Për vitin e kaluar, Kombet e Bashkuara vlerësojnë se deri në 1,400 njerëz u vranë në protestat anti-qeveritare në Bangladesh, shumica prej tyre nga forcat e sigurisë. Hetuesit e OKB-së akuzojnë qeverinë e rrëzuar të Sheikh Hasina për një përgjigje brutale, që mund të përbëjë “krime kundër njerëzimit”.

Ata zbuluan një politikë zyrtare për sulmimin dhe shtypjen me dhunë të protestuesve dhe simpatizantëve të opozitës, për të mbajtur pushtetin përballë kundërshtimeve masive, shkruan BBC.

Sheikh Hasina, që kishte qenë në pushtet për 15 vite, iku me helikopter në Indi pak para se turma të pushtonte vendbanimin e saj. Qindra të tjerë u plagosën në dhunën më të keqe që Bangladesh ka përjetuar që nga lufta e tij e pavarësisë në vitin 1971.

Protestat studentore kundër kuotave në punësimet në administratën shtetërore u shndërruan në një lëvizje të gjerë për të rrëzuar Hasinën dhe Partinë Awami, pas një sulmi brutal të policisë.

Hetuesit e OKB-së dokumentuan ekzekutimin e disa protestuesve me plumba në distancë të afërt, dëmtimin e qëllimshëm të të tjerëve, arrestime arbitrare dhe tortura.

Vlerësohet se deri në 13 për qind e viktimave ishin fëmijë, sipas raportit. Raporti u kërkua nga lideri i përkohshëm i Bangladesh, Muhammad Yunus.

Ndërkohë që shumicën e dhunës e atribuon forcat e sigurisë qeveritare, OKB gjithashtu shpreh shqetësime për sulme ndaj atyre që perceptohen si mbështetës të qeverisë së kaluar dhe ndaj disa grupeve fetare dhe etnike. Këto gjithashtu duhet të hetohen, thotë OKB.

Partia e Lirisë së ekstremit të djathtë (FPÖ) e Austrisë njoftoi sot se negociatat për të formuar një koalicion qeverisës me Partinë Popullore Konservatore (ÖVP) kanë dështuar.

Bisedimet ishin në terren të lëkundur për ditë të tëra, ndërsa të dy palët debatuan mbi një sërë çështjesh, nga politika e jashtme deri te shpërndarja e ministrive.

Kanë kaluar më shumë se 130 ditë nga zgjedhjet parlamentare të Austrisë në shtator dhe një qeveri nuk është formuar. Ky është një rekord për vendin.

Presidenti Alexander Van der Bellen muajin e kaluar ngarkoi Herbert Kickl, liderin e partisë antiimigruese dhe euroskeptike FPÖ, të formonte një qeveri pasi partia arriti një fitore relative në zgjedhjet në shtator. Nëse do të ishte arritur një marrëveshje koalicioni, Kickl do të ishte kancelari i parë nga e djathta ekstreme.

Kickl informoi presidentin se negociatat ishin ndërprerë dhe ktheu mandatin për të formuar një qeveri, njoftoi partia e tij.

“Megjithëse FPÖ i erdhi në ndihmë ÖVP-së në shumë pika, për keqardhjen tonë, negociatat në fund nuk u kurorëzuan me sukses,” shkroi Kickl në një letër drejtuar Van der Bellen.

Mbretëria e Bashkuar planifikon të sigurojë 150 milionë paund të tjera (185.8 milionë dollarë) ndihmë ushtarake për Ukrainën.

Sipas raportit, ndihma do të përfshijë drone, tanke dhe sisteme të mbrojtjes ajrore. Mbretëria e Bashkuar njoftoi paketën e ndihmës në hapjen e takimit të Grupit të Kontaktit të Mbrojtjes së Ukrainës në Bruksel, të cilin Londra e kryeson për herë të parë.

Sipas Times, administrata e presidentit amerikan Donald Trump i ka kërkuar Londrës të udhëheqë grupin e kontaktit. Sipas Associated Press, Sekretari i Mbrojtjes i emëruar së fundmi i SHBA-së, Pete Hegseth, nuk do të shpallë ndihmë të re ushtarake për Ukrainën gjatë udhëtimit të tij në Bruksel.

“NATO duhet të jetë një forcë edhe më vdekjeprurëse”. Kështu është shprehur Sekretari i ri i Mbrojtjes i Shteteve të Bashkuara, Pete Hegseth në vizitën e tij të parë në Europë. I pranishëm në Samitin e Brukselit për luftën në Ukrainë, Shefi i Pentagonit i ka bërë thirrje NATO-s të ndryshojë kursin.

“NATO duhet të jetë një forcë më e fortë, më vdekjeprurëse – jo një klub diplomatik”, shkroi ai në X.

Shefi i ri i Pentagonit ndodhet në Bruksel për vizitën e tij inauguruese. Ai donte të merrte pjesë në një takim të ministrave të Mbrojtjes të më shumë se 50 vendeve që mbështesin Ukrainën në selinë e NATO-s pasdite.

I ashtuquajturi grupi i kontaktit takohet për herë të parë nën udhëheqjen e Britanisë së Madhe, pasi SHBA nën Presidentin Donald Trump hoqën dorë nga drejtimi i tij. Të martën, Hegseth vizitoi bazat ushtarake amerikane në Gjermani. Atje ai njoftoi se donte të fliste “qartë” me aleatët e NATO-s.

Presidenti Donald Trump ka “të drejtë” kur kërkon investime në mbrojtje prej pesë për qind të prodhimit të brendshëm bruto (PBB)nga evropianët, tha shefi i ri i Pentagonit në Shtutgart. Vetë Evropa duhet të kontribuojë më së shumti në mbrojtjen e fqinjësisë së saj, tha ai, duke iu referuar Ukrainës.

Hegseth hodhi poshtë frikën për një tërheqje të rreth 100,000 trupave amerikane nga Evropa. “Nuk ka aktualisht asnjë plan në përgatitje për të shkurtuar ndonjë gjë”, theksoi ai.

Megjithatë, SHBA-ja dëshironte të “rivlerësonte praninë e saj ushtarake në mbarë botën” në mënyrë që të ishte në gjendje të përqendrohej më shumë në ambiciet e Kinës në Indo-Paqësorin.

Hegsesh gjithashtu bëri të ditur se Shtetet e Bashkuara nuk do të dërgojnë trupa ushtarake në Ukrainë. Sakaq, burime diplomatike për Agjencinë Ndërkombëtare të Lajmeve Reuters, bëjnë me dije se, administrata Trump planifikon të nxisë aleatët evropianë që të blejnë më shumë armë amerikane për Ukrainën përpara bisedimeve të mundshme të paqes me Moskën, një veprim që mund të përmirësojë pozicionin negociator të Kievit.

Plani, nëse zyrtarizohet, do të ofrojë njëfarë sigurie për liderët ukrainas, të cilët janë shqetësuar se presidenti Donald Trump mund të bllokojë ndihmën e mëtejshme për vendin, ushtria e të cilit ka humbur ngadalë territorin nën sulmin e ashpër rus në lindje. Vendet evropiane më parë kishin blerë armë amerikane për Ukrainën gjatë administratës së Bidenit.