Lajmet

​Osmani: Aleatët tanë nuk kanë qenë asnjëherë kundër Kushtetutës së Kosovës

E para e shtetit theksoi se rregullorja e BQK-së nuk është kundër dinarit serb.

Published

2 years ago

on

Presidentja e Kosovës, Vjosa Osmani ka deklaruar se Kosova i ka në krah aleatët ndërkombëtarë, pasi ata nuk kanë qenë asnjëherë kundër Kushtetutës së Kosovës dhe as sundimit të ligjit. E para e shtetit theksoi se rregullorja e BQK-së nuk është kundër dinarit serb, por ka të bëjë me spastrimin e parave dhe parandalimin e korrupsionit. Mirëpo nënvizoi nevojën që në bashkëpunim me aleatët të gjendet një rrugë efektive, përmes së cilës do të informoheshin qytetarët e Kosovës, përfshirë ata serbë për zbatimin e rregullorës së BQK-së.

Osmani në konferencë për media, së bashku me ministrin gjerman të Mbrojtjes, Boris Pistorius, tha se Kosova ka obligim kushtetues zhbërjen e strukturave paralele, e cila rrjedh edhe nga marrëveshja e vitit 2013 me Serbinë.

Në anën tjetër, ministri gjerman Pistorius tha se rregullorja e BQK-së është legjitime dhe realizueshme, mirëpo nevojitet një afat më i gjatë për zbatimin e saj. Ndërkaq potencoi mbështetjen ushtarake për të garantuar sigurinë në Kosovë.

“Më lëni ta bëjë të qartë, aleatët tanë i kemi në krah, aleatët tanë nuk kanë qenë asnjëherë kundër Kushtetutës së Kosovës, aleatët tanë asnjëherë nuk kanë qenë pro dinarit serb, aleatët tanë asnjëherë nuk kanë qenë kundër sundimit të ligjit. Përkundrazi, këtë Kushtetutë dhe çdo sukses që kemi arritur, e kemi arritur bashkë me aleatët tanë tradicionalë, përfshirë SHBA’në, Gjermaninë dhe shtetet tjera. Rrjedhimisht, unë nuk shoh asgjë abnormale në bashkëpunimin ndërmjet institucioneve të Kosovës dhe aleatëve tanë ndërkombëtarë në gjetjen e rrugëve shumë efektive nëpërmjet të cilave do të informoheshin qytetarët e Kosovës se si do të zbatohet rregullorja e BQK-së, e cila nuk është rregullore kundër dinarin, nuk e përmend dinarin, por ka të bëjë me spastrimin e parave, parandalimin e korrupsionit dhe masat tjera”, tha Osmani.

Ministri gjerman i Mbrojtjes në vizitën e tij në Kosovë, bëri thirrje për maturi dhe kujdes në tensionet aktuale Kosovë-Serbi.

“Ne marrë parasysh tensionet aktuale me Serbinë dhe pakicën serbe në Kosovë, bëjmë thirrje të qartë për maturi dhe kujdes. Kjo është kërkesa e ditës. Në perspektivë të gjitha palët dhe Kosova, duhet të kontribuojë në shtensionimin e situatës. Mirëpo këtu edhe roli i Serbisë është i veçantë për të cilën ne do të kemi kujdes edhe në të ardhmen….Ne jemi të vetëdijshëm që Kosova ka të drejtë për të zbatuar ligjshmërinë e saj, por në deeskalim bën pjesë edhe masat legjitime sa i përket vendosjes së euros si valutë e vetme, por nevojitet që kjo të komunikohet në mënyrë më të përshtatshme që mos të ketë mosinformim…E kuptojmë vendimin që është legjitim dhe i arsyetueshëm, mirëpo nëse kemi një afat vetëm prej 1 muaji dhe përmes tij i shkaktojmë vështirësi komunitetit pakicë, atëherë kjo mund të kontribuoj më pak në stabilitetin në vend. Mendoj se është më mirë të realizohet rregullorja por të jepet një afat më i gjatë për zbatimin e saj”, tha ai.

