Filmi “The Odyssey”, me regji të Christopher Nolan, është bërë filmi më i suksesshëm në historinë e studiove Universal Pictures në tregjet ndërkombëtare, duke thyer rekordin e mbajtur më parë nga “Furious 7”.

Sipas Universal Pictures, të ardhurat nga shfaqja e filmit jashtë Shteteve të Bashkuara kanë tejkaluar 1.17 miliardë dollarë.

Veronika Kwan Vandenberg, presidente e shpërndarjes ndërkombëtare në Universal Pictures International, e ka cilësuar këtë rezultat si dëshmi të popullaritetit global të Nolanit dhe të ambicies së regjisorit dhe producentëve për ta sjellë në ekran epikën e Homerit.

“The Odyssey” rrëfen udhëtimin dhjetëvjeçar të Odiseut drejt shtëpisë së tij, një histori që ka frymëzuar përshtatjen e re kinematografike të Nolanit. Filmi pati hapjen më të suksesshme ndërkombëtare të karrierës së regjisorit, duke kryesuar listat e arkëtimeve në 77 vende.

Produksioni ka shënuar rezultate të larta edhe në 78 tregje, përfshirë Mbretërinë e Bashkuar dhe Irlandën, Francën, Gjermaninë, Italinë, Meksikën dhe Brazilin.

Në film luajnë emra të njohur të kinematografisë, përfshirë Matt Damon, Tom Holland, Anne Hathaway, Robert Pattinson, Charlize Theron dhe Zendaya. Filmi është prodhuar nga Christopher Nolan dhe Emma Thomas përmes kompanisë së tyre, Syncopy.

Ndërkohë, Universal Pictures ka regjistruar 3.37 miliardë dollarë të ardhura ndërkombëtare gjatë vitit 2026, më shumë se çdo studio tjetër e Hollivudit. Sipas raportimit, studioja ka kaluar gjithashtu pragun prej pesë miliardë dollarësh të të ardhurave globale për këtë vit.

/A.K/

Regjisori i njohur amerikan Michael Mann është plagosur aksidentalisht me armë zjarri në një poligon qitjeje në Los Angeles dhe më pas është transportuar në spital. 83-vjeçari aktualisht është duke punuar në përgatitjet për vazhdimin e filmit të tij të njohur, “Heat”.

Sipas raportimit të portalit TMZ, incidenti ka ndodhur teksa Mann po përpiqej ta vendoste armën në këllëf.

Policia e Los Angelesit (LAPD) e ka konfirmuar rastin për TMZ, duke bërë të ditur se zyrtarët policorë kanë dalë në vendin e ngjarjes, në poligonin e qitjes “The Range LA”.

Sipas raportit policor, plagosja nuk ka qenë e qëllimshme. Arma është shkrepur aksidentalisht dhe e ka goditur regjisorin në këmbë.

Michael Mann ka një karrierë disa dekadëshe në Hollywood dhe njihet për një sërë filmash të vlerësuar nga publiku dhe kritika.

Ndër veprat më të njohura të tij janë “Thief” (1981), “Manhunter” (1986), “The Last of the Mohicans” (1992), “Heat” (1995), “The Insider” (1999), “Ali” (2001), “Collateral” (2004), “Miami Vice” (2006), “Public Enemies” (2009) dhe “Ferrari” (2023).

/A.K/

Dalina Haxhiu është fituesja e çmimit të parë në edicionin e parë të “Akordeve për Fëmijë”. Ajo u shpërblye me Okarinën e Artë për Fëmijë, për këngën “Ëndrra ime s’fle”, duke u renditur në krye të garës muzikore.

Çmimin e parë, Dalinës ia ndau kryetarja e Kuvendit të Kosovës, Albulena Haxhiu.

Okarinën e Argjendtë për Fëmijë, çmimin e dytë, e fitoi Rita Krasniqi me këngën “Soprano”, ndërsa Okarina e Bronztë për Fëmijë iu nda Marin Kerit për këngën “Ëndrrat s’kanë kufij”.

Çmimi për tekstin më të mirë shkoi për Aksa Sulejmanin, për këngën “Lëshoni pëllumbat”, me tekst të autorit Valon Gashi.

Në këtë edicion garuan 15 artistë të rinj, të cilët interpretuan drejtpërdrejt, të shoqëruar nga orkestra, duke sjellë në skenë këngë me mesazhe për ëndrrat, dashurinë, paqen dhe vetëbesimin.

“Akordet për Fëmijë” u organizuan për herë të parë në kuadër të Festivalit të Këngës në RTK “Akordet e Kosovës”, duke krijuar një hapësirë të veçantë për talentet e reja dhe për prezantimin e krijimtarisë së tyre muzikore./A.K/

Në Kuvendin e Kosovës sot do të mbajn mbledhje pesë komisione parlamentare, ku në fokus do të jetë hetimi i përgjegjësisë institucionale për dhunën në familje.

Në orën 11:30 do të mblidhet Komisioni Hetimor Parlamentar për veprimet dhe mosveprimet institucionale lidhur me vrasjen e Arlinda Zekës dhe trajtimin e dhunës ndaj fëmijëve e grave në familje, me qëllim konstituimin dhe hartimin e planit të veprimit.

Përveç këtij komisioni, sot në Kuvend mbahen edhe katër mbledhje të tjera:

Në orën 09:00, Komisioni për Integrim Evropian takohet me kryenegociatorin me BE-në, Jeton Zulfaj, ndërsa Komisioni për Arsim organizon tryezë diskutimi për arsimin parauniversitar.

Më pas, në orën 13:00, Komisioni Ad Hoc shqyrton listën e kandidatëve për Bord të RTK-së, kurse në orën 14:30 Komisioni për Punë të Jashtme takohet me ambasadorin e Gjermanisë, Rainer Rudolph. /E.A/