Miliarderi Elon Musk pritet të takohet me presidentin izraelit, Isaac Herzog të hënën gjatë një vizite në Izrael, konfirmoi zyra e presidentit.

Gjatë takimit me Muskun, Herzog do të theksojë nevojën për të parandaluar rritjen e antisemitizmit, thuhet në njoftimin e mëtutjeshëm të zyrës së presidentit.

Përfaqësuesit e familjeve të pengjeve të mbajtura nga Hamasi gjithashtu pritet të bashkohen në takim, ku ata do të ndajnë “tmerret e sulmit terrorist të Hamasit më 7 tetor dhe dhimbjen dhe pasigurinë e vazhdueshme për ata që mbahen robër”, shtoi zyra e presidentit./UBTNews/

Qendra Arabe për Avancimin e Mediave Sociale ka zbuluar se Meta – e cila zotëron Facebook dhe Instagram – po korr përfitime financiare nga shpërndarja e përmbajtjeve të dëmshme brenda platformave të saj.

Hetimi u nxit nga zbulimi se Facebook shfaqte reklama të synuara që bënin thirrje për vrasjen e individëve dhe reklama që bënin thirrje për dëbimin me forcë të palestinezëve për në Jordani.

7amleh gjeti 19 reklama me gjuhë urrejtjeje dhe nxitje në hebraisht kundër arabëve dhe palestinezëve në kontekstin e luftës në Gaza. Reklamat e miratuara përfshinin thirrje për të “eliminuar Gazën, gratë, fëmijët dhe të moshuarit e saj” dhe fraza të tjera nxitëse që kërkonin në mënyrë eksplicite vrasjen e palestinezëve, djegien e të gjithë Gazës, deportimin e njerëzve në vende të tjera dhe thirrje për të kryer një Nakba* të dytë.

Kjo hedh dritë mbi dështimin e Meta-s për të ndaluar përmbajtjen e reklamave nxitëse në platformat e saj dhe përfitimet financiare të kompanisë nga përhapja e kësaj retorike, tha grupi./UBTNews/

Nakba* është një term në arabisht do të thotë “katastrofë” ose “fatkeqësi”, dhe zakonisht përdoret për të përshkruar ngjarjet që ndodhën në vitin 1948, ku për shumicën e palestinasve, kjo do të thotë humbja e shtëpive, tokave dhe pronave të tyre, si dhe shpërngulja dhe largimi i masave të tyre nga vendet ku ata jetonin.

Kompania mediatike e Paris Hilton, 11:11 Media, ka tërhequr një reklamë nga platforma “X”, vetëm një muaj pasi njoftoi rreth bashkëpunimit të tyre. Kjo është marka e fundit që ka tërhequr një reklamë në platformën që dikur njihej si Twitter, për shkak të përmbajtjes antisemitike dhe pro-naziste në atë sajt.

“11:11 Media mori vendimin për tërheqjen e menjëhershme të kampanjës nga platforma”, deklaroi Bruce Gersh, presidenti dhe shefi operativ për CNN.

Ky vendim për ta tërhequr reklamën është goditje për “X-in” dhe shefen ekzekutive të platformës, Linda Yaccarino, e cila muajin e kaluar njoftoi rreth partneritetit promovues me Hiltonin.

Marrëveshja, e cila u njoftua nga Yaccarino si një “partneritet zyrtar” afatgjatë mes Hiltonit, 11:11 Media dhe platformës, synonte të krijonte “një platformë fillestare për iniciativat e reja në video dhe video live, tregti të drejtpërdrejtë, Spaces, dhe shumë më tepër”.

Me këtë marrëveshje palët u pajtuan edhe për ndarjen e të ardhurave mes tyre./UBTNews/

Ukraina ka shkarkuar dy zyrtarë të lartë të mbrojtjes kibernetike në mes të një hetimi për korrupsion, ka thënë një zyrtar i lartë i qeverisë.

Yurii Shchyhol, kreu i Shërbimit Shtetëror të Komunikimeve Speciale dhe Mbrojtjes së Informacionit të Ukrainës (SSSCIP) dhe zëvendësi i tij, Victor Zhora, u shkarkuan nga qeveria, shkroi shefi i kabinetit Taras Melnychuk në Telegram.

Ukraina ka rritur përpjekjet për ta luftuar korrupsionin derisa po synon anëtarësimin në Bashkimin Evropian./UBTNews/