Në anën tjetër, presidentja Osmani duke folur për aksionet e Policisë së Kosovës në zhbërjen e strukturave paralele të Serbisë në Kosovë, tha se vendi ka obligim që strukturat që rrezikojnë sigurinë kombëtare të Kosovës të mos funksionojnë.

“Në vitin 2013, është nënshkruar një marrëveshje ndërkombëtare në mes të Kosovës dhe Serbisë, e cila është ratifikuar në parlament, e nënshkruar nga kryeministrat e atëhershëm, ku ndër të tjerash parashihet që Serbia ka detyrim t’i zhbëjë të gjitha strukturat ilegale apo paralele në Kosovë. Që nga atëherë Serbia jo vetëm që nuk ka ndërmarrë masa që t’i zhbëjë këto struktura, por në veçanti strukturat ilegale të sigurisë i ka fuqizuar deri në masën që sot ato janë shndërruar në banda, të cilat organizojnë edhe sulme terroriste kundër Republikës së Kosovës. Kosova ka obligim kushtetues, ka obligim ndërkombëtar që rrjedh nga marrëveshjet e Brukselit dhe Kosova ka obligim ligjor që këto struktura që mund ta rrezikojnë sigurinë kombëtare, mos t’i lejojë të funksionojnë dhe të sigurohemi që të gjithë qytetarët tanë, pa dallim, përfshirë serbët, të integrohen në shoqërinë, institucionet tona publike dhe të respektohet kushtetuta”, tha ajo.

Osmani sërish theksoi se nga dëshmitë që i marrin nga institucionet e sigurisë, Serbia po vazhdon planifikimin e sulmeve të reja terroriste në Kosovë.

“Hetimet zyrtare konfirmojnë se prapa këtij sulmi terrorist dhe akti agresioni kundër Republikës sonë qëndron Serbia dhe institucionet e saj, nga organizimi, te furnizimi me armatim dhe pajisje deri te financimi dhe trajnimi i terroristëve në bazat e tyre ushtarake. Sot në vend që Serbia t’i ekstradojë terroristët, vazhdon t’i inkurajojë ata për të destabilizuar Kosovën dhe rajonit, derisa për fat të keq, Serbisë nuk i janë shqiptuar masa nga Bashkimi Evropian….Të gjitha dëshmitë që ne i marrim nga institucionet tona të sigurisë tregojnë se Serbia vazhdon të planifikojë sulme të reja. Ajo cka dua t’i siguroj qytetarët tanë se Serbia nuk do t’ia dalë”, theksoi Osmani.

Megjithëse ministri gjerman, Pistorius, tha se Gjermania nuk është duke bërë hetime për sulmin terrorist në Banjskë, tha se Kosova ka mbështetje ushtarake për të garantuar sigurinë, derisa bëri të ditur se një kontingjent i KFOR-it gjerman, do të vjen në Kosovë në pranverë.

“Duam të bëjmë të qartë se ka mbështetje edhe nga aspekti ushtarake për të garantuar sigurinë dhe në anën tjetër ne shohim që dialogu dhe deeskalimi të ndodhë”, deklaroi ai.

Ai po ashtu bëri thirrje që të dialogu Kosovë-Serbi të rinis së shpejti.

“Dialogu duhet të rinis shpejtë sepse vetëm atëherë ja dalim që t’i afrohemi integrimit të Kosovës dhe rajonit dhe këtu bën pjesë edhe zbatimi i katalogut të masave të dakorduara në Ohër, kjo duhet të jetë qëllimi, pasi qëllimi i përbashkët është anëtarësimi i të gjitha gjashtë vendeve të BP në BE. E dimë që çështja e njohjes së Kosovës i vështirëson këto përpjekje esencialisht sepse ka edhe pesë vende të BE-së që nuk e njohin Kosovën, të jeni të sigurt që ne do të ju mbështesim edhe më tej në këtë drejtim”, është shprehur ai.

