Lajmet

Një vështrim kritik mbi albumin e ri të The Weeknd

The Weeknd u kujdes për të krijuar një aventurë gati kinematografike.

Published

on

Abel Tesfaye, i cili tashmë nuk ka nevojë për prezatim, u rikthye dhe publikoi albumin e tij të 5-të “Dawn FM”. Me produksion ambicioz për të rikthyer atmosferën e viteve ‘80 duke kombinuar elemente të RnB, Synth Pop, synth Wave dhe Dance Music. Një album i cili vazhdoi në hapa të njëjtë sikur “After Hours”, album ky i publikuar pothuajse dy vite më parë.

Për të thënë se albumi “Dawn FM” është i mirë do të ishte një nënvlerësim, pasi që The Weeknd kujdeset për të krijuar një aventurë gati kinematografike, qoftë me përfshirjen e komedianit Jim Carrey, i cili tregon dhe shpjegon qëllimet e albumit apo edhe faktit se dhuron mesazhe koherente ndërlidhëse, të cilat dallohen menjëherë. Dhe ne trajtohemi me shijen e këtij projekti në këngën e parë “Dawn FM”, e cila përfshin një instrumental me sintë, daulle klasike dhe Jim Carreyn si narrator, duke detajuar se është e rëndësishme ta pranojmë veten, fatin tonë dhe të mos nxitohemi, gjithashtu duke shtuar se albumi është komercial dhe se ja vlen të jetë argëtues.

Më pas kemi këngën e parë të plotë nga the Weeknd i cili performon shumë mirë dhe del energjik në kengën hapëse “Gasoline”. Ai kërkon mirëkuptim, dikë që ta pranojë, dhe të mos kenë shqetësime së bashku, ndërkohë që këndon me zë më të rëndë, e cila është ndryshe pasi që albumi merr një kahje më të lehtë pas kësaj. Mesazhi i dërguar dhe performanca vokale na tregon se ai po fillon nga e përfundoi me albumin e fundit. Në “How Do I Make You Love me”, Abel përforcon influencat e viteve ’80 me një instrumental të ngarkuar me sintë të ndryshëm, të cilët i japin jetë refrenit ku vazhdimisht këndon dhe shtron pyetjen “How Do I Make You Love Me”, ndërkohë në vargje ai ka në mendje një vajzë e cila e tërheq dhe dëshiron ta bëjë për vete, duke e pyetur dhe treguar se çfarë ka mundësi t’i tregojë si dhe ta ndihmojë, dhe në mënyrën si e diskuton dhe e zhvillon këtë propozim pothuajse, ai tingëllon i vendosur dhe me pasion dhe e shndërron këngën gati në një thirrje drejt tij.

“Take My Breath Away” është njëra nga këngët teke më virale dhe vazhdon të jetë fantastike, e gjen The Weeknd në formën më të mirë me refren madhështor, si dhe performancë hyjnore në vokalet pasuese. Kënga “Sacrifice” është një ndër këngët më të bukura deri më tani, qoftë për ritmin që ka, falë Abel i cili ecën mbi një instrumental që tingëllon ngjashëm si të ishte nga albumi i njohur i Daft Punk, “Discovery”, normalisht me të gjitha komplimentet e mundshme, duke ditur efektin që “Discovery” vazhdon të ketë 20 vjet pas publikimit, dhe Abel tashmë dihet që inspirohet nga Daft Punk edhe pas bashkëpunimit me dyshen franceze. Refreni hipnotizues i kombinuar me efekte në zërin e tij dhe instrumentali i pasur e nderojnë Daft Punk në mënyrën më të mirë të mundshme.

“A tale by Quincy Jones” është një ndër momentet më të prekshme me legjendën e muzikës Jazz që detajon jetën e tij, duke u rritur pa nënë prej moshës 7-vjeçare, me një njerkë të ligë si dhe efektin që kjo pati tek ai në lidhjet e përfshira, dhe në një mënyrë, The Weeknd dhe Quincy janë shpirtra të afërt duke ditur dhe dëgjuar telashet që kanë pasur në lidhjet romantike si dhe në vetë familjet e tyre. Pas kësaj kemi një moment tjetër të mrekullueshëm me këngën “Out Of Time”. Abel ndanë traumat që ka kaluar, me një person të cilën e ka ndihmuar dhe ka qenë afër saj. Ai largohet shkaku i këtyre telasheve edhe pse ajo i lutet që ai të qëndrojë bashkë me të, dhe gjërat ndryshojnë ajo ka një të dashur, me The Weeknd, i cili ndodhet në dyshime për ta pranuar faktin se e ka humbur, por në të njejtën kohë i thotë se e pret dhe pret momentin kur ai do të gabojë që të rikthehen. Dhe nëse zëri i tij në kulmin e formës nuk është mjaftueshëm, sintet të cilët përsëriten pasi ai përfundon fjalitë e mbështesin zërin e tij në mënyrën më të bukur duke i dhënë këngës një ndjenjë magjie, magjie ku dëgjuesi fluturon dhe dhe arrin një nivel tjetër kënaqësie, i rrethuar nga tinguj klasikë si dhe bukuri të hapësirës, gjë që mund të thuhet për të gjithë albumin. Pas kësaj pjese të parë, albumi fillon të humbasë pak energjinë dinamike që ka.

