Në Gjykatën Themelore në Prishtinë, sot do të mbahet seanca ndaj ushtruesit të detyrës së OVL-UÇK-së, Faton Klinakut për kanosje ndaj kryeministrit në detyrë Albin Kurtit.

Seanca fillon nga ora 09:00, ku duhet të jetë i pranishëm edhe vetë Kurti për deklarim.

Klinaku, së bashku me një person tjetër me inicialet N.S., akuzohen nga Prokuroria Themelore e Prishtinës për kanosje ndaj Kurtit përmes rrjeteve sociale më 30 gusht të vitit 2023.

Faton Klinaku nga Organizata e Veteranëve të Luftës së UÇK-së më herët kishte thënë se mbetet të shihet nëse kryeministri Kurti do të jetë i pranishëm në këtë seancë në cilësinë e të dëmtuarit dhe dëshmitarit të Prokurorisë.

“Shqyrtimi fillestar në Gjykatën Themelore në Prishtinë është caktuar të mbahet më 3 shtator 2025, në ora 09:00. Ta shohim nëse Albin Kurti do t’i përgjigjet ftesës si i dëmtuar-dëshmitar i Prokurorisë,” ka shkruar Klinaku në Facebook.

Klinaku kishte deklaruar në fillim të gushtit se as ai dhe as avokati i tij nuk ishin njoftuar për ngritjen e aktakuzës ndaj tij, por kishte shtuar se mezi pret të ballafaqohet me Kurtin në gjykatë.

Prokuroria Themelore në Prishtinë ka dorëzuar aktakuzën ndaj dy personave të cilët dyshohen se kanë kanosur kryeministrin në detyrë të Kosovës, Albin Kurti.

Sipas aktakuzës, më 30 gusht 2023, Klinaku akuzohet se ka ripostuar një mesazh me përmbajtje kërcënuese ndaj Kurtit, ku thuhej: “… Prapë po e përsëris, nëse ju duket skandaloz postimi i mëhershëm: Më parë e vras A.K. sesa t’ia lëshoj rrugën dhe të iki nga Kosova.”

/S.K/EO/

Presidenti amerikan i SHBA-ve, Donald Trump ka reaguar ashpër pas vendimit të Gjykatës së Apelit që shpalli të paligjshme shumicën e tarifave tregtare të vendosura gjatë administratës së tij.

Nëse administrata Trump humbet apelimin e saj në Gjykatën Supreme të tarifave, kjo do të ishte një katastrofë ekonomike ka thënë presidenti Trump.

Ai e tha këtë në emisionin radiofonik të Scott Jennings, duke theksuar se Shtetet e Bashkuara do të keqtrajtoheshin dhe do të talleshin nga vendet e tjera nëse nuk do të ruanin tarifat.

/S.K/KP/

Gazetari i njohur italian, ish-drejtor i Tg4, Emilio Fede ka vdekur në moshën 94-vjeçare. Lajmin e konfirmoi vajza e tij, Sveva për gazetën italiane ”Corriere della Sera” pasi që gjendja e tij ishte përkeqësuar ditët e fundit.

Fede ishte një nga figurat ikonike të televizionit italian, një karrierë që filloi në RAI në vitet 1960, si korrespondent lufte, vazhdoi si drejtor i Tg1, dhe më pas me ardhjen e tij në ”Fininvest”, ku Silvio Berlusconi e emëroi për të drejtuar Tg4.

Për 20 vjet, nga 1992 deri në 2012, edicioni i tij i lajmeve ishte zëri më hapur pro Berlusconit në ekranin televiziv, i dashur dhe i urryer, ndonjëherë karikaturizuar, por padyshim i dallueshëm për tonin e tij gjithmonë të tepruar.

“Jam redaktori më i kritikuar, por edhe më i ndjekuri”, pretendonte ai.

Me editorialet e tij, Fede mishëronte një epokë televizive dhe një stil unik të gazetarisë.

Karriera e tij profesionale përfundoi papritur në 2012, kur ai u largua nga ”Mediaset”, pas përfshirjes së tij në hetimin e skandalit ”Ruby”.

Periudha e fundit e jetës së tij u ndikua gjithashtu thellë nga humbja e bashkëshortes, Diana De Feo, gazetare dhe më pas deputete e ”Forza Italia”, me të cilën u martua në 1963.

Ajo vdiq në qershor 2021, dhe vdekjen e saj ai vetë e quajti si dhimbjen e tij më të madhe.

/S.K/KP/Libero Magazine/

Këshilli i Ministrave në Shqipëri vendosi të shpërblejë financiarisht të gjithë personelin shtetëror të angazhuar në operacionet për shuarjen e zjarreve gjatë kësaj vere.

Vendimi, i propozuar nga Ministria e Mbrojtjes dhe i mbështetur në kuadër të buxhetit të miratuar për vitin 2025, ka për qëllim vlerësimin dhe motivimin e forcave që kanë kontribuar në menaxhimin e emergjencave natyrore, përmes një skeme të strukturuar shpërblimi në varësi të kohëzgjatjes së angazhimit të tyre.

Sipas vendimit, shpërblimi do t’u jepet punonjësve të këtyre institucioneve: Forcave të Armatosura të Republikës së Shqipërisë; Agjencisë Kombëtare të Mbrojtjes Civile; Policisë së Shtetit; Drejtorisë së Përgjithshme të Mbrojtjes nga Zjarri dhe Shpëtimi; Shërbimeve të Mbrojtjes nga Zjarri dhe Shpëtimit në nivel bashkiak.

Shuma e shpërblimit do të përcaktohet sipas ditëve të angazhimit të personelit në operacionet e shuarjes së zjarreve: 1 deri në 7 ditë angazhim- shpërblim në masën e 1 page mujore bruto; 8 deri në 15 ditë angazhim -shpërblim në masën e 2 pagave mujore bruto; 16 ditë ose më shumë -shpërblim në masën e 3 pagave mujore bruto.

Efekti financiar për strukturat e përcaktuara do të përballohet nga fondi rezervë i buxhetit të shtetit, i miratuar për vitin 2025.

Sipas vendimit, në buxhetin e Ministrisë së Mbrojtjes, në shpenzimet korrente, shtohet fondi prej 193 140 098 lekësh, përkatësisht 145 809 950 lekë në programin buxhetor “Forcat e luftimit”, 43 408 127 lekë në programin buxhetor “Mbështetja e luftimit” dhe 3 922 021 lekë në programin buxhetor “Emergjencat civile”.

Në buxhetin e Ministrisë së Brendshme, në shpenzimet korrente, shtohet fondi prej 69 615 100 lekësh në programin buxhetor “Policia e Shtetit”.

Vendimi është botuar në Fletoren Zyrtare dhe ka hyrë në fuqi menjëherë.

/S.K/KP/