Sot, më 26 mars 2025, shënohet 18-vjetori i momentit kur ish-presidenti finlandez Martti Ahtisaari dërgoi raportin përfundimtar në Këshillin e Sigurimit të OKB-së, ku ai rekomandonte që Kosova të bëhej e pavarur. Ky raport ishte një pikë kthese në procesin e ndërkombëtarizimit të çështjes së Kosovës dhe shpalli një hap të rëndësishëm drejt realizimit të pavarësisë së Kosovës.

Në atë kohë, ndërkombëtarisht, ishte një ndarje e qartë mes mbështetjes dhe kundërshtisë për planin e Ahtisaarit. Shtetet e Bashkuara të Amerikës e mbështetën fuqishëm planin, duke e konsideruar atë si rrugën e duhur për të arritur pavarësinë e Kosovës. Nga ana tjetër, Serbia e kundërshtoi fort këtë plan dhe vazhdoi të shprehte pozita kundër pavarësisë, duke e konsideruar atë si një kërcënim për integritetin e saj territorial.

Në këtë periudhë, Rusia gjithashtu bëri deklarata që mund të interpretohen si kundër pavarësisë, por nuk i përdori mekanizmat e vetos për të penguar planin e Ahtisaarit. Megjithatë, ndikimi i këtyre deklaratave nuk ishte i mjaftueshëm për të frenuar procesin, duke qenë se shumica e vendeve perëndimore, përfshirë SHBA-në, ishin të angazhuara për një rrugë të drejtë për Kosovën.

Tri ditë pas dorëzimit të raportit të Ahtisaarit, më 29 mars 2007, Parlamenti Evropian miratoi një rezolutë që mbështeste pavarësinë e mbikëqyrur të Kosovës me 490 vota pro, 80 kundër dhe 87 abstenime. Ky moment shënoi një hap të madh përpara drejt njohjes ndërkombëtare të pavarësisë së Kosovës.

Pas shpalljes së pavarësisë më 17 shkurt 2008, Kuvendi i Kosovës e shpalli vendin një shtet të pavarur, sovran dhe demokratik. Ky akt u bë pas një seance të jashtëzakonshme të Kuvendit të Kosovës, ku morën pjesë 109 nga 120 deputetë të mundshëm. Shpallja e pavarësisë, megjithatë, nuk kaloi pa polemika dhe kundërshtime. Serbia, duke e konsideruar të paligjshme, kërkoi vlerësimin ndërkombëtar të ligjshmërisë së Deklaratës së Pavarësisë.

Në tetor të vitit 2008, Serbia kërkoi një opinion nga Gjykata Ndërkombëtare e Drejtësisë për të vlerësuar ligjshmërinë e Deklaratës. Më 22 korrik 2010, Gjykata Ndërkombëtare e Drejtësisë dha një vendim këshillues, duke rikonfirmuar se shpallja e pavarësisë së Kosovës nuk kishte shkelur asnjë nen të Ligjit Ndërkombëtar.

Ky moment historik i ka hapur rrugë Kosovës për të qenë pjesë e bashkësisë ndërkombëtare, dhe 18 vjet pas dërgimit të raportit të Ahtisaarit, Kosova ka bërë hapa të rëndësishëm në forcimin e shtetësisë së saj, megjithëse ende ka sfida për t’u përballur me shumë shtete që nuk e kanë njohur ende pavarësinë e Kosovës./UBTNews/

“Ditë e natë, nëse ka nevojë, në rrugë do të qëndroj”, thotë Maliq Mehmeti – një qytetar i mllefosur me propozimin e Zyrës së Rregullatorit për Energji (ZRrE) për ngritjen e çmimit të rrymës për 15 për qind.

Mehmeti dhe qytetarë të tjerë pritet të kundërshtojnë këtë vendim përmes protestës, në fillim të muajit të ardhshëm.

Protesta po organizohet nga grupi “Jo Rritjes së Çmimit të Energjisë Elektrike në Kosovë! AsnjeCentMeShumë”.

Qytetari Maliq Mehmeti e konsideron rritjen si të papërballueshme, duke e krahasuar me çmimet në vendet evropiane.

“Shumë shtrenjtë është [rryma], më shumë se në perëndim, më shumë se në Zvicër. Unë e kam djalin në Zvicër, gruaja më punon, i merr 400 euro pagë, 200 paguaj rrymë, gjysmë rroge e gruas shkon për rrymë. Sikur djali im në Zvicër të paguajë, e ka 5 mijë franga pagën, të paguajë 2 mijë e 500 franga në muaj. Është e njëjtë, ne nuk mund të përballojmë këto çmime. Duhet protestë masive, krejt të dalim, i vogël e i madh. Ditë e natë nëse ka nevojë në rrugë do të qëndroj”, thotë Mehmeti.

Edhe qytetari Fehmi Aliu shprehet se propozimi për shtrenjtimin e energjisë elektrike është diskriminues.

