Igor Tudor vazhdon ende si trajner i Juventusit, por pozita e tij është në rrezik pas humbjes së parë të sezonit ndaj Comos. Dy ndeshjet e ardhshme, kundër Real Madridit në Ligën e Kampionëve dhe Lazios në kampionat, pritet të jenë vendimtare për të ardhmen e kroatit në stol.

Drejtuesit e klubit po shqyrtojnë disa emra të njohur si zëvendësues të mundshëm, ku në listë janë Roberto Mancini, Luciano Spalletti dhe Raffaele Palladino, ndërsa një opsion mbetet edhe rikthimi i Thiago Mottas thuhet sipas “Gazzetta dello Sport”.

Ndërkohë “Tuttosport” shton kandidatët gjermanë Edin Terzic dhe Marco Rose.

Raportohet se ditët e fundit Tudor është takuar me menaxherin e përgjithshëm Damien Comolli për të diskutuar mbi ecurinë e skuadrës dhe ndryshimet e mundshme taktike. Megjithatë, marrëdhëniet mes trajnerit dhe drejtuesve nuk duken të mira, pasi palët kanë pikëpamje të ndryshme mbi mënyrën e lojës dhe drejtimin e ekipit.

Tudor do të ketë shansin e fundit për të bindur klubin në përballjet e radhës, që mund të përcaktojnë fatin e tij në Torino./S.K/KP/Gazzetta dello Sport/

Luka Modric ka dhënë vlerësime të mëdha për Rafael Leaon pas fitores së Milanit ndaj Fiorentinës, ndeshje në të cilën portugezi shënoi dy gola vendimtarë.

“Rafa është vërtet fantastik. Fatkeqësisht u lëndua herët, por tani është rikthyer dhe ky është Leao që na duhet. Ai është një nga më të mirët në botë dhe mund të përmirësohet ende. Shpresoj që këto dy gola ta ndihmojnë të fitojë më shumë vetëbesim, sepse është shumë i rëndësishëm për ne,” tha Modric.

Leao gjithashtu u shpreh i lumtur për bashkëpunimin me kroatin duke thënë se të luash me lojtarë si Modric të bën të rritesh.

“Kur mbërriti në Milanello më përqafoi dhe më tha se donte të më ndihmonte. Të luash me lojtarë si Modric të bën të rritesh. Jam shumë i lumtur dhe besoj se do të më japë shumë asiste për ta çuar Milanin përpara”, tha Leao.

“E dinim që do të ishte e vështirë. Fiorentina ka lojtarë cilësorë, por ne bëmë punë të mirë si grup. Dy golat e mi ia dedikoj familjes dhe shokëve të ekipit pas një muaji e gjysmë mungesë për shkak dëmtimi”, vazhdoi ai.

Në fund, Modric theksoi se skuadra duhet të vazhdojë me qetësi sepse po rriten si ekip dhe kjo është rruga e duhur për ata./S.K/KP/

Në kuadër të xhiros së tetë të Premier Ligës angleze është zhvilluar një nga ndeshjet më të zjarrta të sezonit, derbi mes Liverpoolit dhe Manchester Unitedit, i cili përfundoi me fitoren e “djajve të kuq” me rezultat 2:1.

Skuadra e trajnerit Ruben Amorim e nisi ndeshjen në mënyrën më të mirë të mundshme, duke kaluar në epërsi që në minutën e dytë me golin e Bryan Mbeumo, i cili shfrytëzoi një gabim në mbrojtjen e vendasve dhe mposhti portierin Alisson.

Liverpooli kërkoi me ngulm barazimin gjatë gjithë pjesës së parë, por pa sukses, ndërsa reagimi erdhi vetëm në minutën e 78-të, kur Cody Gakpo realizoi për 1:1 pas një aksioni të bukur ekipor.

Megjithatë, gëzimi i “The Reds” zgjati pak, pasi në minutën e 84-të mbrojtësi Harry Maguire u ngjit më lart se të gjithë në zonë dhe me një goditje të saktë me kokë shënoi golin e dytë për Unitedin, duke i dhënë skuadrës së tij një fitore të madhe në transfertë.

Pas këtij triumfi, Manchester United ngjitet në kuotën e 13 pikëve dhe renditet në vendin e nëntë të tabelës, ndërsa Liverpooli mbetet në pozitën e tretë me 15 pikë, duke humbur mundësinë për t’u afruar me kryesuesit.

Ky derbi konfirmoi se United po rikthehet gradualisht në formë, ndërsa për Liverpoolin, humbja në “Anfield” shërben si alarm për përmirësim në javët e ardhshme./S.K/KP/

Presidenti i FIBA Evropës, Jorge Garbajosa, po qëndron për vizitë në Kosovë, ku po zhvillon disa aktivitete dhe takime të rëndësishme që lidhen me zhvillimin e basketbollit.

