Lajmet

Opozita kërkon kompensimin e dëmeve të vërshimeve, LVV nuk shuan shpresat

Nga opozita kërkojnë që ekzekutivi të kryejë punën e vet.

Published

4 years ago

on

Opozita po konsideron se Qeveria e Kosovës po vonohet në krijimin e një fondi emergjent për komunat të cilat janë në gjendje më të rëndë nga vërshimet. Derisa nga pozita thonë se janë në dijeni për dëmet e mëdha që janë shkaktuar dhe se ekzekutivi do ta kryejë punën e vet.

Ardian Kastrati i Partisë Demokratike të Kosovës kërkon nga qeveria një reagim më të shpejtë për komunat e prekura nga vërshimet.

“Situata është jo e tmerrshme por është tepër e rendë dhe këtu nuk ka më vija politike, nuk ka më nuanca të sekrecionit kulturor që e kemi parë në të kaluarën dhe territorializimit. Situata duhet ndihmuar sa më shpejt këtyre komunave, edhe niveli qendror, ashtu siç po bënë në komunat tjera në baza vullnetare, ashtu siç po bënë në komuna tjera në baza vullnetare, ashtu siç po bënë edhe komuniteti, sepse vet komuna, shembull e Skenderaj, ka kapacitete jashtëzakonisht të limituara. Vërshimet dhe dëmet ashtu siç u vlerësuan nga komuna, arrin shifrën 10 milionëshe dhe do të thotë se situata është jashtëzakonisht e rëndë. Pres që qeveria me pas një reagim sa më të shpejtë, sa më rapid dhe të ju ndihmojë këtyre komunave”, thotë Kastrati.

Edhe Aleanca për Ardhmërinë e Kosovës thotë se tashmë qeveria veç është vonuar. Bekë Berisha nga AAK akuzon ekzekutivin për moskrijimin e një fondi emergjent. Sipas tij, qeveria nuk po duket e gatshme të reagojë.

“Fondi emergjent është dashtë të ekzistojë dhe me hy në funksion, mirëpo ne si duket nuk po e kuptojmë rëndësinë e këtyre fatkeqësive natyrore. Agjensioni për menaxhimin e emergjencave duhet të funksionalizohet, duhet të financohet dhe kështu mendoj se me një plan të mirë, ne në të ardhmen do t’i evidentonim këto probleme… Edhe qeveria duhet të investojë menjëherë, momentin që dihet sa është bërë dëme, qeveria të mos vonohet, sepse po kemi problem me këtë qeveri që po vonohet, po preton si duket të ndikojë menjëherë”, thotë Berisha.

Bekë Berisha, i cili është edhe kryetari i Komisionit për Çështje të Sigurisë, tha se përveç dëmeve materiale mund të ketë efekte edhe në fushën e sigurisë.

“Qeveria kërkesat e komunave duhet t’i zbatojnë menjëherë, ato dëme që janë bërë. Mirëpo përmbi këtij duhet të shikojnë në pranverë menjëherë të organizohen këto komuna që kanë pas përmbytje, t’i shikojnë ku janë problemet dhe duhet të fillojnë, sepse këto probleme, ne nuk ju kemi përshtat shtretërve të lumenjve, nuk ju kemi përshtat natyrës, e kemi dhunuar natyrën me ndërtime, shtretërit e lumenjve nganjëherë i kemi mbyllur dhe natyra nganjëherë na tregon se kemi bërë gabime. Duhet me pas plan menjëherë në pranverë, duhet të ketë investime edhe qeverisë, sepse komunat kanë buxhetin e dobët, në mënyrë që të lëshohen shtretërit e lumenjëve, në mënyrë që mos të përballemi me këto probleme, ndryshe nëse vazhdohet kështu do të jetë përherë problem dhe pastaj këto do të bëhen edhe problem i sigurisë”, tha Beka.