E pyetur nga gazetarët, presidentja Vjosa Osmani foli edhe për raportet e tij me kryeministrin Albin Kurti, ku tha se qëllimet i kanë të përbashkëta, por metodat për t’i arritur ato mund t’i kenë të ndryshme.

“Qëllimet i kemi të përbashkëta dhe ajo është mbrojtja e kushtetutës së vendit, sovranitetit, shtyrja përpara e sundimit të ligjit në çdo cep të territorit të Kosovës, por njëkohësisht edhe arritja e dakordimit me aleatët tanë sa i përket kësaj çështje. Metodat që i shfrytëzojmë për të arritur këtë dakordim mund t’i kemi të ndryshme por qëllimet asnjëherë”, tha Osmani.

Ministri gjerman i Mbrojtjes, Boris Pistorius, në vizitën e tij të hënën në Kosovë, është takuar edhe me kryeministrin, Albin Kurti dhe homologun e tij nga Kosova, Ejup Maqedonci.

Related Topics:
Continue Reading

Rajoni

UBT gati të mirëpresë nesër studiues nga e gjithë bota në Konferencën e 14-të Ndërkombëtare

Published

9 hours ago

on

October 24, 2025

By

Në ambientet e Parkut Shkencor, Inovativ dhe Teknologjik të UBT-së në Lipjan, nesër do të hapet zyrtarisht edicionit i 14-të i Konferencës Ndërkombëtare për Biznes, Teknologji dhe Inovacion – një prej ngjarjeve më të rëndësishme akademike dhe shkencore në rajon, e cila bashkon mijëra akademikë, studiues dhe studentë nga dhjetëra shtete të botës.

Kjo konferencë vjetore e organizuar nga UBT ka për qëllim të shërbejë si një platformë ndërkombëtare për shkëmbim idesh, kërkime shkencore dhe përvoja profesionale, duke ndërlidhur botën akademike me industrinë dhe inovacionin praktik.

Ky edicion pritet të ofrojë dhjetëra sesione paralele, punime shkencore, prezantime inovative dhe panele diskutimi, duke reflektuar trendet më të fundit globale në biznes, teknologji, edukim, mjekësi, energji, arkitekturë dhe fusha të tjera ndërdisiplinare.

Continue Reading

Rajoni

UBT organizoi me sukses Konferencën e parë Ndërkombëtare të Mjekësisë Sportive

Published

12 hours ago

on

October 24, 2025

By

Në Parkun Shkencor, Inovativ dhe Teknologjik të UBT-së në Lipjan, u mbajt me sukses Konferenca e parë Ndërkombëtare e Mjekësisë Sportive (IC-SM 2025) – një ngjarje e nivelit të lartë që shënoi një moment historik për zhvillimin e kësaj fushe në Kosovë dhe rajon.

Në këtë konferencë morën pjesë figura të njohura ndërkombëtare të mjekësisë sportive, përfshirë Presidentin e Federatës Ndërkombëtare të Mjekësisë Sportive (FIMS), Prof. Dr. Fabio Pigozzi nga Italia, Prof. Dr. Norbert Bachl nga Austria, Annika Hangleiter, M.Sc. nga Universiteti Teknik i Mynihut (Gjermani), dhe Prof. Dr. Gobert von Skrbensky nga Austria, së bashku me shumë ekspertë vendorë dhe ndërkombëtarë.

Në hapje të konferencës, Rektori i UBT-së, Prof. Dr. Edmond Hajrizi, theksoi se që nga themelimi, UBT ka qenë e përkushtuar ndaj dijes, inovacionit dhe krijimit të një shoqërie të zgjuar, ku shkenca, teknologjia dhe praktika bashkohen për të krijuar ndikim të qëndrueshëm në shoqëri.

“Mjekësia sportive është një nga fushat që mishëron më së miri këtë filozofi – duke bashkuar shëndetin, edukimin, performancën dhe inovacionin teknologjik”, u shpreh Rektori Hajrizi, duke theksuar se përmes Themelimit të Qendrës për Mjekësi Sportive në UBT, është hapur një kapitull i ri për zhvillimin e kësaj fushe në Kosovë.

