Lajmet

​Që të rritet dinamika e punës së komisioneve hetimore, deputetët kërkojnë të ndalen debatet ashpra

Deputeti Selmanaj tha se vetëm dy intervista janë mbajtur në sesionin pranveror.

Published

4 years ago

on

Komisioni Hetimor Parlamentar në lidhje me menaxhimin e krizës energjetike nga Qeveria e Republikës së Kosovës, për mbledhjen e ardhshme ka ftuar sërish ministrin e Financave, Hekuran Murati në intervistë lidhur me krizën energjetike.

Në diskutimin rreth dinamikës së punës së Komisionit hetimor gjatë sesionit vjeshtor, kryetar i këtij komisioni Driton Selmanaj ka propozuar që në këtë sesion të shtohet dinamika e punës dhe të mbahen nga dy mbledhje në javë, të hënën dhe të premten.

Megjithatë Komisioni me kërkesë të anëtarëve vendosën që mbledhjet të mbahen vetëm një herë në javë, të premten, tërë ditën.

Deputeti Selmanaj tha se vetëm dy intervista janë mbajtur në sesionin pranveror, dhe njëra prej tyre ka mbetur në gjysmë ajo me ministrin e Financave, Punës dhe Transfereve, Hekuran Murati.

“Ne po futemi në tre muajt e fundit të mandatit që e kemi si Komision hetimor. Fillimisht na morën kohë përgatitjet për caktim të ekspertëve, dhe ne filluam me dy intervista, me dy ministra nga kabineti qeveritar, megjithëse intervista e fundit nuk përfundoi deri në fund me ministrin e financave. Prandaj, propozoj që dinamika jonë të jetë më e lartë gjatë këtij sesioni dhe të fillojmë të mbajmë nga dy mbledhje në javë, në mënyrë që t’i kryejmë më shpejt intervistat”, tha ai.

Deputetja Mimoza Kusari-Lila, ka kërkuar që për sesionin vjeshtor të ndalen debatet e ashpra mes deputetëve që nuk përkojnë me periudhën kohore të punës së këtij komisioni.

“Për rritjen e dinamikës së punës, mendoj se nëse e caktojmë një ditë, të premten dhe vendosim një limit kohor, mund ta mbajmë mbledhjen më gjatë. Po ashtu dua të ngris një çështje, e cila uroj të trajtohet me seriozitetin dhe formalitetin që e ka. Kjo ka të bëjë me trajtimin e temës brenda afateve që është votuar Komisioni në kuvend. Ne po hyjmë edhe në një sezon jo të lehtë për sektorin e energjisë, kështu që e kemi përfunduar sesionin e kaluar me debate të ashpra e me ndërprerje arbitrare të takimeve nga ana jonë”, theksoi ajo.

Edhe deputeti Selmanaj është pajtuar që të ndalen tensionet nga deputetët në komision.

“Pajtohem plotësisht me deputeten Kusari-Lila që të kemi kujdes dhe të kufizohemi në mandatin tonë që e kemi. Nuk do të ishte mirë të kemi debate, sepse edhe pengon punën e komisionit dhe arritjen e qëllimit për çka është themeluar”, tha ai.

Në këtë komision hetimor deri tash intervistën e ka përfunduar vetëm ministrja e Ekonomisë, Artane Rizvanolli lidhur me menaxhimin e krizës energjetike nga Qeveria e Kosovës.

Related Topics:
Continue Reading

Lajmet

Andy Burnham merr zyrtarisht detyrën si Kryeministër i ri i Britanisë së Madhe: Premton një model të ri politik dhe plan 10-vjeçar

Published

2 minutes ago

on

July 20, 2026

By

Andy Burnham ka mbajtur fjalimin e tij të parë si kryeministër i Britanisë së Madhe përpara një turme të madhe në Downing Street, duke shënuar fillimin e një epoke të re politike. Pa pasur nevojë për një foltore dhe i rrethuar nga mbështetësit, kryeministri i ri e cilësoi emërimin e tij si një moment reflektimi dhe rezolute të re, duke thënë se gjenerata e tij e politikanëve duhet të ngrejë nivelin e angazhimit për të rikthyer stabilitetin e vendit.

