Qeveria kineze ka kritikuar ashpër kërkesat e testimit për Covid-19 të vendosura ndaj vizitorëve nga Kina dhe kërcënoi me kundërmasa ndaj vendeve të përfshira, të cilat përfshijnë SHBA dhe disa vende evropiane.

“Ne besojmë se kufizimet e hyrjes të miratuara nga disa vende që synojnë Kinën nuk kanë bazë shkencore dhe disa praktika të tepruara janë edhe më të papranueshme”, tha zëdhënësja e Ministrisë së Jashtme, Mao Ning.

“Ne jemi kundër përpjekjeve për të manipuluar masat e Covid-19 për qëllime politike dhe do të marrim kundërmasa bazuar në parimin e reciprocitetit” tha ajo. Mao nuk specifikoi se çfarë hapash mund të ndërmarrë Kina.

Australia dhe Kanadaja këtë javë iu bashkuan një liste në rritje të vendeve që u kërkojnë udhëtarëve nga Kina të bëjnë një test Covid-19 përpara se të hipnin në fluturimin e tyre, ndërsa Kina po lufton me një shpërthim mbarëkombëtar të koronavirusit.

Vende të tjera duke përfshirë SHBA-në, Indinë, Japoninë, Korenë e Jugut dhe disa vende evropiane kanë njoftuar masa më të ashpra Covid-19 ndaj udhëtarëve nga Kina — kjo mes shqetësimeve për mungesën e të dhënave sa i përket infeksioneve në Kinë dhe frikës se mund të shfaqen variante të reja./UBTNews/