Irani e ka lëshuar një breshëri raketash dhe dronësh drejt Izraelit të hënën, si dhe i ka paralajmëruar njëkohësisht gjithashtu Shtetet e Bashkuara se ushtria iraniane i ka tani “duart e lira” për t’i sulmuar objektivat amerikane, një ditë pasi SHBA-ja goditi fuqishëm objektet bërthamore të Teheranit.

Izraeli tha se mbrojtja e tij ajrore është duke punuar për t’i frenuar sulmet, të cilat duket se kishin në shënjestër zonat veriore dhe qendrore të vendit, dhe u kërkoi qytetarëve të shkonin në strehimore.

Irani e përshkroi sulmin si një valë të re të operacionit “Premtimi i Vërtetë 3”, duke thënë se po sulmonte qytetet izraelite Haifa dhe Tel Aviv, sipas televizionit shtetëror iranian.

Nuk pati raportime të menjëhershme për dëme.

Sulmi ndodhi një ditë pasi Shtetet e Bashkuara u përfshinë drejtpërdrejt në luftën e Izraelit kundër Iranit, duke sulmuar objektet bërthamore iraniane, gjë që ngjalli frikë për një konflikt më të gjerë rajonal.

Irani theksoi se Shtetet e Bashkuara e kanë kaluar “një vijë shumë të kuqe” me vendimin e rrezikshëm për t’i goditur tri objekte me raketa dhe bomba shkatërruese të destinuara për bunkerë.

Të hënën, gjenerali iranian Abdolrahim Mousavi, shefi i shtabit të përbashkët të forcave të armatosura, paralajmëroi Uashingtonin se sulmet amerikane ua kanë mundësuar forcave iraniane të kenë “duar të lira” për të “vepruar kundër interesave të SHBA-së dhe ushtrisë së saj”.

Mousavi e përshkroi sulmin amerikan si shkelje të sovranitetit të Iranit dhe të barasvlershëm me pushtimin e vendit, raportoi agjencia shtetërore iraniane e lajmeve, IRNA.

Pas sulmeve amerikane ndaj Iranit, nga e gjithë bota erdhën thirrje për shtensionim të konfliktit dhe rikthim në diplomaci për të gjetur një zgjidhje.

Të hënën, diplomatja e lartë e Bashkimit Evropian, Kaja Kallas, deklaroi se blloku mbetet “shumë i përqendruar në një zgjidhje diplomatike”.

“Shqetësimet për hakmarrje dhe përshkallëzimin e luftës janë të mëdha”, tha Kaja Kallas në fillim të një takimi të ministrave të jashtëm në Bruksel, ku Irani u bë tema kryesore në rendin e ditës.

“Sidomos mbyllja e ngushticës së Hormuzit nga Irani do të ishte diçka jashtëzakonisht e rrezikshme dhe e mirë për askënd”, tha Kallas, duke iu referuar një rruge të rëndësishme detare për transportin e naftës.

Pas sulmeve të së dielës, zyrtarët iranianë përsëritën kërcënimet e tyre të kahershme për mundësinë e mbylljes së kësaj rruge kyçe detare.

Ministri i Jashtëm iranian, Abbas Araghchi, mbërriti të hënën në Moskë për takim me presidentin rus, Vladimir Putin, një nga aleatët kyç të Iranit./REL/

Kina ka bërë thirrje për përpjekje më të mëdha ndërkombëtare për të ulur tensionet në konfliktin Izrael-Iran, me qëllim parandalimin e ndikimit të mëtejshëm në ekonominë globale, ndërsa brenda Iranit po shtohen thirrjet për mbylljen e Ngushticës së Hormuzit si hakmarrje për sulmet amerikane në centralet e tij bërthamore.

I pyetur në lidhje me mbështetjen e parlamentit iranian për mbylljen e korridorit kritik të transportit detar, një zëdhënës i Ministrisë së Jashtme të Kinës tha se Gjiri Persik dhe ujërat përreth tij janë kanale jetësore për tregtinë ndërkombëtare të mallrave dhe energjisë.