Ndërsa opozita thotë krejt ndryshe. Sipas kryetares së Komisionit për Bujqësi, Fitore Pacollit të VV-së, qeveria është e gatshme të punojë në drejtim të sanimit të situatës dhe në marrjen e masave parandaluese për të ardhmen.

Ajo thotë se si komision do të dalin në terren ditën e hënë, dhe do të shohin se cilat janë marrë masat prej komunave si dhe nivelit qendror dhe do të shohin se sa munden të kontribuojnë në sajimin e gjendjes që sa më shpejtë të jetë e mundur.

“Tani e kemi konfirmimin edhe prej kryeministrit dhe ministrave të cilët janë të gatshëm dhe do të punojnë që t’i ndihmojnë secilës familje, secilit qytetar që ka pësuar nga këto vërshime. Dëmet të cilat janë shkaktuar janë dëme të mëdha dhe ka familje tashmë e cila kanë mbet pa strehim dhe duhet t’i ndihmojmë secilit që kemi mundësi dhe qeveria do ta kryej punën e saj… Ne tani duhet të punojmë në masat e parandalimit, që të parandalojmë herën tjetër kur të ndodhin të reshura që të mos përfundojmë në këso katastrofa, për shkak se dëmin më të madh që pësojnë janë qytetarët”, thotë Pacolli.

Për situatën e krijuar ajo i bën përgjegjëse komunat. Sipas saj, në të kaluarën ato nuk e kanë pasur mendjen që të investojnë në këtë drejtim dhe si pasojë e saj, është krijuar kjo gjendje.

“Nëse i shohim komunat tona, tani është një pikëpyetje e madhe, a i kemi komunat e gatshme që të përballen me këto ndryshime klimatike të cilat do të ballafaqohemi ne në të ardhmen. Raporte të ndryshme vlerësojnë se viteve të ardhshme, rajoni në përgjithësi do të përfshihet nga thatësira dhe nga reshje të vrullshme siç janë këto. Nëse ne e kemi mesazhin që në të ardhmen do të kemi reshje të tilla, tani duhet që të mendojmë mirë se si i dizajnojmë, ndërtojmë komunat tona. Problemi është mënyra se si janë ndërtuar komunat tona në të kaluarën, si janë bërë investimet në kanalizime, në ujëmbledhësit. Në të kaluarën, fatkeqësisht komunat nuk e kanë pas mendjen që të investojnë në këtë drejtim dhe sot e kemi gjendjen që e kemi, nuk do duhej që të përfundonte në këtë mënyrë. Sikur të kishim komuna te cilat do të ishin të ndërtuara me planifikim, sipas planeve urbanistike me të gjitha kushtet dhe kriteret që janë te nevojshme, nuk do ta kishim një gjendje të tillë siç e kemi sot”, thotë ajo.

Komunat më të prekura nga këto vërshime ishin komuna e Skenderajt, Klinës, Mitrovicës, Podujevës dhe Istogut.

Related Topics:
Continue Reading

Lajmet

REL: Prokuroria serbe thotë se BIA nuk i është përgjigjur kërkesës për ta marrë në pyetje Vuçiqin në rastin “Panda”

Published

10 hours ago

on

July 30, 2026

By

Prokuroria për Krimin e Organizuar në Serbi ka bërë të ditur se Agjencia e Inteligjencës dhe Sigurisë nuk u është përgjigjur kërkesave për zhvillimin e bisedave me presidentin serb, Aleksandar Vuçiq, si dhe me ish-drejtuesit e Sigurimit të Shtetit, Jovica Stanishiq dhe Franko Simatoviq, në kuadër të hetimeve për vrasjen e gjashtë të rinjve serbë në kafenenë “Panda” në Pejë në vitin 1998, raporton Radio Evropa e Lirë.

Në një përgjigje për REL-in, Prokuroria tha se ka kërkuar në disa raste nga BIA që të zhvillojë biseda me personat e propozuar për të verifikuar nëse ata posedojnë informacione të rëndësishme për hetimin, por deri më tani nuk ka marrë asnjë përgjigje.

