Londra zyrtare shtoi tetë emra të rinj në regjimin e saj të sanksioneve kundër Rusisë dhe kjo e fundit ndërmori menjëherë kundërmasa. Rusia njoftoi sot se po ndalon hyrjen e 21 personave që i akuzon për bashkëpunim me median shkatërruese britanike në promovimin e narratives antiruse.

Lista përfshin gazetarë, ekspertë dhe anëtarë të OJQ-ve dhe emrat e tyre janë shtuar në emrat e qindra qytetarëve të tjerë perëndimorë të cilëve u është ndaluar hyrja në vend nga Rusia që nga fillimi i luftës në Ukrainë.

Lëvizja e Moskës vjen pasi Londra zyrtare shtoi tetë emra të rinj në regjimin e saj të sanksioneve kundër Rusisë.

Sanksionet e reja zbatohen për një kombinim individësh dhe kompanish: Kantemir Kaparbekovich Chalbaev, Zhanishbek Ulu Nazarbek, Leonid Shumakov, Altair Holding SA, CJSC Tengricoin, Grinex LLC, The Capital Bank of Central Asia dhe Old Vector LLC, raporton KosovaPress.

Sanksionet e reja synojnë rrjetet e kriptovalutave që Rusia përdor për të anashkaluar sanksionet ekzistuese.

Në një njoftim për shtyp, qeveria britanike deklaron se Rusia i është drejtuar sektorit financiar tç Kirgistanit në një përpjekje për të shmangur sanksionet.

“Ndërsa sanksionet vazhdojnë të godasin, Rusia i është drejtuar sektorit financiar kirgistanez për të kanalizuar paratë përmes rrjeteve financiare të errëta, duke përfshirë përdorimin e kriptovalutave. Këto rrjete kanë krijuar një sistem kompleks për të shmangur sanksionet e vendosura nga Mbretëria e Bashkuar dhe partnerët e saj.

Ministri i Jashtëm polak Radosław Sikorski reagoi ndaj incidentit të mbrëmshëm, kur një objekt u rrëzua në Poloninë lindore, dhe ministri i Mbrojtjes pretendon se ishte një dron me origjinë ruse.

Sikorski në rrjetin social X tha se do të ngrihej një protestë zyrtare kundër autorit të krimit, pa përmendur vendin që besohet se qëndron pas incidentit.

“Një tjetër shkelje e hapësirës sonë ajrore nga lindja”, shtoi ai.

Zëvendëskryeministri dhe ministri i Mbrojtjes polak Władysław Kosiniak-Kamysz konfirmoi se mjeti fluturues që shpërtheu mbrëmë në Poloni tani besohet të jetë me origjinë ruse, raporton Guardian.

“Rusia po provokon përsëri vendet e NATO-s pas incidenteve me dronë në Rumani, Lituani dhe Letoni. Kjo po ndodh në një moment veçanërisht të rëndësishëm, ndërsa bisedimet e paqes janë duke vazhduar. Po ndodh në një kohë kur ka shpresë se lufta e nisur nga Rusia – një luftë kundër shtetit ukrainas, por edhe një luftë që kërcënon sigurinë e vendeve të NATO-s – ka një shans të përfundojë”, tha ai.

Mbrëmë një objekt i paidentifikuar ra në një fushë misri në qytetin Osiny në rrethin Łuków, në rajonin Lubelszczyzna, dhe policia gjeti mbetje metali dhe plastike të djegura në vend. Shpërthimi ishte aq i fuqishëm sa dritaret e tri shtëpive aty pranë u thyen.

Për fat të mirë, askush nuk u lëndua.

Një pako e garancisë së sigurisë për Ukrainën pritet të finalizohet këtë javë, pasi presidenti i SHBA-së Donald Trump mbështeti një plan që përfshin dërgimin e trupave evropiane si pjesë e një marrëveshjeje të mundshme paqeje, raporton Bloomberg.

Udhëheqësit evropianë tani po përpiqen të përdorin ofertën e Trump për ta vendosur Kievin në një pozicion më të mirë negociues përpara një takimi të mundshëm midis presidentëve Vladimir Putin dhe Volodymyr Zelensky.

Pas një samiti në Shtëpinë e Bardhë të hënën që solli mbështetje më të fortë të SHBA-së për garancitë, zyrtarët evropianë u përqendruan në përpunimin e planit dje.

Sipas burimeve të njohura me situatën, plani përfshin dërgimin e trupave britanike dhe franceze në Ukrainë, dhe numri dhe orari i tyre u diskutuan. Dhjetëra vende janë gati të dërgojnë trupa në vendin e shkatërruar nga lufta, thanë burimet për Bloomberg.

