Pas disa muajsh qëndrimi në burgjet e Serbisë, sot është liruar dhe është kthyer në Kosovë ish-ushtari i Ushtrisë Çlirimtare të Kosovës, Mit’hat Llozhani. Lajmin e ka bërë të ditur avokati i tij, Arianit Koci, i cili e ka shoqëruar Llozhanin sapo ai ka kaluar kufirin.

Avokati Koci e ka cilësuar këtë si një mision të vështirë dhe të rëndë, duke treguar se i është dashur të udhëtojë disa herë drejt Beogradit për të ndjekur rastin. “A kam pasë probleme dhe rrezik? Nuk është me rëndësi. Me rëndësi është që një qytetar i Kosovës u kthye në shtëpi,” ka deklaruar Koci, duke shtuar se këtë shërbim e ka kryer pa pagesë dhe për ideale kombëtare.

Sipas Kocit, Llozhani ka kaluar nëpër një periudhë jo të lehtë gjatë kohës së burgosjes.

Ai ka paralajmëruar se informata më të detajuara rreth rrethanave të arrestimit dhe mbajtjes në Serbi do të jepen në ditët në vijim, së bashku me vetë Mit’hat Llozhanit.

Një ngjarje e rëndë është raportuar mbrëmë në Gjakovë, ku një burrë është gjetur i shtrirë pa shenja jete në pushimoren e shkallëve të një ndërtese banimi.

Ekipi mjekësor që ka dalë në vendngjarje ka konstatuar vdekjen e tij. Me vendim të prokurorit, trupi i pajetë është dërguar në Institutin e Mjekësisë Ligjore (IML) për obduksion, me qëllim zbardhjen e shkaqeve të vdekjes.

Policia e Kosovës e ka cilësuar rastin si “hetim i vdekjes” dhe është duke punuar për sqarimin e plotë të rrethanave të ngjarjes.

Amir Rrahmani do të vazhdojë të mbetet shtylla e mbrojtjes së Napolit edhe për shumë vite të tjera. Mbrojtësi i Kombëtares së Kosovës, i cili është pjesë e gjigantit italian që nga viti 2020, ka arritur marrëveshjen për vazhdimin e kontratës deri në vitin 2029.

Lajmi është bërë i ditur nga gazetari i njohur italian, Nicolo Schira, i cili konfirmon se marrëveshja mes palëve tashmë është nënshkruar. Me kontratën e re, mbrojtësi dardan ka përfituar edhe një rritje të ndjeshme të pagës, duke kaluar nga 2.5 milionë euro në 3.8 milionë euro në sezon.

Ky rinovim konfirmon rëndësinë e madhe që Rrahmani ka në planet e klubit napolitan, duke u rreshtuar ndër lojtarët më të vlerësuar dhe më të paguar të skuadrës.

Tre persona janë arrestuar në Mitrovicën e Jugut pas një mosmarrëveshjeje që ka përfunduar në përleshje fizike mes tyre. Incidenti, i cili është cilësuar si sulm dhe lëndim i rëndë trupor, ka çuar në ndërhyrjen e menjëhershme të policisë.

Pas konsultimit me prokurorin, policia ka kryer një bastisje në shtëpinë e njërit prej të dyshuarve, ku janë gjetur dhe konfiskuar një shufër metalike, një fishek dhe një qese me substancë narkotike (2.9 gram).

Me vendim të prokurorit, të tre të dyshuarit janë dërguar në mbajtje për procedime të mëtejshme, ndërsa ndaj tyre rëndojnë akuzat për lëndim trupor dhe armëmbajtje pa leje.