Aktualitet

Opozita thirrje që të lejohet tërheqja e Trustit, LVV nuk ndërron mendje: S’jemi populistë

Published

3 years ago

on

Partitë opozitare sërish kanë apeluar Lëvizjen Vetëvendosje që të votojnë “pro” tërheqjes së mjeteve të Trustit. Por, sërish nga partia në pushtet kanë marrë një refuzim. Deputetja, Fitore Pacolli ka thënë se një vendim për tërheqje do të shkatërronte sistemin pensional.

Deputetët nesër do të bëjnë shqyrtimin e parë të Projektligjit nr.08/L-134 për plotësimin dhe ndryshimin e Ligjit nr. 04/L-101 për fondet pensionale të Kosovës, i plotësuar dhe ndryshuar me Ligjin nr. 04/L-115, me Ligjin 04/L-168 dhe Ligjin nr. 05/L-116.

Shefi i Grupit Parlamentar të PDK-së, Abelard Tahiri, tha sot se në mungesë të alternativave nga qeveria dhe përballë gjendjes së renduar sociale, tërheqja e një pjese të parave të Trustit është një masë e domosdoshme për të lehtësuar ballafaqimin e qytetarëve me këtë gjendje.

“Mundësia për të tërhequr një pjesë nga paratë e kursyera në këto rrethana, ka qenë kërkesë e drejtpërdrejtë e qytetarëve, prandaj i ftoj të gjithë deputetët e Kuvendit të Kosovës dhe veçmas ata të mazhorancës, që nesër ta votojnë projektligjin që mundëson një gjë të tillë. Kjo nuk është betejë politike por domosdoshmëri konkrete dhe kërkesë e të gjithë qytetarëve pa dallim”, tha ai.

Edhe shefi i Grupit Parlamentar të AAK-së, Besnik Tahiri, kërkoi të votohet pro tërheqjes. Ai tha se situata në Kosovë, në aspektin social, kurrë nuk ka qenë më e vështirë pasi çmimet janë ngritur shumë, pagat kanë mbetur të njëjta, përderisa ndihma e shtetit është më se minimale.

“Kuvendi i Kosovës, në veçanti shumica parlamentare, e ka në dorë që nesër ta miratojë në lexim të parë Ligjin për Trustin, ligj ky i cili, sado pak do të zbuste vështirësitë për njerëzit në nevojë, kontributdhënësit në një situatë krize. Mos të filozofojmë shumë, por të veprohet me votën pro. Shpresoj që vota e mazhorancës, do të jetë pro këtij ligji”, tha Tahiri.

Por, deputetja e Lëvizjes Vetëvendosje, Fitore Pacolli, tha se përpos se janë kundër për shkak të efektive negative që ka, po tregojnë se nuk janë as populistë siç zakonisht i akuzojnë partitë opozitare partinë në pushtet.

“Ne po të ishim siç po na thonë populist do ta votonim sepse është një gjë që disa po kërkojnë, mirëpo ne po mendojmë për shtetin e Kosovës afatgjatë dhe ne mendojmë se nuk duhet ta prekim Trustin, qeveria ka marrë hapa që t’iu ndihmojë familjeve në nevojë të jetë afër atyre të cilët kanë nevojë për mbështetje dhe në të njëjtën kohë të shikojmë se si mund të krijojmë vende të reja të punës, që të punësojmë të rinjtë tanë prekja e Trust-it nënkupton prekjen e stabilitetit financiar të shtetit tonë dhe këtë nuk guxojmë ta bëjmë, në këtë situatë është mirë ta përmendim se një numër i madh i qytetarëve nuk kanë Trust fare, prandaj ne synojmë dhe parimet tona janë që t’i ndihmojmë atyre që nuk kanë ndërsa ata që kanë mund t’ia dalin vetë”, tha Pacolli.

Deputetja e VV-së mendon se ata që po e kërkojnë më shumë tërheqjen e Trustit janë ata që kanë kursime më të mëdha dhe, nëse sipas saj vazhdon kjo mendësi për tërheqjen e mjeteve të kursimeve, do ta dëmtohet shteti në vazhdimësi.

“Ata që kanë më shumë mjete janë duke bërë më shumë presion që të marrin Trustin sepse kanë përqindje më të lartë të Trustit ndërsa qytetarët të cilët janë në gjendje më të vështirë ekonomike, të cilët kanë pak para, mund ta mendojnë se tërheqja e asaj shume të vogël të Trustit që do t’ju ndihmojë mirëpo, kjo krijon vetëm pritje dhe nuk e nxjerr nga kriza këtë qytetar. Ne po mendojmë që është në interesin e shtetit të Kosovës që ta ndërtojmë një sistem financiar të qëndrueshëm i cili në të ardhmen nuk frikësohemi të kemi probleme financiare sepse kur shtetet hyjnë në prekjen e stabilitetit financiar dhe kanë cikle të cilat janë të shpeshta dhe përsëriten ato, nuk është e shëndetshme për shtetin” ka deklaruar Pacolli.

Seanca për shqyrtimin e parë për ndryshimet ligjore që lejojnë tërheqjen e mjeteve të Trustit në lartësinë prej 30% mbahet nesër prej orës 11:00, ndërsa është pika e 8 në rendin e ditës.

Related Topics:
Continue Reading

Aktualitet

Arrestohet një i dyshuar lidhur me vrasjen e rëndë në Baicë të Lipjanit

Published

2 hours ago

on

August 12, 2025

By

Një person është arrestuar lidhur me vrasjen e rëndë që ndodhi javën e kaluar në Baicë të Lipjanit.

Viktima u gjet i groposur në një arë të fshatit Baicë.

