Këshilli Prokurorial i Kosovës (KPK) në mbledhjen e së hënës, ka refuzuar kërkesat për tërheqjen e dorëheqjeve të pesë prokurorëve dhe 15 anëtarëve të stafit mbështetës të komunitetit serb në Prokurorinë e Mitrovicës.

KPK-ja dërgoi tek ushtruesja e detyrës së Presidentes, Albulena Haxhiu, emrat e pesë prokurorëve për lirim nga detyra.

Po ashtu, në këtë takim, Këshilli shfuqizoi vendimin për pezullimin e pagave për prokurorët dhe stafin mbështetës serb.

Për refuzimin e tërheqjes së dorëheqjeve të ofruara nga prokurorët dhe stafi mbështetës serb, votuan katër anëtarët: Dardan Vuniqi, Visar Krasniqi, Elza Bajrami-Kastrati dhe Arlinda Muqa. Ndërkaq kundër votuan: kryesuesi Arian Gashi, Kryeprokurori i Shtetit- Zejnullah Gashi dhe anëtari Milot Krasniqi.

Edhe Policia e Kosovës ka njoftuar se policët serbë që u dorëhoqën në fund të 2022-s, pas shkarkimit të drejtorit të Policisë për rajonin e veriut, Nenad Gjuriq, i cili pati refuzuar ta zbatonte vendimin e Qeverisë për ndalimin e targave ilegale serbe, nuk do ta kenë mundësinë e rikthimit në punë. /EO/

/A.K/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

20 korrik 1995

Katër të vdekur nga moti i lig në Prizren

Katër vetë humbën dje pasdreke jetën për shkak të motit të lig që përfshiu Prizrenin me rrethinë.

Në fshatin Lubeçevë të Prizrenit vërshoi përroi i fshatit, i cili mori me vete vëllezërit Ridvan e Resul Ponika i pari 9, ndërsa i dyti 7 vjeçar, si dhe nipin e tyre Arben Shalën (7) nga Billusha, i cili ishte mysafir. Ata humbën jetën derisa po ktheheshin nga fusha për në shtëpi.

Ndërsa dje në mëngjes, humbi jetën Tahir M. Berisha (24), baba i dy fëmijëve. Tahiri ra viktimë e elektroshokut nga përçuesit e dëmtuar të rrjetit elektrik në afërsi të furrës së qytetit.

Për shkak të të reshurave, u vëshuan disa shtëpi, rrugët e qytetit u mbuluan me rërë, ndërsa në disa vende u dëmtua edhe asfalti e kalldërmi, pastaj rrjeti elektrik e telefonik, si dhe u shkktuan dëme të konsiderueshme në bujqësi.

Rrugët sot ishin të mbushura me rërë e vende-vende pati edhe shpërthime të ujërave nga kanalizimi.

 20 korrik 1998

Gjendje dramatike në Rahovec

Sot në Rahovec mbretëron një gjendje dramatike. Dëshmitarët okularë pohojnë se forcat serbe po granatojnë pa ndërprerë pjesë të tëra të qytetit. Shumë ndërtesa janë rrënuar e janë përfshirë në flakën e zjarrit, ndërsa banorët po lëvizin në drejtim të zonave më të qeta, në mënyrë që t’u shpëtojnë masakrave që u kërcënohen. Një burim i Komisionit për Informim të Degës së LDK-së në Prizren, i cilia ka arritur të depërtojë vetëm 1 kilometër larg Rahovecit, ka takuar shumë gra e fëmijë që kishin braktisur shtëpitë e tyre dhe ishin nisur në drejtim të fshatrave që nuk janë përfshirë në luftime.

Alisa Berisha (15) dhe Vileta Krasniqi (30), të cilat ishin nisur në drejtim të Prizrenit kanë pohuar se në Rahovec po luftohet pa ndërprerë qe 48 orë. Në qytet dëgjohen shpërthime të fuqishme dhe të shtëna të pandërprera. Deri tani janë rrënuar së paku 30 shtëpi, ndërsa shumica e banorëve të qytetit janë evakuuar.

Ato kanë treguar se në grupin e grave e fëmijëve që ishin nisur në drejtim të Prozrenit kishin qrenë edhe disa burra. Në mesin e tyre ishte edhe babai i Alisës, Ymer Berisha dhe Sherif Malisa nga Studençnai, të cilët ishin arrestuar nga policët serbë në postbllokun e vendosur në fshatin Landovicë.

Gjendje dramatike mbretëron edhe në fshatin Bellacerkë. Në këtë fshat, i cili dje ishte në shënjestër të armëve të rënda të forcave serbe, nuk mund të hyjë askush, por besohet se shumë banorë të tij janë vrarë e masakruar.

