Lajmet

Përfundon dëshmia e ish-ushtarakut amerikan në rastin Thaçi dhe të tjerët

Published

on

Kanë përfunduar kundërpyetjet e mbrojtjes për dëshmitarin, Steven Russell, në procesin gjyqësor ndaj ish-krerëve të Ushtrisë Çlirimtare të Kosovës. Në seancën e sotme ka vijuar dëgjimi i dëshmitarit, i cili është shoqëruar nga përfaqësues të qeverisë amerikane. Pas marrjes në pyetje nga mbrojtja e Thaçit dhe Veselit dje, në seancën e sotme ky dëshmitar është marrë në pyetje nga mbrojtja e Selimit, Krasniqit dhe nga trupi gjykues. Hashim Thaçi, Kadri Veseli dhe Rexhep Selimi kanë qenë të pranishëm në sallën e gjyqit, ndërkaq Jakup Krasniqi e ka ndjekur seancën përmes video-lidhjes.

Avokati i Rexhep Selimit, Eric Tully ka insistuar në pyetjet për dëshmitarin e ZPS-së lidhur me kartat identifikuese të pjesëtarëve të Ushtrisë Çlirimtare të Kosovës dhe nëse kanë pasur kontakt me Ministrinë e Rendit Publik.

Tully: A është e drejtë që KFOR-i nuk ka qenë në kontakt me këtë ministri, me sa keni ju dijeni, dhe nuk e dinte se kush kishte e kush nuk kishte kartela të tilla identifikimi?

Russell: Sikur po ju thoja, udhëzimet tona ishin këto: kartelat që nuk janë nga IOM-i apo nga komisioni për zbatimin e përbashkët apo Kombet e Bashkuara, duheshin sekuestruar. Nëse kishin lidhje me UÇK-në, qoftë kjo nga ministritë apo funksionet civile, ne e kishim për udhëzim, kishim direktivë që t’i sekuestronim, t’i merrnim këto.

Tully: Pyetja ime ishte kjo, ju nuk keni qenë në kontakt me këtë ministri për të komunikuar me ta e për t’i pyetur kush kishte kartela të tilla identifikimi. Ju kishit vetëm për detyrë që t’i merrnit këto kartela?

Russell: Po, sipas marrëveshjes teknike ne kishim për detyrë t’i merrnim këto kartela identifikimi.

Tully: Ju po përgjigjeni me jo, ju nuk ishit kontakt me këtë ministri?

Russell: Nga perspektiva jonë ne kishim urdhra. Sipas marrëveshjes nuk ekzistonin institucione legjitime sepse atëherë ishte mandati i OKB-së ta kryente këtë detyrë.

Tully: Po e marrë si jo.

Russell: Ju po bëni një pyetje shumë të vështirë dhe doni një përgjigje të thjeshtë”, tha Russell.

Gjatë dëshmisë së tij dje, Russellit i është prezantuar një kartë, ku u tha se në të shkruhet “Ministria e Rendit Publik-letërnjoftim zyrtar”. Ish-ushtaraku amerikan tha se kanë sekuestruar shumë dokumente e kompjuterë.

“Kemi sekuestruar shumë dokumente me letra me kokë, kemi sekuestruar kompjuterë, kemi sekuestruar shumë dokumentacion. Por gjithashtu kemi gjetur edhe raporte që i kemi lexuar më vonë dhe shumë dokumente zyrtare sigurish që kishin një formë më të unifikuar”, shtoi ai.

Russell u pyet edhe lidhur me bastisjet që kanë kryer në fjetore dhe protestën e shqiptarëve rreth portës.

Tully: Bastisja që kryet ju në fjetore, nuk ishte e fshehtë kjo është e qartë.

Russell: Task-forca ‘Falcon’ kishte dijeni të plot për atë që po ndodhte.

Tully: E morën vesh edhe banorët e zonës dhe u mblodhën me qindra njerëz jashtë portës dhe krijuan një far prishje të rendit aty.

Russell: Nëse po thoni që ne deshëm të bënim teatër aty, atëherë kjo është një parashtrim i pasaktë. Ne deshëm që kjo bastisje të kryhet sa më shpejt, por kjo zgjati shumë sepse duheshin bërë fotografi dhe këto fotografi duhet të ju tregonim një prej viktimave të pretenduara. Pra, ne menduam se do të kishim përfunduar bastisjen brenda dy orësh, nuk kishim për synim të qëndronim, nuk kishim për synim të prishnim rendin publik në Gjilan atë ditë. Ne deshëm të hyjmë në fjetore dhe të largoheshim”, tha dëshmitari i ZPS-së.

Edhe avokati i Krasniqit, Aiden Ellis ka pyetur lidhur me bastisjen nga KFOR-i në fjetore dhe nëse ka parë dokumente të nënshkruara nga Ahmeti Isufi. Dëshmitari Steven Russell tha se ka qenë i pranishëm në këtë bastisje dhe e ka parë dokumentin, i cili i është dhënë nga Florim Kllokoqi.