Burnham pranoi se qytetarët janë të lodhur nga politika aktuale dhe premtoi se ky moment do të shërbejë si një ndryshues i madh kursesh, duke u zotuar për një model të ri që bazohet në bashkëpunim dhe zgjidhje të problemeve, larg pikëve politike. Ai kritikoi vendimet e gabuara të viteve të 80-ta, përfshirë privatizimin dhe de-industrializimin, duke thënë se shumë zona ende nuk janë rimëkëmbur nga ato politika.

Në planin e tij qeverisës, Burnham premtoi se që nga e nesërmja do të shpalosë planet për t’u dhënë njerëzve më shumë hapësirë sa i përket kostos së jetesës, duke treguar edhe si do të financohen ato.

Ai u zotua për ndryshime në sistemin e arsimit për të ndihmuar të rinjtë të futen në tregun e punës, rritje të mbështetjes për shëndetin mendor, si dhe ndërtimin e më shumë shtëpive sociale si një mënyrë e drejtë dhe e qëndrueshme për të ulur shpenzimet e asistencës sociale.

Ndër vendimet e tij të para të prera, kryeministri i ri njoftoi se do të nxjerrë urdhrin e parë për t’i dhënë fund fenomenit të njerëzve që flenë në rrugë.

Për më tepër, Burnham bëri të ditur se do të largojë pushtetin nga Westminsteri për ta shtrirë atë në çdo cep të vendit. Ai u zotua të ndërtojë një ekonomi të re, duke kthyer shërbimet dhe mallrat jetike nën kontrollin publik për t’i bërë ato të përballueshme, si dhe të ri-industrializojë Britaninë duke mbështetur industrinë vendase.

Kryeministri njoftoi se më vonë gjatë këtij viti do të prezantojë një plan 10-vjeçar që do të përcaktojë qartë rrugën se ku dëshiron ta dërgojë vendin. Duke theksuar se kujdesi për njerëzit do të jetë në qendër të çdo vendimi të tij, Burnham i bëri thirrje publikut dhe mbështetësve që t’i qëndrojnë pranë për të ndërtuar një ndjenjë të re të unitetit kombëtar, duke e përmbyllur fjalimin mes duartrokitjeve të shumta, para se të futej në rezidencën e famshme numër 10. /BBC/

Continue Reading

Lajmet

Studio Muzikë Moderne, Produksion Digjital dhe Menaxhment: Programi që të bën lider në industrinë e re të muzikës

Published

4 minutes ago

on

July 20, 2026

By

Industria moderne e muzikës sot kërkon diçka më shumë se thjesht talent; ajo kërkon profesionistë që zotërojnë teknologjinë dhe njohin biznesin. Programi, Muzikë Moderne, Produksion Digjital dhe Menaxhment në UBT është ndërtuar pikërisht për të formuar këta liderë të rinj të industrisë kreative, duke bashkuar në një vend artin, teknologjinë dhe menaxhimin.

Ky program u ofron studentëve një përgatitje të plotë praktike dhe teorike përmes tri shtyllave kryesore;

Krijim dhe Produksion Digjital: Zhvillimi i aftësive profesionale në prodhimin e muzikës, dizajnin e tingullit dhe performancën vokale apo instrumentale.

Menaxhim dhe Biznes: Trajnimi i studentëve për menaxhimin e artistëve, organizimin e ngjarjeve dhe menaxhimin e projekteve në industrinë kreative.

Inovacion dhe Teknologji: Nxitja e ideve të reja dhe përdorimi i teknologjive të fundit të zërit për të krijuar platforma dhe qasje të reja artistike.

Synimi kryesor është përgatitja e drejtpërdrejtë për tregun e punës. Gjatë studimeve, studentët do të punojnë në projekte reale, do të marrin pjesë në masterklasa dhe do të krijojnë kontakte të rëndësishme me kompani muzikore, shtëpi botuese dhe organizata kulturore.

Kjo i orienton ata drejt karrierave të suksesshme si producentë, menaxherë, interpretues apo edukatorë të muzikës moderne.

