Sot, më 9 tetor, festohet Dita Botërore e Postës, një ngjarje e rëndësishme që shënon themelimin e Unionit Universal Postar (UPU) në vitin 1874 në Bernë, Zvicër. Kjo ditë u caktua në vitin 1969 nga Kongresi i UPU-së në Tokio dhe ka si qëllim të ndërgjegjësojë njerëzit për rolin e rëndësishëm që ka posta në jetën e përditshme dhe në zhvillimin social-ekonomik të vendeve anëtare.

Historiku i postës në Kosovë ka filluar që nga periudha osmane, kur shërbimet postare filluan të organizoheshin. Pas Luftës së Dytë Botërore, sistemi postar u modernizua dhe gjatë kohës së Jugosllavisë Socialiste, u krijuan zyrat postare në shumë qytete. Pas luftës në vitin 1999, Posta e Kosovës u themelua nga UNMIK në vitin 2000 dhe ka vazhduar të zhvillohet, duke ofruar një gamë të gjerë shërbimesh moderne për qytetarët dhe bizneset.

Me rastin e Ditës Botërore të Postës, Posta e Kosovës shpreh mirënjohje për të gjithë qytetarët, partnerët, institucionet dhe punonjësit e saj për përkrahjen dhe kontributin e tyre të vazhdueshëm. Posta e Kosovës siguron që çdo letër, pako dhe transaksion financiar të arrijë me shpejtësi dhe siguri. Përmes rrjetit të saj të gjerë dhe shërbimeve moderne, ajo luan një rol të rëndësishëm në komunikim dhe zhvillim ekonomik, duke ndihmuar qytetarët dhe institucionet në arritjen e qëllimeve të tyre.

“Si partner i besuar në jetën tuaj të përditshme, Posta e Kosovës garanton që çdo letër, pako dhe transaksion financiar të arrijë shpejt, me siguri dhe përkushtim. Përmes rrjetit tonë të gjerë dhe shërbimeve moderne, ne luajmë një rol kyç në komunikim dhe zhvillimin ekonomik të vendit, duke ndihmuar qytetarët, bizneset dhe institucionet në realizimin e qëllimeve të tyre.Në këtë botë gjithnjë e më të ndërlidhur, Posta e Kosovës mbetet partneri juaj i besuar, duke qëndruar pranë çdo qytetari, biznesi dhe institucioni, duke ju shërbyer me krenari çdo ditë. Së bashku për një të ardhme të ndritur – Posta e Kosovës, gjithmonë me ju në çdo hap!“, shkruhet nga Posta e Kosovës./UBTNews/

Byroja Federale amerikane e Hetimeve (FBI) ka arrestuar një burrë afgan, për të cilin zyrtarë nga Departamenti i Drejtësisë thonë se ishte frymëzuar nga organizata militante Shteti Islamik dhe po planifikonte një sulm në Ditën e Zgjedhjeve, duke synuar turma të mëdha në SHBA.

Nasir Ahmad Tawhedi, 27 vjeç, nga Oklahoma City, u tha hetuesve pas arrestimit të tij se kishte planifikuar që sulmi i tij të përkonte me Ditën e Zgjedhjeve muajin e ardhshëm dhe se ai dhe një bashkëpunëtor prisnin të vdisnin si martirë, sipas aktakuzës.

Tawhedi, i cili mbërriti në SHBA në shtator të vitit 2021, kishte ndërmarrë disa hapa në javët e fundit për të avancuar planet e tij për sulmin, përfshirë këtu porositjen e pushkëve AK-47, likuidimin e pasurive të familjes dhe blerjen e biletave për gruan dhe fëmijën e tij për t’u kthyer në Afganistan, thanë zyrtarët.

Arrestimi vjen ndërsa FBI-ja përballet me shqetësime të rritura për mundësinë e dhunës ekstreme në territorin amerikan, me drejtorin Christopher Wray që i tha Associated Press në gusht se nuk mund ta kujtonte një kohë në karrierën e tij kur kishte kaq shumë kërcënime të ndryshme njëkohësisht.

