Kreu i Aleancës për Ardhmërinë e Kosovës (AAK) Ramush Haradinaj, sërish e ka quajtur spiun të Serbisë shefin e qeverisë Albin Kurtin gjatë seancës së jashtëzakonshme të Kuvendit.

Sipas tij, angazhimi ditor i Kurtit është mashtrim, dhe se nuk punon në interes të vendit.

“Sot po trajtojmë situatën me logjistikën, shërbimet. Merreni me mend jemi mbledhur 6 vjet pasi u krijua Ushtria me u kthy me fol për logjistikën. Ushtari nuk ka shkuar për ushqimin, për pagën, ai është në gjendje me dhanë racionin e vet ditor për secilin qytetar, ka shkuar me shërby deri në frymën e fundit të jetës së vet”.

Haradinaj shtoi se është shqetësuese se si 6 vjet pas krijimit të Ushtrisë, flitet për ushqimin e pjestarëve të saj.

“Kush e mbron këtë njeri, po e mbroni njeriun që edhe ushtrinë e la pa bukë. Nëse para 6 vjete kemi mbërri me u krenuar që po e krijojmë ushtrinë tonë, ligje që nuk dallojnë nga ushtritë, me fol sot për ushqim, që i ka lanë Albin Kurti pa bukë. Spiun, agjent i Serbisë”.

Deputeti i Partisë Demokratike të Kosovës (PDK) Hisen Berisha, tha se çështja e ushqimit për ushtarët e FSK-së është një sabotim i qëllimshëm i një institucioni kyç për stabilitetin e vendit.

Në seancën e jashtëzakonshme të Kuvendit të Kosovës të thirrur nga opozita rreth krizës së furnizimit me ushqim, deputeti Berisha shtoi se Qeveri ka punuar në dobësimin e institucioneve dhe ka tradhtuar interesat kombëtare të vendit.

“Janë një mori shkaqesh de-motivuese, siç janë pagat, manipulimit me grada, trajnime jashtë vendit me manipulime, puna pas orari e mos pagesa e tyre etj”.

“Ajo çka po ndodh me këtë çështje është sabotimi i qëllimisht i një institucionin kyç për stabilitetin e vendit. Kjo është Qeveri që ka punuar në dobësim të institucioneve. Keni tradhtuar interesat kombëtare të vendit”, ka thënë ai.

Deputeti i Lidhjes Demokratike të Kosovës (LDK), Anton Quni tha se Qeveria nuk ka arritur ta planifikojë përfundimin e kontratës së furnizimit me ushqim në mënyrë të duhur.

Në seancën e jashtëzakonshme të Kuvendit të Kosovës të thirrur nga opozita rreth krizës së furnizimit me ushqim në FSK, ai tha se me kontraktorin e mëparshëm, Ministria e Mbrojtjes kishte lidhur një kontratë të ngjashme urgjente mbi 3 herë, për periudha deri në gjashtë muaj, me një vlerë mbi 7 milionë euro, duke u bazuar në procedura të shpallura ekstreme emergjente.

Ai tha se kjo situatë ka krijuar paqartësi dhe pasiguri dhe ka reflektuar negativisht mbi kredibilitetin e institucionit më të besueshëm në Kosovë. Quni kërkoi që Qeveria që ta evitojë këtë qasje, duke thënë se kjo “jo vetëm që rrezikon shëndetin e ushtarëve tanë, por përfshin pasoja strategjike lidhur me aftësinë tonë për të përmbushur detyrimet ndërkombëtare dhe për të mbrojtur sigurinë kombëtare”.

“Absolutisht e papranueshme që një procedurë kaq e rëndësishme si ushqimi për ushtrinë tonë të shpërfaqë shkelje elementare, ky njëherë procedura klasifikohet si sekrete dhe pastaj si procedurë esktreme emergjente, në kundërshtim me legjislacionin dhe praktiva të shteteve demokratike. Ligji për prokurimin publik saktëson qartë se klasifikimet lejohen vetëm në raste të jashtëzakonshme ku kërkohet siguri kombëtare”.

“Ushqimi nuk përbën asnjë nga këto raste, dhe mund të planifikohen në mënyrë efektive…Përjashtimi duhet të jetë vetëm kur FSK angazhohet në vende ndërkombëtare…Ushqimi nuk është emergjencë e papritur, është diçka që mund të planifikohet me kalendar e transparencë…Përtej kësaj sot e pas një viti e gjysmë MB, pa planifikim adekuat e pa procedura transparence e konkurence, vendosi të aplikojë procedurë të ngjashme emergjente”.

