Gjatë punimeve të Konferencës së Dytë Ndërkombëtare për Mjekësinë Sportive (ICSM 2026), Presidenti dhe Themeluesi i UBT-së, Prof. Dr. Edmond Hajrizi, ka bërë të ditur se ky institucion po punon intensivisht për krijimin e kapaciteteve të qëndrueshme shkencore dhe mjekësore në shërbim të ngjarjes më të madhe sportive në historinë e vendit – Lojërave Mesdhetare “Prishtina 2030”.

Sipas Rektorit Hajrizi, mjekësia sportive moderne tashmë e ka kaluar kornizën e thjeshtë të trajtimit të lëndimeve, duke u shndërruar në një fushë ndërdisiplinore ku bashkohen inteligjenca artificiale, pajisjet inteligjente të bartshme (wearables), diagnostikimi i avancuar dhe shëndeti funksional.

“Ne po shikojmë drejt Lojërave Mesdhetare ‘Prishtina 2030’ si një mundësi të madhe për të ndihmuar në zhvillimin e kapaciteteve të qëndrueshme në mjekësinë sportive, arsim, parandalim dhe rehabilitim. Synimi ynë nuk është thjesht të mbështesim një ngjarje sportive, por të forcojmë infrastrukturën shëndetësore dhe shkencore që do të mbetet trashëgimi afatgjatë për vendin pas tyre”, u shpreh Hajrizi.

Ai theksoi se vizioni i UBT-së është ndërtimi i një ekosistemi të integruar, ku arsimi, kërkimi shkencor dhe teknologjia vendosen plotësisht në shërbim të shëndetit publik dhe performancës sportive. Në këtë kuadër, koncepti “UBT Smart City” shërben si një hapësirë kërkimore praktike për zbatimin e inteligjencës artificiale, modelimit digjital dhe teknologjive më të avancuara interaktive në arsim.

“Në UBT, ne besojmë fuqimisht se e ardhmja e kujdesit shëndetësor dhe e mjekësisë sportive do të varet pikërisht nga ky integrim. Teknologjia nuk duhet të jetë qëllim në vete, por një mjet efektiv që na ndihmon të mbrojmë shëndetin, të parandalojmë dëmtimet dhe të përmirësojmë cilësinë e jetës së sportistëve dhe të gjithë komunitetit”, tha mes tjerash Rektori Hajrizi.

Përmes këtij angazhimi dhe akreditimit të fundit nga Federata Ndërkombëtare e Mjekësisë Sportive (FIMS), UBT po konfirmohet si shtylla kryesore akademike dhe shkencore që do të mbështesë përgatitjet teknike e mjekësore për Lojërat Mesdhetare 2030.

Në kuadër të Konferencës së Dytë Ndërkombëtare të Mjekësinë Sportive (ICSM 2026), Presidenti i Federatës Ndërkombëtare të Mjekësisë Sportive (FIMS), Prof. Dr. Fabio Pigozzi, i ka dorëzuar zyrtarisht pllakatën e anëtarësimit Rektorit të UBT-së, Prof. Dr. Edmond Hajrizi.

Ky hap historik e fut UBT-në dhe Kosovën në rrjetin ekskluziv global prej vetëm 31 qendrave të njohura të mjekësisë sportive në të gjithë botën.

Me rastin e dorëzimit të pllakatës, Presidenti i FIMS-it, Prof. Dr. Fabio Pigozzi, vlerësoi lart këtë sukses institucional.

“Dëshiroj t’i dorëzoj zyrtarisht pllakatën Edmondit, e cila do të vendoset në mjediset e qendrës së re, dhe t’ju uroj përzemërsisht për këtë arritje të jashtëzakonshme. Vlen të theksohet se këtë vit kemi akredituar vetëm tri qendra të reja në nivel global: në Prishtinë, në Tashkent të Uzbekistanit dhe në Hong Kong të Kinës”, u shpreh Pigozzi.

