Lajmet

Nga politikanët deri tek yjet televizive e sportive – Të famshmit që thyen rregullat antiCOVID

Tenisti Novak Djokovic është personazhi më i fundit i famshëm që ka rënë në kundërshtim me rregullat e Covid.

Published

on

Nga ylli i realitetit televiziv Kim Kardashian tek familja mbretërore holandeze dhe tani së fundi ylli i tenisit Novak Djokovic, një mori politikanësh dhe të famshëm kanë qenë pre e kritikave për shkak të mospërfilljes së rregullave që parandalojnë përhapjen e Covid-19.

Presidenti i Afrikës së Jugut, Cyril Ramaphosa, theu rregullat e distancës sociale për të pozuar për një fotografi me dy gra në maj të vitit 2020.

Ai e konsideroi joserioze situatën, duke thënë me shaka, “Ejani para se të na arrestojnë”. Ndonëse ai nuk u arrestua, kjo video e tij u bë virale në rrjete sociale dhe shkaktoi zemërim tek popullsia.

Zëvendësministri i Shëndetësisë i Paraguajit, Juan Carlos Portillo dha dorëheqjen pasi u filmua në një festë në qershor të vitit 2020, pikërisht pasi kishte ndihmuar në vendosjen e kufizimeve të reja.

Këshilltari kryesor i kryeministrit britanik Boris Johnson, Dominic Cummings, shkaktoi bujë në Britani pasi shkeli rregullat e karantinës në maj të vitit 2020 për të udhëtuar përgjatë Anglisë në mënyrë që të kalojë kohë me prindërit e tij.

Ai më vonë tha se bëri një udhëtim tjetër për të “kontrolluar shikimin e tij” përpara se të detyrohej përfundimisht të tërhiqej. Cummings ishte i pari nga një varg i gjatë skandalesh të lidhura me Covid-in që tronditën qeverinë e Johnson.

Ministri britanik i Shëndetësisë, Matt Hancock, dha dorëheqjen për thyerjen e rregullave të Covid-it që kishte vendosur vetë pasi u kap në flagrancë nga paparacët me dashnoren e tij në qershor të vitit 2020.

Familjes mbretërore holandeze iu desh të kërkonte falje muajin e kaluar kur ftuan 21 persona për të festuar ditëlindjen e 18-të të mbretëreshës së ardhshme, Princeshës Amalia.

Kjo ishte një nga një varg kërkim faljesh të bëra, me mbretin Willem-Alexander i cili theu vazhdimisht rregullat e distancimit shoqëror duke shtrënguar duart dhe familja duke shkuar në pushime në Greqi gjatë një bllokimi të pjesshëm, transmeton UBT News.

Themeluesja e SKIMS, Kim Kardashian shkaktoi zemërim në tetor të vitit 2020 duke organizuar një festë në një ishull privat për të festuar ditëlindjen e saj të 40-të, me foto ku të ftuarit shiheshin pa maska.

Kryeministri polak Mateusz Morawiecki kërkoi falje në maj të vitit 2020 pasi pozoi për fotografi zyrtare me stafin në një restorant, kur këshilla e tij për të tjerët ishte të darkonin vetëm me familjen e ngushtë.

Komisioneri evropian i tregtisë, Phil Hogan, u detyrua të jepte dorëheqje në gusht të vitit 2020 së bashku me dy politikanë të lartë irlandezë pasi morën pjesë në një darkë me 80 persona, kur vetëm gjashtë persona lejoheshin të takoheshin në ambiente të mbyllura.

Kreu i bordit të turizmit të vendit, Catherine Martin, u detyrua gjithashtu të largohej pasi shkoi për pushime në Itali, kur njerëzve u thuhej të pushonin në shtëpi.

Guvernatori i Kalifornisë, Gavin Newsom, u detyrua të pranonte se bëri një “gabim të keq” në nëntor të vitit 2020 duke marrë pjesë në darkën e ditëlindjes së një miku gjatë një rritje të rasteve.

Një përplasje e shumëpritur midis gjigantëve të futbollit të Amerikës së Jugut, Brazilit dhe Argjentinës, duhej të ndërpritej në shtator pas pesë minutash pasiqë zyrtarët pretendonin se katër lojtarë argjentinas me bazë në Angli u kishin dhënë atyre informacione të rreme për të shmangur rregullat e Covid.

