Prokuroria Themelore në Prizren dhe Policia e Kosovës kanë realizuar një operacion të madh hetimor të koduar “Bixhozi”, i cili ka çuar në arrestimin e 22 personave të dyshuar për organizimin e skemave piramidale dhe lojërave të fatit të kundërligjshme.

Operacioni është zhvilluar gjatë mbrëmjes së 4 nëntorit nga Sektori Rajonal i Hetimeve në Prizren, me mbështetjen e njësive të tjera policore, pas një pune të gjatë operative-hetimore dhe zbatimit të masave të veçanta hetimore.

Në kuadër të këtij plani operativ janë kontrolluar 20 lokacione të ndryshme (lokale afariste dhe shtëpi banimi) në tri komuna të rajonit: Prizren, Suharekë dhe Dragash.

Gjatë kontrolleve, zyrtarët policorë kanë konfiskuar prova të rëndësishme materiale, ndër to:

• Rreth 10 mijë euro para të gatshme;
• Pajisje elektronike të ndryshme që shërbenin për bixhoz online;
• Katër armë zjarri dhe municion përkatës.

Pas intervistimit të të dyshuarve në prani të avokatëve mbrojtës, me vendim të prokurorit të kujdestar, 19 prej tyre janë dërguar në mbajtje për 48 orë, ndërsa 3 të tjerë janë liruar në procedurë të rregullt.

Prokuroria dhe Policia e Kosovës kanë rikonfirmuar përkushtimin e tyre të plotë për parandalimin dhe luftimin e veprave penale që lidhen me bixhozin e paligjshëm dhe skemat piramidale në gjithë territorin e vendit. /E.A/

Studentët e vitit të tretë të Fakultetit Menaxhment, Biznes dhe Ekonomi (MBE) në UBT, në kuadër të lëndës “Marketing dhe Menaxhim i Shitjeve”, të ligjëruar nga Prof. Rajan Arapi, mirëpritën në një ligjëratë të hapur ekspertin e shitjes, operacioneve dhe marketingut, Fisnik Behxheti.

Me mbi 25 vjet përvojë profesionale, Behxheti ndau me studentët rrugëtimin e tij në industrinë e shitjes dhe menaxhimit, duke sjellë shembuj konkretë nga përvoja në pozita drejtuese në disa prej institucioneve dhe kompanive të njohura në Kosovë, përfshirë TEB, PriBank, SPAR Kosovo, DEPO Market dhe KosInvest. Aktualisht, ai udhëheq ekipe ndërkombëtare të shitjes me mbi 100 profesionistë në katër vende.

Gjatë ligjëratës, vëmendje e veçantë iu kushtua mënyrës se si teoria e marketingut zbatohet në praktikën e përditshme të bizneseve. Përmes rasteve të kompanive globale si McDonald’s, Apple, Zara, Red Bull dhe Coca-Cola, studentët analizuan zbatimin e marketingut miks (4P), sjelljen e konsumatorit dhe ndikimin e emocioneve në vendimmarrjen për blerje.

Po ashtu, u diskutua për ndërtimin dhe menaxhimin e ekipeve të shitjes, matjen e performancës, rëndësinë e etikës profesionale në raport me klientët, si dhe ndikimin gjithnjë në rritje të inteligjencës artificiale në mënyrën se si konsumatorët informohen, kërkojnë dhe blejnë produkte e shërbime në vitin 2026.

Pjesa më interaktive e ligjëratës u zhvillua përmes ushtrimeve praktike, ku studentët analizuan marka vendore, testuan përmes telefonave të tyre mënyrën se si inteligjenca artificiale rekomandon bizneset kosovare dhe u përfshinë në simulime të skenarëve të shitjes B2B (biznes me biznes).

Përmes këtyre aktiviteteve, studentët patën mundësi të sfidojnë njohuritë e tyre, të zhvillojnë mendimin kritik dhe të kuptojnë më nga afër dinamikën e proceseve të shitjes në një treg gjithnjë e më konkurrues dhe të digjitalizuar.