Nga ana e tij, Rektori Edmond Hajrizi theksoi se ky pranim ndërkombëtar kurorëzon vizionin e UBT-së për ndërlidhjen e shkencës, teknologjisë dhe shëndetit publik, duke krijuar kështu një bazë të fuqishme edhe në prag të organizimit të Lojërave Mesdhetare “Prishtina 2030”.

Sot, në Parkun Shkencor, Inovativ dhe Teknologjik të UBT-së, kanë nisur punimet e Konferencës së Dytë Ndërkombëtare për Mjekësinë Sportive (ICSM 2026), me temën “Innovation and Resilience in Sport Medicine”. Kjo ngjarje shkencore bashkoi profesionistë shëndetësorë, hulumtues, akademikë dhe ekspertë të sportit nga vendi dhe bota për të diskutuar zhvillimet e reja, inovacionin dhe qëndrueshmërinë në praktikën klinike e sportive.

Konferenca u organizua nga Instituti për Mjekësi Sportive i UBT-së, në bashkëpunim me Federatën Ndërkombëtare të Mjekësisë Sportive (FIMS), projekti SHAPE, si dhe Shoqatën e Kosovës për Mjekësi Sportive dhe Ushtrimore (KASEM). Këtë vit, konferenca u akreditua edhe nga Oda e Mjekëve të Kosovës në kuadër të Edukimit të Vazhdueshëm Profesional (EVP).

Gjatë punimeve të këtij takimi ndërkombëtar u adresuan tema me rëndësi të veçantë për zhvillimin e mjekësisë sportive, përfshirë shëndetin funksional, radiologjinë, ortopedinë, teknologjitë e bartshme (wearable technologies), inteligjencën artificiale, si dhe mundësitë që sjell inovacioni teknologjik në përmirësimin e kujdesit shëndetësor dhe performancës fizike.

Në konferencë morën pjesë personalitete të shquara, si Presidenti i UBT-së, Prof. Dr. Edmond Hajrizi, Zëvendësministri i Shëndetësisë, Dr. Arsim Berisha, Presidenti i FIMS-it, Prof. Dr. Fabio Pigozzi, Zëvendëspresidenti i FIMS-it, Prof. Dr. Norbert Bachl, si dhe Ibër Alaj, Drejtor i Departamentit të Sportit në Ministrinë për Sport dhe Rini.

Hapjen solemne e bëri Presidenti dhe Themeluesi i UBT-së, Prof. Dr. Edmond Hajrizi, i cili falënderoi bashkëpunëtorët ndërkombëtarë e vendorë për besimin dhe partneritetin e vazhdueshëm. Në fjalën e tij, ai theksoi transformimin e madh që po pëson kjo fushë përmes integrimit të teknologjive të reja.

“Mjekësia sportive sot nuk përcaktohet vetëm nga trajtimi i dëmtimeve apo rikthimi i performancës fizike. Ajo po bëhet një fushë shumë më e gjerë dhe më e integruar, që bashkon parandalimin, diagnostikimin, rehabilitimin, shëndetin funksional, të dhënat, sistemet e inteligjencës, imazherinë mjekësore, teknologjitë e bartshme dhe inteligjencën artificiale. Përgjegjësia jonë është të sigurojmë që inovacioni të mbetet i lidhur me provat shkencore, etikën profesionale, mirëqenien njerëzore dhe nevojat reale klinike”, u shpreh Hajrizi.

Më tej, Rektori Hajrizi potencoi se UBT mbetet e përkushtuar në ndërtimin e një ekosistemi ku arsimi, kërkimi shkencor dhe teknologjia funksionojnë së bashku. Ai veçoi konceptin e “UBT Smart City” si një hapësirë reale kërkimore dhe vuri në dukje rëndësinë e përgatitjes për ngjarjet e mëdha sportive, si Lojërat Mesdhetare “Prishtina 2030”, me qëllim ngritjen e kapaciteteve afatgjata shkencore e shëndetësore në vend.