Kënga “Here We Go Again” e cila është një nga më të trishtat nga ana e The Weeknd, dhuron një performancë shumë të fortë edhe elastike, ajo flet për një rikthim ngjarjesh në lidhjen që ka me një vajzë, ndoshta nuk është i duhuri dhe e pyet se si ra në dashuri me dikë aq të thjeshtë. Është një moment i fuqishëm, por nuk mendoj se ndihmohet nga Tyler, The Creator i cili thotë disa vargje duke folur për temën e trajtuar, megjithatë energjia e tij nuk është më e larta, gjithashtu nuk merr shumë kohë, diku rreth 30 sekonda. E kuptoj rolin mbështetës që shërben, por mendoj se mund të ishte thënë më mirë. “Best Friends” po aq sa këngët e mëparshme trajton stilet e njejta por është më e thjeshtë dhe nuk godet njëlloj si të lartpërmendurat. Por një lëvdatë e madhe është tema e trajtuar me The Weeknd i cili e sheh vetëm si shoqe një vajzë dhe janë në konflikt se çfarë duan të bëjnë dhe çfarë jo. Ndërkohë “Is There Someone Else” dhe “Starry Eyes” përmbushin njëra-tjetrën shumë mirë me përfundimin e së parës, më pas në hyrjen e së dytës, rikthejnë eksperiencën e të fluturuarit në hapsirë. Pjesa e fundit përgjithësisht është e mirë.

“Don’t Break My Heart” rikthen këndimin me zë më të rëndë, e cila e ndihmon shumë një këngë të llojit të tillë, duke u larguar nga stereotipi i zërit më të hollë. Sintët kryesorë të cilët e mbulojnë zërin e tij, dhurojnë një ndjenjë humbjeje dhe pasigurie gjë e cila e forcon këngën. Por ” I heard you are married ” dështon të lë shumë gjurmë, për disa arsye. 1. The Weeknd nuk tregohet shumë energjik si dhe interesant. 2. Kënga merr kohë deri sa fillon dhe pasi fillon Abel nuk merr kreun në mënyrën më dominuese si më parë. 3. Lil Wayne i cili është artisti i 2-të pas Tyler, The Creator me nderin për të bashkëpunuar, por dhuron një nga performancat më të dobëta dhe zhgënjyese, duke mos qenë gati as në ritëm dhe efektet në zërin e tij i shkaktojnë dridhje përgjatë kohës që eshtë në mikrofon dhe gati pasiguri. Fatmirësisht kjo nuk është e gjatë dhe 2 këngët e fundit, e përmbyllin në mënyrën më të mirë.

“Less Than Zero” vazhdon në trajektoren fantastike me The Weeknd, i cili prek dhe sqaron shetësimet personale dhe frikësimet që ka, dhe mënyra e përfshirjes së refrenit të performuar live, në incizimim e studios është çfarë e shndërron gati në një himn të trishtë por me energji euforike. Me të vërtetë është gjeniale dhe ndryshe çfarë arriti me një version ndryshe. Teksti e mbështet dhe sqaron se gjithmonë do të jetë më pak se 0 për faktin se nuk do të përballet me të vërtetën, cila do qoftë ajo. Dhe në këngën e fundit, Jim Carrey rikthehet në ” Phantom Regret ” në rolin e poetit, ai flet për vlerësimin e jetës, të jetosh pa keqardhje, pa frikë dhe me lumturi, të udhëtosh drejt dritës dhe të gjesh paqen me veten, dhe e përmbyllë albumin në mënyrën e duhur duke na lënë tē pyesim se si The Weeknd do të vazhdojë në të ardhmen. Ai ka njoftuar se potencialisht do të ketë një album të tretë me të njejtin stil, dhe kjo u jep dashamirësve të drejtë të jenë optimistë. Ky është një përmirësim i dukshëm prej “After Hours” dhe Abel vazhdon të jetë lideri që rikthen muzikën e viteve ’80. Me çfarëdo dhe kurdo që të kthehet prapë, ai na lë në kulmin e karrierës së tij me një krijim magjepsës dhe të mrekullueshëm./UBTNews

Nota finale: 8/10

Ulis Hamiti, Media dhe Komunikim në UBT

Lajmet

Vlora Çitaku reagon pas dënimit të Thaçit në Hagë: Vendim i turpshëm dhe i papranueshëm

Published

on

By

Ushtruesja e detyrës së kryetares së Partisë Demokratike të Kosovës (PDK), Vlora Çitaku, ka reaguar ashpër pas vendimit të sotëm të Gjykatës Speciale në Hagë, e cila e dënoi ish-presidentin Hashim Thaçi me 17 muaj burgim në procesin për pengim të drejtësisë.

