Kulturë

Një hile e vogël për të mos shpenzuar kot në supermarket

Si t’ja bëni për të mos u tunduar kur shkoni posaçerisht për diçka dhe jo për çokollatat, akulloret apo patetinat që ju dalin para?

Published

4 years ago

June 30, 2021

Betim Gashi

Përveç shtëpisë dhe shkollimit, pjesa më e madhe e shpenzimeve na shkon nëpër supermarkete. Arti i marketingut ja del gjithnjë të na bëjë të shpenzojmë gjithnjë e më shumë edhe nëse nuk e kemi ndërmend. Gjithçka është një hile psikologjike që nëse fillon ta shohësh nga një tjetër këndvështrim, mund të ndryshosh edhe sjellje si konsumator.

Si t’ja bëni për të mos u tunduar kur shkoni posaçerisht për diçka dhe jo për çokollatat, akulloret apo patetinat që ju dalin para?

Sigurisht që duke blerë emrin e markës, aq më tepër të një marke luksoze, ndihesh mirë edhe nëse cilësia nuk ka asnjë ndryshim nga konkurenti, madje dhe kur e di që nuk ja vlen asnjë qindarkë e shtuar. Ndonjëherë ne shkojmë nëpër supermarkete vetëm për 1 ose 2 produkte; përshembull për qumësht apo letra higjenike, por ç’ndodh rrugës? Teksa shkojmë për të marrë gjërat e domosdoshme, vini re teksa kaloni rafte të mbushura me patetinat tuaja të preferuara apo çokollata, biskota që s’ju shpëtojnë dot nga sytë pasi janë vënë qëllimisht për të tërhequr vëmendjen.

Si duhet të veprosh ti në këtë moment? Kujto që është një strategji marketingu dhe bëj prova me veten që para se të hysh aty. Qesh me marketingun e tyre, merr çfarë kishe nevojë dhe dil që aty edhe më e zgjuar. Duke patur në mendje një llogjikë të tillë, s’do të mendohesh më për çokollatën apo akulloren që po ta bën me sy nga rafti tjetër. E mund nepsin, kursen para dhe lufton me nevojën për të shpenzuar për gjëra të kota.

Kulturë

’Det i thellë blu’ nga Terence Rattigan tërheq artdashësit në Teatrin Kombëtar

Published

3 hours ago

December 4, 2025

UBT News

Drama “Det i thellë blu” e Terence Rattigan, në skenë nga regjisorja Rovena Lule Kuka, u shfaq mbrëmjen e sotme në Teatrin Kombëtar.

Artdashësit kryeqytetas mirëpritën performancën e shkëlqyer të aktorëve, në këtë vepër rrëqethëse që trajton dashurinë e pamundur dhe humbjen personale.

Në dramë luajnë aktorë të njohur të skenës shqiptare, përfshirë: Olta Daku, Alfred Trebicka, Igli Zarka, Neritan Liçaj, Anila Bisha, Donald Shehu, Niada Saliasi dhe Florian Agalliu.

Me një ndjeshmëri të thellë psikologjike, drama portretizon një grua të ndarë mes pasionit të njëanshëm dhe realitetit të hidhur të vetmisë.

Ester, gruaja e një gjyqtari të respektuar, braktis gjithçka për dashurinë e një piloti të ri. Por pasioni shndërrohet në dëshpërim dhe e përplas me realitetin e jetës, dashurisë dhe vetvetes.

Pas suksesit të shfaqjeve më 28, 29 dhe 30 nëntor, “Det i thellë blu” do të vijojë deri më 7 dhjetor.

Kjo vepër mbetet një nga dramat më të fuqishme të Terence Rattigan, duke ofruar një udhëtim emocional në thellësitë e shpirtit njerëzor. /A.Z/UBT News/

Kulturë

Edicioni i ri i ‘Hijeve të Bardha’ sjell magjinë e artit në Galerinë Qahili

Published

3 hours ago

December 4, 2025

UBT News

Festa tradicionale e artistëve, ekspozita “Hijet e Bardha”, hapet më 15 dhjetor, nga ora 19:00 në Galerinë Qahili.

Edicioni i sivjetshëm prezanton punën dhe koleksionin personal të artistit Joseph Jeremiah Langley, një krijues amerikano-francez që i ka kushtuar jetën artit dhe edukimit artistik.

Ekspozita mban titullin “Vizionet poetike të atij që nuk sheh”, e fokusohet në idenë e përjetimit të shumë jetëve brenda një njeriu të vetëm.

