Lajmet

Përkundër ankesave të opozitës, Komisioni për Shëndetësi voton Projektligjin për çmimin e produkteve medicinale

Nga mazhoranca ky Projektligj u konsiderua me shumë ndikim për qytetarët.

Published

3 years ago

on

Komisioni për Shëndetësi dhe Mirëqenie Sociale, ka votuar në parim i Projektligjit për çmimin e produkteve medicinale, i cili u aprovua javë më parë nga Qeveria e Kosovës.

Nga mazhoranca ky Projektligj u konsiderua me shumë ndikim për qytetarët, ndërsa opozita e sheh si favorizim për oligarkët farmaceutikë, ndërsa i vështirëson kompanitë e vogla.

Deputeti i Partisë Demokratike të Kosovës, Bekim Haxhiu, tha se me këtë projektligj, favorizohen kompanitë e mëdha, ndërsa dëmtohen ato të voglat. Ai kërkoi që të merren parasysh edhe disa rekomandime të opozitës.

“Është e vërtetë që Kosova ka nevojë për ligjin për rregullimin e çmimit të barnave dhe është më se e vërtetë se ne si parti e kemi dorëzuar projektligjin e propozuar të njëjtin ligj një vit më parë, që mazhoranca nuk e ka miratuar. Ky projektligj i favorizon oligarkët farmaceutikë. Ky model i favorizon kompanitë e mëdha dhe i vështirëson kompanitë e vogla. Unë mendoj që do të duhej të ishte njëkohësisht Ligji për Pajisje dhe Produkte Medicinale. Unë mendoj që duhet ta trajtojmë me seriozitet këtë çështje, jo ta bëjmë këtë ligj për debate politike. Këto dy ligje duhet të trajtohen njëkohësisht”, u shpreh ai.

“Çështjen e çmimeve ta rregullojmë njëherë e mirë këtë punë, jo paradite të ketë një çmim, ndërkaq natën kur ka më pak barnatore hapur, një çmim tjetër. Nuk është qëllim i ligjit nëse është në harmoni me direktivat e Bashkimit Evropian, por të bëhet një zgjidhje për Kosovën. Mbështetjen tonë do ta keni nëse e merrni parasysh projektligjin që ne e kemi dorëzuar në Kuvend që ta pasurojmë këtë ligj, pra ta kemi vullnetin si deputetë që ta rregullojmë atë”, tha Haxhiu.

Deputeti i Lëvizjes Vetëvendosje, Mirsad Shkreta, kërkoi nga opozita ta përkrahin këtë Projektligj.

“Ajo pjesa më e rëndë që ka prek qytetarët në sektorin e shëndetësisë ka qenë sektori i barnave. Mendoj që është një ligj mirë i përpunuar, sot nuk isha i përgatitur të diskutojë se kemi diskutuar mjaftueshëm. Por deputeti Haxhiu e ngriti një çështje që është favorizimi i oligarkëve që nuk është e vërtetë.  Neni 10 flet për përcaktimit e çmimit të barnave origjinalë. Ne mund ta diskutojmë por unë mendoj që qëllimi i ligjit ka prek nga distribuimi me shumicë deri tek ajo shitja me pakicë. Përndryshe ligji është i përpunuar mirë dhe mendoj se duhet ta miratojmë”, tha Shkreta.

Ndërsa deputeti i Aleancës për Ardhmërinë e Kosovës, Shemsedin Dreshaj, e konsideroi si shumë të vonuar këtë Projektligj.  

Ndonëse e përkrah këtë Projektligj, Dreshaj pati edhe disa kërkesa në adresë të Ministrisë së Shëndetësisë.

“Kam pritur që të jetë më shumë i analizuar. Isha duke i shikuar të gjitha rekomandimet e shoqatës së farmaceutikëve, dhe asnjë prej tyre nuk është vendosur në ligj. Do të ishte mirë që ta kishim edhe ligjin për pajisje dhe produkte medicinale dhe këtë ligj që sa më shpejtë të harmonizohen. Kisha dashtë që të ulemi dhe ta bëjmë një punë që ta bëjmë këtë ligj sa më të mirë të mundshëm. Për këtë ligj ka nevojë populli, ka nevojë qytetari dhe ne kemi nevojë. Unë jam pro ligjit, që të miratohet, vetëm se Ministria e Shëndetësisë duhet t’i pranojë ato pikat që të bëhet sa më i mirë si ligj”, tha Dreshaj.

E Haxhi Avdyli nga Lista Guxo, tha se ky Projektligj është i shumëpritur por që edhe ky e konsideron si të vonuar. Problematikë sipas tij do të jetë numri i vogël i inspektorëve farmaceutikë.