Përmes një reagimi publik, Çitaku e ka cilësuar këtë aktgjykim si të turpshëm dhe të papranueshëm, duke theksuar se besimi në paanshmërinë e kësaj gjykate është cenuar thellë. Sipas saj, kontestimet procedurale, proceset e njëpasnjëshme dhe zvarritjet shumëvjeçare i kanë thelluar dyshimet serioze lidhur me mënyrën se si administrohet drejtësia në Hagë, e cila, siç u shpreh ajo, nuk mund të funksionojë me dy standarde.

“Nuk ka asgjë më shqetësuese për drejtësinë sesa kur vendimet e saj pushojnë së befasuari, sepse besimi në paanshmërinë e saj është cenuar thellë. Shpreh zhgënjimin dhe shqetësimin tim të thellë për vendimin e sotëm të Gjykatës Speciale në Hagë ndaj Presidentit Hashim Thaçi dhe të tjerëve”, ka shkruar Çitaku.

Më tej, u.d. e kryetares së PDK-së paralajmëroi se ndaj asaj që e quajti padrejtësi do të ketë reagim të organizuar, duke përmendur mobilizim dhe veprime konkrete politike, juridike e diplomatike. Në fund të reagimit, ajo ritheksoi karakterin e drejtë të luftës së Ushtrisë Çlirimtare të Kosovës, duke porositur se sakrifica e popullit për liri është pjesë e pandryshueshme e historisë dhe nuk mund të njolloset asnjëherë. /E.A/

Continue Reading

Lajmet

Arrestohen dy të dyshuar për grabitjet e armatosura të argjendarive në Gjakovë

Published

on

Policia e Kosovës ka arrestuar dy persona të dyshuar për përfshirje në dy grabitje të armatosura të argjendarive në Gjakovë, të kryera më 5 dhe 16 nëntor.

Sipas Policisë, grabitja e parë kishte ndodhur më 5 nëntor, rreth orës 17:15, në rrugën “Nënë Tereza”, ku dy persona të maskuar dhe të armatosur kishin grabitur një sasi ari në vlerë rreth 30 mijë euro dhe rreth 2 mijë euro para të gatshme.

Rasti i dytë ishte raportuar më 16 nëntor, rreth orës 16:50, në rrugën “Izet Hima”. Dy persona të maskuar kishin hyrë në argjendari, ku njëri dyshohet se ishte i armatosur me një armë të gjatë, ndërsa tjetri me çekan. Ata kishin thyer vitrinën dhe kishin marrë stoli ari.

Gjatë grabitjes, njëri nga viktimat kishte tentuar t’ia marrë armën të dyshuarit, i cili më pas kishte shtënë me armë zjarri dhe e kishte plagosur atë në këmbën e djathtë.

Pas hetimeve dhe analizimit të pamjeve të kamerave të sigurisë, më 17 nëntor, Sektori Rajonal i Hetimeve në Gjakovë, në bashkëpunim me njësitë tjera policore, ka realizuar bastisje në pronat e dy personave të dyshuar, me inicialet A.U. dhe L.I., nga komuna e Deçanit.

Gjatë operacionit janë gjetur dhe sekuestruar 7 mijë e 330 euro, 100 dollarë, një veturë Golf 7, një sasi ari, dy telefona mobilë, veshmbathje që dyshohet se janë përdorur gjatë grabitjeve, si dhe një armë zjarri.

Sipas Policisë, provat e siguruara i lidhin dy të dyshuarit me të dy rastet e grabitjeve. Operacioni policor është ende në zhvillim, ndërsa veprimet e mëtejshme do të ndërmerren në koordinim me Prokurorinë kompetente./A.K/

 

Continue Reading

Lajmet

Sfida vendimtare në Dublin: Kosova kërkon fitoren ndaj Irlandës për plejofin e Ligës A

Published

on

By

Kombëtarja e Kosovës luan sonte nga ora 20:45 në Dublin ndeshjen vendimtare të xhiros së fundit të Grupit B3 të Ligës së Kombeve përballë Irlandës, sfidë kjo që përcakton vendin e dytë në grup dhe përfaqësuesen e fundit që do të zërë vend në vazon e dytë për shortin e kualifikimeve të Kampionatit Evropian “Euro 2028”, i cili tërhiqet në muajin dhjetor.

