Gjuha e urrejtjes ndaj shqiptarëve po shfaqet pothuajse në çdo postim që lidhet me Kosovën në kanale të shumta në rrjetin Telegram, ku postmet prezantohen si “zëri i Rusisë në Serbi” dhe përdorin simbole ruse, por që fokusohen kryesisht te Kosova.

Aty shihen se po promovohen mesazhe që delegjitimojnë institucionet e Kosovës, mohojnë pavarësinë e saj dhe shpesh nxisin retorikë radikale, përfshirë thirrje për ndërhyrje ushtarake.

Ivana Stradner, bashkëpunëtore e Fondacionit joqeveritar për Mbrojtjen e Demokracive në Uashington, se Moska zyrtare i përdor kanalet në Telegram si “armë informacioni”.

Ajo thotë se këto kanale përbëjnë një kërcënim që qytetarët e zakonshëm nuk mund ta shohin, ndiejnë apo prekin – dhe për këtë arsye, në pamje të parë, postimet në këtë rrjet duken si teori konspirative.

Stradner nënvizon se perceptimi ka rol kyç, pasi rrjetet sociale mundësojnë formësimin e bindjeve të njerëzve, në funksion të arritjes së objektivave të sigurisë.

Shumica e këtyre kanaleve u krijuan pas pushtimit rus të Ukrainës në shkurt të vitit 2022 dhe sot kanë nga 10.000 deri mbi 80.000 ndjekës, të cilët marrin dhe shpërndajnë përmbajtje çdo ditë.

Postimet janë qartazi pro Rusisë, mbështesin pushtimin e Ukrainës, kundërshtojnë anëtarësimin e Serbisë në BE dhe kritikojnë bashkëpunimin me vendet perëndimore.

Përndryshe, krijimi në masë i kanaleve të Telegramit që trajtojnë temën e Kosovës, përkoi me rritjen e tensioneve në veri të vendit, pas tërheqjes së serbëve nga institucionet kosovare në nëntor të vitit 2022.

Atëkohë, Qeveria e Kosovës këmbëngulte në zbatimin e vendimeve që kryesisht kishin të bënin me konsolidimin e pushtetit në atë rajon, ku popullsia shumicë është serbe.

Një tjetër karakteristikë e përbashkët e kanaleve proruse në Telegram, që publikojnë përmbajtje rreth Kosovës, është veprimi i tyre i koordinuar, d.m.th. ato veprojnë si një rrjet i vetëm për përhapjen e një narrativi të caktuar.

Kështu, më 29 tetor, kanali “Bunker” në Telegram njoftoi se në Mitrovicë të Veriut janë shfaqur grafite të reja: “Kosova është Serbi”, “Serbët dhe rusët janë vëllezër përgjithmonë Z”, “Nuk ka dorëzim”.

Një nga postimet në Telegram lidhur me vendosjen e gurthemelit për ndërtimin e një shkolle në Mitrovicë të Veriut.

Po atë ditë, kanali “Koridor” publikoi lajme rreth stërvitjes së Forcës së Sigurisë së Kosovës në poligonin e stërvitjes pranë Gjakovës, por me gjuhë të urrejtjes.

“Terroristët ‘shiptarë’ dhe terroristët e NATO-s zhvilluan stërvitje ushtarake së bashku në Gjakovë”, thuhej në postim.

Përndryshe, kanali “Koridor” është përdorur më parë edhe nga “Brigada e Veriut”, e cila së bashku me “Mbrojtjen Civile” janë shpallur organizata terroriste nga Qeveria e Kosovës në qershor të vitit 2023. /S.K/EO/

Ylli i Barcelonës, Lamine Yamal, pasi që ishte vetëm hija e vetes së tij në “Santiago Bernabeu”, të pranishmit kanë sugjeruar se mund të ketë qenë nën presionin e madh të ndeshjes, dhe se arsyeja kryesore është një dëmtim në ijë që ende po e shqetëson.

18-vjeçari filloi të ndiente shqetësime që në fund të gushtit, por pas grumbullimit me kombëtaren e Spanjës u kthye i dëmtuar.

Ai mungoi për dy javë, u rikthye dhe luajti kundër Real Sociedad dhe Paris Saint-Germain, por më pas u detyrua të qëndronte jashtë fushës edhe për tre javë të tjera.

Sipas “Cadena Cope”, njerëzit pranë Lamine Yamal thonë se ai ende nuk është 100% i rikuperuar, ndërsa burime brenda Barcelonës kanë konfirmuar se lojtari vazhdon të ndiejë shqetësime të lehta.

