Një gjykatë në Britani ka dënuar ish-ushtarin Daniel Khalife me 14 vjet e tre muaj burgim për spiunim për Iranin dhe arratisje nga burgu.

Khalife, i cili ishte arratisur nga burgu më 2023, nëntorin e vitit të kaluar ishte gjetur fajtor për spiunim për Teheranin.

Gjykatësja Kaur Cheema-Grubb, gjatë shqiptimit të dënimit më 3 shkurt e përshkroi Khalifen si një “budalla të rrezikshëm” i cili fillimisht u nxit “nga dëshira për t’u mburrur” sesa për të dëmtuar interesat e Mbretërisë së Bashkuar.

“Vet fakti që keni nisur një plan kaq të rrezikshëm tregon papjekurinë tuaj dhe mungesën e mençurisë”, tha Cheema-Grubb.

Khalife, 23-vjeçari i lindur në Londër, iu bashkuar ushtrisë britanike më 2017. Pak kohë pas kësaj, ai nisi të mblidhte informacione të ndjeshme dhe t’i ndante me agjentët iranianë. Për këtë shërbim ai ishte paguar me para të gatshme dhe u kishte thënë bashkëpunëtorëve të tij iranianë se ai do të ngjitej në gradat në ushtri “me lehtësi”.

Khalife u arratis nga burgu Vansvord i Londrës në shtator të vitit 2023 në kohën kur po priste nisjen e gjykimit. Ai qëndroi në arrati për tri ditë, para se të kapej nga autoritetet./REL/

Përfaqësuesja e Lartë e BE-së për Politikën e Jashtme dhe Sigurinë, Kaja Kallas tha sot se nëse SHBA-ja fillon një luftë tregtare me BE-në, Kina do të jetë ajo që do të dalë e kënaqur nga gjithë kjo situatë.

Lidhur me njoftimin e presidentit amerikan Donald Trump se SHBA do të vendosë së shpejti tarifa për mallrat e importuara nga BE, Kallas theksoi se nuk ka fitues në luftërat tregtare.

“Nëse SHBA fillon një luftë tregtare, atëherë Kina është ajo që qeshë mënjanë. Ne jemi shumë të ndërlidhur. Ne kemi nevojë për Amerikën dhe Amerika ka nevojë për ne. Tarifat rrisin kostot. Ato nuk janë të mira për punë, nuk janë të mira për klientët. Kjo është e qartë”, u tha Kallas gazetarëve pas mbërritjes në një takim jozyrtar të liderëve të BE-së për mbrojtjen evropiane.

Ajo shtoi se mbrojtja evropiane është e lidhur ngushtë me NATO-n dhe vlerësoi se nevojitet një bashkëpunim më i fortë i BE-së me NATO-n, si dhe se marrëdhëniet me SHBA-në dhe Britaninë e Madhe janë “jashtëzakonisht të rëndësishme” për forcimin e mbrojtjes evropiane .

Presidenti amerikan Donald Trump njoftoi më herët sot se së shpejti do të vendosë tarifa për mallrat e importuara në SHBA nga Bashkimi Evropian dhe nuk e përjashtoi një masë të tillë kundër Britanisë së Madhe.

Euro ka pësuar një rënie të ndjeshme në kursin e këmbimit këtë javë, duke arritur nivelin më të ulët që nga nëntori i vitit 2022, mes shqetësimeve për përshkallëzimin e tensioneve tregtare ndërmjet Shteteve të Bashkuara dhe disa shteteve të tjera.

Kursi i këmbimit të euro ka rënë në 1,0245 dollarë për një euro, duke shënuar një rënie prej më shumë se një cent në krahasim me vlerën e fundit të mbrëmjes së të premtes. Kjo ulje e vlerës së euro është një pasojë e ngjarjeve të fundit, që përfshijnë një përshkallëzim të tensioneve tregtare dhe vendosjen e tarifave të reja nga ana e SHBA-së.

Euro ka filluar të jetë nën presion që nëntorin e kaluar, pas zgjedhjes së Donald Trump si president i SHBA-së, kur shkëmbimi i euro për dollar u tregtua mbi 1,09 dollarë. Një tjetër faktor që ka ndikuar në këtë zhvillim janë masat e fundit që Trump ka ndërmarrë, përfshirë tarifat prej 25% për importet nga Meksika dhe Kanada, dhe 10% për të gjitha importet kineze. Këto tarifa do të hyjnë në fuqi të martën, pas një urdhri të lëshuar nga Trump të shtunën.

Gjatë një deklarate të bërë të premten, Trump u pyet nëse do të vendoste tarifa edhe për produktet e importuara nga Bashkimi Europian. Ai përgjigj në mënyrë të drejtpërdrejtë, duke thënë “sigurisht,” duke shtuar kështu mundësinë e përhapjes së tensioneve tregtare në tregun global dhe ndikimin e tij të mundshëm mbi vlerën e monedhës europiane.

Kjo situatë ka ngritur shqetësime për perspektivat ekonomike të eurozonës, ndërkohë që një rënie e mëtejshme e euros mund të sjellë pasoja për eksportet dhe politikën e brendshme financiare të vendeve të eurozonës./UBTNews/

Britania ka një marrëdhënie tregtare “të drejtë dhe të balancuar” me SHBA-në, ka thënë një zëdhënës i qeverisë.

Sipas mediave të huaja, pasi presidenti amerikan Donald Trump sugjeroi se ai është gati të zgjerojë regjimin e tij tarifor si në Mbretërinë e Bashkuar ashtu edhe në BE, ka pasur frikë rreth perspektivës së afërt të një lufte tregtare.

Duke folur për njoftimin, zëdhënësi i qeverisë tha: “SHBA është një aleat i domosdoshëm dhe një nga partnerët tanë më të afërt tregtar dhe ne kemi një marrëdhënie tregtare të drejtë dhe të ekuilibruar nga e cila përfitojnë të dyja anët e Atlantikut.

“Ne presim të punojmë ngushtë me Presidentin Trump për të vazhduar ndërtimin e marrëdhënieve tregtare MB-SHBA për ekonominë, bizneset dhe popullin britanik”, tha ai më tej, shkruan A2 CNN.

Trump ka thënë se tarifat për importet nga Evropa po vijnë dhe nuk përjashtoi vendosjen e tarifave për mallrat e Mbretërisë së Bashkuar, por gjithashtu tha se situata me Britaninë “mund të zgjidhet”.