Lajmet

Për herë të gjashtë dështon konstituimi i Komisionit hetimor për rezervën shtetërore

Published

3 years ago

on

Komisioni hetimor parlamentar në lidhje me procedurat për furnizimin dhe menaxhimin me rezervat shtetërore, edhe pas tentativës së gjashtë nuk është konstituar. Kjo për shkak mungesës së mazhorancës.

Kryesuesi në këtë komision, Rashit Qalaj ka ritheksuar se deputetet nga pozita qëllimshëm po pamundësojnë konstituimin e këtij komisioni me qëllim që të fshihen pas të vërtetave lidhur me keqpërdorimet e rezervave shtetërore.

Lidhur me shkresën zyrtare që kanë dërguar te zyra ligjore, Qalaj tha se kanë marrë opinion porse pa sqarime.

“Ata janë duke bojkotuar punën e vetëm këtij komisioni, të gjitha komisionet tjera janë duke funksionuar, dhe shtrohet pyetja pse. Sepse ky komision është i vetmi që është duke u marr me hetimin e dyshimeve për keqpërdorim të rezervave shtetërore dhe padyshim ne mund të themi se deputetet e VV-së janë duke tentuar që me bojkotimin e këtij komisioni, te bojkotojnë edhe informimin e publikut për keqpërdorimet që janë bërë me rezerva shtetërore. Kemi dërguar letër nëpërmjet kryetarit të Kuvendit, zyrës ligjore për çështjen e mungesës së kolegeve të VV-së, dhe kemi marrë një opinion pa opinion. Pra, nuk sqaron asgjë, është një opinion i cili e shton konfuzitetin, vetëm se janë përmendur detyrimet e deputeteve që janë të obliguar të marrin pjesë në punën e Kuvendit, mirëpo nuk kanë sqaruar se çfarë mund të bëjmë gjatë procedurave dhe dyshimeve që kemi ngrit, se a mund t’i zëvendësojmë koleget që po vinë nga partia e njëjtë, apo kemi të drejtë që të vazhdojmë dhe të kërkojmë edhe anëtar të komisionit nga parti tjera që kanë vullnet të vinë në këtë komision. Kemi shumë fakte që do t’i bëjmë publike javën e ardhshme, do të bëjmë publike edhe njerëzit që kemi planifikuar dhe do duhej të ishin këtu për t’i intervistuar duke u nisur nga kryeministri Kurti e deri te personi fundit”, tha Qalaj.

Qalaj shtoi se pas takimit të radhës do të vendosin nëse do ta bartin debatin në Kuvend të Kosovës apo do të bëjnë përpjekje ta themelojnë këtë komision.

Ndërkaq, deputeti nga AAK, Pal Lekaj ka vendosur disa letra në karriget e deputeteve që nuk janë prezent, ku ka shënuar pagat të cilat secili prej këtyre deputetëve merr nga Kuvendi.

“Unë kam vendosur sot në mënyrë simbolike të gjithë deputeteve që nuk janë prezent dhe e bojkotojnë, me tregu sa para marrin dhe sa kanë marrë deri sot, dhe i bojkotojnë. Në shenjë simbolikë po ua vë në karrige dhe ta shohin që ata janë të obligueshëm dhe të vinë“, tha Lekaj.

Ndërsa, deputetja nga LDK, Doarsa Kica ka ftuar ministren për një seancë dëgjimore që të raportojë për dyshimet që kanë lidhur me keqpërdorimin e rezervave shtetërore.

“Ne duhet të procedojmë me një propozim amendament të ligjit për hetim parlamentar, i cili rregullon problematiket që na shpërfaqet me nenin i cili kërkon që minimumi i kuorumit të jetë me shtatë anëtar të komisionit… Propozoj që ky komision ta ftoj ministren e MINT në një seancë dëgjimore, në mënyrë që kjo të na shërbejë se çka ne mund të përfshimë në plan të punës nëse vjen situata deri aty”, tha Kica.

Ideja për formimin e Komisionit hetimor lidhur me procedurat për furnizimin dhe menaxhimin me rezervat shtetërore, keqpërdorimet dhe abuzimet e mundshme me rezervat shtetërore ka ardhur nga Lidhja Demokratike e Kosovës.

Related Topics:
Continue Reading

Lajmet

Justina Shiroka-Pula merr zyrtarisht detyrën e presidentes

Published

16 hours ago

on

October 7, 2026

By

Justina Shiroka-Pula ka marrë zyrtarisht detyrën e presidentes së Republikës së Kosovës.

Në ceremoninë e inaugurimit, ushtruesja e detyrës së presidentes, Albulena Haxhiu, ia ka dorëzuar Kushtetutën presidentes së re.

Justina Shiroka-Pula mori 81 vota në Kuvend, në votimin që u zhvillua në mesnatën mes të martës dhe të mërkurës, në fund të afatit kushtetues që e caktoi 6 tetorin si datë të fundit për zgjedhjen e presidentit. Detyrën e siguroi pas dakordimit të Vetëvendosjes dhe Partisë Demokratike të Kosovës./A.K/

Continue Reading

Lajmet

BE-ja shqetësohet për ndryshimet në Ligjin për Dhomat e Specializuara

Published

16 hours ago

on

October 7, 2026

By

Bashkimi Evropian ka shprehur shqetësim të thellë për miratimin nga Kuvendi i Kosovës të Projektligjit për ndryshimin dhe plotësimin e Ligjit për Dhomat e Specializuara të Kosovës.