Në anën tjetër, ish-fizioterapisti i Barcelonës, Miguel Ángel Cos, tha për “Cadena SER” (nëpërmjet “Sport”) se Lamine Yamal “duhet të mësojë të jetojë me këtë dëmtim në ijë”.

Ai shpjegon se nuk bëhet fjalë për një dëmtim klasik muskulor, por për një problem që shpesh shfaqet gjatë periudhës së rritjes, sidomos nëse lojtari ka shtuar masë muskulore gjatë vitit të fundit. Dëmtimi ndodh në pikën ku muskujt abdominalë takohen me ata të kofshës, dhe nëse nuk janë tërësisht të sinkronizuar, shkaktojnë dhimbje.

Nuk ka një zgjidhje të menjëhershme për këtë, përveç pritjes dhe ndjekjes së rreptë të terapisë fizioterapeutike, duke shmangur “ushtrimet shpërthyese”.

Cos kujtoi se edhe Lionel Messi kishte pasur probleme të ngjashme në dy raste, dhe se stafi mjekësor duhej t’ia ndalonte lojën e “foot-tennis” me Ronaldinhon, pasi argjentinasi jepte gjithçka në ato duele miqësore./S.K/EO/

Sot do të jetë e mbyllur përkohësisht gjysma e tunelit-rrugës nga segmenti që shpie drejt shkollës “Xhemajl Mustafa” deri te hyrja e tunelit në lagjen “Dardania” në Prishtinë.

Kryeqyteti Prishtina ka njoftuar se mbyllja bëhet për shkak të zhvillimit të aktiviteteve kulturore të organizuara nga “Kultura House”.

“Për nevoja teknike dhe për sigurinë e qytetarëve, do të mbyllet përkohësisht gjysma e tunelit/rrugës, nga segmenti që shpie drejt shkollës ‘Xhemajl Mustafa’ deri te hyrja e tunelit, duke filluar nga ora 08:00 e mëngjesit deri pas përfundimit të aktivitetit dhe pastrimit të hapësirës publike” .

“Pjesa tjetër mbetet e lirë për qarkullim. Aktivitetet kulturore do të nisin nga ora 20:00, me performanca muzikore dhe artistike duke sjellë një atmosferë festive në Dardani”, thuhet në njoftim.

Drejtoria e Shërbimeve Publike, në bashkëpunim me Policinë e Kosovës dhe Drejtorinë e Kulturës, ka pohuar se ka ndërmarrë të gjitha masat e nevojshme për mbarëvajtjen e ngjarjes dhe sigurinë e pjesëmarrësve./S.K/KP/

Sot shënohet Dita Botërore e Kursimeve, ditë e cila kremtohet për gati një shekull me qëllim për të ndihmuar në rritjen e ndërgjegjësimit të publikut për rëndësinë e kursimit të parave për ekonomitë moderne dhe individët.

Kjo ditë kërkon të promovojë virtytin e shpenzimeve të mençura, si dhe kursimin e parave në banka, në vend të mbajtjes së tyre në shtëpi dhe jashtë ekonomisë, sipas Bankës Botërore të Kursimeve dhe Institutit të Bankave me Pakicë.

Kursimi është jetik për të pasur një mirëqenie të qëndrueshme dhe ky zakon duhet të çimentohet që në moshë të hershme për të ndihmuar burrat dhe gratë të parandalojnë vështirësitë ekonomike dhe të ndërtojnë të ardhme të ndritshme për veten dhe familjet e tyre.

Dita Botërore e Kursimeve u shënua më 31 tetor 1924, gjatë Kongresit të parë Ndërkombëtar të Bankës së Kursimeve në Milano të Italisë.

Profesori italian Filippo Ravizza e shpalli këtë ditë në ditën e fundit të kongresit.

Ka pasur shembuj të tjerë në histori të ditëve të dedikuara për të kursyer para për një standard më të lartë jetese dhe një ekonomi më të qëndrueshme.

Spanja kujton ditën e parë të kursimit kombëtar të regjistruar në vitin 1921. Ndërkohë, në Gjermani, besimi në kursim duhej të rigjallërohej pasi shumë njerëz humbën pothuajse gjithçka që zotëronin në reformën monetare të vitit 1923.

Pas Luftës së Dytë Botërore, Dita Botërore e Kursimeve vazhdoi dhe arriti kulmin e popullaritetit midis viteve 1955-1970./S.K/KP/