Regjistrimet kanë filluar, këtu gjeni linkun për aplikim!

Continue Reading

Lajmet

Kurti uron Andy Burnhamin për detyrën e re si kryeministër i Britanisë

Published

5 minutes ago

on

July 20, 2026

By

Kryeministri në detyrë i Kosovës, Albin Kurti, ka uruar Andy Burnhamin për marrjen e detyrës si kryeministër i ri i Mbretërisë së Bashkuar, duke shprehur gatishmërinë për vazhdimin e bashkëpunimit ndërmjet dy vendeve.

Përmes një postimi në rrjetin social X, Kurti tha se pret të vazhdojë bashkëpunimin e ngushtë me qeverinë britanike në fusha me interes të përbashkët.

“Urime të përzemërta kryeministrit të ri të Mbretërisë së Bashkuar, Andy Burnham. Pres me padurim të vazhdojmë bashkëpunimin e ngushtë mes qeverive tona”, ka shkruar Kurti.

Ai theksoi se bashkëpunimi do të fokusohet në promovimin e tregtisë dhe investimeve, mbrojtjen e demokracisë nga ndikimet keqdashëse të Rusisë dhe përfaqësuesve të saj në Evropën Juglindore, si dhe në forcimin e bashkëpunimit dhe koordinimit ndërmjet Forcës së Sigurisë së Kosovës dhe Forcave të Armatosura Britanike./A.K/

Continue Reading

Lajmet

Shtatë vjet burg për grabitjen e argjendarisë, urdhërohet kompensimi i 195 mijë eurove

Published

11 minutes ago

on

July 20, 2026

By

Gjykata Themelore në Prizren ka shpallur aktgjykim dënues ndaj të akuzuarit me inicialet Sh.H., duke e dënuar me shtatë vjet burgim dhe 2 mijë euro gjobë për dy vepra penale të vjedhjes së rëndë dhe një vepër penale të vjedhjes së rëndë në tentativë.

Sipas njoftimit të Gjykatës, i akuzuari është shpallur fajtor për vjedhjen e kryer më 12 janar 2025 në një argjendari në Prizren, ku së bashku me një shtetas bullgar, të maskuar dhe të pajisur me mjete të përshtatshme, kanë hyrë me forcë në lokal dhe kanë marrë një sasi të madhe ari, argjendi dhe sende të tjera me vlerë.

Pas hapjes së kasafortës, ata kanë marrë 3 kilogramë ari 14-karatësh, një monedhë pesë lira, dy monedha lira, hallka dore, një kilogram argjend me pastërti 925 dhe një peshore, duke i shkaktuar të dëmtuarit dëm material në vlerë prej 195 mijë eurosh.

Sipas aktgjykimit, po atë natë i akuzuari kishte tentuar të kryente edhe një vjedhje tjetër në një argjendari në Prizren, por nuk kishte arritur ta hapte kasafortën dhe ishte larguar nga vendi i ngjarjes.

Ndërkaq, më 23 janar 2025, ai kishte hyrë me forcë në një objekt tjetër, nga ku kishte marrë një modem interneti, një DVR dhe kishte dëmtuar sistemin e kamerave të sigurisë.

Pas zhvillimit të nëntë seancave gjyqësore, Gjykata e shpalli fajtor të akuzuarin, duke e dënuar me shtatë vjet burgim dhe 2 mijë euro gjobë.

Po ashtu, Gjykata ka urdhëruar që i dënuari t’ia kompensojë të dëmtuarit dëmin në shumën prej 195 mijë eurosh ose, në të kundërtën, të konfiskohen pasuritë e tij me vlerë të barasvlershme.

Për realizimin e kompensimit, është urdhëruar shitja në ankand publik e një apartamenti dhe katër automjeteve të sekuestruara përmes Agjencisë për Administrimin e Pasurisë së Sekuestruar ose të Konfiskuar, ndërsa masa e paraburgimit ndaj të dënuarit është vazhduar deri në plotfuqishmërinë e aktgjykimit./A.K/

Continue Reading

Të kërkuara