Në një përgjigje për KOHËN, një zëdhënës i BE-së ka thënë se ndryshimet e miratuara janë në kundërshtim me obligimet ndërkombëtare të Kosovës ndaj Bashkimit Evropian.

“Partneriteti ynë nënkupton jo vetëm interesa të përbashkëta, por edhe përgjegjësi të përbashkëta”, thuhet në përgjigje.

BE-ja ka theksuar se vazhdimisht ka mbështetur punën e Dhomave të Specializuara të Kosovës si institucion të pavarur gjyqësor, të themeluar përmes vendimeve të Kuvendit në vitet 2014–2015 dhe të përcaktuar në Kushtetutën e Kosovës.

Sipas BE-së, mandati dhe pavarësia e Dhomave të Specializuara duhet të respektohen plotësisht, ndërsa drejtësia duhet të vazhdojë të bazohet në parimin e përgjegjësisë penale individuale.

BE-ja i ka bërë thirrje Kosovës që t’u përmbahet obligimeve të saj ndërkombëtare dhe të garantojë pavarësinë gjyqësore të Dhomave të Specializuara, si dhe llogaridhënien dhe drejtësinë për viktimat dhe familjet e tyre nga të gjitha komunitetet në Kosovë.

Projektligji u miratua në Kuvend të martën, pak para përfundimit të afatit për zgjedhjen e Presidentit, pas një marrëveshjeje mes Lëvizjes Vetëvendosje dhe Partisë Demokratike të Kosovës.

Miratimi i tij u shoqërua me protesta në Kosovë, ndërsa kundërshtimi ndaj Dhomave të Specializuara është rritur pas aktgjykimit të 16 shtatorit ndaj Hashim Thaçit, Kadri Veselit, Jakup Krasniqit dhe Rexhep Selimit./A.K/

Continue Reading

Lajmet

Schuebel uron presidenten e re, mbështetja e BE-së do të mbetet e palëkundur

Published

18 hours ago

on

October 7, 2026

By

Ambasadori i Bashkimit Evropian në Kosovë, Dirk Schuebel, ka uruar Justina Shiroka-Pulën për zgjedhjen e saj në postin e Presidentes së Republikës së Kosovës.

Schuebel ka shprehur shpresën për rikthimin e stabilitetit politik dhe institucional në vend, duke theksuar gatishmërinë për të bashkëpunuar me presidenten e re, institucionet e Kosovës dhe spektrin politik.

“Me shpresën për ripërtëritjen e stabilitetit politik dhe institucional, pres me kënaqësi të punoj me Presidenten Shiroka-Pula, institucionet e Kosovës dhe spektrin e gjerë politik për ta afruar vendin më pranë Bashkimit Evropian”, ka deklaruar Schuebel.

Ai ka theksuar gjithashtu se mbështetja e Bashkimit Evropian për Kosovën do të vazhdojë të jetë e palëkundur.

Justina Shiroka-Pula u zgjodh Presidente e Kosovës në raundin e parë të votimit, duke marrë 81 vota në seancën e Kuvendit që kishte nisur më 6 tetor. Votimi përfundoi pak pas mesnate, ndërsa numërimi i votave përfundoi rreth 15 minuta më vonë.

Me zgjedhjen e Shiroka-Pulës, Kosova tashmë ka presidenten e re, ndërsa mesazhi i BE-së vjen me theks të veçantë te stabiliteti institucional dhe vazhdimi i rrugëtimit të vendit drejt Bashkimit Evropian.

D.L

Continue Reading

Lajmet

15 milionë euro për subvencionimin e faturave të energjisë për familjet në nevojë

Published

19 hours ago

on

October 7, 2026

By

Ministri për Punë, Familje dhe Vlerat e Luftës Çlirimtare, Andin Hoti, ka bërë të ditur se janë ndarë 15 milionë euro për mbështetjen e familjeve për faturat e energjisë elektrike, përmes Programit për Mbrojtjen e Konsumatorëve të Cenueshëm të Energjisë Elektrike 2026–2027.

Hoti ka njoftuar se programi është miratuar në mbledhjen e pestë të Qeverisë dhe synon subvencionimin e faturave për familjet që plotësojnë kriteret për përfitim.

Ai ka thënë se në ditët në vijim do të nënshkruajë vendimin që përcakton kushtet dhe kriteret për përfituesit, pas së cilës pritet të hapet thirrja për aplikim.

Sipas Hotit, programi lidhet edhe me obligimet e Kosovës në kuadër të procesit të integrimit evropian dhe zbatimit të Planit të Rritjes për Ballkanin Perëndimor, veçanërisht për identifikimin dhe mbështetjen e konsumatorëve të cenueshëm.

“15 milionë euro mbështetje. Drejtpërdrejt në faturat e familjeve”, ka shkruar Hoti./A.K/

Continue Reading

Të kërkuara