Një grua gjermane dhe ish-anëtare e grupit të vetëshpallur Shteti Islamik (IS) u dënua të hënën me 10 vjet burg nga një gjykatë e Mynihut pasi la një vajzë jazide të skllavëruar në Irak të vdiste nga etja, transmeton UBT News.
Ky ishte një nga gjykimet e para në botë që ndjek penalisht një krim lufte kundër jazidëve, pakicë kjo e persekutuar dhe skllavëruar nga xhihadistët në Irak dhe Siri.
Rreth 10,000 jazidë u vranë në Irakun verior në mizoritë masive. Rreth 7,000 gra dhe vajza, disa deri në nëntë vjeç, u skllavëruan dhe u transferuan me forcë në vende në Irak dhe Sirinë lindore.
Jennifer Wenisch, 30 vjeç, e akuzuar për krime lufte dhe vrasje, mund të ishte dënuar me burgim të përjetshëm. Sipas raporteve të mediave, Wenisch u konvertua në Islam në vitin 2013 dhe iu bashkua grupit të vetëshpallur Shteti Islamik në Irak vitin e ardhshëm.
Ajo u rekrutua në vitin 2015 nga policia morale e IS-it, duke patrulluar rrugët e Falluxhas dhe Mosulit për të siguruar respektimin e kodit të veshjes dhe sjelljes publike të grupit xhihadist.
Prokurorët gjermanë thonë se Wenisch dhe burri i saj i IS-së “blenë” një grua nga pakica jazide dhe fëmijën e saj 5-vjeçar si “skllevër” të shtëpisë në Mosul në 2015.
“Pasi vajza u sëmur dhe kishte lagur dyshekun e saj, burri i të akuzuares e lidhi me zinxhirë jashtë si ndëshkim dhe e la atëtë vdiste nga etja në vapë përvëluese”, thanë prokurorët.
Burri në fjalë, bashkëshorti i Wenisch, Taha al-Jumailly, po përballet gjithashtu me një gjyq të veçantë në Frankfurt, përcjell UBT News.
Wenisch tha se kishte “frikë” se burri i saj do ta “mbyllte brenda” nëse ajo do të ndërhynte për të shpëtuar vajzën.
Nëna e vajzës, Nora T., vazhdoi të mbahej rob nga çifti pas vdekjes së vajzës së saj. Ajo dëshmoi në gjyq për torturat e bëra ndaj fëmijës së saj. Megjithëse mbrojtja vuri në dyshim dëshminë e saj duke thënë se nuk kishte asnjë provë që vajza, e cila u dërgua në spital pas incidentit, në të vërtetë ka ndërruar jetë.
Wenisch u arrestua nga shërbimet turke të sigurisë në janar të vitit 2016 në Ankara dhe më pas u ekstradua në Gjermani. Ajo nuk ishte vendosur në paraburgim deri në qershor të vitit 2018, kur u arrestua teksa po përpiqej të arrinte territoret që IS kontrollonte ende në Siri me vajzën e saj dyvjeçare.
Gjatë udhëtimit, ajo i tregoi shoferit për jetën e saj në Irak, që në fakt ishte një informator i FBI-së që e ngiste me një makinë të pajisur me mikrofona. Prokuroria përdori këto incizime për ta paditur atë./UBTNews/
Komisioni Qendror i Zgjedhjeve (KQZ) ka njoftuar se më 28 qershor ka nisur periudha për ndërrimin e Qendrës së Votimit brenda komunës për Zgjedhjet Lokale, e cila do të zgjasë deri më 29 gusht 2025.
Gjatë kësaj periudhe 63-ditore, të gjithë qytetarët me të drejtë vote kanë mundësi të kontrollojnë qendrën e tyre aktuale të votimit dhe, nëse dëshirojnë, të kërkojnë ndërrimin e saj, duke zgjedhur një lokacion më të afërt me vendbanimin e tyre brenda të njëjtës komunë.
Ndërrimi i Qendrës së Votimit mund të bëhet në dy mënyra:
Grupe serbësh janë drejtuar për në Graçanicë për të nisur festimet e atij që njihet si Vidovdan. Festimet nisën në mëngjes në Manastirin e Graçanicës dhe po vazhdojnë në Gazimestan, ku janë paralajmëruar edhe ardhje të tjera gjatë ditës.