“Pajtohem se ka pasur një vonesë. Ne kemi mundësi që ta plotësojmë dhe të ngrisim të gjitha mospëlqimet. Ne në Kosovë nuk vuajmë për ligje të mira, por për zbatimin e tij. Për shembull e kemi Ligjin e Duhanit i cili e ndalon pirjen e duhanit brenda por prapë pihet, njëjtë mund të ndodhë edhe me farmaci. Me këtë numër të inspektorëve farmaceutikë ky ligj e ka problem zbatimin e tij, duke marrë parasysh depot e mëdha”, tha Avdyli.

Ndërsa Fatmire Kollçaku, kryetare e komisionit tha se kanë për synim që kostoja e barnave në treg të jetë e krahasueshme me vendet e rajonit.

“Kjo fushë lidhet me prioritetin e Qeverisë për sigurimin e barnave të nevojshme për qytetarët. Propozoj që ta votojmë ne parim këtë projektligj. Fitimet me këtë ligj do të minimizohen dhe do të jenë shumë reale”, tha Kollçaku.

Me tetë vota për, asnjë kundër dhe asnjë abstenim, Projektligji për çmimin e produkteve medicinale është dërguar në Kuvend.

Related Topics:
Continue Reading

Lajmet

​Ndryshohet lokacioni, derbi Prishtina-Ballkani luhet në Hajvali

Published

22 minutes ago

on

September 30, 2025

By

Ndeshja ndërmjet FC Prishtinës dhe FC Ballkanit, e vlefshme për javën e 8-të në Superligën e Kosovës, do të zhvillohet këtë të shtunë, më 4 tetor, me fillim nga ora 15:00, në Kampin Nacional në Hajvali.

Siç ka bërë të ditur klubi nga kryeqyteti, ky ndryshim i lokacionit vjen për shkak të nevojës për mirëmbajtje dhe përpunim të fushës në stadiumin “Fadil Vokrri”, në kuadër të përgatitjeve për ndeshjen e ardhshme të Kombëtares së Kosovës.

Përballja mes Prishtinës dhe Ballkanit konsiderohet si takimi kryesor i javës së 8-të, në Albi Mall Superligën e Kosovës./S.K/KP/

 

Continue Reading

Lajmet

Kushtetuesja vendos për ankesën e Listës Serbe, Kuvendi s’është konstituuar

Published

50 minutes ago

on

September 30, 2025

By

Gjykata Kushtetuese ka vendosur për ankesën e Listës Serbe, për cka ka konstatuar se Kuvendi nuk është konstituuar në pajtim me përcaktimet e paragrafit 1 të nenit 66.

Në vendim, Gjykata ka urdhëruar që seanca Konstituive e Kuvendit të përfundojë brenda afatit të përcaktuar me paragrafin 1 të nenit 66 [Zgjedhja dhe Mandati] të Kushtetutës së Republikës së Kosovës dhe sipas Aktgjykimit të Gjykatës në rastet KO193/25 dhe KO196/25, përkatësisht brenda afatit të mbetur prej 12 (dymbëdhjetë) ditëve nga hyrja në fuqi e këtij Aktgjykimi

Më poshtë sjellim vendimin e plotë:

 

Gjykata Kushtetuese e Republikës së Kosovës, më 30 shtator 2025 vendosi përkitazi me kërkesën KO265/25, në lidhje me vlerësimin e kushtetutshmërisë së “Procesverbaleve të seancave të Kuvendit të Kosovës”, si dhe vendimeve të nxjerra në kuadër të Seancës Konstituive më 26 dhe 28 gusht 2025, të parashtruar nga Igor Simic dhe 9 (nëntë) deputetë të tjerë të Kuvendit të Republikës së Kosovës, bazuar në paragrafin 5 të nenit 113 [Jurisdiksioni dhe Palët e Autorizuara] të Kushtetutës së Republikës së Kosovës.

https://gjk-ks.org/notifications/details/3350?title=Njoftim+p%C3%ABr+vendim+n%C3%AB+rastin+KO265/25

Gjykata, njëzëri, ka vendosur:

