Në Parkun Shkencor, Inovativ dhe Teknologjik të UBT-së në Lipjan është mbajtur konferenca mbi sigurinë në komunikacionin rrugor, e organizuar nga Fakulteti i Inxhinierisë së Ndërtimit dhe Infrastrukturës, përkatësisht Departamenti i Trafikut dhe Transportit. Konferenca mblodhi përfaqësues institucionalë, ekspertë të komunikacionit, profesorë, studentë dhe profesionistë të fushës, të cilët diskutuan mbi sfidat aktuale dhe mundësitë për avancimin e sigurisë rrugore në Kosovë.

Aktiviteti u hap me fjalën përshëndetëse të profesorit Beni Kizolli, i cili theksoi rëndësinë e organizimit të platformave të tilla akademike dhe profesionale, ku bashkohen institucionet, ekspertët dhe studentët për të trajtuar temat që ndikojnë drejtpërdrejt në jetën e qytetarëve.

Në fjalën e tij, Dekani i Fakultetit të Inxhinierisë së Ndërtimit dhe Infrastrukturës në UBT, Prof. Dr. Visar Krelani, vlerësoi rëndësinë e sigurisë rrugore si një prej sfidave më të mëdha të kohës, duke theksuar se universitetet kanë rol të rëndësishëm në krijimin e politikave, zgjidhjeve dhe kapaciteteve profesionale që kontribuojnë në uljen e numrit të aksidenteve dhe përmirësimin e infrastrukturës së transportit.

“Siguria në komunikacion nuk është vetëm çështje infrastrukture apo zbatimi të ligjit, por është edhe çështje edukimi, planifikimi dhe bashkëpunimi ndërinstitucional. UBT mbetet i përkushtuar që përmes programeve akademike dhe aktiviteteve shkencore të kontribuojë në zhvillimin e një sistemi transporti më të sigurt dhe më efikas”, tha Krelani.

Në kuadër të konferencës u zhvillua edhe një panel diskutimi me pjesëmarrjen e ekspertëve dhe përfaqësuesve të institucioneve relevante.

Fejzullah Mustafa, Drejtor i Departamentit për Patentë Shofer në Ministrinë e Mjedisit, Planifikimit Hapësinor dhe Infrastrukturës, prezantoi prioritetet strategjike të institucioneve në fushën e sigurisë rrugore. Ai theksoi rëndësinë e themelimit dhe funksionalizimit të Agjencisë për Siguri Rrugore, harmonizimin e legjislacionit me standardet e Bashkimit Evropian (AQUIS), harmonizimin e bazave të të dhënave me sistemet përkatëse, investimet në infrastrukturën e sigurisë rrugore dhe zbatimin e indikatorëve kyç të performancës (KPI) si mekanizma për matjen e progresit në këtë sektor.

Drejtori i Trafikut Rrugor në Policinë e Kosovës, Nënkolonel, Jeton Rexhep, prezantoi sfidat me të cilat përballen institucionet e sigurisë në monitorimin dhe menaxhimin e trafikut, duke theksuar rëndësinë e bashkëpunimit mes institucioneve dhe qytetarëve për parandalimin e aksidenteve.

Profesori Visar Baxhuku foli për ndikimin e Inteligjencës Artificiale në fushën e sigurisë rrugore, duke theksuar se teknologjitë moderne po ndryshojnë mënyrën se si analizohen aksidentet dhe menaxhohen rreziqet në trafik.

“Inteligjenca Artificiale ka potencial të madh për të transformuar mënyrën e analizimit të aksidenteve të trafikut. Përmes përpunimit të të dhënave, simulimeve dhe parashikimeve të avancuara, ajo mund të ndihmojë jo vetëm në identifikimin e shkaqeve të aksidenteve, por edhe në parandalimin e tyre. Megjithatë, aplikimi i saj kërkon kujdes të veçantë ndaj çështjeve etike, duke ruajtur balancën ndërmjet sigurisë dhe të drejtave individuale”, tha Baxhuku.

Kontribut në diskutim dha edhe Astrit Zejnullahu nga Ndërmarrja Publike e Trafikut Urban, i cili trajtoi rëndësinë e transportit publik dhe ndikimin e tij në krijimin e një sistemi më të qëndrueshëm dhe më të sigurt të mobilitetit urban.