Ky edicion ofron një udhëtim vizual dhe emocional që pasqyron përvojat e shumta të artistit: nga vendlindja e tij në Karolinën e Veriut, tek vitet e kaluara në Francë, jeta në cirk dhe krijimtaria e tij multidisiplinare si një figurë nomade që bart artin kudo që shkon.

“Hijet e Bardha” është një ngjarje artistike e përvitshme e dedikuar fundvitit, që bashkon artistë, artdashës dhe publikun e gjerë.

Titulli shërben si metaforë për të përshkruar artin e pastër, të dëlirë dhe madhështor, një dukuri që ndryshon vazhdimisht, ashtu si hijet, të cilat megjithëse nuk mund të shihen kur janë “të bardha”, janë të pranishme, njësoj si sharmi i artit që vepron përtej së dukshmes.

Ekspozita do të jetë e hapur për vizitorët gjatë gjithë sezonit festiv dhe mund të shikohet deri më 15 janar 2026.

Ky aktivitet është pjesë e programit vjetor të Galerisë Qahili dhe mbahet me mbështetjen e Ministrisë së Kulturës, Rinisë dhe Sportit. /A.Z/UBT News/

Kulturë

Në Prishtinë nis sot “FRAGMENTA 2025, edicioni debutues për artistët e rinj

Published

20 hours ago

December 3, 2025

UBT News

Në kryeqytet hapet edicioni i parë i ekspozitës së Artistëve të Rinj “FRAGMENTA 2025”, pjesë e programit vjetor të Asociacionit të Artistëve Vizualë të Kosovës.

Ky është projekti i dytë i këtij viti dhe sjell në qendër të vëmendjes artin bashkëkohor, eksperimentimin dhe përdorimin e mediave të reja.

“Fragmenta” konceptohet si hapësirë ku fragmente idesh, formash e tregimesh ndërthuren për të krijuar një mozaik të ri kulturor.

Qëllimi kryesor është të nxisë bashkëpunimin mes artistëve të rinj, studiuesve dhe publikut, duke hapur horizonte të reja krijuese dhe duke promovuar dialog ndërdisiplinor.

Me pjesëmarrjen e krijuesve të rinj nga fusha të ndryshme, ky edicion synon të rimendojë rolin e artit e dizajnit në shoqërinë moderne, duke vënë në pah risinë, eksperimentimin e interpretimin e lirë artistik.

Në kuadër të aktivitetit do të akordohet edhe RAW Award (Rising Artists Work), çmim që vlerëson artistët që formësojnë gjuhën e re të artit bashkëkohor dhe kontribuojnë në zhvillimin e skenës vizuale.

Lokacionet dhe oraret e hapjes së ekspozitave:

Tunelli i Kurrizit – ora 17:00

Observatoriumi – ora 18:30

Biblioteka “Hivzi Sylejmani” – ora 19:30

Ekspozita vazhdon më 5 dhjetor, në Hamam, nga ora 19:00.

Ceremonia e ndarjes së RAW Award do të mbahet të shtunën, më 6 dhjetor, në orën 19:00.

“Fragmenta 2025” synon të kthehet në një pikëtakim të rëndësishëm për skenën e artit të ri në Kosovë, duke ofruar një platformë të hapur për vizion, inovacion dhe talent të ri. /A.Z/UBT News/

Kulturë

Abu Dhabi hap muzeun më të madh të historisë natyrore në Lindjen e Mesme

Published

1 day ago

December 3, 2025

UBT News

Muzeu i Historisë Natyrore në Abu Dhabi po hap dyert për publikun, duke ofruar një udhëtim nga krijimi i planetit deri te zhvillimi i jetës në Tokë.

Me 35,000 m² hapësirë ekspozuese, ai mbulon po ashtu 13.8 miliardë vjet shkencë, evolucion dhe zbulime, duke e bërë muzeun më të madh të këtij lloji në rajon.

Një nga atraksionet kryesore është “Stan”, fosili 66 milionë vjeçar i një dinosauri, i prezantuar për herë të parë në një skenar beteje me një tjetër dinosaur.

Vizitorët mund të shohin gjithashtu meteoritet Murchison, një nga shkëmbinjtë më primitivë kozmikë, dhe ekspozita mbi historinë natyrore të Gadishullit Arabik, arkeologjinë dhe trashëgiminë kulturore.

Mes 1,500 objekteve të ekspozuara spikasin një rikrijim i një anijeje tregtare nga Epoka e Bronzit dhe “Perla e Abu Dhabit”, perla më e vjetër në botë, e datuar 5800–5600 p.e.s.

Ky muze përfaqëson një destinacion të ri botëror për dashamirët e shkencës, historisë dhe natyrës. /A.Z/UBT News/