Lajmet

PDK akuzon Qeverinë Kurti: Përmes ambalazhuesve ka realizuar projektin më korruptiv në vend

Published

12 months ago

October 16, 2024

UBTnews

Partia Demokratike e Kosovës ka akuzuar për korrupsion masiv qeverinë Kurti, në lidhje me procesin e përllogaritjes së borxheve të kompanive ambalazhuese të ujit, si dhe mënyrën dhe bazën e shlyerjes së borxheve nga Ministria e Mjedisit, Planifikimit Hapësinor dhe Infrastrukturë.

Në debatin parlamentar në Kuvend, deputeti, Ferat Shala tha se MMPHI ka trashëguar një borxh prej 52 milionë eurove në sektorin e ujërave. Sipas tij, ky borxh i mbetur ndër-vite nuk është trajtuar sipas ligjit dhe rregulloreve në fuqi. Ai tha se ministria përmes kuadrove të dirigjuara ka realizuar projektin të cilin e quajti më korruptiv të mundshëm me pasoja të mëdha për shtetin.

Sipas tij, ministria ka rinegociuar, ri-kalkuluar dhe selektuar borxhet e ambalazhuesve të ujit.

“Ka trashëguar në sektorin e ujërave një borxh prej 52 milionë euro. Ky borxh i mbetur ndër vite është temë dhe fokusi kryesor korruptiv që kjo ministri e ka trajtuar tash e katër vite. Borxhi i ambalazhuesve ka qenë i regjistruar dhe përgatitur sipas legjislacionit në fuqi. Legjislacioni thotë se ky borxh s’mund të falet dhe as shlyhet. Qeveria, me instanca të larta të saj e zbulon praktikën tjetër. Metodën e rinegocimit, rikalkulimit dhe selektimit të ambalazhuesve dhe borxheve. Për të realizuar këtë projekt të paligjshëm dhe korruptiv duhet nxjerr akte normative për të manovruar dhe kalukuar për interesa të grupit të ngushtë….Ministria përmes kuadrove të dëgjuara dhe emëruara si ushtrues detyre filloi të realizojë projektin më korruptiv të mundshëm me pasoja të mëdha për buxhetin e shtetit…Edhe kryeministri dhe ministri kanë qenë të informuar për të gjitha këto afera me e-mail zyrtar nga sinjalizuesit brenda ministrisë”, tha ai.

Ai pasi akuzoi qeverinë për mostransparencë, parashtroi disa pyetje për ministrin e MMPHI, Liburn Aliu.

“Ne si deputetë por edhe qeveria si ekzekutiv e ka obligim ligjor të jetë e hapur dhe transparent në punën e saj. Këtë s’po e shohin. Sot mungon ministri, kabineti qeveritar dhe kryeministri dhe heshtë. Këtu po ikë nga përgjegjësia dhe llogaridhënia…Ne kemi dilemat tona. A është respektuar ligji për temën që po trajtojmë? Hapat e veprimeve që ka marrë shteti po tregojnë se nuk është respektuar. A është menaxhuar sektori i ujit mbi bazën e legjislacionit në fuqi? Kush dhe si menaxhon me sektorin e ujërave në Kosovë? Pse edhe pas tri viteve sektori i ujërave udhëhiqet nga ushtrues detyre në mënyrë të paligjshme? Ne duhet të dimë sa është numri i operatorëve të ujit, gjegjësisht ambalazhuesve. Ne duhet të dimë sa saktë sa janë borxhet e këtyre operatorëve dhe si janë inkasuar dhe sa borxhe kanë mbetur pa inkasuar prej buxhetit të shtetit. Opinioni duhet të dijë çfarë akte ligjore janë nxjerr për sektorin e operatorëve të sektorit të ujërave. Mënyra e kalkulimit dhe shuma financiare që operatorët i kanë realizuar. Mënyrën e negocimit dhe ndryshimit të shumave nga miliona euro në dhjetëra mijëra euro. Ne duhet të dimë mënyrën e shlyerjes së borxheve për kompani të caktuara”, tha ai.

Aktualitet

UBT shpall thirrjen për Konferencën Ndërkombëtare të Gjuhës dhe Kulturës 2025

Published

20 hours ago

September 27, 2025

Driton Iseni

UBT ka bërë hapjen e thirrjes për pjesëmarrje në Konferencën Ndërkombëtare të Gjuhës dhe Kulturës 2025 (IC-LAC), e cila këtë vit organizohet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion.

Ky aktivitet shkencor do të bashkojë studiues, akademikë, studentë të cikleve të avancuara, doktorantë, ekspertë të fushës dhe profesionistë të arsimit nga vende të ndryshme të botës, me synim shkëmbimin e njohurive, përvojave dhe praktikave më të mira mbi gjuhën, kulturën dhe ndërthurjen e tyre në sistemet bashkëkohore arsimore.

Tema kryesore e këtij edicioni është: “Ndërtimi i sistemeve arsimore reziliente për një të ardhme të qëndrueshme.”