Në përmbyllje të aktivitetit, pjesëmarrësit patën mundësinë të njihen nga afër me materialet informuese dhe fletushkat sensibilizuese të përgatitura në bashkëpunim me profesorin Nol Dedaj, të cilat synojnë ngritjen e vetëdijes qytetare për rëndësinë e respektimit të rregullave të trafikut dhe promovimin e kulturës së sigurisë rrugore.

Përmes organizimit të konferencave të tilla, UBT vazhdon të dëshmojë rolin si institucion lider në arsimin e lartë, duke krijuar ura bashkëpunimi ndërmjet akademisë, institucioneve dhe industrisë, si dhe duke kontribuar në trajtimin e çështjeve me rëndësi të veçantë për zhvillimin dhe sigurinë e shoqërisë.

Programi Bachelor në Arte Dramatike në UBT është krijuar për të formuar gjenerata të reja artistësh dhe profesionistësh kreativë në fushën e aktrimit, regjisë dhe dramaturgjisë. Përmes një kombinimi të teorisë dhe praktikës moderne, studentët përgatiten për sfidat e teatrit, filmit dhe medias digjitale, duke zhvilluar njëkohësisht kreativitetin, mendimin kritik dhe aftësitë profesionale.

Misioni i programit është të kultivojë profesionistë që kontribuojnë në zhvillimin kulturor në Kosovë dhe më gjerë, duke nxitur krijimtarinë origjinale dhe përgjegjësinë artistike. Studentët pajisen me njohuri të avancuara në artet dramatike dhe aftësi ndërdisiplinare që i bëjnë të gatshëm për tregun modern të industrisë kreative.

Programi zgjat 3 vite studimi me kohë të plotë dhe përfshin 180 ECTS, ndërsa ligjëratat zhvillohen në Kampusin Kryesor të UBT-së në Prishtinë. Studimet ofrohen kryesisht në gjuhën shqipe, me disa module profesionale në anglisht, duke u mundësuar studentëve një përgatitje bashkëkohore dhe konkurruese.

Programi është i akredituar nga Agjencia e Akreditimit të Kosovës dhe ofron një ambient modern studimi për të gjithë ata që synojnë të ndërtojnë karrierë në botën e artit dhe skenës.

Aplikimet e hershme kanë filluar, këtu gjeni linkun për me shumë informata.

Profesori universitar, Prof. Ass. Dr. Naser R. Morina, do të promovojë librin e tij më të ri “Rezistenca e Materialeve – 2”, një botim akademik i dedikuar studentëve, inxhinierëve dhe profesionistëve të fushës së ndërtimtarisë.

Libri paraqet vazhdimësi të angazhimit akademik dhe profesional të autorit, me fokus në pasurimin e literaturës universitare dhe avancimin e dijes në fushën e Rezistencës së Materialeve, duke ofruar përmbajtje të rëndësishme teorike dhe praktike për studentët dhe profesionistët e inxhinierisë.

Në promovim do të marrë pjesë edhe Rektori i UBT, Prof. Dr. Edmond Hajrizi, së bashku me akademikë, studentë dhe dashamirë të librit.

Ngjarja do të mbahet të enjten, më 28 maj 2026, duke filluar nga ora 13:00, në Kampusin e UBT-së në Lipjan. Autori ka ftuar të gjithë kolegët, studentët dhe të interesuarit e fushës që të bëhen pjesë e këtij promovimi akademik dhe profesional.

Fakulteti i Inxhinierisë së Ndërtimit në UBT, përkatësisht Departamenti i Trafikut dhe Transportit, do të organizojë nesër konferencën me temë “Siguria në Komunikacionin Rrugor”, një aktivitet akademik dhe profesional që synon të trajtojë sfidat dhe rëndësinë e sigurisë në trafikun rrugor.

Konferenca do të mbahet më 26 maj 2026, në kampusin e UBT-së në Lipjan, duke filluar nga ora 11:30, dhe do të mbledhë përfaqësues institucionalë, ekspertë të fushës së komunikacionit, profesorë, studentë dhe profesionistë të industrisë.

Përmes organizimit të aktiviteteve të tilla, UBT vazhdon të kontribuojë në avancimin e dijes profesionale dhe në trajtimin e temave me rëndësi shoqërore dhe institucionale, duke lidhur akademinë me praktikat reale dhe sfidat e kohës.