Major League Soccer (MLS) ka publikuar listën zyrtare të dhjetë futbollistëve më të paguar për sezonin 2026. Siç pritej, lista kryesohet bindshëm nga ylli argjentinas Lionel Messi, por ka edhe emra të rinj që kanë hyrë në “top-listën” e milionerëve të futbollit amerikan.

Dominimi i Messit dhe ndjekësit e tij Tetë herë fituesi i Topit të Artë, Lionel Messi, mbetet lojtari më i paguar në historinë e ligës me një pagë prej 28.3 milionë dollarësh. Diferenca me ndjekësit është e jashtëzakonshme; në vendin e dytë renditet jug-koreani Son Heung-min, i cili përfiton 11.2 milionë dollarë, i ndjekur nga kampioni i botës Rodrigo De Paul me 9.7 milionë.

Përveç emrave të njohur si Emil Forsberg e Riqui Puig, dhjetëshen e mbyll Hany Mukhtar me një pagë prej 5.4 milionë dollarësh në sezon.

 1.Lionel Messi – 28.3 milionë dollarë

2.Son Heung-min – 11.2 milionë dollarë

3.Rodrigo De Paul – 9.7 milion dollarë

4.Hirving Lozano – 9.3 milionë dollarë

5.Miguel Almiron – 7.9 milionë dollarë

6.Emil Forsberg – 6 milionë dollarë

7.Sam Surridge – 5.9 milionë dollarë

8.Riqui Puig – 5.8 milionë dollarë

9.Jonathan Bamba – 5.6 milionë dollarë

10.Hany Mukthar – 5.4 milionë dollarë

Kur lideri kinez, Xi Jinping, të presë homologun e tij amerikan në Pekin këtë javë, Donald Trump do të kujtojë vizitën e tij të fundit në vitin 2017. Atëbotë, ai u prit me të gjitha nderet, përfshirë një darkë brenda “Qytetit të Ndaluar” – një privilegj që asnjë president tjetër amerikan nuk e kishte gëzuar më parë.

Pritja e kësaj jave premton të jetë po aq madhështore, duke përfshirë edhe një ndalesë në Zhongnanhai, rezidenca ekskluzive ku jeton dhe punon udhëheqja e lartë kineze. Megjithatë, agjenda mbetet po aq e vështirë: Irani është bërë burim i ri tensioni, krahas temave të vjetra si tregtia, teknologjia dhe Tajvani.

Por shumëçka ka ndryshuar. Trump po kthehet në një Kinë që është bërë shumë më e fuqishme dhe më këmbëngulëse. Tani, i sigurt në mandatin e tij të tretë historik, një Xi ambicioz po shtyn përpara planet për “forcat e reja prodhuese”, me investime kolosale në energjinë e renovueshme, robotikë dhe inteligjencë artificiale.

Nëse presidenti amerikan dëshiron të shohë të ardhmen që Pekini ka synuar gjatë dekadës së fundit, ai duhet të shikojë përtej mureve të kryeqytetit ku do të kalojë pjesën më të madhe të kohës.

Në veriun e largët dhe të thyer, panelet solare dhe turbinat e erës tani dominojnë peizazhet e pafundme. Në jugun industrial, automatizimi po riformëson fabrikat, ndërsa metropolet si Chongqing janë kthyer në sensacione të rrjeteve sociale. Miliarda dollarë fonde shtetërore e kanë shndërruar Chongqing-un nga një qendër e thjeshtë prodhimi, në një simbol të fuqisë teknologjike dhe një Kinë që po përpiqet t’i tregojë botës një fytyrë më miqësore e moderne.

Ali Wyne, këshilltar i lartë për marrëdhëniet SHBA-Kinë në “International Crisis Group”, thotë se në vitin 2017 Kina po përpiqej të provonte se ishte e barabartë me SHBA-në. “Këtë herë, Kina nuk e ka më të nevojshme ta vërtetojë këtë,” thotë Wyne. Washingtoni tashmë e pranon Kinën si një rival thuajse të barabartë, duke e përshkruar Pekinin si “ndoshta konkurrentin më të fuqishëm me të cilin Shtetet e Bashkuara janë përballur në historinë e tyre”.

‘Amerika e Para’ përballë planeve afatgjata të Kinës

Nga ana tjetër, Trump mbetet lideri i huaj më i paparashikueshëm që Kina ka njohur ndonjëherë. Ai ka madje edhe një nofkë atje: Chuan Jianguo, që do të thotë “Trump, ndërtuesi i kombit”. Shumë kinezë besojnë se politikat e tij përçarëse dhe luftërat tregtare në fakt e kanë ndihmuar ngritjen e Kinës duke dobësuar qëndrimin global të Amerikës.

“Ai nuk shqetësohet fare për pasojat,” thotë një burrë në moshë të mesme, pushues në Chongqing. “Ai duhet ta dijë se ne ndajmë të njëjtën botë. Është një fshat global. Ai nuk duhet të vendosë gjithmonë Amerikën të parën.”

Ai refuzon të japë emrin e tij, teksa qëndron mes turmave që shijojnë pamjen e rrokaqiejve të ndriçuar me neon në Chongqing. /BBC/

Në raportin e fundit të Policisë së Kosovës, janë regjistruar tri raste të dhunës në familje, të cilat kanë çuar në arrestime dhe procedura ligjore disa persona në Graçanicë dhe Gjakovë.

Në Graçanicë, janë raportuar dy raste të ndara. Në rastin e parë, një person ka njoftuar policinë se është kanosur verbalisht nga një grua, rast i cili po trajtohet në procedurë të rregullt. Ndërsa në rastin e dytë, një grua është arrestuar dhe dërguar në mbajtje pasi dyshohet se ka sulmuar fizikisht një burrë pas një mosmarrëveshjeje. Viktimës i është ofruar tretman mjekësor.

Ndërkohë, në Gjakovë, Policia ka arrestuar një burrë nën dyshimin për dhunë në familje. Me vendim të prokurorit, i dyshuari është dërguar në mbajtje për procedura të mëtejshme.

Sipas raportit zyrtar “Me vendim të prokurorit, rastet në Graçanicë dhe Gjakovë po trajtohen sipas procedurave, ku dy persona janë dërguar në mbajtje, ndërsa një rast vazhdon në procedurë të rregullt”.

Në raportin 24 orësh të Policisë së Kosovës, bëhet e ditur se është arrestuar një person në Podujevë nën dyshimin për veprën penale të dhunimit.

Sipas policisë, rasti dyshohet të ketë ndodhur muaj më parë, ndërsa i dyshuari tashmë është dërguar në mbajtje.

“Është arrestuar i dyshuari mashkull kosovar nën dyshimin se muaj më parë ka kryer veprën e cekur ndaj viktimës femër kosovare. Viktima është dërguar në IML për ekzaminime mjekësore, ndërsa i dyshuari pas intervistimit, me urdhër të prokurorit është dërguar në mbajtje”, thuhet në raportin e Policisë.