Lajmet

Përfundon procedura e shpronësimit për rinovimin e stadiumit “Adem Jashari”

Kanë përfunduar të gjitha procedurat e Shpronësimit për Renovimin e Stadiumit të Mitrovicës, “Adem Jashari”.

Publikuar

Stadiumi “Adem Jashari” në Mitrovicë tash e disa vite ka mbetur jashtë funksionimit për shkak të demolimit të tij, por duket se ai do t’i rikthehet normalitetit shumë shpejtë.

Qeveria e Republikës së Kosovës javë më parë ka ndarë 12 milionë euro për rinovimin e tij, derisa tashmë ministri i Ministrisë së Planifikimit Hapësinor dhe i Infrastrukturës, Liburn Aliu ka bërë të ditur se tashmë kanë përfunduar edhe procedurat e shpronësimit gjë që i hap rrugë nisjes së punimeve për rinovimin e tij.

“Kemi përfunduar të gjitha procedurat e Shpronësimit për Renovimin e Stadiumit të Mitrovicës, “Adem Jashari”. Edhe pse shpronësimi solli vonesa në ecurinë e këtij projekti shumë të rëndësishëm, pas një koordinimi dhe bashkëpunimi të suksesshëm ndërinstitucional, kemi përfunduar të gjitha procedurat e shpronësimit, në mënyrë që Stadiumi i Mitrovicës “Adem Jashari”, më në fund të vihet në rrugën e duhur, kështu që të jetësohet e ta gëzojnë të gjithë qytetarët”, ka shkruar Aliu.

Kujtojmë se pak ditë më parë, Ministria e Kulturës, Rinisë dhe Sportit gjithashtu ka marrë vendim për ndërtimin e stadiumit të qytetit në Gjilan me kosto prej 15 milionë eurosh.

Lajmet

Krasniqi: Për katër vite, Kosova ka humbur mbi 210 mijë banorë

Publikuar

nga

Kryetari i Partisë Demokratike të Kosovës, Memli Krasniqi ka reaguar sot pas publikimit të statistikave të regjistrimit të popullsisë, ku, siç thotë, u konfirmua se për 4 vitet e fundit Kosova ka humbur mbi 210 mijë banorë.

“Pa u lëshuar këtu në saktësinë e shifrave të publikuara, është lajm i keq dhe shumë i dhembshëm që, duke u bazuar në publikimet zyrtare të ASK-së, po konfirmohet se vetëm në katër vitet e fundit, Kosova i ka humbur mbi 210 mijë banorë”, tha Krasniqi në një postim në Facebook.

Duke iu referuar dhënave të ASK-së, Krasniqi tha se dëshmohet se në vitin 2020 Kosova kishte 1,798,186 banorë.

“Ndërsa, sot, kjo Agjenci publikoi shifrën pikëlluese prej vetëm 1,586,659 banorëve rezidentë”.

“Qytetarët, e veçmas rinia e Kosovës, po e braktisin vendin! Ose, thënë më mirë, Qeveria i ka braktisur ata dhe ëndrrat e tyre. Ky lajm i gëzon vetëm ata që nuk ia duan të mirën vendit tonë. Kjo shifër kërkon veprime politike emergjente. Qytetarët tanë meritojnë më shumë dhe më mirë – pranë familjeve të tyre dhe në vendin e vet”, tha Krasniqi.

Vazhdo të lexosh

Lajmet

​Pothuajse 10% e popullsisë së BE-së s’është në gjendje të përballojë ushqimin e duhur

Publikuar

nga

Rreth 9.5% e popullsisë së BE-së nuk ishin në gjendje të përballonin një vakt që përmban mish, peshk ose një ekuivalent vegjetarian çdo të dytën ditë të vitit të kaluar, njoftoi sot Eurostat.

Autoriteti statistikor i bllokut 27 anëtarësh tha se kjo shifër ishte 1.2 pikë përqindje më e lartë krahasuar me normën 8.3 të vitit 2022.

“Për më tepër, duke u fokusuar te personat në rrezik të varfërisë në vitin 2023, pesha në nivel të BE-së ishte 22,3%”, tha Eurostati, duke shtuar se kjo shifër gjithashtu u rrit me 2,6 pikë përqindje në bazë vjetore.

Përqindja më e lartë e njerëzve në rrezik varfërie të paaftë për të përballuar ushqimin e duhur u pa në Sllovaki (45.7%), e ndjekur nga Hungaria (44.9%) dhe Bullgaria (40.2%). Nga ana tjetër, përqindja më e ulët u regjistrua në Irlandë (4.2%), e ndjekur nga administrata greke qipriote (5%) dhe Portugalia (5.9%)./AA

Vazhdo të lexosh

Lajmet

Temperaturat e larta në Kosovë, Ministria e Shëndetësisë merr këtë vendim

Publikuar

nga

Ditëve të fundit në Kosovë janë duke mbizotëruar temperatura të larta.

Të njëjtat është paralajmëruar që do të vazhdojnë edhe ditëve në vijim.

Shkak i kësaj Ministria e Shëndetësisë ka marrë vendim për kufizim të orarit të punës për disa kategori.

Nga 13 e deri më 20 korrik lirohen nga puna gratë shtatzëna, por në rast të pamundësisë së lirimit të njëjtat punojnë nga shtëpia.

Po ashtu qytetarët me sëmundje kronike punojnë me orar të shkurtuar deri në 4 orë në ditë.

Nga data 13.07.2024 deri më 20.07.2024 ndalohet puna në sektorin e ndërtimtarisë në ambiente të hapura gjatë orarit 11:00 – 17:00 në të gjithë territorin e Republikës së Kosovës.

Ndërsa, varësisht prej temperaturave që mbizotërojnë gjatë muajit korrik dhe gusht 2024, ndërmerren masa të tjera.

Vazhdo të lexosh

Lajmet

Osmani takohet me Macronin në Uashington, temë diskutimi e ardhmja euroatlantike e Kosovës

Publikuar

nga

Presidentja Vjosa Osmani ka qëndruar në Uashington këto ditë për të marrë pjesë në Samitin e NATO-s për përvjetorin e 75-të të Aleancës.

Në këtë samit, Osmani ka zhvilluar një takim me homologun e saj francez, Emmanuel Macron.

Ajo tha se temë diskutimi ka qenë e ardhmja euroatlantike e Kosovës, mes tjerash.

“Diskutim përmbajtjesor me Presidentin Macron në Samitin e NATO-s në Washington D.C lidhur me të ardhmen euroatlantike të Kosovës, reformat në fushën e sundimit të ligjit dhe forcimin e marrëdhënieve bilaterale ndërmjet Kosovës dhe Francës”, shkroi Osmani në Facebook.

Vazhdo të lexosh

Të kërkuara