Tenisti Novak Djokovic është personazhi më i fundit i famshëm që ka rënë në kundërshtim me rregullat e Covid, ndonëse ky i fundit fajësoi agjentin e tij për një deklaratë të pasaktë në lidhje me udhëtimin e tij para fluturimit për në Australi, ai është parë edhe më herët duke thyer rregullat antiCOVID./UBTNews/

Lajmet

QKUK përfundon verifikimin e pronësisë, paralajmëron rrënimin e objekteve pa leje në oborr

Published

on

By

Qendra Klinike Universitare e Kosovës (QKUK) ka përfunduar verifikimin e pronësisë së oborrit të saj dhe ka paralajmëruar se së shpejti do të nisë lirimin e hapësirave të uzurpuara prej shumë vitesh, duke rrënuar objektet e ndërtuara pa leje.

Ky hap vjen pas punës së një komisioni të posaçëm të formuar në mars të këtij viti, i cili në bashkëpunim me Drejtorinë e Kadastrit të Komunës së Prishtinës, përmes ortofotove dhe planeve kadastrale, ka vërtetuar gjendjen pronësore. “Sipas të dhënave kadastrale, brenda oborrit të QKUK-së nuk figuron asnjë pronë private”, thuhet në njoftimin zyrtar të këtij institucioni.

Para marrjes së vendimit për ndërhyrje, institucioni u ka dërguar dy njoftime zyrtare shfrytëzuesve të lokaleve afariste dhe kioskave që veprojnë brenda këtij perimetri, duke kërkuar dëshmi mbi bazën ligjore të shfrytëzimit të hapësirave.

Megjithatë, nga QKUK-ja bëhet e ditur se asnjëri prej shfrytëzuesve nuk ka paraqitur certifikatë pronësie apo dëshmi se objekti është në proces legalizimi, ndërsa dokumentet e dorëzuara kanë rezultuar të jenë kontrata të skaduara dhe aktvendime të paregjistruara në kadastër.

Procesi i lirimit të këtyre hapësirave ka marrë mbështetje edhe në terren nga Inspektorati i Ministrisë së Mjedisit, Planifikimit Hapësinor dhe Infrastrukturës (MMPHI), i cili gjatë inspektimeve të ditëve të fundit i ka vërtetuar të njëjtat gjetje.

“Me konfirmimet kadastrale dhe rekomandimet zyrtare si nga Inspektorati Komunal, ashtu edhe nga ai i MMPHI-së, menaxhmenti i QKUK-së tashmë ka në dorë të gjitha instrumentet ligjore dhe do t’i përdorë për t’ua kthyer pacientëve e qytetarëve pronën publike”, ka theksuar ky institucion. /E.A/

Continue Reading

Lajmet

KEDS: Rikthehet energjia elektrike për rreth 80 për qind të konsumatorëve të prekur nga erërat e forta

Published

on

By

Kompania Kosovare për Distribuim me Energji Elektrike (KEDS) ka njoftuar se, përkundër erërave të fuqishme që shkaktuan dëmtime në rrjetin shpërndarës, furnizimi me energji elektrike është normalizuar për rreth 80 për qind të konsumatorëve të prekur brenda tri orëve të para pas qetësimit të motit.

Ndër zonat më të prekura nga moti i ligë kanë qenë Prishtina, Gjakova, Dragashi, Prizreni, Suhareka, Kamenica, Gjilani, Kaçaniku, Lipjani, Shtimja, Drenasi, Obiliqi, Fushë Kosova, Podujeva dhe Ferizaj.

Sipas KEDS-it, paralelisht me rikthimin e energjisë për shumicën e konsumatorëve, janë lokalizuar defektet në shtylla dhe përçues në pothuajse të gjitha pikat e rrjetit ku janë evidentuar dëmtime.

