Kuriozitete

Pesë fakte magjepsëse rreth hipnozës!

Hipnoza nënkupton shfrytëzimin e fuqisë së mendjes për të ndikuar në perceptimin dhe sjelljen e dikujt.

Published

on

Hipnotizimi njihet gjerësisht nga shfaqjet skenike në të cilat njerëzit përfshihen në situata të sikletshme.

Por kjo lloj shfaqje nuk ka të bëjë fare me punën aktuale të praktikuesve të ligjshëm. Hipnotizuesit profesionistë i kanë ndihmuar njerëzit që të ndalojnë pirjen e duhanit, të bien në peshë, të menaxhojnë ankthin, të përballojnë dhimbjen etj. E njohur për herë të parë si praktikë në fundin e viteve 1700, hipnoza nënkupton shfrytëzimin e fuqisë së mendjes për të ndikuar në perceptimin dhe sjelljen e dikujt.

Termi “hipnotizoj”vjen nga mjeku gjerman i shekullit të 18-të Franz Mesmer. Ai pretendoi se një lëng magnetik special kalonte nëpër trupin e njeriut, një koncept që ai e quajti magnetizëm i kafshëve. Mesmer theksonte se një bllokim apo mungesë e sasisë së duhur të lëngut, shkakton një sërë problemesh shëndetësore, dhe magnetet mund të ndihmojnë duke e shtuar sasinë e këtij lëngu.

Është interesant fakti që ai mund të ketë pasur njëfarë suksesi. Kështu,disa pacientë dyshohet se janë përmirësuar dhe ndjerë më mirë, pavarësisht diagnozave të mëparshme që tregonin se do të ishin të sëmurë rëndë deri në fund të jetës së tyre.

Mesmer kuptoi se mund të arrinte të njëjtat rezultate pa përdorimin e magneteve, por thjesht duke vendosur duart mbi pacientët. Në fakt, nuk ishin magnetet apo prekja e tij ato që krijuan rezultate pozitive, por fuqia e sugjestionimit. Pacientët i lehtësuan simptomat përmes mendjes së tyre. Kirurgu skocez Xhejms Breid u bë më vonë i njohur si “Babai i Hipnozës”. Ai ishte i pari që përdori termin “hipnozë” në librin e tij të vitit 1843 “Neurohipnologjia”.

Praktikuesit mund të bashkohen në organizata profesionale

Edhe pse në botë ka hipnotizues të kualifikuar dhe të aftë, në përgjithësi ky term është një etiketë që mund ta përdorë shumëkush. Meqë nuk ka asnjë organ drejtues të vetëm që përcakton standardet për hipnozën, është e rëndësishme të pyesni mbi trajnimin e një hipnotizuesi, para se të mendoni t’i nënshtroheni seancave hipnotike me të.

Ndër shoqatat profesioniste të hipnotizuesve, Shoqata Kombëtar e Hipnotizuesve (NGH) në SHBA cilësohet si më e vjetra, më e madhja dhe një nga më të respektuarat në botë. Që dikush të marrë certifikatën e tyre duhen minimumi 100 orë trajnim. NGH ka një kod të fortë etike dhe kërkon një trajnim të vazhdueshëm, në mënyrë që anëtarët të mbeten të azhornuar në trajnimin e tyre.

Kur janë në hipnozë, njerëzit përjetojnë një relaks të thellë. Në atë gjendje, ata janë më të hapur ndaj sugjerimeve dhe ndryshimeve, të cilat mund të çojnë në rezultate pozitive. Në vend se t’i kontrollojë njerëzit, hipnoza u jep në fakt atyre një kontroll më të madh mbi mendjen dhe trupin e tyre.

Keti Lindert, një hipnotizuese e certifikuar nga NGH, e sheh praktikën e hipnozës si një bashkëpunim midis klientit dhe hipnotizuesit. “Nëse nuk doni që të bëni ndryshime, ajo nuk do të funksionojë. Jeni ju vetë që keni bravën dhe çelësin për mendjen tuaj, të nën-ndërgjegjshme dhe të nëndërgjegjshme, dhe vetëm ju mund ta hapni apo mbyllni derën”,- thekson ajo.

