durim Kelmendi, menaxherja e rastit Toska Gega dhe zyrtari Shpat Morina.

Ky komision hetimor kryesohet nga Burim Ramadani (AAK) dhe ka zëvendëskryesues Adnan Rrustemin (LVV). Pjesë e përbërjes janë deputetët Armend Baloku, Arijeta Rexhepi, Osman Musliu dhe Adelinë Tërshani nga LVV-ja; Besa Kabashi-Ramaj dhe Eman Rrahmani nga PDK-ja; Doarsa Kica-Xhelili nga LDK-ja; si dhe Jovana Radosavljeviq dhe Emilija Rexhepi nga radhët e komuniteteve.

Këto intervistime vijnë tre ditë pasi Ministria për Punë, Familje dhe Vlerat e Luftës Çlirimtare njoftoi se një inspektim i jashtëzakonshëm në QPS-në e Pejës ka konstatuar shkelje të shumta në trajtimin e rastit të së ndjerës Arlinda Zekaj. Raporti i inspektimit evidentoi mosrespektim të afatit gjyqësor, neglizhencë në detyrë, mosveprim sipas detyrës zyrtare dhe mungesë të mbikëqyrjes profesionale.

Si pasojë e këtyre gjetjeve, Divizioni i Inspektimit i ka rekomanduar kryetarit të Pejës ndërmarrjen e masave disiplinore ndaj menaxheres së rastit (T. G.) dhe udhëheqësit të Shërbimeve Sociale (D. K.), si dhe rritjen urgjente të kapaciteteve të stafit profesional në këtë qendër. /E.A/

 

Continue Reading

Lajmet

Përfundon takimi dypalësh Xi–Putin në Kinë, Trump niset drejt Shenzhenit për samitin historik trepalësh

Published

on

By

Presidenti kinez Xi Jinping dhe homologu i tij rus Vladimir Putin kanë përmbyllur bisedimet e tyre dypalëshe në qytetin kinez Shenzhen, në kuadër të samitit të Bashkëpunimit Ekonomik Azi-Paqësor (APEC), raporton BBC. Takimi zgjati më shumë se dy orë, ndërsa ndërkohë presidenti amerikan Donald Trump është nisur me Air Force One nga Manila e Filipineve drejt Kinës, në prag të takimit të paprecedentë trepalësh mes tre liderëve botërorë.

Gjatë takimit të tyre të 50-të personal, Xi dhe Putin vlerësuan lidhjet e ngushta dypalëshe dhe rritjen e shkëmbimeve tregtare e teknologjike. Sipas agjencisë shtetërore ruse TASS, në fokus të bisedimeve ishin perspektivat e bashkëpunimit të mëtejshëm ekonomik, furnizimet energjetike — përfshirë projektin e gazsjellësit përmes Mongolisë — si dhe lufta në Ukrainë dhe koordinimi i qasjeve përballë Shteteve të Bashkuara. Lideri kinez deklaroi se marrëdhëniet Rusi–Kinë sjellin stabilitet në një botë kaotike, ndërsa Putin theksoi angazhimin e përbashkët për ndërtimin e një rendi botëror multipolar.

Paralelisht me takimin në Shenzhen, presidenti amerikan Donald Trump përmbylli vizitën e tij në Filipine, ku zhvilloi bisedime me presidentin Ferdinand Marcos Jr. dhe njoftoi finalizimin e një marrëveshjeje të madhe tregtare mes Uashingtonit dhe Manilës, ndonëse pa dhënë detaje konkrete. Fluturimi i tij nga Manila drejt Shenzhenit pritet të zgjasë rreth dy orë.

Takimi trepalësh mes Donald Trumpit, Xi Jinpingut dhe Vladimir Putinit, i parashikuar të mbahet të enjten në margjinat e samitit të APEC-ut, po cilësohet si një moment i paprecedentë diplomatik. Analistët e BBC-së vlerësojnë se ndonëse vështirë të priten kthesa të mëdha konkrete në çështje të ndjeshme si kontrolli i armëve bërthamore apo tarifat tregtare, ky takim po shihet nga mediat ruse si një fitore diplomatike për Putinin, i cili ulet në tryezë me liderët e dy fuqiive më të mëdha botërore pa bërë lëshime për luftën në Ukrainë.

