Policia e Kosovës ka njoftuar se janë duke vërejtur një rritje të ankesave të qytetarëve për raste të mashtrimeve përmes mesazheve telefonike (SMS), ku qytetarët pranojnë mesazhe që përmbajnë Link-e (vegëza) të dyshimta.

Sipas policisë duke u klikuar në to mashtruesit mund të fitojnë qasje në llogaritë bankare të qytetarëve ose të dhëna tjera personale me ç’rast nga llogarit bankare në mënyrë të paligjshme të dyshuarit përfitojnë të holla.

Për t’i mbrojtur qytetarët nga mashtrime të tilla policia ka ftuar qytetarët ti ndjekin këto këshilla:

-Mos klikoni asnjë link të dyshuar që i pranoni përmes mesazheve (SMS) telefonike.

-Mos jepni të dhënat tuajt personale si fjalëkalime apo informacione bankare përmes faqeve të panjohura.

-Verifikoni çdo mesazh të dyshimtë duke kontaktuar drejtpërdrejt institucionin ose kompaninë që pretendohet se ju ka dërguar mesazhin.

-Raporto Rastin tek Autoritetet përkatëse ose ta banka e juaj (të bllokojnë transferin e të hollave) nëse keni dhënë informacione të ndjeshme.

Policia poashtu ka kërkuar nga qytetarët që nëse kanë dyshime ose kanë rënë viktimë e një mashtrimi të tillë, ti kontaktojnë menjëherë autoritetet përkatëse policore.

Organizatat e dala nga lufta e UÇK-së nuk janë njoftuar ende zyrtarisht për shënimin e 27-vjetorit të Epopesë. Xhavit Jashari nga Shoqata e Familjeve të Dëshmorëve deklaroi se nuk janë të vendosur nëse do të dërgojnë përfaqësues në Këshillin Shtetëror për shënimin e Epopesë së UÇK-së, këshill ky i themeluar sot nga Qeverisë së Kosovës.

Qeveria ka themeluar Këshillin Shtetëror për shënimin e 27-vjetorit të Epopesë së Ushtrisë Çlirimtare të Kosovës, i cili do të kryesohet nga ministri i Mbrojtjes, Ejup Maqedonci.

Jashari tha se deri më tani nuk janë kontaktuar nga institucionet.

“Neve nuk na ka kontaktuar askush deri më tani zyrtarisht dhe nëse na kontaktojnë apo bëjnë kërkesë për të qenë pjesë e këtij manifestimi ulem bashkërisht tri organizatat edhe marrim një qëndrim ose një vendim”, deklaron ai.

Ai shtoi se nuk kanë bashkëpunim me Ministrinë e Mbrojtjes, pas dorëheqjes së ish-ministrit, Armend Mehaj.

“Kemi qenë pjesë aktive sa ka qenë ministër i Mbrojtjes, Armend Mehaj, sepse kemi pasur një bashkëpunim të mirë por me largimin e tij nuk kemi pasur asnjë bashkëpunim dhe do të shohim. Çdoherë me ne janë bërë organizimet me FSK-në, por ka pasur edhe anëtarë të tjerë të këtij organizimi. Megjithatë, pa u drejtuar zyrtarisht për të marrë pjesë, nuk mund të them asgjë”, shton Jashari.

Organizata e Veteranëve të Luftës së UÇK-së nuk mori pjesë në aktivitetet e organizuara nga Qeveria për 17 vjetorin e shpalljes së Pavarësisë së Kosovës.

Pas akuzave nga drejtori i Byrosë Federale amerikane të Hetimeve (FBI) për keqpërdorimin e fondeve nga Agjencia e Shteteve të Bashkuara për Zhvillim Ndërkombëtar (USAID), prokuroria në Beograd raportohet se ka nisur hetime ndaj organizatave të caktuara joqeveritare.

Të martën e 25 shkurtit, Policia serbe, duke vepruar në bazë të urdhrave nga Departamenti Special për Luftimin e Korrupsionit i Zyrës së Prokurorit të Lartë Publik në Beograd, ka bastisur zyrat e disa OJQ-ve për, siç është thënë, grumbullimin e provave për keqpërdorim të mundshëm të fondeve të USAID-it, raporton Radiotelevizioni i Serbisë (RTS).