Duke i ndihmuar njerëzit të identifikojnë atë që pengon përparimin e tyre, dhe si t’i riformulojnë këto çështje, Lindert i udhëzon klientët e saj që të zbulojnë përgjigjet brenda vetes. “Puna e përbashkët, ndërtimi i besimit dhe komunikimi, është vendi ku ndodh ndryshimi”,- shton ajo.

Një keqkuptim i zakonshëm në lidhje me hipnozën:Ajo mund t’i bllokojë njerëzit në një gjendje hipnotike, apo t’i detyrojë ata të bëjnë diçka kundër vullnetit të tyre. Por edhe nëse një praktikues nuk ju nxjerr nga hipnoza, ju mund të dilni shpejt prej saj fare natyrshëm, ose duke fjetur ose duke u kthyer tek një gjendje e pandryshuar e vetëdijes.

Hipnoza mund të jetë një plotësuese e mjekësisë tradicionale

Hipnoza nuk synon të zëvendësojë trajtimin e nevojshëm mjekësor. Gjithsesi, mund të jetë e dobishme si një shtesë e praktikave moderne. Kërkimet tregojnë se trajtimi i hipnozës mund të ndihmojë në trajtimin e pagjumësisë, apo të hequrit dorë nga zakonet e pashëndetshme dhe të reduktojnë efektet anësore që shoqërojnë shumë trajtime farmakologjike.

Megjithëse hipnoza ka fituar dalëngadalë një pranim të gjerë në mesin e komuniteteve mjekësore (dhe dentare), disa argumentojnë se ajo është ende e papërdorur. Ndërsa mjekët po mësojnë më shumë për përparësitë e mundshme të hipnozës, ajo mund të bëhet më e përhapur në fushat tradicionale të mjekësisë.

Hipnoza nuk është një formulë magjike, as praktikuesit e saj nuk bëjnë mrekulli. Lindert thotë se njerëzit që kërkojnë zgjidhje të lehta ka të ngjarë të mos jenë të suksesshëm. Me kalimin e viteve ajo ka punuar me klientë mbi një sërë problemesh, përfshirë disa të referuara nga mjekët.

Ndërsa shumë prej nesh mund të përfitojnë nga hipnoza, ajo nuk është efektive për të gjithë. Nëse dikush po përjeton një sëmundje mendore të patrajtuar që përfshin një çekuilibër kimik në tru, Lindert thotë se nuk i trajton dot raste të tilla. Gjithsesi, kur një klient potencial po merr kujdesin e duhur mjekësor, Lindert do të konsultohet me psikiatrin për t’u siguruar se është e sigurt të vazhdohet me seancat e hipnozës.

Një situatë tjetër në të cilën ajo është jashtëzakonisht e kujdesshme:kur prindërit i sjellin fëmijët e tyre pa u thënë se do t’i nënshtrohen hipnozës. Lindert flet sinqerisht me fëmijët, dhe i pyet nëse ata pajtohen me trajtimin. Nëse jo, ajo respekton vendimin e tyre, dhe gjithçka mbyllet aty. Dhe gjithsesi nuk do të funksiononte, shton ajo. “Pa vullnetin e tyre, ju mund të më paguani edhe 1 milionë dollarë, dhe unë nuk do të mund t’i ndryshoja”,-thekson ajo. /Bota.al

Continue Reading

Kuriozitete

Pse ndihemi të lodhur gjatë verës?

Published

on

Stina e verës sjell gëzim, relaks dhe një ndjenjë rigjallërimi. Megjithatë, mund të shoqërohet edhe me ndjenjë përgjumjeje dhe dobësie.

Nëse e ndien veten pa energji gjatë verës, mos u shqetëso – nuk je i vetëm.

