Lajmet

Për dhjetë vjet numri i nxënësve shqiptarë në shkollat e mesme në Preshevë dhe Bujanoc është përgjysmuar

Ikja masive e të rinjve shqiptarë nga Presheva dhe Bujanoci, ka ngritur shqetësime të mëdha sa i përket arsimit.

Published

3 years ago

September 21, 2022

Betim Gashi

Suada Asani, nxënëse në vitin e fundit të Shkollës së Mesme “Sezai Surroi” në Bujanoc, nuk ka vendosur akoma rreth vazhdimit tutje të shkollimit, mirëpo ka në mendje dy opsione: të vazhdojë studimet në Prishtinë apo të ikë në Gjermani?!

“Pyetja se çfarë do të studiosh në të ardhmen, është një nga pyetjet më të rënda për një nxënës të shkollës së mesme nga Lugina e Preshevës. Asnjëherë nuk di se si të përgjigjem. Teksa në mendje kam vetëm dy opsione: të vazhdojë studimet në Prishtinë apo të largohem drejt Gjermanisë”, ka thënë Asani.

Ikja masive e të rinjve shqiptarë nga Presheva dhe Bujanoci, ka ngritur shqetësime të mëdha sa i përket fushës së arsimit në këtë rajon. Numri i nxënësve shqiptarë të shkollave të mesme në komunat Preshevë dhe Bujanoc, për dhjetë vjet është përgjysmuar. Nga statistikat e nxjerra nëpër shkollat e mesme në këto komuna, nga 3 mijë e 646 sa ishin në vitin shkollor 2012/13, pas dhjetë vjetësh, gjegjësisht në vitin 2022/23 janë të regjistruar vetëm 1 mijë e 865 nxënës shqiptarë.

Në shkollën e mesme “Sezai Surroi”, të vetmen në gjuhën shqipe në Bujanoc, në vitin shkollor 2012/13 kanë qenë të regjistruar 1 mijë e 368 nxënës shqiptarë, teksa në vitin 2022/23 janë vetëm 649 sosh.

Në gjimnazin “Skenderbeu” në Preshevë në vitin shkollor 2012/13 kanë qenë të regjistruar 993 nxënës shqiptarë, teksa dhjetë vjet pas, gjegjësisht në vitin 2022/23 janë vetëm 628 nxënës.

Në Shkollën e Mesme Teknike “Presheva” në Preshevë, në vitin shkollor 2012/13 kanë qenë të regjistruar 1 mijë e 285 nxënës, teksa në vitin 2022/23 janë vetëm 588.

Sipas drejtorit të Shkollës së Mesme “Sezai Surroi” në Bujanoc, Zejni Fejzullahu, moszhvillimi ekonomik ka ndikuar drejtpërsëdrejti në ikjen e të rinjve nga ky rajon.

“Moszhvillimi ekonomik i rajonit, e në veçanti i Komunës së Bujanocit, ka ndikim të madh në ikjen e të rinjve dhe familjeve për në vendet e perëndimit. Pa një zhvillim ekonomik të rajonit, vështirë se mund të ndalet trendi i ikjes së të rinjve”, ka thënë Fejzullahu.

Përveç përgjysmimit të numrit të nxënësve dhe stafit mësimdhënës, sipas Fejzullahut problemi tjetër kyç në shkollat e mesme në gjuhën shqipe në Serbi, vazhdon të jetë pajisja me librat shqip, përderisa për shkollat fillore Ministria e Arsimit, Shkencës, Teknologjisë dhe Inovacionit në Kosovë këtë vit ka ndarë 255 mijë euro për blerjen e librave shqip.

Sa i përket numrit të nxënësve shqiptarë në shkollat fillore shqipe në Luginë të Preshevës, sipas statistikave të nxjerra nga viti 2010 dhe viti 2020, edhe në këto shkolla numri i nxënësve shqiptarë është përgjysmuar. Nga 7 mijë e 246 sa kanë qenë në vitin shkollor 2010/11, dhjetë vjet pas, gjegjësisht në vitin shkollor 2020/21, kanë qenë vetëm 3 mijë e 982 nxënës./UBTNews/

Autori: Driton Iseni

Aktualitet

Parashikimi i motit

Published

3 minutes ago

September 18, 2025

UBT News

Moti me diell dhe vranësira te shpërndara pritet të mbajë edhe sot në vendin tonë.

Sipas Institutit Hidrometeorologjik të Kosovës, temperaturat minimale do të sillen ndërmjet 7-10 gradë Celsius, ndërsa ato maksimale ndërmjet 24 dhe 27 gradë Celsius.

Era do të fryjë nga verilindja 1-5 m/s. /S.K/KP/

Lajmet

Bayern-Chelsea, rikthehet klasikja e Ligës së Kampionëve

Published

13 hours ago

September 17, 2025

UBT News

Bayern Munich dhe Chelsea përballen sot në Allianz Arena në ndeshjen hapëse të fazës së ligës në Champions League, një duel që rikthen kujtimet e finales së vitit 2012, të fituar nga londinezët.

Bavarezët nën drejtimin e Vincent Kompany, e kanë nisur sezonin në formë të shkëlqyer duke shënuar mesatarisht gati katër gola për ndeshje.