“Ruajtja e sigurisë dhe stabilitetit në rajon i shërben interesave të përbashkëta të bashkësisë ndërkombëtare”, tha Guo Jiakun, një zëdhënës i ministrisë, në një konferencë të rregullt për shtyp të hënën.

“Kina i bën thirrje bashkësisë ndërkombëtare të intensifikojë përpjekjet për të çtensionuar konfliktin dhe për të parandaluar që turbulencat rajonale të ndikojnë më tej në zhvillimin ekonomik global”, shtoi ai.

Për Kinën, importuesin më të madh të naftës në botë dhe blerësin më të madh të naftës bruto nga Irani, Ngushtica e Hormuzit është edhe më e rëndësishme.

Sipas vlerësimeve të EIA-s, Kina importoi 5.4 milionë fuçi naftë të papërpunuar çdo ditë përmes ngushticës në tre muajt e parë të vitit 2025. Kjo është ekuivalente me rreth gjysmën e importeve mesatare ditore të naftës së papërpunuar të Kinës në tremujorin e parë të vitit, sipas llogaritjes së CNN bazuar në të dhënat e doganave kineze.

Të dielën, Sekretari i Shtetit i SHBA-së, Marco Rubio, i bëri thirrje Kinës që ta dekurajojë Iranin nga mbyllja e Ngushticës së Hormuzit.

Kreu i agjencisë mbikëqyrëse bërthamore të OKB-së, Rafael Grossi, ka bërë thirrje për një armëpushim në Iran, në mënyrë që të lejojë inspektimet e IAEA-s në centralet bërthamore të Iranit.

Në një deklaratë drejtuar bordit të guvernatorëve të IAEA-s në Vjenë, ai tha:

“Vërtetimi i fakteve në terren është një parakusht për çdo marrëveshje dhe kjo mund të bëhet vetëm përmes inspektimeve të IAEA-s.”

“Duhet të ketë një ndërprerje të armiqësive që të mbizotërojnë kushtet e nevojshme të sigurisë dhe mbrojtjes, në mënyrë që Irani të lejojë ekipet e IAEA-s të hyjnë në vendet për të vlerësuar situatën.”

Kryeministri izraelit, Benjamin Netanyahu tha dje se Izraeli synon të shmangë një luftë rraskapitëse me Iranin, raportoi “Times of Israel”.

“Ne nuk do të ndjekim veprimet tona përtej asaj që është e nevojshme për të arritur qëllimet, por gjithashtu nuk do të përfundojmë shumë shpejt”, u citua të ketë thënë Netanyahu.

Ai vlerësoi Shtetet e Bashkuara për shkaktimin e “dëmeve shumë serioze” në impiantin e pasurimit të uraniumit të fortifikuar rëndë të Iranit në Fordow gjatë sulmeve gjatë natës, megjithëse nuk dha detaje specifike rreth shkallës së dëmit.

Netanyahu tha se bëhet fjalë për eliminimin e “dy kërcënimeve konkrete për ekzistencën tonë, kërcënimin bërthamor dhe kërcënimin e raketave balistike”.

“Ne po ecim hap pas hapi drejt arritjes së këtyre qëllimeve. Jemi shumë, shumë afër përfundimit të tyre”, tha ai, sipas “Times of Israel”.

“Kur të arrihen objektivat, atëherë operacioni është i përfunduar dhe luftimet do të ndalen”, shtoi ai.

Ushtria amerikane kreu sulme në uzinën e pasurimit të uraniumit në Fordow, e cila është e ngulitur thellë brenda një mali, dhe në uzinën bërthamore të Natanzit duke përdorur bomba bunkershkatërruese.

Izraeli filloi sulmet e tij në shkallë të gjerë ndaj objektivave iraniane më 13 qershor, duke thënë se synon të parandalojë vendin nga ndërtimi i një arme bërthamore, një akuzë që Teherani e ka mohuar vazhdimisht./atsh