Në këtë artikull do të shqyrtojmë shtatë arsye pse mund të ndihesh i dobët gjatë verës, duke hedhur dritë mbi faktorët që ndikojnë në gjallërinë tonë dhe duke ofruar këshilla të vlefshme për ta përballuar këtë periudhë me lehtësi.

Dehidratimi

Me rritjen e temperaturave, është thelbësore të qëndrojmë të hidratuar, gjatë verës djersisim më shumë për shkak të nxehtësisë, duke rritur rrezikun për dehidrim. Edhe një dehidrim i lehtë shkakton lodhje, marrje mendsh dhe ndjesi të përgjithshme dobësie.

Mos harro të pish shumë ujë dhe përfshi në dietën tënde fruta dhe perime të pasura me ujë për të rikthyer elektrolitet.

Lodhja nga nxehtësia (Heat Exhaustion)

Ekspozimi i tepërt ndaj temperaturave ulë nivelet e energjisë, duke shkaktuar dobësi dhe lodhje, lodhja nga nxehtësia ndodh kur trupi nuk arrin të rregullojë temperaturën e vet, zakonisht për shkak të qëndrimit të gjatë në diell dhe mungesës së lëngjeve.

Për ta parandaluar: kërko hije, vish rroba të lehta dhe ajrosëse dhe shmang aktivitetet e rënda gjatë orëve më të nxehta të ditës.

Mungesa e gjumit cilësor

Ditët më të gjata dhe aktivitetet sociale verës ndikojnë në cilësinë dhe oraret e gjumit, gjumi i pamjaftueshëm mund të të lërë të përgjumur, pa përqendrim dhe me ndjesi dobësie. Krijo ambient të përshtatshëm: mbaj dhomën të freskët, vendos rutinë të rregullt e praktikoni teknika relaksimi para se të flesh.

Gjumi cilësor është kyç për të rifreskuar trupin dhe për të mbajtur energjinë në nivele optimale.

Alergjitë sezonale

Vera mund të jetë sfiduese për ata që vuajnë nga alergjitë, poleni, pluhuri në ajër janë më të përhapur gjatë kësaj stine, duke shkaktuar lodhje, bllokim të hundëve. Nëse dyshon se ke alergji, këshillohu me një mjek që mund të të ndihmojë me këshilla, ilaçe ose ndryshime në stilin e jetesës.

Ushqyerja e papërshtatshme

Vera është e mbushur me ushqime joshëse, ushqime të skarës dhe ëmbëlsira të shumta, edhe pse është në rregull të shijosh këto ushqime, është shumë e rëndësishme të ruash një dietë të balancuar. Konsumi i pijeve me sheqer dhe alkoolit shkakton mungesë të vitaminave, luhatje të sheqerit në gjak dhe rënie të energjisë. Zgjidh ushqime të pasura me vlera si fruta të freskëta, perime, drithëra të plota e proteina të dobëta për të ushqyer trupin me energji.

Mungesa e vitaminës D

E njohur edhe si “vitamina e diellit”, sintetizohet nga trupi kur ekspozohemi ndaj rrezeve të diellit, për shkak të vapës së madhe dhe përdorimit të kremrave mbrojtës, mund të kemi më pak ekspozim ndaj diellit, gjë që mund të çojë në mungesë të kësaj vitamine.

Mungesa e vitaminës D lidhet me lodhje dhe dobësi muskulore. Diskuto me mjekun për mundësinë e marrjes së suplementëve, gjej kohë për të qëndruar në diell në mënyrë të sigurt për të mbajtur nivelet optimale të vitaminës D.

Stresi mendor dhe emocional

Edhe pse vera është kohë pushimesh, sjellë edhe stres qoftë nga pritshmëritë për pushime perfekte a ngjarje shoqërore. Stresi ndikon drejtpërdrejt në energjinë tonë, duke na lënë të lodhur dhe pa fuqi. Praktiko kujdesin ndaj vetes përmes meditimit, teknika të frymëmarrjes, ose aktivitete që të sjellin kënaqësi. Marrja e kohës për të kujdesur për shëndetin mendor është thelbësore për të përballuar dobësinë e shkaktuar nga stresi.