Deputeti i Aleancës për Ardhmërinë e Kosovës, Bekë Berisha deklaroi se për çështjen e ushqimit në FSK duhet të jap dorëheqje ministri, zëvendësministri e sekretari në Ministri të Mbrojtjes. Në seancën e jashtëzakonshme të ftuar me kërkesë të AAK-së, Berisha u shpreh se situata aktuale është shqetësuese dhe se trajtimi i ushtarëve me neglizhencë paraqet shkelje të rëndë të përgjegjësisë nga ana e qeverisë.

Në seancën e jashtëzakonshme ku nuk po marrin pjesë deputetët e shumicës parlamentare, deputeti Bekë Berisha tha se çështja e ushqimit është me rëndësi dhe ndikon në funksionalitetin e FSK-së.

“Ushtria jonë është krenaria e vendit tonë dhe është simbol i shpresës për një të ardhme të sigurt dhe të qëndrueshme. Secili ushtar që shërben ka vendosur t’i shërbejë vendit deri në vetëflijim. Nuk janë aty as për privilegje por as për kushte. Ata janë djemtë e vajzat më të mirë të vendit tonë. Megjithatë, duhet të pranojmë që situata aktuale është tepër shqetësuese. Trajtimi i ushtarëve tanë me neglizhencë është një shkelje e rëndë e përgjegjësisë së udhëheqjes së kësaj qeverie. Kriza e furnizimit me produkte esenciale për FSK-në është një sinjal alarmant që kërkon zgjedhje të menjëhershme. Mos të harrojmë ne jemi në një kohë të rrezikshme për sigurinë në rajon dhe është thelbësore që sektori i sigurisë të trajtohet me prioritet dhe dinjitet”, deklaroi ai.

Në emër të deputetëve nënshkrues, Berisha shtoi se “nuk ka lojë me ushtri” dhe se duhet të plotësohen kushtet e pjesëtarëve të Forcës së Sigurisë së Kosovës.

“Si mund të jemi të sigurt nga kjo mazhorancë që do të avancojë planin 10-vjeçar të transformimit të FSK-së në përputhje me standardet e NATO-s nëse nuk arrin të menaxhojë as furnizimin me ushqim për ushtarët tanë. Prandaj ne sot kërkojmë një përgjigje të qartë nga qeveria, sot kërkojmë zgjedhje të menjëhershme dhe urgjente. Ushtarët nuk duhet të jenë të shqetësuar se a kanë ushqim gjatë ditës dhe se me çfarë kualiteti ju servohen shujtat. Ata duhet të jenë të preokupuar vetëm me pjesën e detyrave që i kanë. Një ushtar nuk duhet të ketë shqetësim ushqimin, uniformën, mungesën e veshmbathjeve. Nëse ju e quani vetën qeveri këto gjëra nuk lejohet të ndodhin, besa nuk kanë ndodhur në asnjë qeveri më herët”, shtoi Berisha në seancë plenare.

Berisha përmendi edhe Dejona Mihalin, e më tej kërkoi edhe dorëheqjen e ministrit të Mbrojtjes.

“Këtë tender, këta tenderë, këta të ushqimit, këtu ish fitimi i madh. Nëse tenderi është 10 euro, me tri euro po u kryjshin obligimet, tjerat shkojnë nëpër xhepa të njerëzve që unë i di. Unë sot e kom një kallabllak dokumente e informacione. Plot aty. Edhe i di të gjitha, ashtu qysh i dimë plot ne. Mirëpo, që katër vjet mandat duke dashur me ruajt ushtrinë, plot gjëra që i kemi ditur nuk i kemi folur dhe i kemi mbrojtur dhe e dinë këta që janë në qeveri. Por tash shtrohet pyetja, nëse ka mbërri Dejona Mihali me hy në Ministri të Mbrojtjes, çka nuk dinë komshiu, tëra i di. Ne mundemi me ia mbajt të fshehtë njëri-tjetrit, ajo tëra i ka treguar. Se qëllimi i saj është që me i dit tjetër kush. Për tërë këtë neglizhencë, sot është dashur të jap dorëheqje ministri, zëvendësministri, sekretari i zgjedhur jashtëligjshëm, për këta deputetë që janë në klub ata që i organizojnë këto gjëra”, përfundoi Berisha.