“Në UBT, ne besojmë fuqimisht se e ardhmja e kujdesit shëndetësor dhe e mjekësisë sportive do të varet pikërisht nga ky lloj integrimi. Vizioni ynë është të zhvillojmë një mjedis ku arsimi, kërkimi shkencor, inovacioni, teknologjia dhe praktika klinike funksionojnë si pjesë e të njëjtit ekosistem inovacioni. Ne po shikojmë drejt Lojërave Mesdhetare Prishtina 2030 si një mundësi për të ndihmuar në zhvillimin e kapaciteteve të qëndrueshme, ku synimi ynë nuk është thjesht mbështetja e një ngjarjeje, por forcimi i infrastrukturës shëndetësore dhe shkencore që do të mbetet pas saj”, tha mes tjerash Rektori Hajrizi.

Nërsa, Zëvendësministri i Shendetësisë Dr. Arsim Berisha, vlerësoi lart punën e UBT-së dhe Presidentit Hajrizi për kontributin e dhënë në shërbim të rinisë dhe për themelimin e Institutit të Mjekësisë Sportive, duke konfirmuar gatishmërinë e ministrisë për bashkëpunim të ngushtë.

“Mjekësia sportive nuk kufizohet vetëm në trajtimin e lëndimeve të sportistëve; ajo është një pjesë tejet e rëndësishme e shëndetit publik, e parandalimit të sëmundjeve, e promovimit të aktivitetit fizik dhe e përmirësimit të mirëqenies fizike e mendore të qytetarëve, e posaçërisht të rinjve. Ministria e Shëndetësisë mbetet e përkushtuar në mbështetjen e iniciativave që promovojnë kujdesin parandalues, ndërsa prania ime këtu dëshmon gatishmërinë për një bashkëpunim të ngushtë me Universitetin UBT”, nënvizoi Zëvendësministri Berisha.

Gjithashtu në fjalën e tij, Presidenti i Federatës Ndërkombëtare të Mjekësisë Sportive (FIMS), Prof. Dr. Fabio Pigozzi, shprehu kënaqësinë për rikthimin në Prishtinë dhe vlerësoi lart partneritetin e konsoliduar me UBT-në. Ai nënvizoi se Kosova tashmë është pjesë e rrjetit global të FIMS-it dhe njoftoi zyrtarisht certifikimin e qendrës së re bashkëpunuese në UBT.

“Jam vërtet i nderuar të jem këtu sot në cilësinë e Presidentit të FIMS-it, sepse marrëdhënia jonë me UBT-në është forcuar ndjeshëm dhe Kosova tashmë është bërë pjesë e familjes sonë ndërkombëtare. FIMS-i ka një rrjet prej 118 shoqatash kombëtare dhe misioni ynë është promovimi i studimeve shkencore, ruajtja e shëndetit përmes sportit dhe mbështetja e kërkimit mjekësor. Jam jashtëzakonisht i lumtur që këtë vit rrjeti ynë global përfshin edhe një qendër të re bashkëpunuese këtu në Prishtinë, e cila është një institucion i mrekullueshëm”, theksoi Prof. Pigozzi.

Presidenti i FIMS-it theksoi gjithashtu se qendra e re në UBT bashkohet me vetëm dy qendra të tjera të reja të akredituara këtë vit në botë, përkatësisht në Tashkent dhe Hong Kong, duke e vendosur Kosovën në hartën globale të edukimit dhe kërkimit shkencor në mjekësinë sportive.

“Këtë vit kemi akredituar vetëm tri qendra të reja bashkëpunuese në të gjithë botën: në Prishtinë, në Tashkent të Uzbekistanit dhe në Hong Kong. Qëllimi i këtyre qendrave është promovimi i edukimit, kërkimit shkencor dhe shkëmbimit ndërkombëtar. Përgëzoj përzemërsisht Profesor Edmond Hajrizin për këtë arritje të madhe dhe me kënaqësi i dorëzoj zyrtarisht pllakatën e akreditimit FIMS për qendrën e re”, u shpreh tutje Presidenti i FIMS-it.

