Lajmet

Përurohet impianti i ujërave të zeza në Gjakovë, Kurti: Synojmë shtatë kryeqendra me impiante

Ai tha se impianti i përuruar sot është i treti që po e inauguron si kryeministër gjatë dy vjetëve të fundit.

Published

3 years ago

on

Kryeministri i Kosovës, Albin Kurti mori pjesë sot në përurimin e impiantit të ujërave të zeza në Komunën e Gjakovës, ku tha se Kosova është në rrugën e duhur për të siguruar mbrojtjen e mjedisit dhe avancimin e projekteve të rëndësishme infrastrukturore.

Kurti tha se impianti i përuruar sot është i treti që po e inauguron si kryeministër gjatë dy vjetëve të fundit. Ai u shpreh se partnerët zhvillimorë janë partnerë, jo vetëm për financimin e projekteve të këtilla, por edhe për përvojën dhe praktikat më të mira, që i sjellin tek ne nga vendet e tyre, për të operuar impiante të tilla, që janë akoma risi për neve.

Kurti, siç u bë e ditur në komunikatë, shprehu gjithashtu mirënjohjen për bashkëpunimin me Republikën Federale të Gjermanisë dhe Konfederatën Zvicerane, duke përmendur që për këtë projekt, Banka zhvillimore gjermane KfW ka kontribuuar me 6 milionë euro, qeveria zvicerane me 7.6 milionë euro, ndërsa komuna ka shtuar edhe 3.2 milionë euro.

Kryeministri shtoi më tutje se pas përurimit të impianteve të ujërave të zeza në Prizren, Pejë e Gjakovë, do të vazhdohet me punën për impiantin në Gjilan, që do të kushtojë 23 milionë euro, në Mitrovicë, për investim 40 milionësh dhe në Prishtinë, për projektet e impiantit dhe rrjetit të kanalizimit, që kap vlerën rreth 160 milionë euro.

“Me impiantet në Pejë, Gjakovë dhe Prizren, ne kemi arritur të trajtojmë rreth 11% të ujërave të ndotura në nivel vendi, nga 1% sa kishim në fillim të mandatit dhe Qeveria e Kosovës është e përkushtuar për ta avancuar edhe më shumë këtë sektor”, tha Kurti, duke se janë gati për të filluar ndërtimin e tri impianteve të ujërave të ndotura në Mitrovicë, Gjilan dhe Ferizaj, së bashku me Bankën Evropiane për Zhvillim dhe kështu, “synojmë që në pesë vitet e ardhshme të kemi shtatë kryeqendra me impiante.”

Ai tha se sfidë e këtij projekti është kostoja për mirëmbajtjen dhe operimin e impiantit dhe se një nga shpenzimet më të mëdha për ujësjellësit është rryma elektrike. Prandaj, “Qeveria është angazhuar dhe ka ndarë fonde, si dhe po negocion me partnerët zhvillimor, për të punuar në efiçiencën e energjisë”.

Kryeministri tha se qeveria synon të sigurojë që investimet në mjedis do të jenë të qëndrueshme dhe të përfitojë i gjithë komuniteti.

Pas fjalëve hyrëse dhe ceremonisë së përurimit, kryeministri Kurti pa nga afër impiantin dhe punën që zhvillohet nga ky impiant.

Related Topics:
Continue Reading

Lajmet

PDK bllokon serish hyrjen e Qeverisë: Kërkohet vazhdimi i seancës konstituive të Kuvendit

Published

2 minutes ago

on

August 18, 2026

By

Partia Demokratike e Kosovës (PDK) ka vazhduar edhe të martën protestën e saj përpara objektit të Qeverisë së Kosovës, duke bllokuar hyrjen kryesore të ndërtesës. Këtij aksioni simbolik i është bashkuar edhe forum jaunor i kësaj partie, Rinia Demokratike e Kosovës (RDK).

Aksioni i protestës vjen si reagim ndaj mos-thirrjes së vazhdimit të seancës konstituive të Kuvendit të Kosovës.

Deputetët dhe aktivistët e PDK-së po kërkojnë me ngulm nga kryesuesi i seancës konstituive, Avni Dehari, që të thërrasë menjëherë vazhdimin e punimeve për t’i hapur rrugë konstituimit të plotë të Kuvendit.