Ai gjithashtu përmendi se falë kësaj nisme, Kosova është bërë për herë të parë anëtare e Federatës Ndërkombëtare të Mjekësisë Sportive (FIMS), përmes Shoqatës së Mjekësisë Sportive dhe Ushtrimeve të Kosovës (KASEM) — një arritje që e rendit vendin përkrah mbi 117 shteteve anëtare të kësaj organizate prestigjioze.

Në fjalën e tij përshëndetëse, Prof. Dr. Fabio Pigozzi, President i FIMS-it, vlerësoi kontributin e UBT-së në zhvillimin e mjekësisë sportive dhe theksoi rëndësinë e bashkëpunimit ndërkombëtar për avancimin e kërkimit dhe praktikave klinike në këtë fushë.

Në hapje të konferencës morën fjalën edhe: Fitim Arifi, përfaqësues i Komitetit Olimpik të Kosovës; Agim Ademi, Kryetar i Federatës së Futbollit të Kosovës; Agim Krasniqi, Kryetar i KASEM; Iber Alaj, Drejtor i Departamentit të Sportit në Ministrinë e Kulturës, Rinisë dhe Sportit.

Pjesa kryesore e konferencës përfshiu sesionet shkencore me ligjërata nga:

Prof. Dr. Fabio Pigozzi (Itali) – “Sudden Cardiac Death in Sports and Exercise”

Prof. Dr. Norbert Bachl (Austri) – “Sports Medicine as a Specialty in Europe: Shaping Precise Prevention”

Prof. Dr. Edmond Hajrizi (Kosovë) – “UBT Smart City – An Integrated Platform of Emerging Technologies and Smart Support for Sports Medicine Education, Research, Innovation, and Clinical Services”

Annika Hangleiter, M.Sc. (Gjermani) – “Wearable Technologies in Personalized Prevention: The Future is Already Present”

Prof. Dr. Gobert von Skrbensky (Austri) – “Concepts in Sports Surgery Following Knee Trauma: The Role of Activity Level and Biological Age”

Prezantimet shkencore dhe punimet kërkimore

Në sesionin e dytë të konferencës, të udhëhequr nga Dr. Milaim Berisha dhe Dr. Agron Thaqi, u prezantuan punime shkencore të recenzuara, ndër të cilat:

“The New Era FitScore Test: A Comprehensive General Fitness Assessment” – Era Deva, Milaim Berisha

“The Success Ratio of Non-Surgical Management of Proximal Hamstring Injury in Judo: The Case of Olympic Gold Medalist” – Nora Gjakova, Milaim Berisha

“Beyond Consensus, Into Action: Kosovo’s Response to Elite Athlete Mental Health Challenges” – L.J., Zhu., J., Hell & V. Klissouras

“Comparative Analysis of Body Composition in Elderly Residents of Nursing Homes in Kosovo” – Agron Thaqi

Konferenca IC-SM 2025 shërbeu si një platformë e rëndësishme ndërkombëtare për bashkëpunim, shkëmbim përvojash profesionale dhe prezantim të trendeve më të fundit në mjekësinë sportive. Ngjarja synon të nxisë kërkimin shkencor, inovacionin në rehabilitim, edukimin profesional dhe ndërtimin e rrjeteve ndërkombëtare në fushën e sportit dhe shëndetit.

Konferenca u organizua nga UBT, në bashkëpunim dhe mbështetje të:

  • Kosovo Association of Sports and Exercise Medicine (KASEM),
  • International Federation of Sports Medicine (FIMS),
  • Komitetit Olimpik të Kosovës, dhe
  • Sport, Health and the People – A Western Balkan University Network (SHAPE Project).

IC-SM 2025 u vlerësua si një ngjarje që shënon fillimin e një tradite të re shkencore në Kosovë, duke e pozicionuar vendin në hartën ndërkombëtare të kërkimit në mjekësinë sportive dhe shëndetin publik.

