Presidenti amerikan Donald Trump deklaroi se beson që Kina do të ulet në tryezën e negociatave dhe do të arrijë një marrëveshje tregtare me Shtetet e Bashkuara, duke paralajmëruar gjithashtu tarifa të reja nëse kjo nuk ndodh.

Në një konferencë për shtyp, Trump u pyet nga një gazetar mbi pasojat e mundshme nëse Kina nuk luan drejt në tregtinë globale, dhe Trump u përgjigj se tarifat mbeten një armë e fuqishme ekonomike në duart e Amerikës dhe se është i bindur që Pekini do të zgjedhë rrugën e bashkëpunimit.

“Ata do të na paguajnë qindra miliona dollarë në vit nëse nuk bëjnë një marrëveshje. Por unë besoj se do të bëjnë”, tha Trump, duke shtuar se ka një marrëdhënie të mirë personale me presidentin kinez Xi Jinping.

Presidenti theksoi se Kina i ka trajtuar ata me shumë respekt, por nuk e përjashtoi mundësinë e vendosjes së tarifave të reja ndaj mallrave kineze nëse negociatat dështojnë.

Deklarata vjen në një kohë kur tensionet mes Kinës dhe fqinjëve të saj janë përshkallëzuar, veçanërisht në Detin e Kinës Jugore, ku përplasjet me forcat australiane dhe të tjera rajonale kanë tërhequr vëmendjen ndërkombëtare./S.K/KP/

Zyrtarët e Beogradit dhe Moskës e kanë nënshkruar një memorandum bashkëpunimi për thellimin e marrëdhënieve midis kryeqyteteve të Serbisë dhe Rusisë.

Dokumenti u nënshkrua si pjesë e aktivitetit “Ditët e Moskës në Beograd”. Serbia, e cila thotë se synon anëtarësimin në Bashkimin Evropian, vazhdon të jetë një nga partnerët e paktë evropianë të Kremlinit edhe pothuajse katër vjet pasi Rusia e nisi pushtimin e plotë të fqinjit të vet, Ukrainës.

Memorandumi i Bashkëpunimit midis kryeqyteteve të Serbisë dhe Rusisë u nënshkrua nga presidenti i Asamblesë së Beogradit, Nikolla Nikodijeviq, dhe ministri i Qeverisë së Moskës dhe shefi i Departamentit për Ekonomi të Jashtme dhe Marrëdhënie Ndërkombëtare, Sergey Cheryomin, shkruan REL.

Nikodijeviq deklaroi se memorandumi duhet të mundësojë bashkëpunim të mëtejshëm në fushat e transportit, kulturës, arsimit dhe sportit.

“Është shumë e rëndësishme për ne që një qytet kaq i madh si Moska, një nga qytetet më të mëdha evropiane, dëshiron të ketë bashkëpunim të ngushtë me qytetin e Beogradit”, tha ai në një konferencë për shtyp.

“Unë besoj se memorandumi që nënshkruam sot do të jetë njëfarë ‘bilete hyrëse’ në tregun rus për shumë nga biznesmenët tanë, por edhe se Beogradi dhe Serbia do të sigurojnë kështu investime të reja nga Rusia”, tha Nikodijeviq.

Nikodijeviq vlerësoi se memorandumi i mëparshëm dhjetëvjeçar i bashkëpunimit kishte përmirësuar marrëdhëniet midis dy kryeqyteteve.

Memorandumi i Bashkëpunimit midis kryeqyteteve u nënshkrua në 81-vjetorin e çlirimit të Beogradit nga pushtimi nazist në Luftën e Dytë Botërore.

Qyteti u çlirua bashkërisht nga forcat e Ushtrisë së Kuqe Sovjetike dhe Ushtrisë Çlirimtare Popullore të Jugosllavisë./S.K/KP/

Presidenti i Shteteve të Bashkuara të Amerikës, Donald Trump ka përsëritur qëndrimin e tij se nëse Hamasi e thyen armëpushimin, ai do të shkatërrohet dhe se nuk do të ketë asnjë ushtri amerikane në Gaza.

“Nëse Hamasi e thyen armëpushimin, ai do të shkatërrohet.”, tha Trump.

Trump u thotë gazetarëve se beson që Ukraina mund ta fitojë ende luftën me Rusinë, por nuk mendon se do ta bëjë.

“Çdo gjë mund të ndodhë. Lufta është një gjë shumë e çuditshme.”, thotë ai.

Pastaj ai shton se SHBA-të ndoshta nuk do të kishin arritur marrëveshjen e armëpushimit midis Izraelit dhe Hamasit nëse nuk do të kishin vendosur të sulmonin objektet bërthamore të Iranit. Ai e quan atë një nga manovrat më të mëdha ushtarake të të gjitha kohërave.

Trump është pyetur se çfarë hapash po ndërmerr SHBA-ja për të ruajtur armëpushimin, i cili u shkel për pak kohë të dielën pasi Izraeli goditi Gazën jugore për atë që e quajti shkelje flagrante të marrëveshjes nga Hamasi.

Trump përgjigjet duke thënë se SHBA-të po ndërmarrin shumë hapa për të ruajtur paqen.

Ai shton se Hamasi duhet të sillet mirë dhe nëse jo, do të na duhet t’i zhdukim ata nëse duhet./S.K/KP/

Konservatorja Sanae Takaichi u zgjodh kryeministrja e parë grua e Japonisë nga parlamenti i vendit duke shënuar një moment historik për vendin patriarkal ku si politika ashtu edhe vendet e punës dominohen nga burra të moshuar.

Takaichi mori këtë rol derisa Japonia po përballet me vështirësi ekonomike në rritje dhe një politikë të përçarë dhe të bllokuar dhe vetëm disa ditë para se presidenti i SHBA-së Donald Trump të vizitojë vendin.

Pikëpamjet e saj thellësisht konservatore kanë alarmuar disa anëtarë të partisë së qendrës. Për shembull, ajo mbështet rishikimin e kushtetutës pacifiste të Japonisë dhe shpesh viziton një faltore lufte të diskutueshme që përfshin emrat e të dënuarve për krime lufte gjatë Luftës së Dytë Botërore.

Ajo gjithashtu kundërshton martesat e të njëjtave gjini dhe një lëvizje në rritje për të lejuar çiftet e martuara të përdorin mbiemra të veçantë.

Disa nga këto qëndrime, të tilla si pikëpamjet e saj agresive ndaj Kinës, mund të ndërlikojnë marrëdhëniet rajonale të Japonisë.

Brenda Japonisë disa shqetësohen për propozimet e saj ekonomike për të shpenzuar shumë dhe për të ulur taksat, ndërsa vendi përballet me inflacion dhe kosto jetese shumë të larta.

Ajo u zgjodh kryetare e Partisë Liberale Demokratike në pushtet (e cila, pavarësisht emrit të saj, është konservatore) në fillim të tetorit, duke mposhtur kandidatë më të moderuar.

Kjo sugjeroi një kthesë djathtas për LDP-në e goditur nga skandali, e cila pësoi humbje të mëdha në dy zgjedhjet e fundit parlamentare pasi votuesit e pakënaqur kaluan në parti të reja të ekstremit të djathtë.

Ajo u zgjodh kryeministre nga të dy dhomat e parlamentit por tani, ajo do të duhet t’i përgjigjet popullsisë prej 120 milionë japonezësh. Përballimi i çmimit të lartë të mallrave do të jetë një nga sfidat e saj të para; për shembull, çmimi i orizit, një ushqim bazë në Japoni, është pothuajse dyfishuar nga viti i kaluar./S.K/EO/CNN/