Në nderim të jetës dhe veprës së akademik Rexhep Ferrit, është mbajtur mbledhja komemorative në Akademinë e Shkencave dhe Arteve të Kosovës, në të cilën është kujtuar vepra e tij, ndërsa të pranishmit kanë bërë edhe homazhe.

Kryetari i Akademisë së Shkencave dhe Arteve të Kosovës, Mehmet Kraja ka theksuar se Republika jonë është e artit dhe veprave si shkak i artistëve siç është Rexhep Ferri.

Kraja ka thënë se Ferri ka zënë një vend nderi në historinë e artit të Kosovës.

Ndërsa, kryeministri i vendit, Albin Kurti ka derisa ka kujtuar figurën e tij, ka thënë se nga veprat e intelektualit Ferri do të mësojnë të gjithë brezat, ndërsa ka shtuar se i njëjti do të kujtohet përherë si artisti më i veçantë.

“Kreshnik e patriot, Rexhep Ferri nuk do të na lë dot. Vepra e tij është shumë e madhe, do t’i përcjellë gjitha brezat e rinj që kanë shumë për të mësuar nga ai. Sot nuk jemi mbledhur vetëm për të kujtuar një artist, por për një intelektual i shquar që do të vazhdojë të na ndriçojë rrugën, do të kujtohet përherë si artisti modernist, si artisti më i veçantë. Figura e tij do të flet panumërta dekada për të“, tha Kurti.

Përfaqësuesi i familjes Ferri, Naser Ferri ka thënë se sot përveç familjes edhe për mbarë shqiptarinë është ditë e dhimbshme, pasi vendi ka humbur një intelektual të shquar.

Ai është shprehur se piktori Ferri pas vetes ka lënë një veprimtari të pastër artistike për të gjitha gjeneratat.

Në një seri takimesh të titulluara “Diplomacia dhe kultura” në COD, ambasadori i Spanjës në Shqipëri, Álvaro Renedo Zalba, u ftua për të diskutuar mbi temën: “Culture for Diplomacy and Diplomacy for Culture”, përballë përfaqësuesve nga institucionet publike dhe private, si dhe studentëve dhe nxënësve.

Si përfaqësuesi më i lartë diplomatik i Spanjës, Zalba paraqiti thellësisht kulturën spanjolle në botë dhe diskutoi për marrëdhëniet e ngushta midis Spanjës dhe Shqipërisë që nga hapja e ambasadës së Spanjës në Tiranë në vitin 2006. Ai theksoi përpjekjet e fundit për të nxitur bashkëpunimin në fusha të interesit të ndërsjellë, si ekonomia, arsimi dhe iniciativat e tjera, shkruan ATA.

Pjesëmarrësit treguan interes të lartë për marrëdhëniet dypalëshe dhe për rëndësinë e integrimit në Bashkimin Evropian, si dhe për ndikimin e kulturës në këtë proces.

Ambasadori Zalba theksoi se kultura është thelbi i njohjes së një vendi dhe ndërton lidhje mes shteteve dhe njerëzve. Ai gjithashtu foli për rritjen e turizmit kulturor dhe projektet e rëndësishme që ambasada spanjolle ka ndërmarrë në Shqipëri, si hapja e universitetit UNED në Gjirokastër dhe kampi veror i Realit të Madridit në Tiranë.

Ambasadori Zalba theksoi angazhimin e tij për të ndihmuar në procesin e integrimit të Shqipërisë në Bashkimin Evropian./UBTNews/

Ekspozita e Pop Artit Amerikan në Galerinë e Artit Tiranë është një ngjarje e rrallë për kulturën shqiptare, duke paraqitur për herë të parë për publikun vendas 39 punime të Andy Warhol, një nga figurat më ikonike të artit modern.

