Në Shqipëri do të protestohet më 17 tetor me kërkesën për drejtësi për ish-eprorët e Ushtrisë Çlirimtare të Kosovës (UÇK).

Protesta do të mbahet në sheshin “Skënderbeu”, u bë e ditur në një konferencë për media të Organizatës së Veteranëve të Luftës së Ushtrisë Çlirimtare të Kosovës.

Kryetari i OVL-UÇK-së, Hysni Gucati nga Tirana tha se kjo protestë vjen pas asaj të mbajtur në Prishtinë dhe tjetrës në Hagë – qyteti holandez ku e ka selinë Gjykata Speciale.

“Sot nga kjo tryezë ju drejtohemi të gjithë shqiptarëve, partive politike bashkoheni me ne në këtë protestë paqësore në Tiranë. Le të ngrihemi të gjithë si një vend i vetëm që të ju kundërvihemi padrejtësive”, deklaroi ai. /D.B/KP

Skuadra e Superligës së Kosovës në futboll, Gjilani, ka bërë të ditur se ka ndarë rrugët me trajnerin Ardian Nuhiu.

“Sport Club Gjilani njofton opinionin publik, tifozët dhe mediat se pas një bashkëpunimi korrekt dhe profesional, në mënyrë të dyanshme është mbyllur bashkëpunimin me kryetrajnerin Ardian Nuhiu. Klubi e falënderon trajnerin Nuhiu për punën, përkushtimin dhe kontributin e dhënë gjatë periudhës që ishte pjesë e Sport Club Gjilani. Puna dhe profesionalizmi i tij do të mbeten gjithmonë të vlerësuara nga të gjithë ne. Sport Club Gjilani i uron trajnerit Nuhiut shumë suksese në rrugëtimin e tij të ardhshëm profesional”, thuhet në njoftimin e klubit gjilanas.

Klubi ka bërë të ditur se do të njoftojë së shpejti opinionin publik për hapat e mëtejmë në lidhje me stafin teknik dhe drejtimin e skuadrës./S.K/KP/

Prokuroria Themelore në Prizren ka ngritur aktakuzë kundër të pandehurit E.B, i cili gjendet nën masën e paraburgimit nga muaji gusht për shkak të dyshimit se i njëjti ka kryer veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”.

Sipas aktakuzës, me datë 10 gusht të këtij viti, rreth orës 20:30, në lagjen “Tusus”, në rrugën “Lapidari” në Prizren, i pandehuri “me dashje dhe në mënyrë dinake duke shfrytëzuar besimin e viktimës H.Sh, të njëjtin e privon nga jeta”.

Sipas Prokurorisë, ngjarja ka ndodhur pas organizimit të një përleshjeje mes qenve, ku pas përfundimit të saj, viktima ishte duke u larguar nga vendi i ngjarjes.

“I pandehuri e ka ndjekur atë dhe më pas, duke përdorur një mjet të mprehtë – thikë, e ka sulmuar papritur viktimën duke e goditur tri herë në pjesë të ndryshme të trupit”, sipas Prokurorisë.

Ekspertiza mjeko-ligjore e autopsisë e datës 22 shtator, tha se lëndimet kanë shkaktuar gjakderdhje të brendshme të rëndë në regjionin e majtë të kraharorit, e cila ka rezultuar me vdekjen e viktimës.

Ndër të tjera, Prokuroria tha se “Keqtrajtimi i kafshëve dhe ndotja e ushqimit dhe e ujit të shtazëve” është duke u trajtuar nga Departamenti i Përgjithshëm, në kuadër të procedurave hetimore përkatëse, ndaj dy të dyshuarve tjerë, të cilët kanë organizuar përleshjen me qen.

Prokurori i çështjes i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i për veprat penale për të cilat akuzohet të shpallet fajtor dhe të dënohet sipas ligjit./D.B/KP

Jose Mourinho kthehet këtë javë në Stamford Bridge, tashmë në krye të Benficës, për sfidën e Ligës së Kampionëve kundër Chelseat, në një moment kur trajneri i londinezëve, Enzo Maresca, ndodhet nën presion të madh.

Benfica vjen në Londër pas një fitoreje 2-1 në kampionat, ndërsa për Mourinhon kjo është një rikthim i veçantë në stadiumin ku ndërtoi legjendën e tij si “i veçanti”.

Atmosfera rreth Chelseat është e turbullt, me vetëm një fitore në pesë ndeshjet e fundit, një sukses minimal ndaj Lincoln City nga League One, ndërkohë që humbjet nga Bayern Munich, Manchester United dhe Brighton kanë lënë gjurmë të thella.

Disfata ndaj Brighton ka rritur debatet për të ardhmen e Maresca-s, edhe pse drejtuesit e klubit londinez e mbështesin për momentin dhe pritet ta gjykojnë në fund të sezonit. Megjithatë, vetë trajneri italian nuk është i kënaqur, pasi prej verës ka kërkuar përforcime në dy pozita kyçe, portier dhe qendërmbrojtës, që tashmë janë shfaqur si pikat më të dobëta të skuadrës.

Chelsea e sheh kualifikimin në Ligën e Kampionëve për sezonin e ardhshëm si objektiv të panegociueshëm, ndërsa në janar priten lëvizje serioze në merkato. Megjithatë, një humbje në shtëpi nga Benfica e Mourinhos do të ishte shumë e dhimbshme për tifozët e “Bluve” dhe mund të thellonte më tej krizën.

Mourinho, i njohur për aftësinë e tij për të sfiduar pritshmëritë dhe për të provuar skeptikët si të gabuar, synon t’i kujtojë Chelseat fuqitë e tij, ndërsa Maresca kërkon mbi të gjitha besimin se projekti i tij mund të funksionojë./S.K/KP/