Një dëshmitar okular ka deklaruar se në fshat kanë mbetur trupat pa jetë të Ibrahim Popajt dhe bashkëshortes së tij, Azizes, të dy mbi 72 vjeçarë. Dyshohet se janë vrarë edhe bashkëshortet e Ismail Popajt dhe Halim Popajt.

Dëshmitarët okularë pohojnë se forcat serbe kanë marrë peng disa shqiptarë nga ky fshat. Beqir Kollari ka njoftuar se forcat serbe kanë marrë peg të afërmit e tij: Isuf, Ismet, Mejdi e Beqir Kollarin, katër vëllezërit Bekeri, Masar Ejupi, Agim Canzibaj, Mustafë Kasapi, profesori me emrin Behxhet dhe një shqiptar nga Prizreni, i paidentifikuar. Sipas dëshmitarëve ata janë marrë peng nga forcat paramilitare që i udhëheq Arkani.

Kryesia e Degës së LDK-së në Prizren bën apel që të mundësohet nxjerrja e kufomave nga fshati Bellacerkë.

Vazhdon sulmi serb në Rahovec – dyshohet se ka shumë të vrarë

Qyteti i Rahovecit është në flakë në luftën e ashpër midis forcave shqiptare dhe forcave serbe.

Forcat serbe po e sulmojnë Rahovecin nga të gjitha anët, me tanke, topa, raketa e me armë e makineri tjetër lufte.

Burimet nga Rahoveci bëjnë me dije se forcat serbe po terrorizojnë e masakrojnë popullatën civile shqiptare. Korrespondenti i “Rilindjes” nga Rahoveci i ka thënë korrespondentit të ATSH në Prishtinë se kishte parë me sytë e tij se si forcat serbe e vranë me plumba dum-dum një grua shqiptare shtatzënë, Hatixhe Hundozin (38).

E ndodhur para sulmeve e masakrave serbe, popullata shqiptare po largohet nga Rahoveci. Njoftohet se më se 20. 000 veta kanë shkuar në drejtim të Malishevës. Të ikurit thonë se në Rahovec e rrethinë ka shumë të vrarë, të masakruar e të plagosur.

Ndërkohë njoftohet se forcat serbe kanë hyrë në disa lagje të qytetit, ku kanë marrë qytetarët shqiptarë dhe i kanë lidhur nëpër shtylla të rrjetit elektrik e të telefonit, në mënyrë që të shërbejnë si mbrojtje nga sulmet e forcave të rezistencës.

Në Gjykatën Themelore në Prishtinë ka dështuar të nisë gjykimi në mungesë ndaj 21 të akuzuarve për veprën penale “Krim i luftës kundër popullsisë civile”, lidhur me masakrën e Reçakut, ku më 15 janar 1999 u vranë 42 civilë shqiptarë.

Kryetarja e trupit gjykues, Violeta Namani-Hajra, bëri të ditur se seanca u shty pasi disa nga avokatët e caktuar nuk ishin pajisur me shkresat e lëndës. Ajo njoftoi gjithashtu se për katër të akuzuar – Zoran Stanojeviq, Milan Josanoviq, Goran Petkoviq dhe Dragoslav Nikoliq – mungonin avokatët mbrojtës, pasi Oda e Avokatëve të Kosovës ende nuk e kishte njoftuar gjykatën për emërimin e tyre.

Prokurori special Ilir Morina tha se Prokuroria kishte kërkuar nga Oda e Avokatëve listën e mbrojtësve të caktuar, në mënyrë që ata të pajiseshin me materialet e lëndës. Sipas tij, deri tani vetëm 10 avokatë janë paraqitur për të marrë shkresat, ndërsa u bëri thirrje edhe të tjerëve që ta bëjnë këtë sa më parë.

Prokuroria Speciale e Kosovës ngriti aktakuzën më 30 dhjetor 2025, duke propozuar gjykim në mungesë ndaj 21 personave për krime lufte kundër popullsisë civile. Sipas aktakuzës, ata akuzohen se, si pjesëtarë të forcave ushtarake dhe policore serbe gjatë luftës në Kosovë, kanë kryer vrasje, trajtim çnjerëzor, dëbime, shkatërrim të pronës dhe spastrim etnik ndaj popullsisë civile shqiptare në Reçak.

Aktakuza i ngarkon të akuzuarit me përgjegjësi për vrasjen e 42 civilëve shqiptarë gjatë masakrës së Reçakut, një nga krimet më të rënda të kryera gjatë luftës në Kosovë./Betimi për Drejtësi//A.K/

Sekretari amerikan i Shtetit, Marco Rubio, tha se Irani po përpiqet ta përdorë Ngushticën e Hormuzit si “mjet presioni ndaj botës”.

Ai e akuzoi atë se synon të kontrollojë një rrugë jetike ndërkombëtare dhe u bëri thirrje edhe vendeve të tjera që të ndajnë barrën e mbrojtjes së transportit detar global.