Ata do të zbresin në fushë pa Alphonso Davies, Jamal Musiala, Raphaël Guerreiro dhe Hiroki Ito, por me Harry Kane si pikë referimi në sulm.

Chelsea, i rikthyer në garën më të madhe evropiane pas një sezoni mungese, synon surprizën në Mynih. Trajneri Enzo Maresca ka përforcuar skuadrën gjatë verës, por e di se shorti i vështirë e bën misionin të komplikuar.

Në pesë përballjet e fundit direkte, Bayern ka fituar katër herë, ndërsa Chelsea vetëm një dhe ndeshja nis në orën 21:00 në Mynih.

Këto janë formacionet e mundshme:

Bayern: (4-2-3-1): Neuer; Laimer, Upamecano, Tah, Stanišić; Kimmich, Pavlović; Olise, Gnabry, Díaz; Kane.

Chelsea: (4-2-3-1): Sánchez; James, Chalobah, Adarabioyo, Cucurella; Caicedo, Fernández; Estêvão, Palmer, Neto; Pedro./S.K/KP/

Aktualitet

UBT hap thirrjen për abstrakte në Konferencën Ndërkombëtare të Stomatologjisë

Published

13 hours ago

September 17, 2025

Driton Iseni

UBT ka shpallur hapjen zyrtare të thirrjes për dorëzimin e abstrakteve për Konferencën Ndërkombëtare për Stomatologji (IC-DS 2025), e cila do të zhvillohet në kuadër të aktiviteteve të edicionit të 14-të të Konferencës Ndërkombëtare të UBT-të.

Kjo konferencë synon të bashkojë studiues, profesionistë dhe praktikues të fushës së stomatologjisë nga vende të ndryshme të botës, për të ndarë njohuri, përvoja dhe rezultatet më të fundit kërkimore në këtë fushë gjithnjë në zhvillim.

Fokusimi tematik

IC-DS 2025 mbulon një spektër të gjerë temash nga fusha e shkencave dentare dhe disiplinave të ndërlidhura, përfshirë:

Stomatologji e Përgjithshme
Mjekësi Orale
Kërkime në Stomatologji
Inovacione dhe Avancime në Stomatologji
Stomatologji me Laser
Nano-Stomatologji
Stomatologji Kozmetike
Kirurgji Orale dhe Maksilofaciale
Stomatologji Pediatrike
Shëndeti Publik Dentar
Stomatologji Restauruese
Anesteziologji Dentare
Higjiena Dentare
Pedodontikë dhe Stomatologji Preventive
Ortodontikë dhe Ortopedi Dentofaciale

Datat e rëndësishme për aplikuesit:

Dorëzimi i abstrakteve: deri më 10 tetor 2025

Njoftimi për pranim: më 17 tetor 2025

Rishikimi shkencor (peer-reviewed): më 17 tetor 2025

Regjistrimi i hershëm: deri më 17 tetor 2025

Regjistrimi i vonuar: deri më 20 tetor 2025

Dorëzimi i punimeve të plota: deri më 14 nëntor 2025

Dorëzimi i punimeve

Punimet që do të prezantohen në konferencë duhet të jenë origjinale, të papublikuara më parë dhe të mos jenë në shqyrtim në ndonjë konferencë apo revistë tjetër. Gjatësia maksimale e punimit është 6 faqe.

Të gjitha punimet që nuk përputhen me formatin e kërkuar do të refuzohen automatikisht. Për udhëzime më të detajuara rreth formatimit dhe dorëzimit, pjesëmarrësit inkurajohen të vizitojnë faqen zyrtare të konferencës në faqen e UBT-së.

UBT ka kënaqësinë t’i ftojë të gjithë të interesuarit – akademikë, profesionistë të shëndetit, studiues dhe studentë – të marrin pjesë në IC-DS 2025 dhe të kontribuojnë me punimet e tyre në këtë ngjarje me karakter ndërkombëtar dhe me rëndësi të veçantë për zhvillimin e shkencave dentare në rajon dhe më gjerë.

Për më shumë informacione, vizitoni faqen zyrtare të konferencës në UBT: KONFERENCA E UBT-së

Aktualitet

Goditje e rëndë për Real Madridin, ylli i ekipit mungon dy muaj

Published

14 hours ago

September 17, 2025

UBT News

Real Madridi ka marrë një lajm të keq pas ndeshjes së djeshme kundër Marsejës në Ligën e Kampionëve. Mbrojtësi anglez Trent Alexander-Arnold u detyrua të largohej nga fusha që në minutat e para për shkak të një dëmtimi.

Testet mjekësore të kryera kanë zbuluar një këputje muskulore në bicepsin femoris të këmbës së majtë.

Sipas raportimeve nga klubi madrilen, kohëzgjatja e rikuperimit pritet të jetë rreth dy muaj, çka nënkupton se lojtari do të humbasë disa ndeshje tepër të rëndësishme.

Alexander-Arnold nuk do të jetë i gatshëm për derbin e Madridit kundër Atlético Madridit, për El Clásicon ndaj Barcelonës në La Liga, si dhe për ndeshjen e fazës së grupeve në Ligën e Kampionëve kundër Juventusit më 22 tetor.

Ky është një problem serioz për trajnerin Carlo Ancelotti, i cili duhet të gjejë zgjidhje alternative për repartin defensiv në një periudhë të ngjeshur dhe vendimtare të sezonit./S.K/KP/