“Ky çmim është jo real, diskriminues për gjithë qytetarët, dhe çdo protestë e cila organizohet do t’i bashkangjitem. Këtu, përkundrazi duke pas parasysh standardin që kemi po shtrenjtohen, nëse nuk ndërhyn shteti këta nuk ka kush me i ndal”, thotë Aliu.

Themeluesi i grupit, Luan Hasanaj thotë se thirrjes tashmë i janë bashkuar mbi dy mijë qytetarë, të cilët sipas tij e konsiderojnë ditën e shtunë – 5 prill, për të protestuar lidhur me shtrenjtimin.

“Diskutimi brenda grupit është që protesta të mbahet ose me datën 4 apo 5 prill. Me sa po shihet, shumica dërmuese e anëtarëve të grupit janë që protesta të mbahet me datën 5 prill, që është e shtunë, meqenëse është edhe ditë pushimi. Aktiviteti ynë është i përditshëm duke kontaktuar qoftë me biznese, me organizata joqeveritare, qoftë me grupe tjera të organizuara të qytetarëve, sepse ky vendim prek secilin. Të gjithë duam të jetojmë normalisht, dhe nuk mund të jetosh normalisht nëse ti ballafaqohesh me këtë rritje enorme te çmimeve në çdo sektor. Andaj, sikur të mos mjaftonte kjo, tanimë propozohet edhe rritje prej 15 për qind e çmimit, i cili do të shoqërohet me rritje zingjir të çmimeve në çdo sektor tjetër. Ne jemi mobilizuar dhe po kërkojmë prej ZRrE-së, bordit të tyre, që të mos marrin këtë vendim. Kundërshtimi i qytetarëve është shumë i madh, me secilin që diskutojmë, jo vetëm me biznese, por edhe me qytetarët të gjithë janë të gatshëm të angazhohen për të kundërshtuar qoftë me protesta apo qoftë edhe me mënyra tjera”, thekson Hasanaj.

Ai thotë se po përgatiten të iniciojnë një fushatë e cila do të kërkojë prej qytetarëve bojkotin e pagesës së energjisë elektrike, pasi sipas tij “edhe qytetarët kanë të drejtë të bëjnë rezistencë”.

“Ne jemi duke u përgatitur që të iniciojmë një fushatë e cila do të kërkojë prej qytetarëve bojkotin e pagesës së energjisë elektrike, sepse nëse ata japin të drejtë vetes që të rendojnë jetën tonë, duke marrë vendime që ndikojnë direkt në xhepin e qytetarëve, atëherë edhe qytetarët kanë të drejtë të bëjnë rezistencë, sepse kjo është një diçka që pamundëson jetën normale. Ne nuk do të ndalemi, urojmë se pari të mos merret, dhe do i sugjeroja ZRrE-së që mos ta merr këtë vendim, jo të paktën në ketë kohë. Në të kundërtën kundërshtimi i qytetarëve do të jetë i vazhdueshëm. Ne nuk do te ndalemi vetëm me një protestë. Deri më tani kemi mbi 2 mijë qytetarë brenda rreth tre apo katër pesë dite, por numri po rritet çdo moment. Afër 1 mijë e kanë nënshkruar peticionin online. Andaj, pakënaqësia e qytetarëve është e madhe ndaj këtij vendimi”,thotë Hasanaj.

Edhe njohësi i ekonomisë, Adem Qorrolli e cilëson rritjen si një lajm të keq për qytetarët dhe bizneset.

Ai thotë se ky vendim do të ndikojë jo vetëm në tarifat e energjisë, por edhe në rritjen e çmimeve të produkteve esenciale, të cilat do të ndikojnë seriozisht në jetën e përditshme të qytetarëve.

“Rritja energjisë elektrike për 15 për qind është një lajm jo shumë i mirë për qytetarët e vendit dhe bizneset, sepse edhe bizneset do të kenë një tarifë, paguajë rrymën para se të vijë koha e shfrytëzimit të energjisë dhe sigurisht institucionet janë shumë afër të bërit biznes me energji. Kështu kur kemi interes qeveritar në të bërit pazare energjetike, atëherë edhe qytetari do të pësojë dhe sigurisht do të pësojë edhe me këtë rritjen prej 15 për qind. Dhe do të pësojnë edhe në gjitha produktet esenciale qofshin ato dhe të rëndomtat”, thotë Qorrolli.

Ditë më parë, kryetari i Bordit të Zyrës së Rregullatorit të Energjisë, Ymer Fejzullahu në një intervistë për KosovaPress njoftoi gjithashtu se pritet një rritje prej rreth 15 për qind në tarifat e energjisë për konsumatorët fundorë.

Më 14 mars, Zyra e Rregullatorit për Energji Elektrike në Kosovë njoftoi se ka propozuar shtrenjtimin e çmimit të energjisë elektrike për rreth 15 për qind – në muajin e ardhshëm.