Datat kryesore:

Dorëzimi i abstrakteve: 10 tetor 2025
Njoftimi i pranimit & rishikimi shkencor: 17 tetor 2025
Regjistrimi i hershëm: deri më 17 tetor 2025
Regjistrimi i vonuar: deri më 20 tetor 2025
Dorëzimi i punimit të plotë: 14 nëntor 2025

Qëllimet dhe objektivat

Konferenca IC-LAC synon të hapë një hapësirë të gjërë diskutimi mbi rolin e gjuhës dhe kulturës në shoqëritë moderne, duke nxitur qasje multidisiplinare për edukimin dhe komunikimin ndërkulturor.

Fushat e diskutimit përfshijnë:

Gjuha dhe kultura në arsim
Përdorimi i teknologjisë në mësimdhënie dhe të nxënë
Komunikimi ndërkulturor dhe shumëgjuhësia
Praktikat e qëndrueshme në edukimin gjuhësor
Inteligjenca artificiale dhe ndikimi i saj në të nxënit e gjuhëve
Përkthimi, interpretimi dhe komunikimi global
Rezilienca arsimore dhe dizajnimi i kurrikulave

Dorëzimi i punimeve

Punimet e paraqitura duhet të jenë origjinale, të papublikuara më parë dhe të mos jenë në proces shqyrtimi në konferenca të tjera. Gjatësia maksimale e një punimi është 6 faqe. Punimet që nuk respektojnë kriteret e formatimit nuk do të merren në konsideratë.

Organizatorët ftojnë të gjithë të interesuarit që të kontribuojnë me hulumtimet e tyre shkencore dhe praktikat profesionale, duke u bërë pjesë e një platforme ndërkombëtare shkëmbimi idesh që synon të forcojë lidhjen mes gjuhës, kulturës dhe arsimit për një të ardhme më të qëndrueshme.

Lajmet

Gjykata spanjolle liron Dani Alves-in

Published

2 days ago

September 26, 2025

UBT News

Gjykata e Lartë e Katalonjës ka rrëzuar të premten dënimin për përdhunim ndaj ish-futbollistit brazilian Dani Alves, duke arsyetuar se çështja kishte mospërputhje dhe kontradikta në dëshmitë e paraqitura.

Alves, 41 vjeç, ishte dënuar vitin e kaluar me katër vjet e gjysmë burg për përdhunimin e një gruaje në një klub nate në Barcelonë në vitin 2022. Megjithatë, gjykata e apelit vendosi se dëshmia e akuzueses nuk kishte besueshmëri të mjaftueshme, duke theksuar se mungonin prova të qarta për të mbështetur akuzën.

“Dani Alves është shumë i lumtur. Ai është i pafajshëm, kjo është demonstruar. Drejtësia ka folur,” deklaroi avokatja e tij, Ines Guardiola.

Ndërkohë, avokatja e akuzueses, Ester Garcia, paralajmëroi se do ta çojë çështjen në Gjykatën Supreme të Spanjës, proces që mund të zgjasë deri në një vit./S.K/KP/Morung Express/

Lajmet

Caktohet data, Pogba rikthehet në fushë

Published

2 days ago

September 26, 2025

UBT News

Paul Pogba është shumë pranë rikthimit në futboll pas një periudhe të gjatë mungese tha trajneri i Monacos, Adi Hütter. Ai zyrtarisht ka konfirmuar se mesfushori francez po përparon ndjeshëm.

“Fizikisht dhe mendërisht po shkon mirë. Është stërvitur për tre muaj dhe është afër kthimit në skuadër,” deklaroi Hütter.

Sipas mediave franceze, Pogba pritet të jetë i disponueshëm më 5 tetor, në ndeshjen e Ligue 1 kundër Nice në Stade Louis II.

Ndërkohë, rikthimi në sfidën e së shtunës kundër Lorient shihet më pak i mundshëm.

Ish-mesfushori i Juventusit nuk ka luajtur një ndeshje zyrtare që prej 3 shtatorit 2023, kur u aktivizua ndaj Empolit.

Pak javë më vonë, ai u pezullua për doping dhe u dënua fillimisht me katër vite jashtë fushave. Megjithatë, në tetor 2024, Gjykata e Arbitrazhit Sportiv uli ndalimin në 18 muaj, që skadoi më 11 mars 2025.

Pas ndarjes me Juventusin, Pogba refuzoi një transferim në MLS dhe verën e kaluar nënshkroi një kontratë dyvjeçare me Monacon, e vlefshme deri më 30 qershor 2027.

Klubi monegask e ka regjistruar 31-vjeçarin edhe për Ligën e Kampionëve, ku pritet të rikthehet në tetor.

Ky rikthim do të shënojë një moment të rëndësishëm për kampionin e botës 2018, i cili synon të rifitojë formën dhe të lërë pas periudhën më të vështirë të karrierës së tij./S.K/KP/CNN/