Duke folur para gazetarëve, para nisjes për një takim në Filipine, Rubio tha se operacionet ushtarake amerikane janë të përqendruara vetëm në ndalimin e sulmeve iraniane ndaj anijeve tregtare dhe në dobësimin e aftësisë së Teheranit për të kërcënuar trafikun detar.

“Është e qartë se Irani, ose të paktën disa njerëz në Iran, duan ta kontrollojnë Ngushticën dhe ta përdorin atë si mjet presioni ndaj botës”, tha Rubio.

“Shtetet e Bashkuara do të vazhdojnë të bëjnë atë që është e nevojshme për të mbrojtur transportin detar global, por edhe vendet e tjera duhet të fillojnë të kontribuojnë, qoftë me pajisje, qoftë me mjete financiare, për ta ndarë këtë barrë”, shtoi ai.

Sipas tij, Uashingtoni nuk mund të mbetet i vetmi përgjegjës për sigurimin e një prej rrugëve më të ngarkuara tregtare detare në botë.

“Nuk është detyrë e Shteteve të Bashkuara që ta mbrojnë përgjithmonë transportin detar të të gjithë planetit”, tha Rubio.

Diplomacia mbetet e mundur

Rubio tha se fushata aktuale ushtarake amerikane ka në shënjestër vetëm kapacitetet iraniane që po përdoren për të lëshuar raketa dhe dronë ndaj anijeve tregtare në Ngushticën e Hormuzit.

Ai e përshkroi Ngushticën si një rrugë ndërkombëtare që duhet të mbetet e hapur.

“Arsyeja e vetme pse Shtetet e Bashkuara po kryejnë sulme, është goditja e kapaciteteve iraniane që po përdoren për të sulmuar transportin tregtar global”, tha ai.

Sipas tij, forcat amerikane kanë arritur ta zvogëlojnë aftësinë e Iranit për të goditur anije dhe shumë sulme janë parandaluar para se të kryheshin.

“Ju dëgjoni për anijet që janë goditur. Por, nuk dëgjoni për ato që janë mbrojtur dhe për sulmet që Irani nuk ka arritur t’i kryejë”, tha Rubio.

Duke përsëritur se Uashingtoni mbetet i hapur për negociata, Rubio tha se diplomacia do të kërkonte një ndryshim të vërtetë në sjelljen e Teheranit.

“Ne jemi gjithmonë të hapur për diplomaci. Por, ajo duhet të jetë e vërtetë. Duhet të jetë një marrëveshje që ata janë të gatshëm ta respektojnë”, tha ai.

Rubio e akuzoi Iranin se ka shkelur mirëkuptimet e mëparshme, duke vazhduar sulmet ndaj anijeve në vend se ta rihapte Ngushticën e Hormuzit.

“Sjellja e tyre duhet të ndryshojë që të ndryshojë edhe e jona”, tha ai, duke shtuar se Teherani vazhdon të dërgojë sinjale përmes kanaleve të drejtpërdrejta dhe të tërthorta se është i interesuar për negociata, ndërkohë që vazhdon sulmet me raketa dhe dronë.

Ndarjet brenda Iranit

Rubio tha se, brenda udhëheqjes iraniane, duket se po thellohen ndarjet mes zyrtarëve që kërkojnë lehtësim ekonomik përmes diplomacisë dhe vijës së ashpër që dëshiron ta vazhdojë përballjen ushtarake.

“Ka një ndarje në rritje mes atyre që e kuptojnë se ekonomia e tyre është në gjendje të rëndë dhe të tjerëve që kanë një qasje shumë luftarake dhe vazhdojnë të lëshojnë raketa”, tha ai.

Rubio tha se Uashingtoni do t’i mirëpriste negociatat nëse zërat më pragmatikë do të fitonin më shumë ndikim në Teheran, por paralajmëroi se vazhdimi i përballjes do ta thellonte krizën ekonomike të Iranit.

“Nuk mendoj se kjo do të jetë mirë për Iranin”, tha Rubio, duke e përshkruar ekonominë e vendit si të rrënuar, me inflacion të lartë, mungesa të ushqimeve dhe karburanteve, rënie të të ardhurave dhe probleme të rënda të brendshme.

Rubio, po ashtu, e akuzoi udhëheqjen iraniane se po i përdor burimet për të mbështetur grupe si Hezbollahu, Hamasi dhe milicitë rajonale, në vend se të investojë te populli i saj.

Sipas tij, brenda Iranit, përfshirë edhe mes disa zyrtarëve qeveritarë, po rritet vetëdija se drejtimi aktual i vendit nuk është i qëndrueshëm.

“Nëse hapet dera për diplomaci, ne do ta mirëpresim”, tha Rubio. /REL/