UBT vazhdon të promovojë një qasje bashkëkohore të mësimdhënies, duke ndërthurur njohuritë akademike me përvojën e profesionistëve nga industria dhe duke krijuar ura të drejtpërdrejta bashkëpunimi ndërmjet studentëve dhe tregut të punës.

UBT International Smart Schools ka lansuar Edicionin e III-të të Testit Provues të Arritshmërisë, një mundësi e veçantë për të gjithë nxënësit e klasave të nënta në tërë territorin e Kosovës, që duan të testojnë njohuritë e tyre, të përgatiten për Testin e Semimaturës dhe të përfitojnë bursa shkollimi deri në 100%.

Testi do të zhvillohet më 27 shkurt 2027, në ora 12:00, online dhe falas, duke u mundësuar nxënësve të marrin pjesë nga kudo dhe të dëshmojnë njohuritë dhe potencialin e tyre.

Në kuadër të Edicionit të III-të, nxënësit që arrijnë rezultatet më të larta do të kenë mundësi të përfitojnë bursa shkollimi nga 25% deri në 100%, duke e shndërruar këtë test në një mundësi për të vlerësuar përgatitjen akademike dhe për të fituar mbështetje për vazhdimin e shkollimit.

Testi Provues i Arritshmërisë është konceptuar si një mundësi për nxënësit e klasave të nënta që të matin nivelin e njohurive të tyre dhe të përgatiten më mirë për sfidat e Testit të Semimaturës. Përmes testimit, ata do të kenë mundësi të identifikojnë nivelin e tyre të përgatitjes dhe të dëshmojnë aftësitë e fituara gjatë arsimit të mesëm të ulët.

Me lansimin e këtij edicioni, UBT International Smart Schools vazhdon të krijojë mundësi të reja për nxënësit, duke ndërthurur vlerësimin e njohurive me mundësitë për përfitime akademike dhe duke i inkurajuar ata të sfidojnë veten dhe të synojnë rezultate të larta.

Mos e humb mundësinë për të testuar njohuritë, për t’u përgatitur për Testin e Semimaturës dhe për të fituar bursë deri në 100%! APLIKO TANI ONLINE!

Presidentja Justina Shiroka-Pula ka kërkuar mbështetjen e mëtejshme të Zvicrës për fuqizimin e pozitës ndërkombëtare të Kosovës dhe avancimin e procesit të anëtarësimit në organizata ndërkombëtare.

Këtë kërkesë e bëri gjatë një takimi të zhvilluar në Prishtinë me ministrin e Punëve të Jashtme të Zvicrës, Ignazio Cassis, i cili njëkohësisht kryeson Organizatën për Siguri dhe Bashkëpunim në Evropë (OSBE).

Sipas njoftimit zyrtar nga Presidenca, Shiroka-Pula lartësoi marrëdhëniet bilaterale mes dy shteteve dhe shprehu falënderime për mbështetjen e vazhdueshme të Zvicrës. Ajo theksoi nevojën për thellimin e bashkëpunimit ekonomik, rritjen e shkëmbimeve tregtare dhe promovimin e investimeve zvicerane në Kosovë.

Presidentja veçoi mundësitë që ofron marrëveshja me Asociacionin Evropian të Tregtisë së Lirë (EFTA) për zgjerimin e partneritetit ekonomik, si dhe vlerësoi lart rolin e mërgatës shqiptare në Zvicër si urë kryesore lidhëse mes dy popujve. Po ashtu, u shpreh mirënjohje për angazhimin e palodhshëm të kontingjentit zviceran në kuadër të KFOR-it që nga viti 1999.

Nga ana e tij, diplomati zviceran Ignazio Cassis rikonfirmoi përkushtimin e shtetit të tij për të vazhduar mbështetjen ndaj Kosovës edhe në të ardhmen. /E.A/