Nga ana e tij, Zëvendëspresidenti i FIMS-it, Prof. Dr. Norbert Bachl, përgëzoi UBT-në për arritjet e mëdha infrastrukturore e akademike. Ai vuri në dukje rëndësinë e këtij suksesi që kurorëzohet me statusin e Qendrës Bashkëpunuese të FIMS-it, duke shprehur besimin se ky institut do të shërbejë si urë lidhëse për kërkimin shkencor dhe avancimin klinik në mjekësinë sportive.

“Edmond, mund të krenohesh me arritjen e kaq shumë strukturave të realizuara në mënyrë të përkryer dhe fakulteteve të jashtëzakonshme. Jam mjaft i lumtur që pas themelimit të Institutit të Mjekësisë Sportive në UBT, ky angazhim u kurorëzua me statusin e Qendrës Bashkëpunuese të FIMS-it. Kjo përfaqëson një arritje të jashtëzakonshme që përbën bazën për zhvillimin e mëtutjeshëm dhe për ndërtimin e bashkëpunimeve të frytshme ndërkombëtare”, u shpreh Prof. Bachl.

Një fjalë përshëndetëse mbajti edhe Drejtori i Departamentit të Sportit në Ministrinë për Kulturë, Rini dhe Sport, Dr. Ibër Alaj, i cili theksoi se investimi në mjekësinë sportive është investim i drejtpërdrejtë te shëndeti i qytetarëve. Ai shprehi gatishmërinë e ministrisë për të bashkëpunuar ngushtë me UBT-në për ngritjen e kapaciteteve të përbashkëta shkencore e sportive.

“Sporti sot nuk mund të kuptohet vetëm përmes garës, rezultateve dhe medaljeve; sporti është, para së gjithash, shëndet, mirëqenie, edukim dhe përfshirje shoqërore. Prandaj, zhvillimi i sportit duhet të ecë paralelisht me zhvillimin e mjekësisë sportive dhe kërkimit shkencor. UBT, përmes kësaj konference, po jep një shembull të shkëlqyer të krijimit të një platforme shkencore që mundëson shkëmbimin e hulumtimeve më të fundit, pasi investimi në mjekësinë sportive është investim te njerëzit”, deklaroi Dr. Alaj.

Punimet e Konferencës së Dytë Ndërkombëtare për Mjekësinë Sportive do të vazhdojnë gjatë tërë ditës me sesione të veçanta shkencore, ku ekspertë, profesorë dhe hulumtues të njohur vendorë e ndërkombëtarë do të paraqesin prezantimet e tyre mbi risitë e fundit në këtë fushë.

Profesoresha Xhevahire Millaku nga Fakulteti i Medias dhe Komunikimit në UBT, e përfshirë drejtpërdrejt në përgatitjen e Konferencës së 15-të Ndërkombëtare të UBT-së, ka folur në një lidhje telefonike për Radio Campus 100.7 FM, lidhur me përgatitjet, temat kryesore dhe rëndësinë e kësaj konference shkencore.

Po flasim për konferencën ndërkombëtare të UBT-së, e cila tashmë është traditë dhe mbahet çdo vit. Po flasim konkretisht për Fakultetin e Medias dhe Komunikimit, i cili, përmes kësaj konference, arrin të sjellë punime të shumta shkencore nga studiues të ndryshëm, duke përfshirë profesorë, por edhe studentë, të cilëve u kushtohet një hapësirë e veçantë. Si po zhvillohen përgatitjet për konferencën e radhës shkencore të Fakultetit të Medias dhe Komunikimit?