Continue Reading

Lajmet

Kusari-Lila: Të dielën seanca e jashtëzakonshme për Qeverinë, ftesa është dërguar tashmë tek të gjithë deputetët

Published

13 hours ago

on

October 24, 2025

By

Në Kuvendin e Kosovës të dielën, më 26 tetor, do të mbahet seanca për votimin e Qeverisë së re të Kosovës.

Shefja e Grupit Parlamentar të Lëvizjes Vetëvendosje, Mimoza Kusari – Lila, konfirmoi për Telegrafin se ftesa tashmë është dërguar tek të gjithë deputetët për seancë të jashtëzakonshme.

“Po, kemi bërë kërkesë dhe tashmë është dërguar ftesa tek të gjithë deputetët për seancë të jashtëzakonshme për të dielën, ora 10:00, me një pikë të rendit të ditës: Zgjedhja e Qeverisë së Republikës së Kosovës”, tha ajo.

Më 11 tetor, presidentja e Kosovës, Vjosa Osmani, e ka mandatuar liderin e Lëvizjes Vetëvendosje (LVV), Albin Kurti, që të formojë Qeverinë e re të vendit, tetë muaj pas mbajtjes së zgjedhjeve të përgjithshme.

Derisa kanë mbetur edhe dy ditë afat për ta paraqitur përbërjen e re të Qeverisë, deri më tani nga LVV nuk është ndërmarrë asnjë hap konkret.

Nuk është raportuar për ndonjë takim apo negociatë me subjektet e tjera politike që do të mundësonte ndërtimin e një koalicioni qeverisës.

Kjo, pasi LVV-së i nevojiten të paktën 61 vota në Kuvend për të formuar Qeverinë, ndërsa në zgjedhjet e 9 shkurtit, kjo parti ka siguruar 48 ulëse./EO

Continue Reading

Lajmet

Në Kroaci po futet shërbimi i detyrueshëm ushtarak, parlamenti voton pro

Published

13 hours ago

on

October 24, 2025

By

Parlamenti kroat sot, me 84 vota pro, 30 abstenime dhe 11 kundër, ndryshoi Aktin e Mbrojtjes, duke konfirmuar kështu rikthimin e trajnimit bazë ushtarak të detyrueshëm.

Stërvitja bazë ushtarake (TVO) do të zgjasë dy muaj, thirrjet e para do të fillojnë deri në fund të vitit, dhe rekrutët e parë në kazermat në Knin, Slunj dhe Pozhega priten në fillim të vitit të ardhshëm. Siç është njoftuar nga Ministria e Mbrojtjes, është planifikuar të thirren rreth 4,000 rekrutë çdo vit, të ndarë në pesë breza.

Të gjithë të rinjtë 18-vjeçarë janë të regjistruar në regjistrin ushtarak dhe do të dërgohen në stërvitje ushtarake në vitin kalendarik kur të mbushin 19 vjeç. Rekrutët do t’i nënshtrohen një kontrolli mjekësor para stërvitjes për të përcaktuar nëse janë të aftë për stërvitje ushtarake dhe Ministria e Mbrojtjes deklaron se kjo do të organizohet sa më afër vendbanimit të rekrutëve për ta bërë më të lehtë aksesin për pjesëmarrësit.

Ekzaminimi përcakton aftësinë mjekësore të një rekruti potencial, njoftoi Ministria e Mbrojtjes, duke shtuar se ata që i nënshtrohen shërbimit ushtarak mund të dërgohen për stërvitje ose të marrin një shtyrje të përcaktuar me ligj deri në fund të vitit të 29-të të jetës, ose të përjashtohen nga detyrimi sipas kushteve dhe mënyrës së përcaktuar me ligj.

Përjashtimisht, rekrutët mbi moshën 19 vjeç dhe deri në moshën 30 vjeç mund të dërgohen edhe në stërvitje ushtarake, pasi shërbimi mund të shtyhet në rastin e studimit dhe për atletët që të marrin pjesë në kampionatet botërore dhe evropiane./EO

Continue Reading

Të kërkuara