Në Pejë janë arrestuar katër persona pasi që të njëjtit dyshohen së kanë planifikuar përgatitjen e një vrasje. Sipas Policisë së Kosovës të dyshuari janë zënë në flagrancë duke pranuar armët për kryerjen e veprës.

“Pejë, Prishtinë 2024/2025 , NN. Janë arrestuar katër të dyshuar meshkuj kosovarë, pasi që të njëjtit dyshohet se kanë planifikuar përgatitjen e vrasjes së viktimës. Të dyshuari janë zënë në flagrancë duke pranuar armët për kryerjen e veprës. Gjatë operacionit policor janë kontrolluar vendbanimet e të dyshuarave në katër lokacione të ndryshme ku gjatë kontrollit janë gjetur dhe sekuestruar dy armë, municion të kalibrave të ndryshme si dhe disa dëshmi tjera të rëndësishme”, thuhet në raportin 24 orësh të Policisë.

Më tej thuhet se me vendim të prokurorit pas intervistimit tre të dyshuarit janë dërguar në mbajtje, ndërsa njëri është liruar në procedurë të rregullt.

Në një market në rrugën “Rexhep Luci”, në Prishtinë është kryer një grabitje nën kërcënimin e armës.

Policia ka bërë me dije se nën kërcënimin e armës së ftoftë janë grabitur rreth 1 mijë e 720 euro para të gatshme nga arka.

“Ankuesja femër kosovare, ka raportuar se deri sa ishte në vendin e saj të punës në një market, kishte hyrë një person i dyshuar dhe nën kërcënimin e armës së ftohtë (thikës) kishte arrit të marr nga arka para të gatshme në vlerë rreth 1720 euro dhe kishte ikur në drejtim të panjohur. Rasti nën hetime”, përfundon njoftimi.

Presidentja e Republikës së Kosovës, Vjosa Osmani, ka shprehur ngushëllime për familjet e viktimave të aksidentit ajror tragjik që ndodhi të enjten pranë Uashingtonit, D.C.

“E pikëlluar thellësisht nga rrëzimi tragjik ajror pranë Uashingtonit, D.C. Zemra ime është me familjet dhe të dashurit e atyre që humbën jetën në këtë tragjedi të paimagjinueshme. Kosova qëndron pranë jush në pikëllim dhe solidaritet”, ka shkruar Osmani në rrjetin social X.

Një aeroplan pasagjerësh me 64 persona në të është përplasur me një helikopter ushtarak dhe për pasojë ka rënë në një lumë në Uashington.

Ekipet e kërkim-shpëtimit janë të angazhuara për të kërkuar njerëzit e tjerë.

Presidentja Vjosa Osmani ka njoftuar se për shkaqe humanitare ia ka falur një të dënuares pjesën e mbetur të dënimit. 

Kjo u bë e ditur përmes një njoftimi nga Presidenca.

Në njoftim thuhet se e para e shtetit, bazuar në kompetencat e saj, për shkaqe humanitare e ka nënshkruar dekretin për faljen e A. C.

“Në marrjen e vendimit për falje, janë marrë parasysh edhe faktorë të tjerë, duke përfshirë faktin se e dënuara nuk ka kryer asnjë vepër penale më herët, vepra penale për të cilën është dënuar është për ‘Rrezikim të Trafikut Publik’, pra është kryer aksident pa dashje, ndërkaq është vërtetuar se nuk ka qenë nën ndikim të alkoolit apo substancave të tjera kur ka ndodhur aksidenti. Përveç këtyre, gjithashtu janë marrë parasysh sfidat shëndetësore të nënës dhe foshnjës”, thuhet në njoftimin e Presidencës.

Gjykata Themelore në Ferizaj, e pati dënuar me 18 muaj burgim efektiv, të akuzuarën për rrezikim të trafikut publik, ku si pasojë e këtij aksidenti kishin humbur jetën dy shoqet e saj, E.I dhe E.M. Ajo e pati pranuar fajësinë.