“Po, atëherë, konferenca shkencore e UBT-së është njëra nga konferencat ndërkombëtare që tashmë ka krijuar një traditë të saj. Këtë vit kemi konferencën e 15-të me radhë, e cila zhvillohet në kampuset e UBT-së, në fakultete të ndryshme. Sikurse edhe në vitet e tjera, edhe kësaj radhe Fakulteti i Medias dhe Komunikimit organizon konferencën shkencore me temën që përfshin gazetarinë, median, inteligjencën artificiale, gjuhën, komunikimin, artin dhe kulturën, e kështu me radhë.”

Ju i keni nisur përgatitjet muaj më herët për konferencën. Cilat janë temat specifike ku jeni orientuar? E përmendët inteligjencën artificiale, por cila do të ishte ndoshta tema me interesimin më të madh nga studiuesit?

“Është e vërtetë që përgatitjet për konferencën kanë filluar nga fillimi i vitit 2026. Temat në të cilat janë orientuar janë kryesisht nga fushat e medias dhe komunikimit. Pjesëmarrësit mund t’i prezantojnë kërkimet e tyre fizikisht në Prishtinë ose online, duke u mundësuar studiuesve nga e gjithë bota të bëhen pjesë e konferencës sonë. Në këtë aspekt, pra, është shumë e rëndësishme që të trajtohen tema si gazetaria, media, inteligjenca artificiale, gjuha, komunikimi dhe arti. Përgjithësisht, këto janë temat që e përfaqësojnë apo e mbulojnë këtë konferencë ndërkombëtare, e cila do të zhvillohet në UBT.”

E kemi parë edhe nga vitet e kaluara që në këtë konferencë angazhohen me punime të ndryshme profesorët dhe asistentët e Medias dhe Komunikimit, gjithashtu edhe studentë të ndryshëm, të gjithë ata që kanë vullnet dhe dëshirojnë të publikojnë punime e të hulumtojnë në fusha të ndryshme të medias. Sa rëndësi u kushton hulumtimeve shkencore ky fakultet?

“Ashtu është. Profesorët, në bashkëpunim me asistentët dhe gjithë stafin e Fakultetit të Medias dhe Komunikimit, janë të angazhuar rreth hulumtimeve shkencore në fushën e gjuhës dhe medias gjatë gjithë vitit. Ndërsa konferenca që zhvillohet çdo vit në UBT, përveç studiuesve jashtë Kosovës që e begatojnë konferencën tonë, si çdo vit, ka pjesëmarrës edhe stafin e Fakultetit të Medias dhe Komunikimit, të cilët, me punimet dhe rezultatet e tyre hulumtuese, sjellin të rejat në fushën e gjuhës, komunikimit dhe inteligjencës artificiale në raport me median.”

Po ndalemi pak edhe te përvoja juaj profesionale dhe personale. Të flasim pak edhe për punimet e shumta që i keni në publikime shkencore. Në çfarë hapash po shkojnë hulumtimet e reja në fushën e medias? Ku është interesimi më i madh dhe për çfarë hulumtohet më së shumti?

“Po, është e vërtetë. Angazhimi im në pjesën e mësimdhënies është parësor, pastaj angazhohem edhe në hulumtimet shkencore dhe jam aktive. Vlen të theksohet se në konferencën e fundit isha pjesëmarrëse në konferencën e Bolonjës, në Itali. Sa i përket platformave që janë publike, unë jam prezente edhe në ato, por gjithmonë do ta kemi parasysh faktorin sfidues, që ka të bëjë me vlerat shqiptare dhe vlerat shkencore në Kosovë, të cilat nuk janë në pozicionin e tyre të merituar. Kemi ende hapësirë dhe punë për të bërë për ta avancuar pjesën shkencore, si në nivel vendi, ashtu edhe në nivel institucional, siç është UBT-ja.”

Konferenca e Medias dhe Komunikimit mbledh edhe studiues nga jashtë UBT-së dhe jashtë Kosovës. Ju tashmë keni mbledhur edhe abstrakte për konferencën. Prej nga janë studiuesit e paraqitur dhe a ka një numër të kënaqshëm të atyre që kanë vendosur t’i paraqesin publikimet apo hulumtimet e tyre?

