Lajmet

Prezantohen produktet e punuara nga fëmijët me Sindromën Down

Në mënyrë të organizuar, shkuan për të blerë edhe nxënësit e shkollave fillore të ulëta.

Published

3 years ago

March 21, 2022

UBT news

Në Ditën Botërore të Sindromës Down në sheshin “Zahir Pajaziti”, Shoqata Down Syndrome Kosova vendosi tri tezga që përmbanin produktet e punuara nga anëtarët e sindromit down.

Produkte këto të cilat tërhoqën vëmendjen e qytetarëve që kalonin andej pari.

Me interesimin e fëmijëve të cilët shkuan për të blerë kartolinat e punuara nga fëmijët me sindrom down, u shpreh i lumtur Dionis Ferataj nga Down Sindrome Kosova.

“Më vjen shumë mirë që për 21 mars, ditës së Down Sindrome për të gjithë ata që kanë ardhur për të blerë kartolina për fëmijë me autizëm…Ftojë qytetarët tanë që të vijnë e të kontribuojnë për shoqatën, dhe i uroj 21 marsin”, tha Ferataj.

Në mënyrë të organizuar, shkuan për të blerë edhe nxënësit e shkollave fillore të ulëta.

Valdrina Nekoviqi, mësuese nga shkolla fillore e mesme e ulët “Qamil Batalli”, tregoi se ora e parë e mësimit i është kushtuar fëmijëve me Sindromën Down.

“Në klasë fillimisht e kemi mbajt një ligjëratë vetëdijësusese sa i përket kësaj dite që i kushtohet fëmijëve me Sindromën Down, më pas kemi ardhur për t’i vizituar në pikat ku shënojnë aktivitetet këta fëmijë, dhe shoqatës Sindromës Down. Ne kemi ardhur këtu për t’i përkrahur ata, për t’i mbështetur në çdo pikë sepse duhet të përfshihen dhe të ketë gjithë përfshirje edhe për këta fëmijë”, tha Nekoviqi.

Nxënësja Rubikë Hasani, foli për dashurinë dhe respektin që duhet t’iu jepet fëmijëve më këtë sindromë.

“Sot është dita e fëmijëve me Down Sindrom dhe ne jemi të vetëdijshëm që atyre duhet t’iu japim dashuri, respekt dhe shumë të tjera”, tha nxënësja Hasani.

I pranishëm ishte edhe kryetari i Komunës së Prishtinës, Përparim Rama, me ç’rast tha se është duke punuar në disa projekte në ndihmë për komunitetin.

“Me moton ‘Ec me ne’, ne jemi së bashku dhe do të ecim së bashku me juve. Si rezultat i kësaj i kemi edhe disa projekte të cilat tash janë në përfundim e sipërm, për shembull, shtëpitë, ndërtesa për Down Syndrome ku përveç kësaj do të kemi një bashkëpunim të plotë me të gjitha organizatat joqeveritare që t’i ndihmojmë këtij komuniteti që të jetë dhe të ndihet si pjesë e të gjithë komunitetit[…]Ne jemi me ju, ne do të ecim me ju dhe do të bëjmë çfarë do që është e mundur, po ashtu në aspektin e arsimit tash kemi edhe 15 asistentë shtesë që të ndihmojnë personat me Down Syndrome. Pra kemi një mori projektesh, me të cilat Komuna e Prishtinës merret që ti ndihmojë komunitetit”, tha Rama.

Sot për Ditën Botërore të Sindromës Down do të marshohet nga Kuvendi i Kosovës deri tek sheshi “Zahir Pajaziti”. Pjesë e marshit do të jetë edhe presidentja, Vjosa Osmani.

Motoja “ Ec Me Këpucët e Mia” bart mesazhin mbi sfidat nëpër të cilat kalon një person me sindromë Down.

21 marsi shënon Ditën Botërore të Sindromës Down. Në këtë ditë personat me këtë sindromë, të afërmit e tyre, organizatat që punojnë për këtë çështje, organizojnë dhe marrin pjesë në aktivitete që synojnë rritjen e ndërgjegjësimit të publikut për sindromën Down.

Sindroma Down ndodh kur një individ ka një kopje shtesë të pjesshme ose të plotë të kromozomit 21.

Në dhjetor 2011, Asambleja e Përgjithshme e OKB-së shpalli 21 Marsin si Ditën Botërore të Sindromës Down.

Incidenca e vlerësuar e sindromës Down është midis 1 në 1000 deri në 1 në 1100 lindje të gjalla në mbarë botën. Çdo vit, rreth 3,000 deri në 5,000 fëmijë lindin me këtë çrregullim kromozomik.

Lajmet

Tërmet në Shqipëri

Published

14 minutes ago

June 24, 2025

UBTnews

Lëkundje të forta tërmeti janë ndjerë në Shqipëri në orët e para të mëngjesit të sotëm.

Sipas Qendrës Sizmologjike (EMSC), tërmeti i parë me magnitudë 4.5 është regjistruar në ora 05:04, 16 kilometra në veriperëndim të Tiranës.

Pas këtij tërmeti janë regjistruar edhe lëkundje të tjera, por me magnitudë më të vogël, 2.2, 2.6 pastaj 3.0 dhe 3.4.

Ky i fundit është regjistruar në ora 05:45, 20 kilometra në veriperëndim të Tiranës.

Deri tani nuk është raportuar për të lënduar ose dëme materiale.