“Terrorizmi mbetet prioriteti numër një i FBI-së dhe ne do të përdorim çdo burim për ta mbrojtur popullin amerikan”, tha Wray në një deklaratë të martën.

FBI-ja nuk zbuloi saktësisht se si Tawhedi ra në radarin e hetuesve, por përmend provat që tregojnë përkushtimin e tij në planifikimin e sulmit. Një fotografi nga korriku, e përfshirë në aktakuzë, tregon një burrë që hetuesit e identifikuan si Tawhedi duke lexuar për dy fëmijë të vegjël, përfshirë vajzën e tij, “një tekst që përshkruan shpërblimet që një martir merr në jetën e përtejme”.

Zyrtarët thonë se Tawhedi gjithashtu konsumoi propagandë të Shtetit Islamik, kontribuoi në një bamirësi që shërben në mënyrë të fshehtë për grupin militant dhe komunikoi me një person që FBI-ja tha se ishte i përfshirë në rekrutimin dhe indoktrinimin e njerëzve të interesuar për ekstremizëm.

Bashkëpunëtori i supozuar i Tawhedit nuk u identifikua nga Departamenti i Drejtësisë, që e përshkroi atë vetëm si një i mitur, shtetas afgan dhe vëllai i gruas së Tawhedit.

Pasi të dy reklamuan shitjen e pronës personale në Facebook, FBI-ja përdori një informator muajin e kaluar për t’iu përgjigjur ofertës dhe për të krijuar një lidhje komunikimi me ta. Informatori më vonë i ftoi ata në një poligon qitjeje, ku ata porositën armë nga një agjent i fshehtë i FBI-së që po shtirej si partner biznesi, sipas dokumenteve të gjykatës.

Tawhedi u arrestua të hënën pasi mori në posedim dy pushkë AK-47 dhe municionin që kishte porositur, thanë zyrtarët. Bashkëpunëtori i paidentifikuar gjithashtu u arrestua, por Departamenti i Drejtësisë nuk dha detaje për shkak se ai është i mitur.

Pasi u arrestua, Departamenti i Drejtësisë tha se Tawhedi u tha hetuesve se kishte planifikuar një sulm për Ditën e Zgjedhjeve që do të synonte turma të mëdha njerëzish.

Tawhedi u akuzua për komplot dhe përpjekje për të ofruar mbështetje materiale për Shtetin Islamik, që është përcaktuar nga SHBA-ja si një organizatë e huaj terroriste. Dënimi për këtë akuzë është deri në 20 vjet burgim.

Ai u paraqit në gjykatë të martën dhe u urdhërua të mbahej në paraburgim.

Një grua që e identifikoi veten si gruaja e Tawhedi refuzoi të diskutojë për rastin.

“Nuk duam të flasim me mediat”, tha gruaja, e cila nuk dha emrin e saj.

Tawhedi hyri në SHBA me një vizë speciale imigrimi në vitin 2021 dhe ka qenë me lejeqëndrim të përkohshëm, në pritje të përfundimit të procedurave të tij të imigracionit, tha Departamenti i Drejtësisë.

Shawn VanDiver, president i #AfghanEvac, një koalicion organizatash të përkushtuara për të ndihmuar afganët që përpiqen të largohen nga Afganistani, tha se edhe pse akuzat janë serioze, “është e rëndësishme që të mos fajësojmë një komunitet të tërë për veprimet e një individi. Mijëra afganë që u vendosën në Shtetet e Bashkuara po punojnë për të ndërtuar jetë të reja dhe për të kontribuar në të ardhmen tonë të përbashkët”.