“Po, konferenca e Medias dhe Komunikimit këtë vit ka mbledhur studiues nga universitete të ndryshme. Kemi studiues nga Universiteti i Elbasanit, pastaj kemi studiues të paraqitur nga Universiteti i Shkupit, Universiteti Publik, nga Universiteti i Tetovës, si dhe profesorë të Fakultetit të Medias dhe Komunikimit. Të gjithë dashamirët e fushës së medias dhe komunikimit do të jenë të pranishëm në këtë konferencë që do të mbahet gjatë kësaj jave.”

A flasim pak edhe për interesimet kryesore dhe veprimtarinë shkencore?

“Po, sipas përzgjedhjes së kumtesave për të qenë pjesë e konferencave të Fakultetit të Medias dhe Komunikimit, interesimet e punës hulumtuese shkencore të pjesëmarrësve janë të përqendruara në të gjitha fushat e medias online, të inteligjencës artificiale në aspektin gjuhësor, kulturor dhe të komunikimit në përgjithësi, që e përfshin këtë fushë.”

Krahas mësimdhënies, hulumtimi është edhe një prej fushave kryesore që çmohet në kohën tonë, sidomos në fushën akademike. Sa mendoni se në nivel të Kosovës po zhvillohen hulumtime cilësore shkencore në fushën e komunikimit?

“Sa u përket hulumtimeve në fushën tonë, në fushën e medias, mendoj se kemi ende hapësirë për të kontribuar në zhvillime dhe hulumtime në fushën e medias dhe komunikimit. Një nga kontributet e vlefshme në këtë fushë është konferenca shkencore që do të mbahet gjatë kësaj fundjave, më 23, 24 dhe 25 tetor, në ambientet e UBT-së, në Fakultetin e Medias dhe Komunikimit. Të gjithë janë të ftuar të marrin pjesë, si ata që janë paraqitur, ashtu edhe ata që nuk janë paraqitur, por dëshirojnë të vijnë në konferencën vjetore të UBT-së. Janë të mirëseardhur për të kontribuar në punimet dhe hulumtimet që do të zhvillohen në konferencën e UBT-së, në Fakultetin e Medias dhe Komunikimit.”

A ka ende kohë për të aplikuar apo kur është mbyllur pjesa e aplikimeve për dorëzimin e abstraktit?

“Realisht, afati për dorëzimin e abstraktit ka përfunduar tashmë. Mirëpo, të gjithë të interesuarit janë të ftuar, edhe pse ndoshta nuk janë pjesëmarrës direktë në konferencë. Ka shumë prej tyre që kanë shprehur interesim dhe vullnet për të qenë pjesë e konferencës sonë. Janë të mirëseardhur për të kontribuar në çfarëdo forme në konferencën e UBT-së, që mbahet në kuadër të Fakultetit të Medias dhe Komunikimit, më 24, ditën e shtunë, në ambientet e UBT-së.”

Profesoresh, një mesazh, një thirrje për të gjithë të rinjtë që dëshirojnë të jenë pjesë e akademisë, sidomos pjesë e hulumtimeve të ndryshme shkencore në kuadër të Medias dhe Komunikimit?

“Mesazhi im do të ishte hulumtimi në mënyrë korrekte, hulumtimi dhe studimi i shkencës në fushën e medias dhe komunikimit. Kemi mjaft për të trajtuar, si në aspektin gjuhësor, ashtu edhe në atë teknologjik. E dimë dhe jemi dëshmitarë se ku po shkon media në Kosovë. Realisht, të gjitha kumtesat, fjalimet apo ndërtimet shkencore mund të jenë të dobishme në fushën e medias dhe komunikimit. Besoj se kemi mjaftueshëm gazetarë dhe studiues nga fusha profesionale e medias që do të jenë pjesë e kësaj konference vjetore që organizohet në UBT”, thekson profesoresha Xhevahire Millaku.