Zëdhënsja e policisë, Flora Ahmeti ka konfirmuar se lidhur me rastin është arrestuar një person i dyshuar.

“Si rrjedhojë e angazhimeve intensive hetimore, sot nga Njësiti i Hetimeve të Përgjithshme – Prishtinë, është arrestuar një person i dyshuar: T. K, mashkull, shtetas i Republikës së Kosovës, për rastin vrasje që ka ndodhur në fshatin Baicë të Lipjanit. Aktualisht hetuesit po kryejnë procedurat e nevojshme policore, në koordinim me prokurorinë”, ka konfirmuar Ahmeti.

Continue Reading

Aktualitet

Arrestohet një person i dyshuar për posedim të Kokainës në Prizren në vlerë rreth 300 mijë euro

Published

2 hours ago

on

August 12, 2025

By

Policia e Kosovës, konkretisht hetuesit e Njësisë Rajonale për Hetimin e Trafikimit me Narkotikë në Prizren, në bashkëpunim me Prokurorinë Themelore në Prizren, kanë ndërmarrë veprime operative të suksesshme që kanë rezultuar me arrestimin e një personi të dyshuar për përfshirje në veprimtari kriminale të lidhur me substanca narkotike.

Me datë 11 gusht 2025, në rrugën “Viljam Voker” në Prizren, është arrestuar i dyshuari me iniciale H.K. (1994) shtetas i Republikës së Kosovës.

Gjatë kontrollit të realizuar në dy lokacione me urdhër të prokurorit kompetent, në njërën nga lokacionet janë gjetur dhe sekuestruar si prova materiale:

· Substancë e dyshuar narkotike e llojit kokainë, me peshë totale 4 kg e 440 gram;

· Dy (2) peshore elektronike;

· Të holla (para) në vlerë prej 260 euro;

· Një (1) pajisje për vakumim të qeseve plastike;

· Një (1) motoçikletë PIAGGIO VESPA;

· Një (1) telefon mobil iPhone 15 Pro Max;

· Një (1) skalper;

· Sasi e konsiderueshme e qeseve plastike për paketim.

Sipas vlerësimeve, sasia e sekuestruar e substancës narkotike, në tregun ilegal, mund të kapë vlerën deri në 300,000 (treqind mijë) euro.

I dyshuari është shoqëruar në Polici, ku është intervistuar në prani të avokatit të caktuar sipas detyrës zyrtare. Pas intervistimit, me vendim të prokurorit të shtetit, i njëjti është ndaluar për 48 orë.

Hetimet lidhur me këtë rast janë duke vazhduar nga ana e Njësisë së antidrogës në Prizren në koordinim me Prokurorinë Themelore në Prizren.

Policia e Kosovës mbetet e përkushtuar në luftën kundër narkotikëve dhe fton qytetarët që të bashkëpunojnë, duke raportuar çdo informacion të dyshimtë tek organet e rendi.

Continue Reading

Aktualitet

Temperaturat e larta: Inspektorati i Punës intensifikon kontrollet në vendet e punës

Published

4 hours ago

on

August 12, 2025

By

Pas paraqitjes së temperaturave të larta në vend, Inspektorati Qendror i Punës është duke kryer inspektime të rregullta dhe të intensifikuara në të gjitha institucionet publike dhe private.

“Qëllimi i këtyre inspektimeve është të sigurohet që punëdhënësit të respektojnë masat mbrojtëse ndaj temperaturave ekstreme, me synim ruajtjen e shëndetit dhe sigurisë së punëtorëve, sidomos atyre që punojnë në kushte të vështira dhe në ambiente të hapura”, thuhet në njoftim.

Sipas tyre, kur nuk ka respektim të masave do të ketë veprime ndëshkuese.

“Nëse gjatë inspektimeve konstatohet se nuk janë ndërmarrë veprimet e nevojshme mbrojtëse, Inspektorati Qendror i Punës do të veprojë në përputhje me legjislacionin në fuqi, duke ndërmarrë masat ligjore të parapara ndaj subjekteve përkatëse”, vazhdon njoftimi.

Ministria e Shëndetësisë ka rekomanduar institucionet publike dhe private t’i zbatojnë masat mbrojtëse për punëtorët pas rritjes së temperaturave. Rekomandimi vlen nga 11 deri më 15 gusht.

Sipas vendimit të MSH-së kërkohet që të shmanget puna në ambient të jashtëm nga ora 11:00 deri në orën 16:00.

Kurse kërkohet që gratë shtatzëna të lirohen nga puna nga ora 11:00 deri në orën 16:00, nëse nuk është e mundur që ato të punojnë nga shtëpia, të përshtaten oraret e punës herët në mëngjes apo pasdite dhe nëse s’ka ajrosje të mjaftueshme dhe pika freskimi në vendet e punës.

Continue Reading

Aktualitet

Shënohet 26-vjetori i themelimit të Doganës së Kosovës

Published

4 hours ago

on

August 12, 2025

By

Dogana e Kosovës sot mban ceremoninë e diplomimit të gjeneratës së re të oficerëve doganorë si dhe shënimin e 26-vjetorit të themelimit të Doganës së Kosovës.

Përmes një njoftimi nga Dogana e Kosovës, thuhet se ky moment historik shfaq të arriturat dhe angazhimin ndër vite për vendin, dhe mirëpresin oficerët e rinj për të i shërbyer vendit.

“Ky eveniment shënon një moment të rëndësishëm për historinë dhe zhvillimit të Doganës së Kosovës, duke reflektuar mbi të arriturat ndër vite dhe duke mirëpritur oficerët e rinj që do t’i shërbejnë vendit me profesionalizëm e integritet”, njofton Dogana e Kosovës.

Continue Reading

Të kërkuara