Kryetari i Lidhjes Demokratike të Kosovës, Lumir Abdixhiku, ka deklaruar se partia që ai drejton do të marrë pjesë në çdo takim ku ftohet.

“Ne shkojmë kudo ku marrim ftesë. Është pozitive që Presidentja po i mbledh liderët, dhe po ashtu është e rëndësishme që të kemi një qëndrim të përbashkët për çështjet me interes shtetëror,” u shpreh Abdixhiku.

Është ndërprerë vazhdimi i 40-të i seancës konstituive të Kuvendit të Kosovës.

Seanca do të vazhdojë më 3 korrik, në orën 11:00.

Deputeti i Partisë Demokratike të Kosovës (PDK), Mërgim Lushtaku, ka akuzuar Lëvizjen Vetëvendosje për mungesë serioziteti në procesin e konstituimit të Kuvendit, duke e cilësuar si shkaktar kryesor të ngërçit politik aktual.

Ai tha se mungesa kryeministrit në detyrë, Albin Kurti, në Kuvend tregon se ai do të bëjë gjithçka, do të shkelë çdo ligj, vetëm që të mbajë pushtetin.

“Unë besoj që prioritet duhet të jenë punët e shtëpisë. Besoj që nuk i ka zgjidhur punët e shtëpisë dhe kjo është për keqardhje. Ne si parti i kemi dhënë zgjidhjet politike edhe pse nuk e kemi për detyrë. Po shihet qartë që ngërçi është të Vetëvendosja”, tha Lushtaku.

Deputeti i Lëvizjes Vetëvendosje, Dimal Basha, ka akuzuar partitë opozitare për bllokim të procesit të konstituimit të Kuvendit.

“Votimi i fshehtë po tentohet të shfrytëzohet pasi votimi i hapur s’ka qenë i suksesshëm. Gjykata Kushtetuese në aktgjykimin e saj ka thënë se mund të përdoret cilido votim,” tha Basha.

Më tutje ai shtoi se Lëvija Vetëvendosje i ka provuar dy formatet.

“Ne kemi provuar me votimin e hapur, s’ka pasur zgjidhje, e kemi tentuar me votimin e fshehtë. Gjykata ka thënë zgjidhni cilido që të doni. Por, opozita po thotë që votimi i fshehtë është pikë e re e rendit”, shtoi Basha.