Për “Dardanët”, të cilët e fituan duelin e parë në Prishtinë me rezultat 1-0 më 24 shtator, mjafton edhe një barazim për të siguruar vendin e dytë në grup, çka u garanton automatikisht pjesëmarrjen në plejofin për inkuadrim në Ligën A të Ligës së Kombeve, si dhe pozicionimin në vazon e dytë të shortit evropian. Nga ana tjetër, Irlandës i duhet patjetër fitorja për të shmangur rënien në vazon e tretë. Vlen të ceket se në këtë fazë të plejofit do të paraqitet edhe Serbia, por përballjet mes saj dhe Kosovës nuk lejohen nga UEFA.

Pavarësisht se barazimi i kryen punë Kosovës, përzgjedhësi Franco Foda ka bërë të qartë në konferencën për shtyp të mbajtur të hënën se skuadra e tij nuk do të futet në fushë me llogari, por për të kërkuar fitoren.

“Presim të jetë ndeshje ndryshe nga ajo që ishte në Prishtinë. Jemi të vetëdijshëm që Irlanda është kombëtare shumë e fortë dhe këtë e ka treguar në ndeshjet e kaluara, sidomos kundër Austrisë në shtëpi ku morën avantazhin prej 2-0. Megjithatë, ne jemi këtu për të marrë rezultat pozitiv dhe do të tentojmë të marrim fitore”, deklaroi Foda.

Tekniku gjerman e refuzoi idenë se ndeshja do të jetë e lehtë, duke shtuar se qasja ofensive që pritet nga irlandezët mund t’i krijojë hapësira Kosovës. “Nuk mund të futesh në ndeshje për të kërkuar barazimin, në fushë duhet të futesh për të fituar. Presim që Irlanda të luajë lojë më ofensive dhe kjo do të nënkuptonte që ne do të kemi më shumë hapësira, të cilat shpresoj t’i shfrytëzojmë nëpërmjet kundërsulmeve”, përfundoi Foda. /E.A/

Continue Reading

Lajmet

Arrestohet një 31-vjeçar shqiptar në Gjermani, kishte shtatë pseudonime dhe dhjetë kërkesa policore

Published

on

Policia Federale Gjermane ka arrestuar një 31-vjeçar shqiptar në Aachen, nën dyshimin se kishte tentuar të vidhte produkte farmaceutike në një farmaci, së bashku me një 29-vjeçare nga Bullgaria.

Gjatë verifikimeve në stacionin policor, autoritetet zbuluan se shqiptari ishte i njohur për policinë me shtatë pseudonime, ndërsa ndaj tij ishin regjistruar dhjetë kërkesa për përcaktimin e vendndodhjes, të iniciuara nga Prokuroria Publike e Bremenit.

Sipas njoftimit të Policisë Federale, ngjarja ndodhi të dielën, rreth orës 11:00, në një farmaci në stacionin kryesor të trenit në Aachen. Dy personat dyshohet se kishin tentuar të merrnin produkte farmaceutike në vlerë prej rreth 28 eurosh.

Gruaja ishte ndaluar në vendin e ngjarjes, ndërsa burri ishte larguar para mbërritjes së policisë. Ai u gjet më vonë në një garazh parkimi aty pranë, ku u përpoq të largohej pasi vërejti zyrtarët. Mallrat e dyshuara të vjedhura u gjetën në dysheme pranë tij.

Gjatë shoqërimit në stacion, 31-vjeçari kundërshtoi policët dhe përdori forcë fizike ndaj tyre, por zyrtarët arritën ta neutralizonin dhe ta prangosnin.

Sipas policisë, dhjetë kërkesat për përcaktimin e vendndodhjes së tij lidhen me dyshime për vepra të ndryshme penale, përfshirë vjedhje, grabitje, kërcënime, sulme të rënda dhe sulm seksual.

Po ashtu, verifikimet zbuluan se shqiptari ishte dëbuar nga Gjermania në vitin 2023 dhe ndaj tij ishte vendosur ndalim pesëvjeçar për hyrje dhe qëndrim në këtë shtet.

Gjatë kontrollit fizik, në çantën e belit të tij u gjet edhe një thikë, lehtësisht e arritshme. Për këtë arsye, ndaj tij u shtua edhe dyshimi për vjedhje me armë.

Pas konsultimit me prokurorin, 31-vjeçari u dërgua në paraburgim në Aachen, me qëllim të paraqitjes para gjykatës për caktimin e masës së paraburgimit.

Ndërkaq, 29-vjeçarja nga Bullgaria u lirua pasi ndaj saj u ngrit kallëzim penal./A.K/

Continue Reading

Të kërkuara