Kjo protestë është pjesë e një presioni të vazhdueshëm politik pas disa ditësh përpjekjesh nga opozita. Si PDK-ja, ashtu edhe Aleanca për Ardhmërinë e Kosovës (AAK), kanë kërkuar vazhdimisht rifillimin e punimeve të seancës së ndërprerë. Për më tepër, PDK-ja ka dorëzuar zyrtarisht disa kërkesa të njëpasnjëshme drejtuar kryesuesit Dehari për caktimin e datës dhe orës së vazhdimit të seancës. /Ekonomia online/

Continue Reading

Lajmet

Muriq shkëlqen në Kupën e Italisë, Sassuolo kalon tutje

Published

7 minutes ago

on

August 18, 2026

By

Portieri i Përfaqësueses së Kosovës, Arijanet Muriq, ka hapur sezonin e ri në mënyrë fantastike me skuadrën e tij, Sassuolo, duke siguruar kualifikim të bindshëm në Kupën e Italisë.

 Në ndeshjen e zhvilluar të hënën në mbrëmje në kuadër të fazës 1/32 të finales, Sassuolo mposhti pa probleme skuadrën e kategorisë së dytë, Cesena, me rezultatin e thellë 3:0. Golat e fitores për vendasit u shënuan nga Cristian Volpato, Vasilije Axhiq dhe Luca Lipani.

Gardiani 27-vjeçar kosovar ishte një nga lojtarët më të dalluar në fushë. Muriq realizoi pesë pritje vendimtare gjatë ndeshjes, duke mbajtur portën e paprekur dhe duke u vlerësuar me notën e lartë 8.2 për paraqitjen e tij.

Kjo fitore i jep një start mjaft pozitiv Sassuolos përpara fillimit të kampionatit. Skuadra do të luajë ndeshjen e saj të parë për edicionin 2026/27 në Serie A këtë të diel, ku do të përballet me Atalantan. /E.A/

Continue Reading

Lajmet

Sulmohet nga hakerët ueb-faqja e Zyrës për Mbrojtjen e Konsumatorit

Published

15 hours ago

on

August 17, 2026

By

Ueb-faqja zyrtare e Zyrës për Mbrojtjen e Konsumatorit, konsumatori.rks-gov.net, ka qenë cak i një sulmi kibernetik.

Për shkak të sulmit, ueb-faqja aktualisht nuk është funksionale. Autoritetet kanë njoftuar qytetarët se, deri në rikthimin e plotë të shërbimeve online, ankesat dhe kërkesat mund t’i dërgojnë përmes emailit [email protected] ose përmes Viberit në numrin +383 (0) 46 311-000.

Qytetarët janë falënderuar për mirëkuptimin, ndërsa pritet që ueb-faqja të rikthehet në funksion pas përfundimit të procedurave përkatëse./A.K/

Continue Reading

Lajmet

Fruthi në Kosovë, 137 raste të konfirmuara – 25 të reja vetëm gjatë javës së fundit

Published

15 hours ago

on

August 17, 2026

By

Instituti Kombëtar i Shëndetësisë Publike të Kosovës (IKShPK) ka njoftuar se nga 16 prilli deri më 17 gusht 2026, në Kosovë janë konfirmuar gjithsej 137 raste me fruth.

Vetëm gjatë javës së fundit janë regjistruar 25 raste të reja. Numri më i madh i rasteve është raportuar në Prishtinë me 47 raste dhe në Fushë-Kosovë me 34 raste. Pas tyre renditen Ferizaj me 12 raste, Obiliqi me 8, ndërsa Kaçaniku dhe Lipjani me nga 7 raste.

Raste janë raportuar edhe në Skenderaj, Vushtrri, Drenas, Gjilan, Shtime, Shtërpcë, Deçan, Gjakovë, Graçanicë, Mitrovicë, Podujevë dhe Viti.

Në komunat me numrin më të lartë të rasteve, ekipet e vaksinimit kanë intensifikuar aktivitetet. Vetëm gjatë javës së fundit janë vaksinuar me MMR gjithsej 276 fëmijë që kishin vonesa në vaksinim sipas kalendarit të rregullt.

IKShPK u bën thirrje prindërve dhe kujdestarëve të verifikojnë statusin e vaksinimit të fëmijëve dhe të sigurojnë vaksinimin sipas kalendarit në qendrat e mjekësisë familjare.

Instituti rekomandon gjithashtu që personat me simptoma të dyshimta, si temperaturë e lartë, skuqje të lëkurës, kollë, rrufë ose konjuktivit, të paraqiten menjëherë në institucionet shëndetësore./A.K/

Continue Reading

Të kërkuara