Sipas Prokurorisë, veprimet e mëtejshme do të varen nga raporti që pritet të dorëzohet nga BIA.

Kërkesa për marrjen në pyetje të Vuçiqit, Stanishiqit dhe Simatoviqit është paraqitur nga avokati i familjeve të viktimave, Ivan Niniq, i cili argumenton se ata mund të kenë njohuri të rëndësishme për rastin. Në veçanti, Vuçiq ka deklaruar disa herë publikisht se ekzistojnë informacione lidhur me vrasjet në kafenenë “Panda”, ndërsa në vitin 2013 kishte thënë se nuk kishte prova që autorë të krimit ishin shqiptarët dhe se opinioni publik serb do të përballej me “të vërteta të tmerrshme”.

Në kërkesën drejtuar Kryeprokurorit Publik, Niniq ka kërkuar gjithashtu që të verifikohen pretendimet se Radomir Boban Baqoviq mund të jetë autori i drejtpërdrejtë i masakrës. Këto pretendime u publikuan së fundmi në një video në rrjetin social Telegram nga shtetasi malazez në arrati, Milosh Medenica.

Prokuroria bëri të ditur se Baqoviqi nuk është marrë asnjëherë në pyetje në lidhje me këtë rast, pasi deri më tani nuk është konsideruar dëshmitar i besueshëm në hetim.

Autoritetet serbe theksuan se hetimet, të nisura në vitin 2016, vazhdojnë ende, pasi nuk janë siguruar prova të mjaftueshme për të krijuar dyshim të bazuar mbi autorët e krimit. Prokuroria shtoi se është e gatshme t’i paraqesë Prokurorisë Supreme Publike një raport të plotë mbi veprimet e ndërmarra deri më tani.

Më 14 dhjetor 1998, pesë nxënës të shkollës së mesme dhe një studente u vranë kur persona të armatosur hynë në kafenenë “Panda” në Pejë dhe hapën zjarr. Në atë kohë, autoritetet serbe arrestuan disa shqiptarë nën dyshimin për përfshirje në krim, por ata u liruan një vit më vonë nga Gjykata në Beograd për mungesë provash./REL/

D.L

Continue Reading

Lajmet

Himarë, humb jetën 65-vjeçari pasi dyshohet se u plagos nga shpërthimi i dinamitit gjatë peshkimit

Published

11 hours ago

on

July 30, 2026

By

Një 65-vjeçar ka humbur jetën të enjten në zonën e Porto Palermos, në Himarë, pasi dyshohet se u plagos rëndë nga shpërthimi i një lënde plasëse që po e përdorte për peshkim, raporton KosovaPress.

Sipas Policisë së Shtetit, ngjarja ka ndodhur rreth orës 09:00, kur shtetasi me inicialet P.M., 65 vjeç, dyshohet se u lëndua nga shpërthimi i një lënde plasëse (dinamit) gjatë peshkimit.

I plagosuri u transportua menjëherë për trajtim mjekësor në Qendrën Shëndetësore të Himarës, por nuk arriti t’u mbijetojë plagëve dhe ndërroi jetë.

Grupi hetimor, nën drejtimin e Prokurorisë, po vazhdon veprimet për zbardhjen dhe dokumentimin e plotë të rrethanave të kësaj ngjarjeje.

D.L

Continue Reading

Lajmet

Arrestohet edukatorja në Tiranë, dyshohet se ushtroi dhunë ndaj një fëmije 2-vjeçar

Published

12 hours ago

on

July 30, 2026

By

Një edukatore e një kopshti privat në Tiranë është arrestuar në flagrancë, nën dyshimin se ka ushtruar dhunë fizike ndaj një fëmije 2-vjeçar,raporton KosovaPress.

Sipas njoftimit të Policisë së Tiranës, e dyshuara me inicialet B.H., 32 vjeçe, e cila punonte si edukatore në këtë institucion, dyshohet se ka ushtruar dhunë ndaj të miturit në ambientet e kopshtit ku punonte.