Dëshmitari Steven Russell u pyet nga gjyqtari, Ginel Metro, nëse ushtarët e UÇK-së kanë pasur mundësi të raportojnë për ngjarjet që kishin ndodhur para KFOR-i të jetë në terren.

“Kishte raportime si nga ana e serbëve dhe e shqiptarëve që raportonin për varre masive dhe donin që ne t’i hetonim. Pra, gjëra të kësaj natyre. Raportonin për krime që kishin ndodhur edhe para se të mbërrinin forcat e NATO-s edhe thonin ‘ja këtu janë varrosur njerëzit’ ose ‘janë varrosur atje’. Jemi përpjekjur t’i hetojmë, ishte një lajm i madh për këdo që donte të hetonte varret masive të gjente vendndodhjen e këtyre varreve masive. Zakonisht këto raporte vinin nga fshatarët e zonës ose nga personat me të cilët kishim kontakte. Kemi marrë raportime të ngjashme edhe nga serbët edhe nga shqiptarët”, përfundoi ai.

Në gjashtë muajt e parë, siç shtoi ai, misioni i KFOR-it përpiqej që të mos digjeshin pronat edhe të mos vriteshin njerëzit.

Gjykimi ndaj ish-krerëve të Ushtrisë Çlirimtare të Kosovës ka filluar më 3 prill të vitit 2023. Ish-krerët e UÇK-së po gjykohen për krime të pretenduara të luftës dhe po mbahen në qendrën e paraburgimit në Hagë që nga nëntori i vitit 2020.

Lajmet

Donika Emini kritikon interpretimin e këngës nacionaliste serbe në forumin e BE-së në Bruksel

Published

on

Ekspertja e politikës së jashtme, Donika Emini, ka kritikuar interpretimin e këngës nacionaliste serbe “Oj Kosovo, Kosovo” në mbrëmjen hapëse të Forumit të Zgjerimit të Bashkimit Evropian në Bruksel, duke e cilësuar të papranueshme përzgjedhjen e një kënge që përmban pretendime territoriale ndaj Kosovës.

Gjatë fjalimit të mbajtur më 16 nëntor, Emini tha se ngjarja e kishte detyruar ta ndryshonte tërësisht fjalimin e përgatitur. Ajo e nisi paraqitjen duke cituar disa vargje të këngës, të interpretuar një natë më parë.

“Popull serb, thërrit fort. Kosovë, nuk do të të dorëzojmë. Ti gjithmonë ke qenë e jona. Kështu ka qenë që nga kohët e lashta”, citoi Emini, duke theksuar se teksti përmban pretendime të drejtpërdrejta territoriale ndaj Kosovës.

Ajo ngriti pikëpyetje nëse institucionet evropiane i kuptojnë kompleksitetet politike dhe ndjeshmëritë historike të Ballkanit Perëndimor.

“Pas asaj që ndodhi mbrëmë, vërtet pyes veten nëse ata i kuptojnë kompleksitetet e rajonit, edhe pse po flasim për një Komision Evropian që është mjaft afër këtij rajoni”, deklaroi ajo.

Emini tregoi se kishte vendosur të merrte pjesë në forum pasi kishte vërejtur mungesën e përfaqësuesve nga Kosova në listën e folësve. Megjithatë, ajo theksoi se prania e saj si përfaqësuese e shoqërisë civile nuk mund ta zëvendësonte përfaqësimin institucional të vendit.

Ajo tha se nuk do të befasohej nëse një këngë e tillë do të interpretohej në tubime nacionaliste apo në një tubim të ish-presidentit serb Slobodan Millosheviq, por u shpreh e befasuar që ajo u dëgjua në një aktivitet të Komisionit Evropian.

“U befasova shumë kur e dëgjova në Komisionin Evropian, një projekt paqeje, një projekt që po e udhëheq rajonin drejt demokracisë”, u shpreh Emini.

Ekspertja sqaroi se kundërshtimi i saj nuk kishte të bënte me gjuhën apo muzikën serbe, duke theksuar se do ta mirëpriste interpretimin e këngëve shqipe dhe serbe që promovojnë bashkëjetesën dhe tejkalimin e ndarjeve.

Në përfundim të fjalimit, Emini i bëri thirrje Bashkimit Evropian të mos riprodhojë narrativa nacionaliste dhe revizioniste që, sipas saj, kanë penguar procesin e pajtimit në Ballkan.

“A mundeni të paktën të mos i riprodhoni narrativat revizioniste dhe propagandistike të një regjimi që e përçau rajonin dhe që e bëri pajtimin kaq të vështirë deri më sot?”, pyeti ajo.