“Këta janë të njëjtët individë që qëndruan krah për krah me ne në Afganistan për më shumë se dy dekada, duke mbrojtur vlerat që ne i çmojmë”, tha ai në një deklaratë. “Tani, ata janë fqinjët tanë dhe ne duhet t’i mbështesim ata ndërsa kërkojnë siguri dhe stabilitet në shtëpinë e tyre të re”./REL/

Grupi “Besa Besë” ka reaguar ndaj vendimit të Qeverisë së Kosovës për heqjen e kufizimeve të mallrave serbe, duke shprehur shqetësim për këtë zhvillim. Në një komunikatë për media, grupi e cilëson vendimin si të ngutshëm dhe që nuk përmbush objektivat e parashikuara, veçanërisht ato që lidhen me reciprocitetin.

Sipas “Besa Besë”, Serbia ka vendosur barriera jo tarifore për produktet kosovare për 25 vite, duke e penguar zhvillimin e tregtisë ndërkufitare. Grupi thekson se mallrat serbe që shiten në Kosovë nuk shënojnë emrin “Republika e Kosovës”, por vetëm “Kosovo”, duke e përjashtuar njohjen e shtetësisë kosovare. Po ashtu, ata akuzojnë Serbinë se ka bllokuar tranzitin e produkteve me origjinë shtazore nga Kosova drejt Evropës.

“Qeveria e Kosovës nuk duhej të heqë ndalesat derisa këto barriera të rregullohen nga Serbia,” theksohet në komunikatë. Grupi shpreh shqetësim për situatën e rëndë ekonomike dhe sociale në Kosovë, duke përmendur largimin masiv të qytetarëve dhe vështirësitë me të cilat përballet sektori privat.

Për të reaguar ndaj kësaj situate, grupi “Besa Besë” i bën thirrje qytetarëve të Kosovës për të bojkotuar produktet serbe. “Askush nuk e ka vuajtur më shumë se qytetarët e Kosovës pasojat e regjimit të Milloshoviqit. Prandaj, vendimi qytetar është më i rëndësishëm se çdo vendim qeveritar,” përfundon komunikata, duke i inkurajuar qytetarët të ruajnë integritetin dhe mirëqenien e vendit të tyre./UBTNews/

Kosova do të përfaqësohet nga Ministria e Industrisë, Ndërmarrësisë dhe Tregtisë në mbledhjen e nesërme të gjashtë vendeve të rajonit në CEFTA. Megjithëse përmes fusnotës, në Lëvizjen Vetëvendosje e konsiderojnë sukses përfaqësimin e Kosovës në CEFTA pa UNMIK-un.

Sipas partisë në pushtet në mbledhjen e nesërme pritet të miratohen një grup marrëveshje teknike që janë diskutuar me muaj të tërë të cilat lehtësojnë tregtinë e lirë për vendet e rajonit. Në anën tjetër, në Partinë Demokratike të Kosovës thonë se largimi i masave të sigurisë për mallrat serbe si kundërvlerë e përfaqësimit të Kosovës në CEFTA është e pamjaftueshme. Ndërkaq, njohës të proceseve rajonale e mirëpresin vendimin e qeverisë për heqjen e bllokadës për mallrat serbe për lehtësimin e tregtisë së lirë dhe arritjen e suksesit të plotë të CEFTA-s dhe Procesi të Berlinit.

Shefja e Grupit Parlamentar të Lëvizjes Vetëvendosje, Mimoza Kusari-Lila, thotë se pas vendimit të djeshëm për heqjen e masës së sigurisë për mallrat serbe vetëm përmes pikës kufitare në Merdarë është plotësuar kërkesa gjermane që CEFTA dhe Procesi i Berlinit të kenë sukses të plotë.