Përveç diplomacisë së nivelit të lartë, Kina po e shfrytëzon samitin e APEC-ut në qendrën teknologjike të Shenzhenit për të demonstruar epërsinë e saj në inteligjencën artificiale fizike, me robotë humanoidë që patrullojnë ambientet dhe mirëpresin delegacionet ndërkombëtare. Ndërkohë, sa i përket spekulimeve për një takim të mundshëm me liderin e Koresë së Veriut, Kim Jong Un, burimet diplomatike vlerësojnë se gjasat që ai të shfaqet në këtë samit janë shumë të vogla, në mungesë të koordinimit paraprak nga Pheniani. /E.A/

 

Continue Reading

lajme

Rama fton investitorët japonezë në projektin e hekurudhës Durrës–Prishtinë: Ka rëndësi strategjike edhe për NATO-n

Published

on

By

Kryeministri i Shqipërisë, Edi Rama, ka pritur në një takim një përfaqësi të gjerë të sipërmarrjes japoneze, me të cilët ka diskutuar mundësitë e bashkëpunimit ekonomik dhe investimet strategjike, me fokus të veçantë te projekti i hekurudhës Durrës–Prishtinë, raporton RTSH.

Gjatë takimit, Rama bëri të ditur se Shqipëria dhe Kosova janë të gatshme të mirëpresin përfshirjen e partnerëve japonezë në këtë projekt infrastrukturor, duke theksuar se kjo linjë hekurudhore, e cila përmes Nishit lidhet me rrjetin e Evropës Qendrore, ka rëndësi të dyfishtë: ekonomike dhe të sigurisë.

“Së bashku me kryeministrin e Kosovës kemi biseduar më shumë se një herë se sa mirë do të ishte ta përfshinim Japoninë në projektin e hekurudhës së re nga Durrësi në Prishtinë, e cila më pas kalon nëpër Nish dhe lidhet me Evropën Qendrore. Kjo hekurudhë ka gjithashtu rëndësi shumë të madhe për NATO-n, për shkak të Portit të ri në Durrës, i cili do të ketë edhe një degë të dedikuar 100 për qind për veprimtaritë ushtarake dhe ato të Aleancës. Ky mund të jetë një investim shumë interesant”, deklaroi Rama.

Kryeministri shqiptar i ftoi përfaqësuesit e biznesit japonez që ta shqyrtojnë këtë projekt strategjik, duke rikonfirmuar gatishmërinë e plotë të qeverive të Shqipërisë dhe Kosovës për të bashkëpunuar me çdo partner nga Japonia drejt realizimit të tij. /E.A/

 

Continue Reading

Lajmet

Kosova mposhtet thellë në Dublin nga Irlanda, e mbyll grupin në vendin e tretë dhe mbetet në Ligën B

Published

on

By

Përfaqësuesja e Kosovës në futboll e ka mbyllur edicionin e pestë të Ligës së Kombeve me një humbje të rëndë 3:0 në udhëtim ndaj Irlandës, në takimin e zhvilluar të martën mbrëma në Dublin.

Pikë kthese e ndeshjes rezultoi të jetë minuta e 26-të, kur mbrojtësi Kreshnik Hajrizi u ndëshkua me karton të kuq pasi ndali topin me dorë në vijën e portës. Nga pika e bardhë, Troy Parrott shënoi për 1:0 në minutën e 28-të. Ndonëse Kosova e nisi më mirë takimin përmes rasteve të Lindon Emërllahut dhe Vedat Muriqit, ky 11-metërsh dhe largimi i Hajrizit ndryshuan plotësisht rrjedhën e lojës.

Në pjesën e dytë, irlandezët thelluan epërsinë përmes një tjetër penalltie të realizuar përsëri nga Parrott në minutën e 50-të (pas një ndërhyrjeje të portierit Aro Muriq), ndërsa rezultatin përfundimtar 3:0 e vulosi Jack Moylan në minutën e 75-të me një goditje të saktë me kokë.

Me këtë humbje, Kosova e mbyll Grupin B3 në vendin e tretë me gjashtë pikë, duke siguruar megjithatë mbetjen në Ligën B për edicionin e ardhshëm. Austria e fitoi grupin me 12 pikë pas barazimit 1:1 me Izraelin, ndërsa Irlanda u rendit e dyta me tetë pikë, duke siguruar plejofin për Ligën A dhe një vend në vazon e dytë për shortin e kualifikimeve të “Euro 2028”. Izraeli përfundoi i fundit me katër pikë.

Për shkak të këtij renditjeje, Kosova do të pozicionohet në vazon e tretë për shortin e kualifikimeve të Kampionatit Evropian, i cili do të tërhiqet më 6 dhjetor. Përkundër mungesave dhe disfatës së thellë në ndeshjen e fundit ku u aplikua sistemi 5-3-2, “Dardanët” arritën objektivin kryesor të ruajtjes së statusit në Ligën B. /E.A/

 

Continue Reading

Të kërkuara