Continue Reading

Kuriozitete

Pse fjetja në bark nuk është e mirë?

Published

on

Çdo njeri ka pozicionin e vet të preferuar të fjetjes dhe në kundërshtim me disa besime popullore, nuk ka asnjë mënyrë “perfekte” për të fjetur.

Megjithatë ka pozicione më të mira dhe më të këqija që ndikojnë në cilësinë e gjumit, por sa e keqe është në të vërtetë të flesh përmbysur?

Mund të shkaktojë dhimbje në qafë

Sipas specialistëve ky është padyshim pozicioni më i keq i gjumit, shkakton disa dhimbje të këqija veçanërisht në qafë. Shpesh, kur njerëzit flenë në bark, qafa e tyre ngrihet lart. Plus, qafa është e përdredhur në njërën anë gjatë gjithë mbrëmjes. Si rezultat, shumë njerëz përjetojnë dhimbje qafe në mëngjes.

Mund të tendosi pjesën e poshtme të shpinës

Dhimbja në pjesën e poshtme të shpinës është tjetër shqetësim tek personat që flenë ashtu. Ky pozicion ushtron presion tek nyjet në shpinë. Njëkohësisht nuk është e mundur të mbash shtyllën kurrizore siç duhet. Gjumi i vazhdueshëm në bark çon në parehati ose dhimbje për periudha afatgjata.

Ju bën të lëvizni më tepër

Ata që flenë në bark janë ata që lëvizin më shumë gjatë natës. Fjetja me fytyrë poshtë ngjesh nyjet në qafë dhe shpinë e shkakton mpirje të krahëve. Këta persona priren të lëvizin ose të dridhen gjatë natës, duke shkaktuar ndërprerje të gjumit. Dhe mungesa e gjumit cilësor lidhet me të gjitha llojet e efekteve negative shëndetësore, si mbipesha dhe presioni i lartë i gjakut.

Mund të përkeqësojë refluksin e acidit

Kur qëndroni në këmbë ose uleni drejt, graviteti ndihmon në parandalimin e rritjes së acidit të stomakut, që kalon në fyt. Kur shtriheni, graviteti nuk ju ndihmon më. Kjo bën që acidi të ngrihet më lehtë dhe të prishë gjumin tuaj.

Sa e keqe është fjetja në këtë pozicion?

Edhe pse nuk ka asnjë pozicion të përsosur, fjetja në bark është padyshim më i keqi. Ndërsa pozicioni më i mirë i fjetjes është ai në shpinë.

Continue Reading

Kuriozitete

Shishe plastike apo qelqi në punë? Ja çfarë thonë faktet!

Published

on

Nëse jeni ndër ata që mbajnë gjithmonë një shishe me vete në punë, ndoshta është koha të mendoni: qelq apo plastikë?

Vendimi nuk është estetik, por prek shëndetin, mjedisin dhe prakticitetin e përditshëm.

Qelqi, më i sigurt për shëndetin

Shishet prej qelqi janë të padëmshme dhe nuk lëshojnë kimikate në lëngje, madje as kur ekspozohen ndaj nxehtësisë. Krahasuar me plastikën, që përmban substanca si BPA apo BPS, qelqi është alternativa më e shëndetshme për përdorim të përditshëm.

Plastika ndot më shumë, por kërkon më pak energji

Edhe pse plastika është më e lehtë për transport e kërkon më pak energji për t’u prodhuar, është më problematike për mjedisin. Shumë nga plastikat nuk riciklohen e përfundojnë në natyrë, duke lëshuar mikroplastikë që ndot oqeanet dhe zinxhirin ushqimor.

Prakticiteti- plastika fiton

Nëse je në lëvizje, plastika është praktike: e lehtë, nuk thyhet,  vjen në formate që përshtaten në çanta apo makina. Por nëse punon në zyrë fikse dhe dëshiron diçka afatgjatë e të qëndrueshme, qelqi është zgjedhje elegante dhe e qëndrueshme.

Vendimi përfundimtar?

