Kombëtarja e Spanjës ka shënuar një fitore bindëse 3-0 ndaj Austrisë, duke siguruar me meritë kalimin për në 1/8 e finales të Kupës së Botës. Me këtë triumf, “La Roja” konfirmon formën e saj të lartë dhe përgatitet për një super-sfidë në fazën tjetër, ku do të përballet me Portugalinë, e cila më herët eliminoi Kroacinë.

Ndeshja nisi me dominimin e spanjollëve, të cilëve fillimisht iu anulua një gol spektakolar me volej nga Marc Cucurella për shkak të një faulli në sulm. Megjithatë, epërsia u zhbllokua në minutën e 36-të, kur Mikel Oyarzabal shënoi pas një asistimi të saktë nga po i njëjti Cucurella.

Në pjesën e dytë, Spanja e rriti presionin dhe në minutën e 66-të dyfishoi shifrat me anë të Pedro Porros, i shërbyer bukur nga Alex Baena. Austria u përpoq të reagonte, madje David Alaba shpëtoi një gol të sigurt mbi vijën e portës pas një goditjeje të Lamine Yamal. Krejt në fund të takimit, në minutën e 89-të, Oyarzabal shënoi golin e tij të dytë personal dhe të tretin për Spanjën, pas një tjetër asistimi nga Cucurella, duke vulosur rezultatin përfundimtar 3-0.

Ky sukses e dërgon Spanjën drejt një prej dueleve më të pritura të turneut, ku në fazën e 1/8-ave do të masë forcat në një derbi iberik kundër Portugalisë së Cristiano Ronaldos. /E.A/

Një hetim i thelluar i “BBC Eye” ka zbuluar një skandal në platformën Instagram në Indi, ku reklama të paguara dhe të miratuara nga sistemi i moderimit të Meta-s promovonin hapur materiale të abuzimit seksual me fëmijët.

Reklamat përdornin terma të drejtpërdrejtë dhe përmbanin lidhje që i dërgonin përdoruesit në kanale të aplikacionit Telegram, ku këto materiale shiteshin për më pak se një dollar.

Gjatë këtij hetimi, BBC raportoi një nga këto reklama tronditëse, por Instagram u përgjigj fillimisht se postimi nuk shkelte rregullat e komunitetit. Vetëm pasi mediat kërkuan komente zyrtare, kompania Meta ndërhyri duke bllokuar llogaritë dhe duke deklaruar se asnjë sistem nuk është i përsosur, ndërsa premtoi rritjen e përdorimit të inteligjencës artificiale për të shmangur gabime të tilla.

Ky rast ka ngritur alarm të madh te autoritetet dhe ekspertët ligjorë në Indi, të cilët kanë kërkuar ndërhyrjen e menjëhershme të Gjykatës Supreme. Ata theksojnë se rrjetet sociale nuk mund t’i shmangen përgjegjësisë penale kur përfitojnë financiarisht nga aktivitete të tilla kriminale. Të gjitha gjetjet e këtij hetimi tashmë u janë dorëzuar autoriteteve indiane për ndjekje të mëtejshme. /BBC/ /E.A/

Breel Embolo dhe Dan Ndoye shënuan nga një gol në fitoren 2:0 të Zvicrës ndaj Algjerisë, në ndeshjen e luajtur në orët e hershme të mëngjesit të së premtes, duke siguruar kualifikimin për në 1/8 e finales të Kupës së Botës.

Granit Xhaka udhëhoqi sërish Zvicrën si kapiten në fushë, duke e çuar përfaqësuesen drejt një tjetër suksesi në skenën më të madhe të futbollit botëror.

Zviceranët e nisën ndeshjen me vrull dhe kaluan në avantazh që në minutën e 10-të falë golit të Embolo-s, rezultat me të cilin u mbyll edhe pjesa e parë.

Me të filluar pjesa e dytë, Ndoye dyfishoi shifrat në 2:0, rezultat që mbeti i pandryshuar deri në fishkëllimën e fundit të arbitrit.

Me këtë kalim grupi, Zvicra përsërit suksesin e tre Botërorëve të kaluar ku arriti në 1/8 e finales, por këtë herë synon të thyejë tabunë dhe të avancojë edhe më tej në turne./E.A/

Portugalia ka siguruar kualifikimin në 1/8 e finales të Kupës së Botës pas një fitoreje dramatike 2-1 ndaj Kroacisë, në një ndeshje plot emocione dhe episode VAR-i.

Kroacia kaloi e para në avantazh në minutën e 53-të me anë të Ivan Perisiç, pas një aksioni të nisur nga Luka Modriç.

Portugalia reagoi shpejt në një lojë që mori rrjedhë të çmendur.

Kroacisë iu anulua një gol i Igor Matanoviç, ndërsa pak më vonë edhe Cristiano Ronaldos iu anulua një realizim për pozicion jashtë loje.

Pasi Rafael Leao goditi traversën, Portugalia fitoi një penallti pas rishikimit të VAR-it për një faull ndaj Renato Veigës, të cilën Ronaldo e shndërroi në gol në minutën e 68-të për të barazuar në 1-1.

Përmbysja e madhe u vulos nga Gonçalo Ramos që shënoi golin e fitores. Në minutën e 90+13, Kroacia barazoi përkohësisht në 2-2, por goli u anulua sërish nga VAR-i për pozicion jashtë loje. Me këtë triumf, Portugalia kalon tutje dhe përgatitet për një superpërballje të fortë në fazën tjetër kundër Spanjës. /E.A/