Fjalimi u mbajt në kuadër të forumit “Përmes pajtimit drejt zgjerimit të Bashkimit Evropian”, më 16 nëntor, një ditë pas interpretimit të këngës në mbrëmjen hapëse të aktivitetit në Bruksel./A.K/

Continue Reading

lajme

Studentët e Masterit në Agrokulturë me Mjedis nisin hulumtimin eksperimental për kultivimin e sallatës së gjelbër pa tokë

Published

on

By

Studentët e programit Master në Agrokulturë me Mjedis, Sihana Bokshi dhe Shpëtim Salihu, nën udhëheqjen e profesorit Ismet Babaj, kanë dizajnuar metodikën e hulumtimit dhe kanë nisur punën eksperimentale për kultivimin e sallatës së gjelbër (Lactuca sativa L.) në sistemin e kultivimit pa tokë.

Qëllimi i këtij eksperimenti është vlerësimi i efekteve të sistemit të prodhimit dhe furnizimit me azot në formë të nitratit mbi statusin ushqyes të bimëve, akumulimin e nitrateve dhe nitriteve, prodhimin e biomasës, si dhe morfologjinë e sistemit rrënjor.

Në kuadër të hulumtimit po testohen tre trajtime me tretësira ushqyese në dy sisteme të hapura të prodhimit pa tokë, përmes vazove me vëllim prej 1 litri: njëri sistem përdor vermikulitin si substrat rritës, ndërsa tjetri përdor cocopeat (torfë kokosi).

Puna kërkimore do të përmbyllet me analiza kimike dhe matje të parametrave të rritjes së bimëve. Të dhënat dhe rezultatet e përfituara do t’u shërbejnë studentëve për përgatitjen e punimeve të tyre të diplomës, si dhe për publikime në revista shkencore, duke dëshmuar gërshetimin e suksesshëm të teorisë me praktikën shkencore.

Continue Reading

lajme

Rama kritikon interpretimin e melodisë së këngës nacionaliste serbe në Bruksel

Published

on

By

Kryeministri i Shqipërisë, Edi Rama, ka kritikuar interpretimin e melodisë së një kënge nacionaliste serbe në koncertin e organizuar nga Komisioni Evropian në Bruksel. Ai e bëri këtë në fillim të një debati në “Forumin e Zgjerimit“, duke thënë se kjo çështje nuk mund të mbetet pa u përmendur.

“Nuk mund të heshtet ajo që ndodhi mbrëmë me muzikën e interpretuar në një mbrëmje në prag të këtij forumi. Nuk e di a ishte e qëllimshme apo injorancë, por ishte një këngë nacionaliste këtu, në mbrëmjen e këtij eventi. Për ta shtuar ironinë, u bë nën logon ‘Meloditë e Unitetit’”, tha Edi Rama.

“Asnjëherë nuk mund të lëmë anash diçka që na kthen nga e kaluara. E kam thënë për vite se sa e rëndësishme është Serbia për rajonin tonë, sa e rëndësishme është ta mbajmë Serbinë në anën tonë. Por dua të sigurohem që ajo që them të mos shkojë kundër kësaj bindjeje. Por, në të njëjtën kohë, mendoj se nuk duhet të tolerojmë hapësirë që betejat e mesjetës të bëhen motivim për ndasitë e sotme”, ka thënë Rama.

“Sa më shpejt Serbia ta njohë Kosovën, aq më mirë do të jetë për Serbinë dhe për të gjithë”, ka thënë kryeministri i Shqipërisë. /KOHA/

Continue Reading

Vendi

Ndalohet një zyrtar i Gjykatës së Prishtinës, dyshohet për keqpërdorim detyre

Published

on

By

Prokuroria Themelore në Prishtinë, në bashkëpunim me Drejtorinë për Hetimin e Krimeve Ekonomike dhe Korrupsionit (DHKEK) në Policinë e Kosovës, ka ndaluar sot për 48 orë personin me inicialet A.B., udhëheqës i Zyrës për Menaxhimin e Lëndëve në Gjykatën Themelore në Prishtinë.

Sipas njoftimit të Prokurorisë, ndalimi është bërë pas hetimeve disamujore, nën dyshimin se A.B. ka kryer veprën penale “Keqpërdorimi i pozitës apo autoritetit zyrtar”. Ai dyshohet se gjatë ushtrimit të detyrës, me qëllim të përfitimit të kundërligjshëm pasuror për vete dhe persona të tjerë, ka krijuar dosje fiktive duke vendosur vulën e vërtetësisë në kopjen e një kontrate të falsifikuar të shitblerjes.

Përmes këtyre veprimeve, shtetasit të Serbisë me inicialet M.B. — i cili aktualisht ndodhet në arrati — i është mundësuar regjistrimi i kundërligjshëm i një banese me sipërfaqe prej 55.89 m² në Zonën Kadastrale në Matiçan, pranë Zyrës Kadastrale në Prishtinë.

Prokurori i Shtetit ka paralajmëruar se brenda afatit ligjor do të paraqesë kërkesë në gjykatën kompetente për caktimin e masës së paraburgimit ndaj të pandehurit. /E.A/

Continue Reading

Të kërkuara