•Nëse prioriteti yt është shëndeti dhe qëndrueshmëria, zgjidh qelqin.
•Nëse ke nevojë për prakticitet dhe lehtësi, plastika pa BPA është alternativë më fleksibël – por kujdes me riciklimin!

Një ide e zgjuar? Përdor një shishe qelqi në zyrë dhe mbaj një plastike të riciklueshme me vete gjatë ditës!

Kështu, kombinon shëndetin, prakticitetin dhe kujdesin për mjedisin.

Continue Reading

Kuriozitete

Pesë vende ku nuk duhet ta lini kurrë celularin

Published

on

Sot është e vështirë të gjesh një person që nuk zotëron një telefon celular. Jemi të varur nga këto pajisje që nuk luajnë më vetëm rolin e një telefoni, por edhe të një kalendari, një axhende, një radioje e lista mund të mos mbarojë kurrë.

Lënia e telefonave në vende të caktuara mund të jetë e rrezikshme për shëndetin. Shumë studime e kanë lidhur rrezatimin e tyre me shfaqjen e kancerit të trurit, tumoreve dhe problemeve riprodhuese.

Në shtrat ose nën jastëk

Të flesh me telefonin nën jastëk është ide e keqe për disa arsye. Njoftimet nuk ndalen natën. Drita nga ekrani na zgjon e çon në probleme afatgjata me gjumin. Ekspozimi i vazhdueshëm ndaj dritës ndikon në prodhimin e melatoninës, hormonit të gjumit, i cili është i rëndësishëm për pushimin tonë. Ekspozimi ndaj fushave elektromagnetike të krijuara nga telefonat shkakton dhimbje koke, ka shumë raste shpërthimesh që kanë ndodhur në të gjithë botën për shkak të temperaturave të rritura që zhvillohen kur pajisjet mbulohen nën pëlhura për një kohë të gjatë.

Në xhep

Lëvizja më e zakonshme që bëjmë të gjithë. E fusim celularin në xhepin e pantallonave dhe vazhdojmë para. Mendojmë se në këtë mënyrë nuk do të humbasim asnjë njoftim. Megjithatë, sado logjike që mund të tingëllojë, ky veprim bën shumë dëm. Rrezatimi i emetuar nga një telefon kur është në xhepin e pantallonave rritet ndjeshëm krahasuar me kur është në çantë. Rrezatimi i telefonit ndikon në strukturën e ADN-së, të shkakton probleme me fertilitetin ose të kontribuojë në zhvillimin e tumoreve. Gjithashtu, mbajtja e telefonit celular pranë kofshëve dobëson kockat e legenit.

Në banjo

Nëse jeni mësuar ta merrni me vete në banjo ose të dëgjoni muzikë kur jeni në dush, mos e bëni më! Bakteret në sipërfaqe, pavarësisht sa mirë i pastrojmë, “ngjiten” në pajisje e transferohen në duart, fytyrën e rroba. Bakteret qëndrojnë në hapësirë ​​për një kohë të gjatë, aq sa ngjiten lehtësisht në sipërfaqe të tjera.

Në vende shumë të ftohta ose shumë të nxehta

Nëse temperaturat e ambientit janë të larta ose shumë të ulëta, është më mirë të mos e merrni telefonin celular me vete ose mbani në çantë. Luhatjet e temperaturës janë të rrezikshme për pajisjet elektronike. Tkurrja e zgjerimi i shkaktuar çon në probleme me funksionet e tij apo në shpërthime fatale.

Në prizë

Jo, ta lësh telefonin në karikim për orë të tëra nuk do të dëmtojë shëndetin tënd, por do të dëmtojë xhepin, telefonin e mjedisin. Është më mirë të mos e lësh telefonin duke u karikuar natën ose për shumë orë. Kjo shkurton jetëgjatësinë dhe performancën e baterisë së telefonit. Gjithashtu kontribuon në rritjen e konsumit të energjisë dhe, rrjedhimisht, në faturën e energjisë elektrike.

Continue Reading

Të kërkuara