Ekipet në terren po vazhdojnë punën intensive për sanimin e plotë të problemeve dhe rikthimin e rregullt të furnizimit për të gjithë konsumatorët./E.A/

Continue Reading

Lajmet

Nga 18 vjet burgim për Ilir dhe Rrahim Abdullahun për vrasjen e policit Triumf Riza

Published

on

By

Gjykata Themelore në Prishtinë ka shpallur të premten aktgjykimin dënues ndaj Ilir dhe Rrahim Abdullahut, duke i dënuar me nga 18 vjet burgim secilin për vrasjen e zyrtarit policor, Triumf Riza. Kryetari i trupit gjykues, Avni Syla, bëri të ditur se gjykata i shpalli të akuzuarit fajtorë për kryerjen në bashkëkryerje të veprës penale “Vrasje e rëndë”, bazuar në aktakuzën e Prokurorisë Speciale.

Sipas vendimit të gjykatës, Ilir Abdullahut i është vazhduar masa e paraburgimit deri në plotfuqishmërinë e aktgjykimit, ndërsa e njëjta masë e paraburgimit i është caktuar edhe Rrahim Abdullahut. Gjatë seancës së shpalljes së vendimit, në sallë ishte i pranishëm vetëm i akuzuari Ilir Abdullahu i shoqëruar nga avokati i tij, Ramë Dreshaj, ndërsa Rrahim Abdullahu mungoi dhe u përfaqësua nga avokatja Agnesa Salihu. Në seancë mungoi po ashtu edhe prokurorja e rastit, Arbëresha Shala.

Zyrtari policor Triumf Riza u vra më 30 gusht të vitit 2007 në lagjen “Dardania” në Prishtinë. /Ekonomia Online/

Continue Reading

Lajmet

AKB: Nga 7.16 miliardë euro remitanca në pesë vjet e gjysmë

Published

on

By

Aleanca Kosovare e Bizneseve (AKB) ka shprehur shqetësimin për mënyrën se si po shfrytëzohet kapitali i diasporës në vend, duke vlerësuar se dërgesat e mërgimtarëve po mbeten kryesisht të orientuara drejt shpenzimeve të përditshme dhe sektorit të ndërtimit, në vend se të kanalizohen në zhvillimin e industrisë dhe prodhimit vendor.

Sipas një vlerësimi të kësaj organizate, gjatë periudhës nga viti 2021 deri në qershor të vitit 2026, Kosova ka pranuar gjithsej rreth 7.16 miliardë euro remitanca, prej të cilave rreth 80 për qind ose afro 5.73 miliardë euro janë shpenzuar në konsum, patundshmëri dhe ndërtim. Ndërkohë, vetëm 2 për qind e këtij kapitali, që përkthehet në rreth 143 milionë euro, është investuar në biznes, industri dhe prodhim, kurse 18 për qind e mbetur ka shkuar në destinime të tjera.

Të dhënat e prezantuara nga AKB-ja tregojnë një trend të vazhdueshëm të rritjes së dërgesave të diasporës ndër vite, duke filluar nga 1.15 miliardë euro në vitin 2021, 1.22 miliardë euro në vitin 2022, 1.33 miliardë euro në vitin 2023 dhe 1.35 miliardë euro në vitin 2024.

Kjo rritje ka vazhduar edhe në vitin 2025, kur remitancat arritën në 1.4 miliardë euro, ndërsa vetëm në gjashtëmujorin e parë të vitit 2026 në vend kanë hyrë rreth 690.7 milionë euro. Pavarësisht këtij potenciali të lartë financiar, AKB-ja vlerëson se këto mjete nuk po arrijnë të shndërrohen në motor të zhvillimit ekonomik përmes hapjes së fabrikave të reja apo rritjes së eksporteve.

Për ta ndryshuar këtë gjendje, AKB-ja i ka bërë thirrje Qeverisë së Kosovës që të hartojë një strategji të posaçme për orientimin e kapitalit të mërgatës drejt sektorëve prodhues, teknologjisë dhe eksportit.

Kryetari i kësaj organizate, Agim Shahini, ka kërkuar nga institucionet që të krijojnë një klimë më të favorshme investuese përmes garantimit të sigurisë juridike, ofrimit të lehtësirave fiskale dhe zbatimit të politikave konkrete mbështetëse, duke theksuar se vendi ka nevojë për investime që gjenerojnë fabrika dhe vende të reja pune, e jo vetëm mjete për konsum. /E.A/

 

 

 

Continue Reading

Të kërkuara