Lajmet

KQZ: Më 3 korrik fillon afati për përmirësimin e Listës Votuese dhe largimin e personave të vdekur

Published

19 hours ago

June 23, 2025

UBTnews

Komisioni Qendror i Zgjedhjeve ka njoftuar se periudha për kundërshtimin e pasaktësive në Listën Preliminare të Votuesve për Zgjedhjet Lokale për Kryetarë të Komunave dhe për Kuvende Komunale, do të fillojë më 3 korrik dhe do të përfundojë më 31 gusht 2025.

Gjatë kësaj periudhe 60 ditore, çdo person me të drejtë vote që nuk figuron në Listën Votuese, është caktuar gabimisht në qendër tjetër të votimit apo ka të dhëna të tjera të pasakta, mund të kërkojë nga KQZ rishikimin e saj: përmes platformës elekronike: https://qv.kqz-ks.org/sq, oseduke u paraqitur në Komisionin Komunal të Zgjedhjeve në komunën përkatëse.

Po ashtu, gjatë kësaj periudhe votuesi mund ta kundërshtojë pasaktësinë e Listës Preliminare të Votuese edhe për ndonjë emër të votuesit për të cilin pretendon se nuk duhet të figurojë në këtë listë, përfshirë edhe rastet kur në këtë listë figuron emri i ndonjë personi të vdekur. Në këtë rast, ankesa duhet të parashtrohet në Panelin Zgjedhor për Ankesa dhe Parashtresa.

Për të kundërshtuar pasaktësitë për Listën Preliminare të Votuesve, votuesi duhet të indentifikohet me njërin nga tri dokumentet: Letërnjoftim i vlefshëm; pasportë e vlefshme; leje e vozitjes e vlefshme.

Lajmet

Njësia A5 e TC Kosova A rikthehet në operim

Published

19 hours ago

June 23, 2025

UBTnews

Korporata Energjetike e Kosovës (KEK) njofton opinionin publik se sot, më 23.06.2025, njësia A5 e Termocentralit Kosova A është sinkronizuar me rrjetin elektroenergjetik rreth orës 10:03 të mëngjesit, duke shënuar një rikthim të suksesshëm në operim, pas realizimit të një sërë ndërhyrjesh dhe sanimesh teknike të domosdoshme.

Procesi i startimit të njësisë kishte filluar këtë mëngjes, pasi kishin përfunduar me sukses të gjitha ndërhyrjet e planifikuara, në kohë dhe me cilësi të lartë teknike.

Punimet e realizuara përfshijnë:

Sanimin e rrjedhjeve në ritejnxehëse (i përfunduar të premten);
Sanimin e rrjedhjeve në ekonomajzer (ngrohës i ujit) dhe në ekranet e kaldajës (i përfunduar të dielën);
Pastrimin me pompë presioni të ftohësve të hidrogjenit;
Pastrimin e komorave në hyrje të kondenzatorit;
Punime mirëmbajtëse në pajisjet e sistemit MRRK;
Pastrimin e kuotave rreth kaldajës nga materiale të huaja – për rritje të sigurisë dhe efikasitetit operacional.

Ky rikthim në operim konfirmon edhe një herë kapacitetin dhe gatishmërinë e ekipeve tona teknike, të cilat, me përkushtim profesional dhe koordinim të vazhdueshëm, siguruan një proces të suksesshëm dhe të qëndrueshëm të rikthimit të njësisë A5.

Kryeshefi Ekzekutiv i KEK sh.a., z. Gramos Hashani, ka falënderuar të gjithë punonjësit për angazhimin dhe përkushtimin e tyre:

“Edhe ky rast tregon përgjegjësinë që bartin punonjësit e KEK-ut, të cilët, edhe në ditë pushimi, nuk kursejnë as përpjekjet e as profesionalizmin për të mbështetur sistemin energjetik të vendit. Ju falënderoj për angazhimin dhe jam krenar për punën që keni bërë!”

Lajmet

Kriza politike, Murati fajëson partitë tjera: Po ju konvenon kjo situatë

Published

20 hours ago

June 23, 2025

UBTnews

Deputeti i Lëvizjes Vetëvendosje, Hekuran Murati ka vazhduar akuzat ndaj partive parlamentare që deri tani ishin në opozitë për krizën politike në vend.

Ai pas dështimit për herë të 36-të të konstituimit të legjislaturës së nëntë, tha se Kosova po humbet para nga Banka Botërore si pasojë siç tha ai të qasjes bllokuese të partive që deri tani ishin në opozitë.

Murati shtoi nevojën që Gjykata Kushtetuese të dal më shpejt me një aktgjykim në lidhje me kushtetutshmërinë e votimit të fshehtë të kryeparlamentarit.

“E dëgjuam pak më parë deputeten Bajrami më parë se tha se ky vakum ju konvenon keqbërëseve. Pyetja ime do të ishte se apo i bie që meqenëse opozita po e mundëson këtë bllokadë a janë ata keqbërësit. Atyre po iu konvenon kjo situatë. Ata që bllokojnë tentojnë të fajësojnë të tjerët për bllokada. Uroj dhe besoj se së shpejti të kemi një mendim apo aktgjykim nga Gjykata Kushtetuese që të rikonfirmohet se votimi i fshehtë ashtu siç është thënë në vitin 2014 të jetë një prej mënyrave që mund të përdoret nga deputetët. Po ashtu uroj dhe shpresoj që nuk do të ketë diktat dhe shkelje të kushtetutës dhe ligjeve nga kryetarët e partive që siç kemi dëgjuar kanë tendenca autoritare që të shfaqin votën e fshehtë në publik që do të ishte në shkelje të parimeve demokratike”, tha ai.