Pavarësisht progresit, natyra e mbështetjes së SHBA-së mbetet e paqartë. Trump tha për Fox News: “Në frontin e sigurisë, ata janë të gatshëm të dërgojnë njerëz në terren. Ne jemi të gatshëm t’i ndihmojmë ata me disa gjëra. Ndoshta mund të flasim për mbështetje ajrore sepse askush nuk ka pajisjet që kemi ne, realisht nuk i ka. Nuk mendoj se kjo do të jetë problem.”

Më vonë, zëdhënësja e Shtëpisë së Bardhë, Caroline Leavitt, tha se Trump kishte përjashtuar dërgimin e trupave amerikane në terren.

Qeveria britanike konfirmoi dje se zyrtarët ushtarakë evropianë do të takohen me homologët e tyre amerikanë në ditët në vijim për të përpunuar “garanci të forta sigurie dhe për t’u përgatitur për vendosjen e forcave për të siguruar stabilitetin në rast të ndërprerjes së armiqësive”.

Bisedimet do të përfshijnë gjithashtu komandantin Suprem të Forcave Aleate të NATO-s për Evropën Alexus Gregory Grynkewich, dhe krerët e mbrojtjes së shteteve anëtare.

Paketa që po përgatitet përbëhet nga disa faza:

Faza e parë, sipas burimeve, do të përfshijë forcimin e ushtrisë ukrainase përmes trajnimit dhe përforcimeve. Këto forca do të mbështeteshin më pas nga një grup shumëkombësh i përbërë kryesisht nga trupa evropiane, me Britaninë dhe Francën të përgatitura të dërgonin qindra trupa të tyre. Ato do të stacionoheshin në Ukrainë.

Faza tjetër e planit përfshin gjithashtu të ashtuquajturën mbështetje logjistike të SHBA-së, e cila do të përfshinte ndarjen e inteligjencës, mbikëqyrjen e kufijve, furnizimet me armë dhe ndoshta mbrojtjen ajrore.

Vetëm pesë institucione në botë janë përzgjedhur si finalistët e Triple E Awards – Universiteti i Angazhuar i Vitit (Kategoria Globale), dhe UBT është një prej tyre. Ky vlerësim e vendos UBT-në krah institucioneve më të njohura ndërkombëtare, duke treguar përkushtimin e tij ndaj arsimimit, inovacionit dhe ndikimit shoqëror në nivel global.

Përcaktimi si finalist është rezultat i viteve të përkushtimit për të integruar arsimin, kërkimin dhe ndikimin në komunitet në një model unik angazhimi që krahasohet me universitetet më të mira në botë.

Institucionet finaliste të tjera krahas UBT-së janë:

• Jönköping University – School of Engineering (Suedi)
• King Fahd University of Petroleum and Minerals (Arabia Saudite)
• McGill University – Dobson Centre for Entrepreneurship (Kanada)
• Fuzhou Melbourne Polytechnic (Australi/Kinë)

Të qëndrosh përkrah institucioneve kaq të njohura ndërkombëtare është një dëshmi e ekselencës dhe reputacionit ndërkombëtar në rritje të UBT-së. Fituesit përfundimtarë do të shpallen në ceremoninë e ndarjes së Çmimeve Triple E.

UBT është përzgjedhur në këtë finale globale kryesisht falë përkushtimit të tij të palëkundur ndaj dijes, inovacionit dhe përgjegjësisë shoqërore, të mishëruar përmes Strategjisë së Integruar të institucionit.

Me një rrjet në rritje të qendrave kërkimore – si 5G Innovation Hub, Instituti RIED, dhe Qendra Kombëtare për Monitorimin e SDG-ve në Kosovë – UBT forcon infrastrukturën kombëtare të kërkimit, nxit bashkëpunimin ndërdisiplinor dhe lidh akademinë me vendimmarrjen. Iniciativa si Pro-Academia, shërbimet falas për komunitetin dhe një program bursash i trefishuar që nga viti 2019, sigurojnë qasje, barazi dhe mobilitet shoqëror, veçanërisht për grupet e margjinalizuara.

UBT gjithashtu shfaq lidership humanitar gjatë krizave, e përfshin qëndrueshmërinë përmes Strategjisë së SDG-ve dhe Planit të Veprimit për Kampusin e Gjelbër, si dhe promovon rezistencën përmes bashkëpunimit ndërkombëtar dhe diplomacisë arsimore. Duke e transformuar kampusin e vet në një laborator të gjallë, të zgjuar, gjithëpërfshirës dhe të qëndrueshëm, UBT përfaqëson më së miri mënyrën se si arsimi i lartë mund të mobilizojë dijen për të mirën publike – me rrënjë lokale, i lidhur globalisht dhe i orientuar drejt së ardhmes.