  1. TË DEKLAROJË, kërkesën të pranueshme;
  2. TË KONSTATOJË, që Seanca Konstituive e Kuvendit, e filluar me 15 prill 2025 nuk ka përfunduar si rezultat i moszgjedhjes së nënkryetarit të Kuvendit nga radhët e deputetëve të komunitetit Serb, dhe Kuvendi nuk është konstituuar në pajtim me përcaktimet e paragrafit 1 të nenit 66 [Zgjedhja dhe Mandati] dhe paragrafët 1 dhe 4 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës;
  3. TË URDHËROJË, që Seanca Konstituive e Kuvendit të përfundojë brenda afatit të përcaktuar me paragrafin 1 të nenit 66 [Zgjedhja dhe Mandati] të Kushtetutës së Republikës së Kosovës dhe sipas Aktgjykimit të Gjykatës në rastet KO193/25 dhe KO196/25, përkatësisht brenda afatit të mbetur prej 12 (dymbëdhjetë) ditëve nga hyrja në fuqi e këtij Aktgjykimi;
  4. TË URDHËROJË, të gjithë deputetët e zgjedhur të Kuvendit të Republikës së Kosovës, që në pajtim me nenin 4 [Forma e Qeverisjes dhe Ndarja e Pushtetit], nenin 7 [Vlerat], paragrafin 4 të nenit 67 [Zgjedhja e Kryetarit dhe Nënkryetarëve]  dhe nenin 74 [Ushtrimi i Funksionit] të Kushtetutës së Republikës së Kosovës, që gjatë procedurës së zgjedhjes së nënkryetarit të Kuvendit të Republikës së Kosovës nga radhët e deputetëve të komunitetit Serb, të ushtrojnë funksionin e tyre kushtetues në interesin më të mirë të Republikës së Kosovës dhe në pajtim me Kushtetutën dhe Rregulloren e Kuvendit;
  5. TË VAZHDOJË, masën e përkohshme, e cila ka hyrë në fuqi nga data 5  shtator 2025, deri në hyrjen në fuqi të këtij Aktgjykimi;
  6. T’UA KUMTOJË këtë Aktgjykim palëve;
  7. TA PUBLIKOJË këtë Aktgjykim në Gazetën Zyrtare të Republikës së Kosovës, në pajtim me paragrafin 4 të nenit 20 (Vendimet) të Ligjit Nr. 03/L-121 për Gjykatën Kushtetuese të Republikës së Kosovës;
  8. TË KONSTATOJË që ky Aktgjykim hyn në fuqi në ditën e publikimit nga Gjykata Kushtetuese e Republikës së Kosovës dhe njoftimit të palëve, përveç pikës V të dispozitivit, e cila hyn në fuqi menjëherë.

Continue Reading

Lajmet

​Fati i Amorim në duart e Granit Xhakës

Published

57 minutes ago

on

September 30, 2025

By

Manchester United gjendet në krizë të thellë dhe presioni mbi trajnerin Ruben Amorim po shtohet sepse skuadra ka marrë vetëm 7 pikë nga 6 ndeshje duke humbur tre përballjet e këtij sezoni, duke lënë tifozët e pakënaqur.

Legjenda Wayne Rooney ka kritikuar ashpër gjendjen e klubit, duke thënë se disa lojtarë nuk e meritojnë ta veshin fanellën e United dhe seklubi ka humbur kulturën e tij.

Ai shprehu edhe mungesë besimi te Amorim.

Të shtunën United përballet me Sunderlandin e Granit Xhakës, një sfidë vendimtare për të ardhmen e portugezit.

Mediat britanike raportojnë se drejtuesit e klubit tashmë po shqyrtojnë pasues të mundshëm si Oliver Glasner, Fabian Hürzeler dhe Andoni Iraola./S.K/KP/

Continue Reading

Botë

Turqia do të bisedojë me Hamasin për planin amerikan të Gazës

Published

3 hours ago

on

September 30, 2025

By

Presidenti turk, Recep Tayyip Erdogan, vlerësoi më parë “përpjekjet dhe lidershipin” e Donald Trump për t’i dhënë fund luftës në Gaza.

Përfaqësuesit turq do të marrin pjesë në diskutimet me delegacionin e Hamasit mbi planin e Presidentit të SHBA-ve Donald Trump për t’i dhënë fund luftës në Gaza, tha një zëdhënës i Ministrisë së Jashtme të Katarit.

Presidenti turk, Recep Tayyip Erdogan, vlerësoi më parë “përpjekjet dhe lidershipin” e Donald Trump për t’i dhënë fund luftës në Gaza, pasi udhëheqësi amerikan siguroi mbështetjen e kryeministrit izraelit Benjamin Netanyahu për një propozim paqeje të sponsorizuar nga SHBA-të.

“Unë përgëzoj përpjekjet dhe lidershipin e presidentit amerikan Donald Trump që synojnë ndalimin e gjakderdhjes në Gaza dhe arritjen e një armëpushimi”, tha Erdogan, i cili u takua me Trump në Shtëpinë e Bardhë për herë të parë në gjashtë vjet javën e kaluar.

Turqia do të vazhdojë të kontribuojë në proces “me qëllim krijimin e një paqeje të drejtë dhe të qëndrueshme të pranueshme për të gjitha palët”, shtoi ai në X.

Një burim nga Ministria e Jashtme turke tha vonë të hënën se ministri i Jashtëm Hakan Fidan kishte diskutuar propozimin e Trump me homologët e Arabisë Saudite, Katarit dhe Jordanisë në një telefonatë./D.B/EO

Continue Reading

Të kërkuara