Punimet e shfaqura janë pjesë e një koleksioni privat nga Sllovenia dhe përfshijnë serigrafi të njohura të artistit. Galeria e Artit Tiranë ka punuar për mbi 7 muaj për të siguruar këtë ekspozitë dhe për të bërë të mundur që kjo pjese e rëndësishme e artit botëror të jetë e arritshme për publikun shqiptar.

Drejtoresha e Galerisë, Edit Pula, shprehet se ky proces ishte sfidues, por thelbi ishte krijimi i besimit tek veprat dhe shprehja e rëndësisë së tyre për publikun shqiptar. Veprat e Warhol janë përjetësim i artit pop dhe kjo ekspozitë sjell një shans të rrallë për të njohur më shumë për këtë artist legjendar.

Andy Warhol është një ndër figurat më të shquara të artit modern dhe një prej përfaqësuesve kryesorë të Pop Artit. Impakti i tij në skenën artistike botërore është i pamohueshëm dhe kjo ekspozitë paraqet një mundësi e rëndësishme për publikun shqiptar për të eksploruar thellësisht veprën dhe kontributin e tij në artin global.

Ekspozita do të qëndrojë e hapur deri më 5 gusht dhe për të gjithë dashamirësit e artit është një mundësi e jashtëzakonshme për të përjetuar këtë pjese të rëndësishme të historisë së artit modern./UBTNews/

Bota e artit shqiptar humbi një prej figurave të saj më të mëdha, Rexhep Ferrin, i cili ndërroi jetë në moshën 87-vjeçare. I lindur në Kukës në vitin 1937, Ferri ndërtoi një karrierë të shkëlqyer si poet dhe piktor. Ai përfundoi studimet në Akademinë e Arteve në Beograd dhe kontribuoi me pasion në Akademinë e Arteve Figurative në Prishtinë.

Me ekspozita të shumta në Kosovë dhe jashtë saj, si dhe vepra të botuara në poezi, ese dhe romane, Ferri la një trashëgimi të pasur artistike. Fjalët e tij, “Ka vdekë njerëzorja, ka mbetë vetëm njeriu,” reflektojnë thellësinë e mendimit dhe ndjenjave të tij.

Si anëtar i rregullt dhe sekretar i Seksionit të Arteve në ASHAK, Ferri do të kujtohet për kontributin e tij të pashoq në artet pamore dhe letërsinë shqipe.

Në vitin 1966, Ferri u diplomua në Degën e Pikturës Monumentale në Akademinë e Arteve në Beograd, ndërsa në vitin 1970 përfundoi studimet pasuniversitare po në të njëjtën Akademi. Në vitin 1971, ai mori “Çmimin e Dhjetorit” të Kuvendit të Kosovës për kontributin e tij në fushën e arteve figurative.

Në vitin 1974, Rexhep Ferri u zgjodh pedagog në Akademinë e Arteve Figurative në Prishtinë, duke ndihmuar në formimin e brezave të rinj të artistëve.

Në vitin 1996, Ferri u zgjodh anëtar korrespondent i ASHAK-ut, ndërsa në vitin 2000 u bë anëtar i rregullt. Në vitin 1999, ai u emërua sekretar i Seksionit të Arteve në ASHAK.

Ferri ka organizuar shumë ekspozita të pavarura brenda dhe jashtë vendit, dhe ka marrë pjesë në manifestime të rëndësishme, ekspozita, bienale dhe takime në Kosovë, ish-Jugosllavi, Francë, Itali, Gjermani, Turqi, Egjipt dhe shumë vende të tjera. Ai ka botuar disa përmbledhje me poezi, si dhe ese dhe romane.

Në vitin 2010, ASHAK botoi një monografi që përmbledh tërë opusin artistik të Ferrit, duke pasqyruar punën dhe kontributin e tij të jashtëzakonshëm në fushën e arteve.

Humbja e Rexhep Ferrit përbën një goditje të madhe për artin dhe kulturën shqiptare, duke lënë pas një trashëgimi të pasur artistike dhe letrare që do të vazhdojë të inspirojë gjeneratat e ardhshme./UBTNews/