Në një intervistë për KosovaPress, Garbajosa ka vlerësuar lart bashkëpunimin e Federatën e Basketbollit të Kosovës dhe zhvillimin e basketbollit në vendin tonë.

“Kur vjen në një vend, siç është Kosova, ka shumë gjëra për të bërë. Për shembull, dy gjërat kryesore ishin takimi i Komisionit të Rinisë dhe Takimi i Under-14, i cili është një nga programet kryesore për ne, sepse natyrisht për ne Eurobasketi për meshkuj, femra, seniorë janë shumë të rëndësishëm, por si FIBA Europe, si një ekip në Mynih, ne vendosim më shumë kohë dhe përpjekje tek të rinjtë, tek programi i rinisë, dhe Under-14 është aty ku fillon gjithçka. Po ashtu kemi edhe disa takime këtu, përfshirë një takim këtë mëngjes me Ministrinë, Ministrin e Sportit dhe Kulturës dhe ekipin e tij. Ka shumë gjëra për të bërë këtu, por për mua kjo nuk është aspak një përpjekje, sepse po vij për të bërë atë që dua dhe në një vend që dua gjithashtu”, u shpreh fillimisht Garbajosa.

Ai vlerësoi lart bashkëpunimin e FIBA Evropës me Federatën e Basketbollit të Kosovës, duke theksuar se përfshirja e Kosovës në këtë familje është një nder i vërtetë.

“Së pari, për mua, dhe mund të flas në emër të gjithë bordit të FIBA Europe, të kemi Kosovën si pjesë të ekosistemit tonë, si pjesë të familjes tonë, është një nder i vërtetë. Jo vetëm sepse kemi një marrëdhënie jashtëzakonisht të mirë me Presidentin Fetahu, që gjithashtu është anëtar i bordit të FIBA Europe, por niveli i bashkëpunimit, niveli i proaktivitetit. Kur je një federatë evropiane dhe dëshiron të bësh shumë gjëra, të duhen vende që bashkëpunojnë me ty. Dhe kur ke Kosovën gjithmonë të gatshme për të organizuar, në këtë rast Takimin Under-14 dhe komisionin e rinisë, por edhe shumë gjëra të tjera si Eurobasketi i rinisë dhe gjatë verës shumë aktivitete këtu, kjo është e mirë.”, shtoi ai.

Garbajosa tha se Evropa po kalon një periudhë të rëndësishme ristrukturimi në aspektin e garave, me qëllim që të krijohen më shumë mundësi zhvillimi për të gjitha klubet.

“Në fakt, natën e kaluar patëm një takim shumë të frytshëm me Presidentin dhe Sekretarin e Përgjithshëm z. Novak dhe gjithashtu znj. Dushku për mënyrën se si mund të krijojmë një skenar ku kombëtaret, federatat kombëtare dhe klubet të zhvillohen. Jemi në një moment shumë interesant në Evropë për atë që e quajmë ‘riformësim’ i piramidës së konkurrencës, jo vetëm në Evropë, por po flas specifikisht për Evropën, ku duhet t’u japim mundësi klubeve, klubeve jo tradicionale, të marrin pjesë në konkurrencë. Kam disa ish-lojtarë që tani janë miq të mirë dhe janë përgjegjës ose pronarë të klubeve. Ata më kërkojnë të njëjtën gjë: kjo nuk është vetëm për klubet kryesore; edhe klubet e klasës së mesme, ata që nuk marrin pjesë tradicionalisht në konkurrencën kombëtare, duhet të kenë mundësinë të zhvillohen. Ne po punojmë për këtë; komisioni i konkurrencës po punon për këtë. Ne jemi të bekuar dhe të lumtur të dimë që çdo vit duhet të zgjerojmë konkurrencat, për meshkuj dhe femra, sepse shumë vende duan të marrin pjesë. Nuk mund të izolojmë vetëm një vend; kjo po ndodh në të gjithë Evropën dhe duhet të marrim masat e duhura në të ardhmen e afërt”, tha në fund ai.

Gjatë ditës, Presidenti i FIBA Evropës, Jorge Garbajosa, së bashku me Drejtorin Ekzekutiv të FIBA Evropës Kamil Novak, si dhe drejtuesit e FBK-së, Kryetari Arben Fetahu dhe Sekretarja e Përgjithshme, Elvira Dushku u pritën sot nga Ministri i Kulturës, Rinisë dhe Sportit, Hajrulla Çeku, zëvendësministrja Daulina Osmani, Sekretari i Përgjithshëm Bislim Bislimi dhe Fidan Shatri, Kryeshef i Agjencisë së Sportit të Kosovës./KP