“Kosova do të ketë përfaqësimin e saj, jo më përmes UNMIK-ut nga dita e nesërme, përderisa në agjendë janë një grup marrëveshjes teknike që janë diskutuar me muaj të tërë, por për shkak të mospjesëmarrjes sonë dhe disa çështje të tjera atje nuk ka pasur vendimmarrje. Pritet që këto vendime të miratohen nesër…Vet mekanizmi i CEFTA-s si mekanizëm lehtësues për tregtinë e lirë për vendet e rajonit dhe vendet që aspirojnë anëtarësimin në Bashkimin Evropian parasheh lehtësinë përmes zbutjes së ngarkesave apo burokracisë që ekziston përmes shteteve. Por, gjithashtu edhe adaptimin e standardeve teknike për të cilat vendet e BE-së i kanë qoftë për kualitetin e mallrave apo standardeve që duhet të aplikohen për ofrimin e shërbimeve. Tashmë këto kalojnë në nivel teknik, ndërsa përfaqësimi i shteteve është në nivel politik. Prej nesër e tutje s’ka më përfaqësues të UNIMIK-ut që do të jetë atje bashkë me Kosovën”, deklaron ajo.

Kusari-Lila shton se Kosova do të përfaqësohet nga MINT, mirëpo nuk dihet a do të jetë në nivel teknik apo politik të përfaqësimit të tyre.

“Sipas diskutimit të marrëveshjeve rajonale kjo është e fundit që emri i Kosovës do të jetë me asterisk por në cilin nivel në aspektin e përfaqësimit politik ende nuk është e qartë, do të varet sesi shtetet në tërësi e kanë përfaqësimin e tyre. A janë të gjitha në nivele politike apo në nivele teknike të zyrtarëve të tjerë. Në këtë rast nga Kosova do të jetë e përfaqësuar nga Ministria e Industrisë, Ndërmarrësisë dhe Tregtisë”, thekson Kusari-Lila.

Mirëpo, nënkryetarja e PDK-së, Mimoza Ahmetaj, thotë se qeveria kishte synuar që ta kushtëzojë BE-në me idenë që përmes bllokimit të mallrave serbe të hiqen sanksionet ekonomike dhe politike, por pranoi që vetëm përmes përfaqësimit në CEFTA me asterisk të largoi masat ndaj mallrave serbe.

“Nesër Kosova do të merrë pjesë në takimin e CEFTA-s. Ne kishim synuar që ta kushtëzojmë BE me idenë që përmes bllokimit të mallrave serbe të na hiqen sanksionet ekonomike dhe politike por fatkeqësisht përfunduam duke u pajtuar me asteriskun qe aq shumë i jemi kundërvënë”, thotë ajo.

Ndërkaq, analisti politik, Visar Ymeri thotë se qeveria ka vepruar mirë që ka larguar masën e sigurisë ndaj mallrave serbe, pasi konsideron se bashkëpunimi rajonal është i rëndësishëm për vendin.

Sipas tij, ekzekutivi ka bërë mirë që ka adresuar çështjen e skanerëve pasi brengat për çështje të sigurisë janë marrë parasysh. Ai thekson se Kosova të vetmit mekanizma për bashkëpunim rajonal i ka përmes CEFTA-s dhe Procesit të Berlinit.

“Shumë mirë që çështja e skanerëve është adresuar, shumë mirë që brengat dhe shqetësimin e Kosovës për çështje të sigurisë janë marrë parasysh, por Kosova tash është në pozicion që duhet të vendosë. A po dëshiron të jetë pjesë e këtij bashkëpunimi rajonal apo do të përjashtojë vetën. Arsyetime dhe pengesa mundesh me gjetë gjithë. Politika nuk është me gjetë pengesa por zgjidhje. Natyrisht me bërë edhe kompromise për qëllime tua strategjike”, thekson ai.

Ministria e Punëve të Brendshme dje ka autorizuar Doganën e Kosovës që të hiqen masat e sigurisë për mallrat serbe që arrijnë përmes pikës kufitare në Merdarë.

Kryeministri Albin Kurti deklaroi se pas një veprimi të tillë janë përmbushur kërkesat e aleatëve që CEFTA dhe Procesi i Berlinit të kenë sukses të plotë.

Vendimin e qeverisë e mirëpritën ambasadori amerikan në Kosovë, Jeffrey Hovenier dhe ambasadori i Gjermanisë, Jorn Rohde./UBTNews/