Kryetari i Kuvendit të Republikës së Kosovës, Glauk Konjufca, i shoqëruar nga Nënkryetarja e Kuvendit, Saranda Bogujevci, Shefi i Kabinetit, Ilir Kërçeli, ambasadori Florian Qehaja dhe këshilltarët, ka pritur sot në takim Kryetarin e Kuvendit të Republikës së Maqedonisë së Veriut, Afrim Gashi.

Në pritjen që i bëri homologut të tij Gashi, kryeparlamentari Konjufca shprehu bindjen se takimet dhe angazhimi i përbashkët i shërbejnë rritjes së bashkëpunimit të shkëlqyer midis Republikës së Kosovës dhe Maqedonisë së Veriut, duke i konsideruar ato si përpjekje për më të mirën e qytetarëve tanë.

Në këtë takim, kryetari Konjufca dhe kryetari Gashi diskutuan aspekte të ndryshme të parlamentarizmit dhe folën për mundësitë e rritjes së bashkëpunimit midis institucioneve tona legjislative. Gjithashtu, biseduan edhe për çështje të tjera të interesit të përbashkët, duke përfshirë rrugën e integrimeve evropiane, zhvillimin ekonomik, tregtar dhe stabilitetin e rajonit tonë.

Kryetari Konjufca shtoi se bashkëkombasit tanë, vlerat dhe synimet e përbashkëta janë ato që qëndrojnë midis raporteve tona të shkëlqyera shtetërore si garanci e këtij bashkëpunimi të shkëlqyer dhe thellimit të tij.

Kryetari i Kuvendit të Republikës së Maqedonisë së Veriut, z. Afrim Gashi e falënderoi kryekuvendarin Konjufca për pritjen dhe shprehu gatishmërinë e plotë për të avancuar sa më shumë me projekte dhe punë të përbashkëta, të cilat çojnë në drejtim të përmbushjes së synimeve dhe interesave të vendeve tona.

Përpjekja e Hungarisë për të avancuar bisedimet e anëtarësimit me Serbinë në fazën tjetër u bllokua të hënën nga një grup i konsiderueshëm vendesh anëtare të Bashkimit Evropian, duke bërë të pamundur arritjen e unanimitetit të nevojshëm.

Debati u zhvillua në një takim me dyer të mbyllura të ambasadorëve evropianë.

Kroacia, Estonia, Finlanda, Gjermania, Letonia, Lituania, Holanda dhe Suedia ishin mes vendeve që kundërshtuan lëvizjen, duke akuzuar Beogradin për shkelje të të drejtave themelore, për marrëdhëniet e tensionuara me Kosovën fqinje dhe për refuzimin e vazhdueshëm për t’i vendosur sanksione Rusisë.

Propozimi, i parashtruar nga presidenca hungareze e Këshillit të BE-së, synonte ta afronte Serbinë me hapjen e Grupimit të Tretë të procesit të anëtarësimit, që përfshin 8 kapituj individualë të lidhur me konkurrencën dhe rritjen ekonomike; si taksimi, politika monetare, punësimi, unioni doganor dhe kërkimet shkencore.

Më parë, Serbia kishte zhbllokuar 5 nga këta kapituj, por në vitin 2020 Brukseli ndryshoi rregullat për të krijuar grupimet tematike, të cilat duhet të hapen secila si një e tërë pas përmbushjes së një serie kriteresh paraprake.

Sipas Komisionit Evropian, Serbia ka përmbushur disa kritere dhe teknikisht është gati për të nisur bisedimet për Grupimin e Tretë, duke e lënë vendimin final në duart e shteteve anëtare, që duhet të japin dritën e gjelbër në mënyrë unanime për çdo hap të procesit.

Dështimi i konsensusit këtë të hënë erdhi pasi grupi i vendeve që kundërshtuan, insistoi se Serbia duhet të arrijë rezultate konkrete përpara se të hedhë hapin e ardhshëm.

Rreth nëntë mijë qytetarë nga rajoni i Prishtinës janë vaksinuar kundër gripit sezonal, ndërkaq tre mijë doza të tjera janë ende në dispozicion. Nga Qendra Kryesore e Mjekësisë Familjare (QKMF) iu bëjnë thirrje grupeve më të ndjeshme që të vaksinohen deri në fund të dhjetorit.

Grupet më të rrezikuara konsiderohen të moshuarit, personat me sëmundje kronike dhe punëtorët shëndetësorë të cilët janë në kontakt të drejtpërdrejtë me pacientët.

Sipas punëtorëve shëndetësorë, shtimi i rasteve me grip sezonal në Kosovë është një shqetësim i zakonshëm për këtë periudhë të vitit – në temperatura të ulëta dhe kur aktivitetet kufizohen në ambiente të mbyllura.

Mjeku në QKMF, Rushit Ismajli thotë se kohëve të fundit numri i pacientëve që kërkojnë shërbime mjekësore është rritur.

Por ai tregon se ky grip tejkalohet “vetvetiu ose me një trajtim të thjeshtë”.