“Specialistët për Hetimin e Krimeve në Komisariatin e Policisë Nr. 4 arrestuan në flagrancë shtetasen B.H., 32 vjeçe, me detyrë edukatore në një kopsht privat, pasi dyshohet se ka ushtruar dhunë fizike ndaj një të mituri 2-vjeçar, në ambientet e kopshtit ku punonte”, thuhet në njoftimin e Policisë së Tiranës.

Materialet procedurale i janë referuar Prokurorisë për veprime të mëtejshme hetimore, ndërsa policia ka bërë të ditur se po vazhdon punën për dokumentimin e plotë të rrethanave të rastit.

D.L

Continue Reading

Lajmet

Haxhiu nga Zubin Potoku: Mbetjet e gjetura janë me prejardhje njerëzore, të ruhet integriteti i hetimeve

Published

13 hours ago

on

July 30, 2026

By

Ushtruesja e detyrës së presidentes së vendit, Albulena Haxhiu, ka vizituar lokacionin në fshatin Kalludër të Zubin Potokut, ku institucionet e Kosovës po zhvillojnë gërmime në kërkim të personave të zhdukur me dhunë gjatë luftës së fundit në Kosovë, raporton Ekonomia Online.

Haxhiu tha se në terren po angazhohen institucionet përgjegjëse për zbardhjen e fatit të personave të zhdukur.

“Sot, bashkë me nënkryetaren, ministren Bogujevci, jemi këtu në fshatin Kalludër, për të parë nga afër punën e ekipeve tona në kërkim të së vërtetës për personat e zhdukur me dhunë gjatë luftës së fundit në Kosovë.

Më lejoni që së pari të falënderoj institucionet e Republikës së Kosovës për përfshirjen në këtë proces, secilin institucion në veçanti: nga Policia, nga Prokuroria, nga Komisioni për Personat e Zhdukur me Dhunë gjatë luftës së fundit në Kosovë, po ashtu nga IML-ja, por edhe secilin institucion tjetër që po e bëjnë angazhimin më të madh për të ardhur deri te e vërteta. Tash ajo çfarë është konfirmuar është që mbetjet janë me prejardhje njerëzore. Tani duhet të presim punën e institucioneve kompetente për ekzaminime dhe për identifikim”, ka thënë ajo.

Haxhiu, ka bërë thirrje që të ruhet integritetit i hetimeve.

“Ajo çfarë është e rëndësishme ta theksoj është që secili nga ne, institucionet e Republikës së Kosovës, përfshirë këtu edhe mediat, duhet të kujdesemi që ta ruajmë integritetin e hetimeve, sepse kjo është një çështje shumë e ndjeshme, e po ashtu të kemi konsideratë për familjet që presin informacione se çfarë po ndodh në këtë terren”, ka shtuar ajo.

Haxhiu tha se çështja e personave të zhdukur me dhunë mbetet plagë e hapur edhe më shumë se 25 vjet pas përfundimit të luftës.

“Ajo çfarë duhet të theksoj po ashtu është që personat e zhdukur me dhunë gjatë luftës në Kosovë — pra gjatë luftës së fundit në Kosovë — është plaga më e madhe me të cilën po përballemi edhe sot. Pra, përkundër faktit që kanë kaluar mbi 27 vite nga periudha e luftës, ne përballemi me pasojat e asaj lufte. Për sa kohë këtu po bëhet përpjekje maksimale për të kuptuar se ku janë personat e zhdukur me dhunë, vazhdojmë të përballemi me gjuhë urrejtjeje, me retorikë shoviniste, me mohim të krimeve, e po ashtu me pretendime me pretendime territoriale ndaj Republikës së Kosovës nga krerët e institucioneve në Serbi”, ka shtuar ndër të tjera Haxhiu./A.K/

Continue Reading

Të kërkuara