Mësohet se me hetime po përballen OJQ-ja e quajtur Qendra për Hulumtime, Transparencë dhe Llogaridhënie (CRTA), dhe shoqata Iniciativat Qytetare.

Policia nuk i është përgjigjur pyetjeve të Shërbimit të Ballkanit të Radios Evropa e Lirë në lidhje me aksionin.

Një ditë më parë, presidenti i Serbisë, Aleksandar Vuçiq, ka thënë se Serbia do t’i ndihmojë FBI-së në hetimet e saj rreth financimit të OJQ-ve serbe nga USAID-i dhe nga Fondacioni Kombëtar për Demokraci (NED).

“Pa dyshim se ne do të bashkëpunojmë ngushtë me FBI-në për këtë çështje”, ka thënë Vuçiq për televizionin Happy, duke shtuar se FBI do të marrë çfarëdo informate që ka nevojë nga Serbia.

OJQ-ja Iniciativat Qytetare njoftoi, përmjes një komunikate për media, se policia ka hyrë në zyrat e saj më 25 shkurt.

“Këtë mëngjes, rreth 20 zyrtarë policorë kanë bastisur zyrat e Iniciativave Qytetare, duke thënë se kanë urdhër nga prokuroruia për të hetuar punën e organizatës, por nuk kanë dashur ta tregojnë dokumentin”, u tha në komunikatë.

Kjo OJQ shtoi se policia ka bastisur edhe Qendrën për Politika Praktike, një organizatë që, sipas saj, nuk ka pasur ndonjë projekt me USAID-in.

“Ky është sulm serioz ndaj të drejtave themelore qytetare dhe vazhdim i trysnisë së paligjshme ndaj shoqërisë civile në Serbi. Strukturat qeverisëse po përpiqen të zbatojnë mekanizma të frikësimit dhe ndjekjes, pa miratimin e Ligjit për Agjentët e Huaj”, u tha në komunikatën e OJQ-së Iniciativat Qytatare.

Presidenti amerikan, Donald Trump, ka kufizuar punën e USAID-it, duke urdhëruar një ngrirje 90-ditëshe të shpenzimeve të saj, më 24 janar.

Administrata presidenciale amerikane po shqyrton futjen e USAID-it nën ombrellën e Departamentit të Shtetit, si pjesë e një riorganizimi të madh që do të reduktonte numrin e punonjësve.

Që prej kthimit të Trumpit në Shtëpinë e Bardhë, administrata e tij dhe njerëz të afërt me të e kanë quajtur vazhdimisht USAID-in “organizatë kriminale”.

USAID-i u themelua më 1961, me qëllim koordinimin më të mirë të ndarjes së ndihmave amerikane jashtë vendit.

Sipas shifrave të fundit, ai ka rreth 10.000 punonjës, dy e treta e të cilëve punon jashtë SHBA-së. Në vitin fiskal 2023, USAID-i shpërndau ndihma me vlerë prej 43.79 miliardë dollarësh./REL/

Ka vdekur Enver Duriqi, babai i katër fëmijëve të vrarë në masakrën e Podujevës më 28 mars të vitit 1999. Duriqit aty, mizorisht, i ishin vrarë edhe bashkëshortja dhe të dy prindërit.

Familja e tij ishte vrarë në masakrën që forcat serbe kishin kryer ndaj Familjeve Duriqi, Bogujevci dhe Llugaliu në Podujevë.

Për vdekjen e Duriqit njoftoi Fondi për të Drejtën Humanitare në Kosovë, “Zëri i së vërtetës dhe drejtësisë”.

Fondi shkroi në Facebook se Enver Duriqi ishte angazhuar me përkushtim që të dokumentoheshin krimet dhe përgjegjësit të viheshin para drejtësisë.

“Ai besonte se vetëm përmes të vërtetës mund të ndërtohej një e ardhme më e drejtë dhe më humane. Sot, teksa përcjellim në amshim Enver Duriqin, kujtojmë forcën dhe dinjitetin e tij të pashoq. Ai nuk ishte vetëm një dëshmitar i së kaluarës së dhimbshme, por edhe një simbol i palëkundur i qëndresës dhe drejtësisë. Trashëgimia e tij do të mbetet frymëzim për brezat që vijnë”, shkroi Fondi për të Drejtën Humanitare.