“Kohëve të fundit kemi pasur një numër më të rritur të pacientëve që kërkojnë ndihmë në institucionin tonë shëndetësor dhe për shkak të sezonës, por edhe arsye të tjera, dhe është bërë edhe ngarkesë e shërbimeve shëndetësore. Në qoftë se flasim për dëmet, zakonisht nuk janë shumë të mëdha që shkaktohen nga gripi sezonal, sepse simptomat janë të thjeshta – temperaturë, kollitje, dhimbje muskuj, fyti – shpesh kalon vetvetiu ose me një trajtim të thjeshtë, nuk ka nevojë që të shqetësohen shumë, përveç në raste shumë të rralla kur kanë temperaturë shumë të lartë, kanë vështirësi në frymëmarrje, kanë dhimbje gjoksi”, thotë Ismajli.

Ismajli shton se qytetarët nuk duhet të marrin antibiotik pa përshkrim nga profesionistët shëndetësorë.

Kjo për shkak të dëmeve dhe efekteve anësore që mund të shkaktohen.

“Janë edhe masat specifike, vaksinimi i cili në komunën e Prishtinës është duke shkuar mjaft mbarë, deri tani ne i kemi diku nëntë mijë vaksina në Prishtinë me rrethinë, akoma rezervë [3 mijë] 12 mijë vaksina [i kemi pasur në total]. I ftoj qytetarët e Prishtinës që të vijnë të vizitojnë qendrën tonë dhe të vaksinohen kundër gripit sezonal, kanë kohë deri nga fundi i dhjetorit që të marrin këtë vaksinë dhe të jenë të vaksinuar, punëtorët shëndetësorë janë në këtë kategori duke përfshirë dhe grupe të tjera fëmijët, gratë shtatzëna, të moshuarit sidomos ata që kanë sëmundje bashkëshoqëruese si tension diabet sëmundje kronike të mushkërive rekomandohet shumë që të marrin vaksinën por edhe të gjithë qytetarët e tjerë është mirë që të vaksinohen ndaj gripit sezonal. Qytetarët nuk duhet të marrin antibiotikë vet nuk duhet të shkojnë në barnatore që të marrin antibiotik pa përshkrim nga ana e mjekut”, ka shtuar ai.

Vaksinimi kundër gripit sezonal është një masë kyçe për të parandaluar komplikimet që mund të shkaktojë ky grip, sidomos tek grupet e rrezikuara.

Edhe një muaj ka mbetur deri në përfundimin e afatit të aplikimit për regjistrim si votues jashtë Kosovës për zgjedhjet parlamentare të 9 shkurtit 2025, ndërkohë që në KQZ tregojnë se çfarë do të ndodhë me bashkatdhetarët që janë refuzuar deri më tash.

Zëdhënësi i KQZ-së, Valmir Elezi tha se deri më 22 nëntor, përmes platformës elektronike janë regjistruar afro 19 mijë votues.

Ai tregon se në rastet kur një shtetasi i refuzohet aplikimi për t’u regjistruar si votues jashtë Kosovës, i njëjti mund të aplikojë serish.

“Është e rëndësishme ta theksojmë se procesi i regjistrimit të votuesve jashtë Kosovës, nuk është përjashtues. Kjo do të thotë se nëse një shtetas i refuzohet aplikimi, ky nuk është një refuzim përfundimtar, pasi i njëjti ka të drejtë të ri-aplikojë. KQZ i informon individualisht aplikuesit e refuzuar për arsye të refuzimit të kërkesës së tyre dhe gjithashtu aplikuesit e refuzuar njoftohen se mund të ri-aplikojnë për regjistrim dhe të bashkëngjisin dokumentet e nevojshme për të përmbushur kërkesën e tyre në përputhje me udhëzimet e KQZ-së”, tha Elezi.

Elezi tregon numrin e aplikimeve të refuzuara qe nga fillimi i periudhës për regjistrim jashtë vendit dhe të atyre që janë regjistruar pasi kanë aplikuar serish.

“Qe nga fillimi i procesit të regjistrimit të votuesve jashtë Kosovës, në përgjithësi janë 2,559 aplikime që janë refuzuar, por rreth 1.290 kanë ri-aplikuar, duke plotësuar dokumentet që kërkohen nga KQZ apo kanë ndjekur udhëzimet që parashihen me procedurë dhe kësisoj kanë arritur të regjistrohen në listën e votuesve jashtë Kosovës. Aktualisht, në listën e aplikimeve të refuzuara janë rreth 1,270 raste. Këta persona, por edhe rastet tjera që mund të refuzohen ditëve në vazhdim, kanë të drejtë të ri-aplikojnë dhe të arrijnë të regjistrohen si votues jashtë Kosovës”, tha Elezi.

Elezi sqaron se në rastet kur aplikuesit konsiderojnë të padrejtë refuzimin për regjistrim si votues jashtë vendit, atëherë ka të drejtën e ankesës fillimisht në KQZ përmes e-mail, e më pas në Panelin Zgjedhor për Ankesa dhe Parashtresa (PZAP).

Më 29 gusht ka nisur aplikimi për regjistrimin e votuesve jashtë Kosovës për zgjedhjet parlamentare, e cila periudhë do të përfundojë më 26 dhjetor 2024.

Po ashtu, gjatë kësaj periudhe, në momentin e regjistrimit votuesit mund të përcaktohen individualisht për mënyrën e votimit: të votojnë fizikisht në njërën nga përfaqësitë diplomatike të Kosovës, duke dërguar fletëvotimin përmes postës në kutinë postare të KQZ-së në Kosovë apo duke dërguar fletëvotimin përmes postës në njërën nga kutitë postare të hapura nga KQZ-ja jashtë Kosovës.