Për të siguruar mbarëvajtjen e aktivitetit, Policia e Kosovës ka ndërmarrë masa të rrepta sigurie. Në hyrje të Gazimestanit, po zhvillohen kontrolle për të gjithë të pranishmit, ndërkohë që njësi të shumta policore janë të vendosura në terren, bashkë me forcat e KFOR-it.
Policia ka njoftuar se masat planifikuese dhe operative janë ndërmarrë për ruajtjen e rendit publik, menaxhimin e trafikut dhe sigurinë kufitare. PK ka apeluar për një manifestim të qetë, duke kërkuar nga qytetarët të shmangin provokimet dhe të respektojnë ligjet dhe udhëzimet e organeve të sigurisë.
Në fillim të këtij muaji, Gjykata Themelore në Prishtinë anuloi vendimin e mëparshëm të komunës së Graçanicës që lejonte shfaqjen e flamurit serb për këtë rast, duke vlerësuar se një veprim i tillë ishte në kundërshtim me legjislacionin në fuqi, pasi Vidovdani nuk është festë zyrtare në Kosovë.
Vidovdani lidhet me Betejën e Kosovës të vitit 1389, ku princi serb Lazar humbi jetën. Në diskursin historik serb, kjo betejë përshkruhet si një humbje ushtarake por një fitore shpirtërore.
Gazimestani është gjithashtu një vend me ngarkesë historike dhe politike, pasi aty presidenti i atëhershëm i Serbisë, Slobodan Millosheviq, mbajti një fjalim të njohur në vitin 1989, i cili shpesh shihet si paralajmërim i konflikteve që pasuan në Ballkan.
Deputeti i Partisë Demokratike të Kosovës, Përparim Gruda tha se në takimin e sotëm të partive politike me kryeministrin në detyrë, Albin Kurti do të diskutohet dalja nga situata e krijuar në Kuvendin e Kosovës.
Gruda tha se kryetari i PDK-së, Memli Krasniqi do të shpreh qëndrimet e kësaj partie se si të zhbllokohet Kuvendi i Kosovës, bazuar në aktgjykimin e Gjykatës Kushtetuese.
Ndërkaq, se a do të arrihet ndonjë marrëveshje apo çështje të tjera siç tha Gruda, do të përgjigjet vetë Krasniqi.
Këtë deklarim Gruda e bëri pas pyetjeve të gazetarëve në konferencën e thirrur nga PDK.
Presidenti Amerikan Donald Trump për të tretën herë në vetëm një javë është rikthyer të flasë për çështjen e raporteve të tensionuara midis Kosovës dhe Serbisë, teksa bën pasqyrën e konflikteve globale që ai pretendon se ka zgjidhur.
Gjatë një konference për shtyp në Shtëpinë e Bardhë, Trump sërish tha se Serbia dhe Kosova ishin gati të përplaseshin ushtarakisht, madje sipas tij në një luftë të madhe.
“Serbia dhe Kosova ishin gati të përplaseshin. Po shkonin drejt një lufte të madhe”, tha Trump.
Më tej ai zbuloi formulën e tij të suksesit, me të cilën e ndali shpërthimin e një lufte mes dy shteteve në Ballkan, shkruan A2 CNN.
Trump vazhdimisht gjatë javës së fundit, nga momenti kur vendosi armëpushimin midis Izraelit e deri tek samiti i NATO-s në Hagë, i është referuar marrëveshjes Kosovë-Serbi, të arritur në Uashington më 2020 si histori suksesi e ndërmjetësimit të tij.
“Ne e ndalëm Serbinë, e cila ishte gati të fillonte një përplasje”, deklaroi dy ditë më parë Trump.
Ai i referohet marrëveshjes së nënshkruar nga Presidenti i Serbisë, Aleksandër Vuçiq dhe kryeministri i Kosovës, Avdullah Hoti në Zyrën Ovale, më 04.09.2020 të ndërmjetësuar nga Donald Trump.